Јеһова — Аллаһын адыдыр вә «олмасына сәбәб олур» мәнасыны дашыјыр. Јеһова Күлли-Ихтијар Аллаһдыр вә һәр шејин јараданыдыр. О, һәр бир нијјәтини һәјата кечирмәјә гадирдир.

Гәдим ибрани дилиндә Аллаһын ады дөрд самитлә јазылыб, Азәрбајҹан дилиндә исә ЈҺВҺ самитләри илә верилир. Аллаһын ады Төвратын орижинал мәтниндә тәхминән 7000 дәфә јазылыб. Бүтүн дүнјада инсанлар Аллаһын адыны мүхтәлиф ҹүр тәләффүз едирләр, һәр кәс өз дилиндә неҹә гәбул олунубса, о ҹүр тәләффүз едир.

▸ Фәс. 1, абз. 15

Мүгәддәс Китабы инсанлар јазса да, о Аллаһын Китабыдыр. Неҹә ки мүдир фикирләрини катибәјә диктә едиб јаздырыр, еләҹә дә Аллаһ Өз мүгәддәс руһу васитәсилә Мүгәддәс Китабы јазан мүгәддәс бәндәләринә Өз фикирләрини чатдырмыш вә онлар бу фикирләри гәләмә алмышлар. Аллаһ Кәламындакы сөзләри мүхтәлиф јолларла, вәһјләр вә рөјалар васитәсилә чатдырыб.

▸ Фәс. 2, абз. 5

Принсип — инсана дүзҝүн гәрар вермәјә көмәк едән Мүгәддәс Китаб тәлимидир. Мәсәлән, «пис достлар јахшы әхлагы позур» принсипи ҝөстәрир ки, мүнасибәт сахладығымыз инсанлар бизә пис вә ја јахшы тәсир ҝөстәрир (1 Коринфлиләрә 15:33). «Инсан нә әкәрсә, ону да бичәҹәк» принсипиндән исә ҝөрүнүр ки, һәрәкәтләримизин нәтиҹәсиндән гача билмәрик (Галатијалылара 6:7).

▸ Фәс. 2, абз. 12

Илаһи вәһј, јахуд вәһјин әјан едилмәси пејғәмбәрлик адланыр. Пејғәмбәрлик илаһи нәсиһәт, әмр, һөкм, јахуд ҝәләҹәк һадисәләр барәдә мәлуматдан ибарәт олур. Аллаһ һәмчинин пејғәмбәрликләр васитәсилә Өз нијјәтини ачыр. Мүгәддәс Китабда јазылан пејғәмбәрликләрин әксәријјәти артыг јеринә јетиб.

▸ Фәс. 2, абз. 13

Мәсиһлә бағлы чохсајлы пејғәмбәрликләр Исанын үзәриндә јеринә јетиб. « Мәсиһ һаггында пејғәмбәрликләр» адлы чәрчивәјә бахын.

▸ Фәс. 2, абз. 17, һаш.

Јеһова Аллаһ Јер күрәсини јаратмышды ки, ора ҹәннәт олсун вә орада Ону севән инсанлар јашасын. Аллаһ бу нијјәтиндән дөнмәјиб. Тезликлә, О, јер үзүндән бүтүн писликләри јох едәҹәк вә Өз хидмәтчиләринә әбәди һәјат верәҹәк.

▸ Фәс. 3, абз. 1

Шејтан Аллаһа аси чыхан мәләкдир. Јеһова Аллаһа гаршы дурдуғу үчүн о, Шејтан (мәнасы «әлејһдар») адланыр. Аллаһа гара јахдығы вә инсанлары јолдан чыхартдығы үчүн она һәмчинин Иблис (мәнасы «шәрчи», «бөһтанчы») ады верилиб.

