ИСРАИЛЛИЛӘРИН Кәнан торпағына дахил олмасындан әсрләр әввәл Јеһова һәмин торпағы Ибраһимин нәслинә вермәји вәд етмишди. Инди исраиллиләр Јушәнин рәһбәрлији алтында Вәд олунмуш дијары әлә кечирмәјә һазыр идиләр.

Аллаһ кәнанлылары өлүмә мәһкум етмишди. Онлар өлкәни һәддиндән артыг ҹинси әхлагсызлыгла вә амансызҹасына ахыдылан инсан ганы илә долдурмушдулар. Буна ҝөрә дә исраиллиләр истила етдикләри Кәнан шәһәрләрини тамамилә дармадағын етмәли идиләр.

Лакин дијара ҝирмәздән әввәл Јушә ора ики ҹасус ҝөндәрди. Онлар Әриһа шәһәриндә Раһаб адлы гадынын евиндә галдылар. Һәмин адамларын исраилли олдуғуну билсә дә Раһаб онлары евинә гәбул етди вә горуду. О, исраиллиләрин Аллаһына иман едирди, чүнки Јеһованын Өз халгыны хилас етмәк үчүн етдији ишләр һагда ешитмишди. Раһаб өзүнү вә аиләсини сағ бурахаҹагларына даир ҹасуслара анд ичдирди.

Бир мүддәт сонра исраиллиләр Кәнан дијарына ҝириб Әриһаја һүҹум едәндә Јеһова елә етди ки, Әриһанын диварлары мөҹүзәви шәкилдә дағылды. Јушәнин гошуну шәһәрә ҝириб ораны дармадағын етди, анҹаг Раһабы вә онун аиләсини сағ бурахды. Сонра алты ил сүрән ҝәрҝин дөјүшләр нәтиҹәсиндә Јушә Вәд едилмиш дијарын бөјүк һиссәсини фәтһ етди. Бундан сонра торпаглар Исраил гәбиләләри арасында бөлүндү.

Аллаһа узун илләр әрзиндә етдији хидмәтин сонуна јахын Јушә халгы бир јерә топлады. О, исраиллиләрин улу бабалары илә Јеһованын неҹә рәфтар етдијини нәзәрдән кечирди вә халгы Јеһоваја хидмәт етмәјә тәшвиг етди. Лакин Јушә вә онун мүасири олан ағсаггаллар өләндән сонра исраиллиләр Јеһовадан үз дөндәрәрәк јаланчы аллаһлара хидмәт етмәјә башладылар. Тәхминән 300 ил әрзиндә халг һеч дә һәмишә Јеһованын ганунларына табе олмурду. Һәмин илләр әрзиндә Јеһова исраиллиләри дүшмәнләринин мәсәлән филиштлиләрин әлинә верирди ки, онлара зүлм етсинләр. Анҹаг исраиллиләр көмәк үчүн Јеһоваја үз тутанда О, халгы хилас етмәк үчүн вахташыры олараг һакимләр тәјин едирди ки, онларын да сајы үмумиликдә 12 нәфәр олмушдур.

«Һакимләр» китабында тәсвир олунан һакимләр дөврү Үснииллә башлајыб дүнјада јашамыш ән ҝүҹлү инсан олан Шимшонла тамамланыр. Мүгәддәс Јазыларын мараг доғуран «Һакимләр» китабында дөнә-дөнә сүбута јетирилән һәгигәт бундан ибарәтдир: Јеһоваја итаәткарлыг хејир-дуалар, итаәтсизлик исә фәлакәт ҝәтирир.

«Јушә»; «Һакимләр» китабларына вә Лавилиләр 18:24, 25 ајәләринә әсасланыб.