ЈЕҺОВА билирди ки, бир ҝүн Она ән әзиз олан Биринә ишҝәнҹә вериләҹәк вә өлдүрүләҹәк. Јарадылыш 3:15 ајәсиндә јазылмыш пејғәмбәрлик бу һәгигәтә ишарә едирди. Аллаһ бу өлүмүн Она неҹә баһа баша ҝәлдијини инсанлара һансыса јолла чатдыра биләрдими? Мүгәддәс Китабда буна даир ҹанлы нүмунә вар. Аллаһ Ибраһимә севимли оғлу Исһагы гурбан вермәсини бујурду.

Ибраһим бөјүк иман саһиби иди. Јадыныздадырса Аллаһ габагҹадан дејилмиш Хиласкарын вә ја Өвладын Исһагдан төрәјәҹәјини вәд етмишди. Лазым ҝәләрсә, Аллаһын Исһагы дирилдәҹәјинә әмин олараг Ибраһим итаәткарлыгла оғлуну гурбан вермәк үзрә икән Аллаһын мәләји Ибраһими дајандырды. Аллаһ Ибраһими малик олдуғу ән дәјәрли шеји гурбан вермәјә һазыр олдуғуна ҝөрә тәрифләди вә вәдләрини бу садиг инсана тәкрарлады.

Сонралар Исһагын Ејс вә Јагуб адлы ики оғлу олду. Ејсдән фәргли олараг, Јагуб руһани дәјәрләри гијмәтләндирирди вә буна ҝөрә дә мүкафатландырылды. Аллаһ Јагубун адыны дәјишиб Исраил гојду вә онун 12 оғлу Исраил гәбиләләринин башчысы олду. Бәс неҹә олду ки, бу аилә бөјүк халга чеврилди?

Бу оғулларын әксәријјәтинин кичик гардашлары Јусифә пахыллыг етмәләри нәтиҹәсиндә бир сыра һадисәләр баш верди. Гардашлары Јусифи гул кими сатдылар вә о, Мисирә апарылды. Анҹаг Аллаһ бу иманлы вә ҹәсарәтли ҝәнҹи хејир-дуаландырды. Бөјүк чәтинликләрә бахмајараг, нәтиҹәдә Јусиф Мисир һөкмдары фиронун ҝөзүндә лүтф газанды вә она бөјүк сәлаһијјәт верилди. Бу, дүз вахтына дүшдү, чүнки аҹлыг уҹбатындан Јагуб оғулларындан бәзиләрини Мисирә әрзаг алмаға ҝөндәрди. Һәмин вахт бүтүн әрзаг еһтијаты Јусифин ихтијарында иди! Пешман олмуш гардашлары илә һәјәҹанландырыҹы говушмадан сонра Јусиф онлары бағышлады вә бүтүн аиләни Мисирә ҝәтирмәләрини хаһиш етди. Онлара артыб хошбәхт јашамалары үчүн ҝөзәл бир дијар верилди. Јусиф анлајырды ки, вәдләрини јеринә јетирмәк үчүн һадисәләри Аллаһ Өзү бу ҹүр истигамәтләндириб.

Јаша долмуш Јагуб өмрүнүн галан һиссәсини Мисирдә ҝетдикҹә артан аиләсинин әһатәсиндә кечирди. Өлүм јатағында оларкән о, вәд олунан Өвладын вә ја Хиласкарын оғлу Јәһуданын нәслиндән ҝәләҹәјини вә гүдрәтли Һөкмдар олаҹағыны габагҹадан деди. Узун илләр сонра Јусиф өлүмүндән әввәл пејғәмбәрлик етди ки, Аллаһ бир ҝүн Јагубун аиләсини Мисирдән чыхараҹаг.

Јарадылыш 20—50-дәк фәсилләринә; Ибраниләрә 11:17—22 ајәләринә әсасланыб.