▸ Фәс. 3, абз. 4

Аллаһ-Таала мәләкләри инсандан чох-чох әввәл јарадыб. Онлар ҝөјдә јашамаг үчүн јараныблар. Мәләкләрин сајы јүз милјондан чохдур (Дәнјал 7:10). Һәр биринин ады вә өзүнәмәхсус хүсусијјәтләри вар. Садиг мәләкләр ситајиш гәбул етмир. Онлар мүхтәлиф дәрәҹәләрә мәнсуб олуб, мүхтәлиф вәзифәләри иҹра едирләр, мәсәлән, Јеһова Аллаһын һүзурунда хидмәт едир, Онун сөзүнү чатдырыр, јердәки гулларыны мүдафиә вә һидајәт едир, һөкмләрини јеринә јетирир, мүждәчилик ишини дәстәкләјирләр (Зәбур 34:7; Вәһј 14:6; 22:8, 9). Ҝәләҹәкдә мәләкләр Армаҝеддон дөјүшүндә Иса Мәсиһин тәрәфиндә вурушаҹаглар (Вәһј 16:14, 16; 19:14, 15).

▸ Фәс. 3, абз. 5; фәс. 10, абз. 1

Јеһова Аллаһын бәјәнмәдији вә Онун ирадәсинә зидд олан һиссләр, фикирләр вә һәрәкәтләр ҝүнаһ адланыр. Ҝүнаһ инсанын Аллаһла мүнасибәтләрини корладығы үчүн Аллаһ нәјин ҝүнаһ олдуғуну ачыглајан ганунлар вә принсипләр вериб. Онлара әмәл етмәклә ҝүнаһдан гача биләрик. Аллаһ башланғыҹда һәр шеји камил јаратмышды. Амма Адәмлә Һәвва Аллаһын сөзүндән чыхараг ҝүнаһ етдиләр вә буна ҝөрә дә артыг камил дејилдиләр. Онлар тәдриҹән гоҹалдылар вә өлдүләр. Ҝүнаһ улу валидејнимиз Адәмдән бизә кечдији үчүн биз дә гоҹалыб өлүрүк.

▸ Фәс. 3, абз. 7; фәс. 5, абз. 3

Аллаһын Шејтан дүнјасыны вә бүтүн писликләри мәһв едәҹәји мүһарибә Армаҝеддон адланыр.

▸ Фәс. 3, абз. 13; фәс. 8, абз. 18

Аллаһын Падшаһлығы Јеһова Аллаһын ҝөјдә гурдуғу һөкумәтдир. Иса Мәсиһ бу һөкумәтин падшаһыдыр. Ҝәләҹәкдә Аллаһ бу Падшаһлығын васитәсилә бүтүн писликләри арадан галдыраҹаг. Дүнјаны Аллаһын Падшаһлығы идарә едәҹәк.

▸ Фәс. 3, абз. 14

Аллаһ һәр шејдән әввәл Исаны јарадыб. Јеһова ону јер үзүнә ҝөндәрди ки, бүтүн инсанлар уғрунда ҹаныны фәда етсин. Иса өлдүрүләндән сонра Аллаһ ону дирилтди. Һал-һазырда Иса ҝөјдә Аллаһын Падшаһлығында падшаһ вәзифәсини јеринә јетирир.

▸ Фәс. 4, абз. 2

Мүгәддәс Китабда Мәсиһин нә вахт зүһур едәҹәји әввәлҹәдән хәбәр верилмишди. Бу һадисә 69 һәфтә адланан дөврүн тамамында баш вермәли иди. Бу дөвр б. е. ә. (бизим ерадан әввәл) 455-ҹи илдә башлады вә б. е. (бизим ера) 29-ҹу илиндә тамам олду.

Һарадан билирик ки, бу дөвр ерамызын 29-ҹу илиндә баша чатыб? 69 һәфтә б. е. ә. 455-ҹи илдә, Нәһәмја Јерусәлимә ҝәлиб ораны бәрпа етмәјә башлајанда башланды (Дәнјал 9:25; Нәһәмја 2:1, 5—8). «Һәфтә» сөзүнү ешидәндә, адәтән, инсанын ағлында 7 рәгәми ҹанланыр. Бу пејғәмбәрликдәки һәфтәләр билдијимиз једди ҝүндән ибарәт һәфтәләр дејил, једди илдән ибарәт һәфтәләрдир. Чүнки пејғәмбәрликләрдә ҝүнләр башга гајда илә һесабланыр, јәни «һәр ҝүн үчүн бир ил» һесабланыр (Сајлар 14:34; Һизгијал 4:6). Бу гајдаја әсасән, әҝәр һәфтәләрин һәр бири једди илдән ибарәтдирсә, демәли, 69 һәфтә 483 илә бәрабәрдир  (69 х 7 = 483). Б. е. ә. 455-ҹи илдән бу јана 483 ил һесабласаг, ҝәлиб ерамызын 29-ҹу илинә чыхырыг. Мәһз һәмин ил Иса вәфтиз олунараг Мәсиһ олду! (Лука 3:1, 2, 21, 22).

