Бүтүн динләрин нүмајәндәләри арасында јахшы адамлар вар. Аллаһ белә сәмими инсанлары ҝөрүр вә онлары нәзәриндә сахлајыр. Амма етираф етмәлијик ки, дин пәрдәси алтында чохлу пис ишләр ҝөрүлүр (2 Коринфлиләрә 4:3, 4; 11:13—15). Бу ҝүн хәбәрләрдә бәзи динләрин ушагбазлыгда, сојгырымларда, мүһарибә вә террорчулугда әли олдуғуну ешитмәк олар. Бүтүн бунлар сидги-үрәкдән Аллаһа инанан инсанларда икраһ ојадыр. Мәтта 24:3—5, 11, 12 ајәләрини охујун.

Аллаһа мәгбул дин Аллаһы уҹалдыр, јалан дин исә Онун адына ләкә ҝәтирир. Јалан динләр Мүгәддәс Китабда олмајан тәлимләри өјрәдир, Аллаһ барәдә, өлүләр барәдә вә диҝәр мөвзуларда әфсанәләр ујдурур. Јеһова Аллаһ исә истәјир ки, инсанлар Ону олдуғу кими танысынлар. Ваиз 9:5, 10; 1 Тимутијә 2:3—5 ајәләрини охујун.

Аллаһы алдатмаг мүмкүн дејил. Аллаһ дилдә Она гуллуг етдијини дејиб, әслиндә, Шејтан дүнјасындан икиәлли јапышан динләри јахшы таныјыр (Јагуб 4:4). Аллаһын Кәламында үмумиликдә јалан дин «Бөјүк Бабил» адланыр. Бабил гәдимдә шәһәр олуб. Нуһ әјјамындакы дашгындан сонра мәһз бурада јалан дин мејдана чыхыб. Тезликлә Аллаһ инсанлары аздыран вә онлары буховда сахлајан динләри мәһв едәҹәк. Вәһј 17:1, 2, 5, 16, 17; 18:8 ајәләрини охујун.

Амма Јеһова Аллаһ јалан динләрин ичиндә олан сәмими инсанлары унутмајыб. О, белә инсанлары Өз јолуна јөнәлтмәклә бир јерә топлајыр. Микә 4:2, 5 ајәләрини охујун.

Јеһова Аллаһ һагг јолуну севән, јахшылыға ҹан атан инсанларын хилас олмасыны истәјир. О, онлары јалан диндән чыхмаға чағырыр. Аллаһы ҝерчәкдән севән инсан Аллаһы разы салмаг үчүн һәјатында дәјишиклик етмәјә һазырдыр. Вәһј 18:4 ајәсини охујун.

Ерамызын биринҹи јүзиллијиндә тәвазөкар инсанлар Иса пејғәмбәрин ардыҹылларындан хош хәбәри ешидәндә ону севинҹлә гәбул едирдиләр. Јеһова Аллаһ бу инсанлара јени һәјат јолуну — хошбәхт, мәналы, үмиддолу һәјат јолуну өјрәдирди. Онлар хош хәбәри ешитдикдән сонра Јеһова Аллаһы һәјатда һәр шејдән үстүн тутмаға башладылар. Бу инсанлар бизә ҝөзәл өрнәкдир. 1 Салоникилиләрә 1:8, 9; 2:13 ајәләрини охујун.

Јеһова Аллаһ јалан дини тәрк едән инсанлары Она ибадәт едәнләрин ҹәрҝәсинә дәвәт едир. Әҝәр Јеһованын бу хош дәвәтини гәбул етсәниз, Онун достлуғуну газанаҹаг вә Она ибадәт едәнләрдән ибарәт јени, меһрибан бир аиләнин үзвү олаҹагсыныз. Ҝәләҹәкдә исә әбәди Ҹәннәт һәјатына говушаҹагсыныз. Марк 10:29, 30; 2 Коринфлиләрә 6:17, 18 ајәләрини охујун.

Аллаһ тезликлә јалан динләрә кәсдији һөкмү иҹра едәҹәк. Инсанлар бу динләрин әсарәтиндән јаха гуртараҹаг. Даһа һеч вахт јалан дин инсанлары алдатмајаҹаг вә араја тәфригә салмајаҹаг. Бүтүн дүнјада тәк бир дин олаҹаг, бүтүн хилгәт ваһид Јарадана сәҹдә едәҹәк. Бундан да ҝөзәл хәбәр ола биләрми? Вәһј 18:20, 21; 21:3, 4 ајәләрини охујун.