Јеһова Аллаһ Јер күрәсини инсан үчүн јарадыб. Бура бизим евимиздир. Илк инсанлар Адәм вә Һәвва ҝөјдә јашамаг үчүн јаранмамышдылар. Ҝөјдә јашамаг үчүн Аллаһ мәләкләри јаратмышды (Әјјуб 38:4, 7). Јеһова Аллаһ илк инсаны Әдән бағы адланан ҝөзәл ҹәннәтдә јерләшдирди (Јарадылыш 2:15—17). Аллаһ она вә онун ҝәләҹәк өвладларына јер үзүндә әбәди јашамаг имканы вермишди. Зәбур 37:29; 115:16 ајәләрини охујун.

Башланғыҹда јалныз Әдән бағы ҹәннәт иди. Илк инсан ҹүтү төрәјиб бүтүн дүнјаја саһиб олмалы вә ону ҹәннәтә чевирмәли иди (Јарадылыш 1:28). Аллаһ бујурур ки, Јер күрәси һеч вахт мәһв олмајаҹаг, о, әбәдијјән бәшәријјәтин еви олараг галаҹаг. Зәбур 104:5 ајәсини охујун.

Адәмлә Һәвва Аллаһын сөзүндән чыхдылар, буна ҝөрә дә Јеһова Аллаһ онлары ҹәннәт бағындан говду. Ҹәннәт итирилди! Һеч бир инсан ону бәрпа етмәјә гадир дејил. Мүгәддәс Китаб ачыглајыр ки, о вахтдан бәри «дүнја шәрин ихтијарына верилиб» (Әјјуб 9:24). Јарадылыш 3:23, 24 ајәләрини охујун.

Лакин Јараданымыз Јеһова һәр шејә гадирдир. О, бәшәријјәтлә бағлы илк нијјәтиндән дөнмәјиб (Әшија 45:18). Аллаһ бәшәријјәти әзәлдән нијјәт етдији дурума гајтараҹаг. Зәбур 37:11 ајәсини охујун.

Аллаһын тәјин етдији падшаһын, Иса Мәсиһин һакимијјәти дөврүндә ҹәннәт јер үзүндә бәрпа едиләҹәк. Армаҝеддон адланан дөјүшдә Мәсиһ өз башчылығы алтында олан мәләкләрлә  бирҝә Аллаһа бојун әјмәјәнләрин һамысыны мәһв едәҹәк. Сонра Иса Мәсиһ Шејтаны тутуб мин иллијә буховлајаҹаг. Аллаһын халгы исә сағ галаҹаг, чүнки Иса Мәсиһ онлары һифз едиб ниҹат јолуна јөнәлдәҹәк. Онлар Ҹәннәтдә әбәди јашајаҹаглар. Вәһј 20:1—3; 21:3, 4 ајәләрини охујун.

Бәс Аллаһ пислији нә вахт јох едәҹәк? Иса пејғәмбәр сонун јахын олдуғуна ишарә едән әламәт вермишди. Бу ҝүн дүнјада ҹөвлан едән һадисәләр бәшәријјәти учурума сүрүкләјир. Бурадан мәлум олур ки, биз дөврүн јекунунда јашајырыг. Мәтта 24:3, 7—14, 21, 22 ајәләрини охујун.

Иса Мәсиһ миниллик һакимијјәти әрзиндә, ҝөјдән јери идарә едән заман әзаб-әзијјәтә сон гојаҹаг (Әшија 9:6, 7; 11:9). Һәмчинин о, Аллаһы севән инсанларын ҝүнаһларыны силәҹәк. Хәстәлик, гоҹалыг, өлүм дүнјадан ҝөтүрүләҹәк. Беләҹә, Иса Мәсиһ Аллаһын әзәли нијјәтини һәјата кечирәҹәк. Әшија 25:8; 33:24 ајәләрини охујун.

Ҹәннәтдә Аллаһа табе олан инсанлар јашајаҹаг (1 Јәһја 2:17). Иса пејғәмбәр өз давамчыларына тапшырыб ки, һәлим инсанлары ахтарыб тапсынлар вә онлара Аллаһын јолу илә ҝетмәји өјрәтсинләр. Бу ҝүн Јеһова Аллаһ милјонларла инсаны Ҹәннәтдә јашамаг үчүн һазырлајыр (Сәфәнја 2:3). Јеһованын Шаһидләринин јығынҹагларында инсанлар јахшы әр, јахшы арвад, јахшы ата-ана олмағы өјрәнирләр. Ушагларла валидејнләр Аллаһа ибадәт едир вә Онун кәламындан бәһрәләнирләр. Микә 4:1—4 ајәләрини охујун.