Мәсиһ һаггында дејилән пејғәмбәрликдә једди ил давам едән даһа бир һәфтә барәдә јазылыб. Бу һәфтә, јәни бу мүддәт әрзиндә Мәсиһ өлдүрүлмәли иди вә бу һадисә ерамызын 33-ҹү илиндә баш верди. Ерамызын 36-ҹы илинин әввәлиндә  Аллаһын Падшаһлығы һаггында мүждә јалныз јәһудиләрә дејил, бүтүн халглара да тәблиғ олунмалы иди (Дәнјал 9:24—27).

▸ Фәс. 4, абз. 7

Мүгәддәс Китаба әсасән, Јеһова Аллаһ Јарадандыр вә О, һәр шејдән әввәл Исаны јарадыб (Колослулара 1:15, 16). Иса Аллаһ дејил. О, һеч вахт өзүнү Аллаһа бәрабәр тутмајыб. Әксинә, о дејирди ки, «Ата мәндән үстүндүр» (Јәһја 14:28; 1 Коринфлиләрә 15:28). Лакин бәзи динләр Аллаһы Үч үгнум кими гәбул едир, јәни Онун үч шәхсдән — Ата, Оғул вә мүгәддәс руһдан ибарәт олдуғуну дүшүнүрләр. Мүгәддәс Китабда «Үч үгнум» сөзү јазылмајыб. Бу тәлим Аллаһын Кәламына әсасланмыр.

Мүгәддәс руһ шәхс дејил, о, Аллаһын Өз истәјини һәјата кечирмәк үчүн истифадә етдији гүввәдир. Мәсәлән, Мүгәддәс Китабда еркән мәсиһиләр һаггында јазылыб: «Онларын һамысы мүгәддәс руһла долду». Һәмчинин Јеһова демишди: «Һәр ҹүр инсанын үзәринә руһуму төкәҹәјәм» (Һәвариләрин ишләри 2:1—4, 17).

▸ Фәс. 4, абз. 12; фәс. 15, абз. 17

Нәјә ҝөрә Јеһованын Шаһидләри ибадәтдә хачдан истифадә етмирләр?

1. Хач узун мүддәт сахта динин ибадәт објекти олуб. Гәдимдә хач тәбиәт гүввәләринә ситајишдә вә бүтпәрәстлијин әхлагсыз ајинләриндә истифадә олунуб. Мәсиһин өлүмүндән сонра илк 300 ил әрзиндә онун давамчылары хача ситајиш етмәјибләр. Сонралар исә Рома императору Константин хачы христиан дининин рәмзи едир. О дөврдә хач васитәсилә инсанлары христианлыға ҹәлб едирдиләр. Хачын Иса Мәсиһлә һеч бир әлагәси јохдур. Бир енсиклопедијада дејилир:  «Хача һәм христианлыгдан өнҹәки, һәм дә гејри-христиан мәдәнијјәтләриндә дә раст ҝәлинир» («New Catholic Encyclopedia»).

2.  Иса Мәсиһ хач үзәриндә өлмәјиб. «Хач» вә ја «чармых» кими тәрҹүмә олунан јунан сөзү шагули дирәји, евләрин тәмәлиндә гојулан сүтуну вә ја пајаны билдирир. Бир китабда белә изаһат ҝәтирилир: «[Әһди-Ҹәдидин] јунанҹа мәтниндә бунун ики шалбандан ибарәт олдуғуна һеч бир ишарә јохдур» («The Companion Bible»). Бәли, Иса шагули дирәјин үзәриндә едам олунуб.

3. Јеһова инсанларын тәсвирләр вә ја рәмзләр васитәсилә Она ибадәт етмәсини истәмир (Чыхыш 20:4, 5; 1 Коринфлиләрә 10:14).

