Ҝеҹәјарысы Јеһованын мәләји Јусифә ҝөрүнүб дејир: «Дур, ушағы вә анасыны ҝөтүр, Мисирә гач. Мән сәнә демәјинҹә орадан чыхма. Чүнки Һирод ушағы тапыб өлдүрмәк истәјир» (Мәтта 2:13). Јусиф дәрһал Мәрјәми ојадыб бу тәҹили хәбәри она чатдырыр.

Онлар бир ан белә јубанмадан ҝеҹәјарысы өлкәдән гачырлар. Бу лап вахтында олур, чүнки Һирод мүнәҹҹимләрин ону алдатдығыны өјрәнир. Һирод онлара Исаны тапанда ҝәлиб јерини она хәбәр вермәләрини тапшырмышды. Мүнәҹҹимләр исә падшаһа һеч нә демәдән өлкәдән чыхыб ҝетмишдиләр. Падшаһ бәрк гәзәбләнир вә Исаны өлдүрмәкдән өтрү Бејтләһм вә онун әтрафында ики јаша гәдәрки бүтүн оғлан ушагларыны өлдүрмәји әмр едир. Бу јаш һәддини о, шәргдән ҝәлмиш мүнәҹҹимләрдән алдығы мәлумата әсасән тәхмин едир.

Көрпә ушагларын гәтлә јетирилмәси дәһшәтли бир шејдир! Дүздүр, нә гәдәр ушағын өлдүрүлдүјү бизә мәлум дејил, амма бир ону дејә биләрик ки, бунунла Әрәмја пејғәмбәрин аналарын ағлашмасы вә бөјүк шивән гопармасы илә бағлы дедији пејғәмбәрлик јеринә јетир (Әрәмја 31:15).

Бу арада Јусиф аиләси илә Мисирә ҝәлиб чатыр вә орада мәскунлашыр. Ҝүнләрин бир ҝүнү ҝеҹә Јеһованын мәләји јенә Јусифә јухуда ҝөрүнүр. Инди исә о, белә дејир: «Дур, ушағы вә анасыны ҝөтүр, Исраил торпағына ҝет, чүнки ушағын ҹанына гәсд етмәк истәјәнләр өлдүләр» (Мәтта 2:20). Беләҹә, Јусиф гәрара ҝәлир ки, аиләсини ҝөтүрүб вәтәнинә гајытсын. Бунунла да башга бир пејғәмбәрлик — Аллаһын Өз оғлуну Мисирдән чағыраҹағы һаггындакы пејғәмбәрлик јеринә јетир (Һушә 11:1).

Јусиф Јәһудијјәдә, Бејтләһм шәһәринин јахынлығында, Мисирә гачмаздан әввәл јашадығы јерә гајытмаг истәјир. Амма ешидир ки, орада Һиродун  гәддар оғлу Архела падшаһлыг едир. Һәмчинин рөјада да Аллаһ ону тәһлүкә барәдә хәбәрдар едир. Она ҝөрә дә о, аиләси илә шимала, Ҹәлиләнин Насирә шәһәринә, јәһудиләрин дини фәалијјәтинин гајнашдығы јердән узаг бир јерә көчүр. Исанын бурада бөјүмәси илә даһа бир пејғәмбәрлик һәјата кечир: «Она нәсрани дејәҹәкләр» (Мәтта 2:23).