▸ Фәс. 5, абз. 12

Иса Мәсиһ давамчыларына онун өлүмүнү анмағы бујурмушду. Онлар бу мәрасими илдә бир дәфә, гәдимдә исраиллиләрин Пасха бајрамыны гејд етдији тарихдә, нисан ајынын 14-дә кечирирләр. Мәрасимдә иштирак едәнләрин һамысы Исанын бәдәнини вә ганыны тәмсил едән чөрәк вә шәрабы бир-биринә өтүрүрләр. Иса илә бирликдә ҝөјдә падшаһ олаҹаг шәхсләр чөрәкдән вә шәрабдан дадырлар. Јер үзүндә әбәди јашамаға үмид едәнләр исә чөрәк вә шәрабдан дадмыр, садәҹә бу мәрасимдә иштирак едирләр.

▸ Фәс. 5, абз. 21

Мүгәддәс Китабын Азәрбајҹанҹа «Јени Дүнја Тәрҹүмәси»ндә «руһ» кими тәрҹүмә олунан ибраниҹә руах вә јунанҹа пневма сөзү мүхтәлиф мәналары дашыјыр. Бу сөзләр һәр заман күләк вә ҹанлыларда олан һәјат гүввәси кими ҝөзәҝөрүнмәз гүввәјә аид ишләнир. Бу сөзләр һәмчинин руһани варлыглара, Аллаһын гүввәсинә, јәни мүгәддәс  руһа аид дә ишләнә биләр (Чыхыш 35:21; Зәбур 104:29; Мәтта 12:43; Лука 11:13).

Бәзи динләрин инанҹына ҝөрә, инсан өләндә руһа чеврилиб әҹдадларынын руһуна говушур. Бәзи инсанлар инаныр ки, руһларын онлара ја хејри дәјә биләр, ја да зијаны.

Өлән доғмаларымызын руһунун јашамасы фикри Мүгәддәс Китаба әсасланмыр. Әксинә, орада дејилир ки, инсан өләндә бүтүн фәалијјәти дајаныр. Мүгәддәс Китабда ачыг-ајдын шәкилдә дејилир: «Дириләр өләҹәкләрини билир, лакин өлүләр һеч нә билмир. Артыг онлара һеч бир музд верилмир, чүнки онларын хатирәси дә унудулуб. Онларын севҝиси дә, нифрәти дә, пахыллығы да јох олуб. Ҝүнәш алтында ҝөрүлән һеч бир ишдә артыг пајлары јохдур... Мәзарда нә иш, нә нијјәт, нә елм, нә дә һикмәт вар» (Ваиз 9:5, 6, 10). Һәмчинин орада јазылыб ки, инсан өләндә «торпаға гајыдыр, дүшүнҹәләри һәмин ҝүндәҹә јох олур» (Зәбур 146:4; Јарадылыш 3:19).

Ҝөрүндүјү кими, Мүгәддәс Китаба әсасән, инсан өләндән сонра онун руһу јашамаға давам етмир. Беләҹә, өлүләр бизә нә көмәк едә биләр, нә дә зијан јетирә биләр.

▸ Фәс. 6, абз. 5; фәс. 15, абз. 17

(Ибраниҹә ҝеһ-һинном. «Ҹәһәннәм» сөзү дә бу ифадәдән әмәлә ҝәлмишдир.) Гәдим Јерусәлимин јахынлығында јерләшән бу вадидә зибил јандырырдылар. Һинном вадисиндә инсанларын вә ја һејванларын дири-дири јандырылдығына, јахуд онлара ишҝәнҹә верилдијинә һеч бир дәлил јохдур. Беләҹә, һәмин јер инсан руһларынын аловда јаныб әбәди ишҝәнҹә чәкдији ҝөзәҝөрүнмәз мәканын символу ола билмәз. Иса Мәсиһ Һинном вадисинә атылмышлар барәдә данышанда онларын әбәди мәһв олмасыны нәзәрдә тутурду (Мәтта 5:22; 10:28).

▸ Фәс. 7, абз. 20

Иса Мәсиһ шаҝирдләринә дуа етмәји өјрәтмишди. О демишди ки, давамчылары ашағыдакы шејләр барәдә дуа етмәлидирләр:

• «Гој адын мүгәддәс тутулсун»

  Бу сөзләрлә Јеһовадан хаһиш едирик ки, Өз адыны бүтүн шәр-бөһтандан тәмизләсин вә нәтиҹәдә, ҝөјдә вә јердә олан бүтүн варлыглар Онун адыны уҹа тутсун вә бу ада еһтирам бәсләсин.

• «Гој Падшаһлығын ҝәлсин»

  Бу сөзләрлә дуа едирик ки, Аллаһын гурдуғу һөкумәт Шејтанын шәр дүнјасыны мәһв етсин, дүнјаны идарә етсин вә јер үзүнү ҹәннәтә чевирсин.

• «Гој Сәнин ирадән... јердә... јеринә јетсин»

  Бу сөзләрлә дуа едирик ки, Аллаһын јер үзү илә бағлы нијјәти јеринә јетсин вә беләҹә, Јеһова инсаны јараданда нијјәт етдији кими, итаәткар, камил инсанлар ҹәннәтдә әбәди јашасын.

▸ Фәс. 8, абз. 2

Јеһова Аллаһ инсанлары ҝүнаһ вә өлүмдән хилас етмәк үчүн фидјә вериб. Фидјә Адәмин итирдији камил һәјаты гајтармаг вә инсанларын Јеһова Аллаһла мүнасибәтләрини бәрпа етмәк үчүн өдәнилмәли иди. Аллаһ Исаны јер үзүнә ҝөндәрди ки, ҝүнаһлы бәшәријјәт уғрунда ҹаныны фәда етсин. Исанын өлүмү сајәсиндә бүтүн инсанларын гаршысында камиллијә вә әбәди һәјата говушмаг имканы ачылыб.

▸ Фәс. 8, абз. 21; фәс. 9, абз. 13

«Дәнјал» китабынын 4-ҹү фәслинә әсасән, Аллаһ Өз Падшаһлығыны 1914-ҹү илдә гуруб.

Пејғәмбәрлик. Јеһова Аллаһ Навуходоносор падшаһа јухуда кәсилмиш нәһәнҝ ағаҹ ҝөстәрир. Падшаһ ҝөрүр ки, ағаҹ «једди дөвр» бөјүмәсин дејә көтүјү дәмир вә мислә чәмбәрләнир. Бу дөвр кечәндән сонра ағаҹ јенә бөјүјәҹәкди (Дәнјал 4:1, 10—16).

Бу пејғәмбәрлијин бизә һансы аидијјәти вар? Ағаҹ Аллаһын һакимијјәтини тәмсил едир. Јеһова узун илләр әрзиндә Исраил халгы үзәриндә Јерусәлимдәки падшаһлар васитәсилә һөкмранлыг едиб (1 Салнамәләр 29:23). Тәәссүф ки, бу падшаһлар Аллаһа садиг галмадылар, буна ҝөрә дә онларын һакимијјәтинә сон гојулду. Б. е. ә. 607-ҹи илдә Јерусәлим јерлә јексан олду. Һәмин андан етибарән пејғәмбәрликдәки «једди дөвр» башланды (2 Падшаһлар 25:1, 8—10; Һизгијал 21:25—27). Иса: «Халглара верилән вахт гуртарана гәдәр Јерусәлим халгларын тапдағы алтында галаҹаг», — дејәндә мәһз бу «једди дөврү» нәзәрдә тутурду (Лука 21:24). Белә чыхыр ки, Иса јердә јашајанда «једди дөвр» һәлә баша чатмамышды. Јеһова сөз вермишди ки, «једди дөврүн» сонунда бир Падшаһ тәјин едәҹәк. Бу јени Падшаһын, Иса Мәсиһин һакимијјәти бүтүн дүнјада јашајан Аллаһын халгына әбәди немәтләр бәхш едәҹәк (Лука 1:30—33).

«Једди дөвр» нечә мүддәт давам етмәли иди? «Једди дөвр» 2520 ил давам етмишди. Әҝәр б. е. ә. 607-ҹи илдән бу јана 2520 ил һесабласаг, 1914-ҹү илә ҝәлиб чыхырыг. Һәмин ил Јеһова Аллаһ Иса Мәсиһи ҝөјдә Өз Падшаһлығынын Падшаһы тәјин едиб.

 Јәгин сизә мараглыдыр, 2520 или һарадан ҝөтүрмүшүк. Мүгәддәс Китабда јазылыб ки, үч дөвр јарым 1260 ҝүнә бәрабәрдир (Вәһј 12:6, 14). Демәли, икигат артыг давам едән «једди дөвр» 2520 ҝүнә бәрабәр олур. Пејғәмбәрликләрдә ҝүнләрин һесабланма гајдасына, јәни «һәр ҝүн үчүн бир ил» гајдасына әсасән, 2520 ҝүн 2520 ил едир (Сајлар 14:34; Һизгијал 4:6).

▸ Фәс. 8, абз. 23

Мүгәддәс Китабда јалныз бир баш мәләк һаггында данышылыр. Бу баш мәләјин ады Микајылдыр (Дәнјал 12:1; Јәһуда 9).

Микајыл Аллаһын сәдагәтли мәләкләриндән ибарәт ордунун башчысыдыр. Вәһј 12:7 ајәсиндә јазылыб: «Микајыл өз мәләкләри илә әждаһаја гаршы вә әждаһа да өз мәләкләри илә онлара гаршы вурушду». «Вәһј» китабында дејилир ки, Аллаһын ордусунун башчысы Иса Мәсиһдир. Бундан белә нәтиҹәјә ҝәлирик ки, Микајыл Исанын диҝәр адыдыр (Вәһј 19:14—16).

▸ Фәс. 9, абз. 4

Аллаһын Падшаһлығынын Шејтан дүнјасыны мәһв етмәсиндән әввәлки дөвр «ахырзаман» адланыр. Пејғәмбәрлик олунмушду ки, бу дөвр әрзиндә јер үзүндә әламәтдар һадисәләр баш верәҹәк. Бу дөвр Мүгәддәс Китабда һәмчинин «дөврүн јекуну» вә «инсан Оғлунун һүзуру заманы» адланыр (Мәтта 24:3, 27, 37). «Ахырзаман» 1914-ҹү илдә ҝөјдә Аллаһын Падшаһлығы гуруланда башлајыб вә Армаҝеддонда Шејтан дүнјасы мәһв оланда баша чатаҹаг (2 Тимутијә 3:1; 2 Бутрус 3:3).

▸ Фәс. 9, абз. 5

Аллаһын өлән инсаны һәјата гајтармасы дирилмә адланыр. Мүгәддәс Китабда доггуз нәфәрин дирилмәси барәдә јазылыб. Аллаһын Илјас, Әлјәсә, Иса, Бутрус вә Булус кими садиг гуллары өлүләри дирилдибләр. Сөзсүз ки, бу мөҹүзәләри онлар Аллаһын гүдрәти илә едирдиләр. Јеһова Аллаһ сөз верир ки, «һәм салеһләри, һәм дә гејри-салеһләри» дирилдәҹәк (Һәвариләрин ишләри 24:15). Аллаһын Кәламында һәмчинин дејилир ки, бәзи инсанлар ҝөјдә јашамаг үчүн дириләҹәк. Аллаһ тәрәфиндән сечилмиш бу инсанлар Иса Мәсиһлә бирҝә ҝөјдә јашајаҹаглар (Јәһја 5:28, 29; 11:25; Филиппилиләрә 3:11; Вәһј 20:5, 6).

▸ Фәс. 9, абз. 13

Ҹинләрлә билаваситә, јахуд ҹиндар, овсунчу вә руһчағыран васитәсилә әлагә јаратмаг ҹиндарлыг, јәни спиритизм адланыр. Ҹиндарлыгла мәшғул олан инсанлар инанырлар ки, өләндән сонра инсан башгаларына ҝүҹлү тәсир етмәјә гадир олан руһа чеврилир. Амма бу ағ јаландыр. Ҹинләрлә әлагә јаратмаг ҝүнаһдыр, чүнки онлар инсанлары Аллаһын јолундан аздырырлар. Ҹиндарлыға һәмчинин астролоҝија, фалчылыг, маҝија, оккултизм, ҹадуҝәрлик, мөвһуматчылыг вә фөвгәлбәшәр гүввәләрә инанҹ дахилдир. Бир чох китаблар, журналлар, улдуз фалы, филмләр, тәсвирләр, һәтта маһнылар сеһрбазлығы, ҹинләри, јахуд фөвгәлтәбии шејләри зәрәрсиз вә ја мараглы бир шеј кими гәләмә верир. Бир чох јас мәрасимләри, мәсәлән, мүәјјән ҝүнләри гејд етмәк, өләнин адына јемәк биширмәк билаваситә вә ја долајысы илә ҹиндарлыгла бағлыдыр. Адәтән, руһларла әлагә јарадан инсанлар ујушдуруҹу маддәләр гәбул едирләр (Галатијалылара 5:20; Вәһј 21:8).

▸ Фәс. 10, абз. 10; фәс. 16, абз. 4

Јеһова Аллаһ Гүдрәт Саһибидир вә Каинатын јараданыдыр (Вәһј 15:3). Буна ҝөрә дә О, һәр шејин Саһибидир, һәр шејин ихтијары Ондадыр вә О, бүтүн хилгәтин Ағасыдыр (Зәбур 24:1; Әшија 40:21—23; Вәһј 4:11). О, бүтүн хилгәт үчүн ганунлар тәсис едиб. Јеһованын башгаларына сәлаһијјәт вермәк ихтијары вар. Биз Аллаһы севмәклә вә Она табе олмагла Онун һакимијјәтинин тәрәфини тутдуғумузу ҝөстәририк (1 Салнамәләр 29:11).

▸ Фәс. 11, абз. 10

Аборт — һәлә дүнјаја ҝәлмәмиш ушағы гәсдән, билә-билә өлдүрмәкдир. Бәдбәхт һадисә нәтиҹәсиндә ана бәтниндә ушағын өлмәси вә ја гадынын ушаг салмасы бура аид дејил. Артыг мајаланма башлајан андан ушаг садәҹә ананын бәдәнинин бир һиссәси јох, ајрыҹа бир инсан сајылыр.

▸ Фәс. 13, абз. 5

Инсан бәдәнинә халис ганын вә ја онун дөрд әсас компонентиндән биринин көчүрүлмәси ганкөчүрмә адланыр. Бу тибби проседур заманы ја инсанын өз ганы, ја да башгасынын ганы организмә көчүрүлүр. Ганын әсас дөрд компоненти бунлардыр: плазма, еритроситләр (гырмызы ган), лејкоситләр (ағ ган) вә тромбоситләр.

▸ Фәс. 13, абз. 13

Мүгәддәс Китабда истифадә олунан «тәрбијә» сөзү садәҹә олараг ҹәза сөзүнүн синоними дејил. Тәрбијә етмәк өјүд-нәсиһәт, тәлим-тәрбијә вә дүзәлиш вермәк демәкдир. Јеһова һеч вахт инсанлары кобуд шәкилдә вә гәддарҹасына тәрбијә етмир (Мәсәлләр 4:1, 2). Јеһова Аллаһ тәрбијә вермәкдә валидејнләрә чох ҝөзәл нүмунәдир. Онун итаәткар бәндәләринә вердији тәрбијә о гәдәр сәмәрәли вә хејирлидир ки, онлар һәтта Онун тәрбијәсини севирләр (Мәсәлләр 12:1). Јеһова Өз хидмәтчиләрини севир вә онлара тәлим-тәрбијә верир. Аллаһын вердији өјүд-нәсиһәт хидмәтчиләринә јанлыш фикирләрини дүзәлтмәјә, Ону разы салан шәкилдә дүшүнмәјә вә давранмаға көмәк едир. Бәс валидејн ушағыны неҹә тәрбијә етмәлидир? Әввәлҹә ушағы баша салмаг лазымдыр ки, нәјә ҝөрә о, итаәткар олмалыдыр. Һәмчинин ушаға Јеһоваја, Онун Кәламына мәһәббәт ашыламаг вә принсипләри баша салмаг лазымдыр.

▸ Фәс. 14, абз. 13

Ҹинләр фөвгәлбәшәр ҝүҹә малик, ҝөзәҝөрүнмәз руһани варлыглардыр. Бунлар шәр мәләкләрдир, чүнки Аллаһын итаәтиндән чыхыб Онун дүшмәнинә чеврилибләр (Јарадылыш 6:2; Јәһуда 6). Онлар Шејтана гошулуб Аллаһа гаршы үсјан едибләр (Ганунун тәкрары 32:17; Лука 8:30; Һәвариләрин ишләри 16:16; Јагуб 2:19).

▸ Фәс. 16, абз. 4