БӨЛМӘ 2
Ҹәннәт итирилир
Үсјанкар мәләк илк киши вә гадына Адәмлә Һәвваја тәсир едир ки, онлар Аллаһын һакимијјәтини рәдд етсинләр. Нәтиҹәдә, ҝүнаһ вә өлүм дүнјаја дахил олур
ИНСАНЛАРЫ јаратмаздан узун илләр әввәл Аллаһ чохлу ҝөзәҝөрүнмәз руһани варлыглар — мәләкләр јаратмышды. Сонралар Шејтан Иблис кими танынан үсјанкар мәләк Әдән бағында һијләҝәрҹәсинә ҹәһд етди ки, Һәвваны Аллаһын гадаған етдији ағаҹын мејвәсиндән јемәјә ширникдирсин.
Иландан истифадә едәрәк Шејтан Аллаһын гадындан вә онун әриндән нә исә јахшы бир шеј ҝизләтдијинә ејһам вурду. Мәләк Һәвваја деди ки, онлар гадаған олунмуш мејвәдән јемәклә өлмәјәҹәкләр. Бунунла Шејтан Аллаһы јаратдығы инсанлара јалан сөјләмәкдә иттиһам етди. Иблис Аллаһа итаәтсизлији хүсуси билик вә азадлыг бәхш едән ҹазибәли бир шеј кими гәләмә верди. Анҹаг бүтүн бунлар ҹәфәнҝијат — јер үзүндә сөјләнән илк јалан иди. Бу мүбаһисәли суал әсас етибарилә Аллаһын али һакимијјәтинә — Онун идарә етмәк һүгугуна, еләҹә дә әдаләтлә вә тәбәәләринин рифаһыны дүшүнәрәк һөкмранлыг етмәсинә даир галдырылмышды.
Һәвва Шејтанын јаланына ујду. Онда мејвәни јемәк арзусу ојанды вә ону дәриб једи. Сонра әринә дә верди, о да һәмин мејвәдән једи. Бунунла да онлар ҝүнаһлы олдулар. Илк бахышдан садә ҝөрүнән бу һәрәкәт әслиндә үсјанкарлыг иди. Аллаһын әмринә гаршы гәсдән чыхмагла Адәмлә Һәвва камил һәјат да дахил олмагла, онлара һәр шеји верән Јараданын рәһбәрлијини рәдд етдиләр.
«О, сәнин башыны әзәҹәк, сән исә ону дабанындан чалаҹагсан» (Јарадылыш 3:15).
Аллаһ үсјанкарлара тутдуглары әмәлә ҝөрә һөкм кәсди. О, иланла тәмсил олунан Шејтаны мәһв едәҹәк вәд олунмуш Өвладын вә ја Хиласкарын ҝәләҹәјини пејғәмбәрлик етди. Аллаһ Адәмлә Һәвваја кәсдији өлүм һөкмүнү дәрһал иҹра етмәди. Бунунла да онларын һәлә дүнјаја ҝәлмәмиш өвладларына мәрһәмәт ҝөстәрди. Һәмин ушагларын үмид үчүн әсаслары олаҹагды, чүнки Аллаһын ҝөндәрәҹәји шәхс Әдәндәки үсјанын фаҹиәли нәтиҹәләрини арадан галдыраҹагды. Ҝәләҹәк Хиласкарла бағлы Аллаһын нијјәтинин неҹә һәјата кечәҹәји вә һәмин шәхсин ким олаҹағы Мүгәддәс Китаб јазылдыгҹа тәдриҹән ачыгланырды.
Аллаһ Адәмлә Һәвваны Ҹәннәтдән говду. Онлар Әдән бағындан кәнарда зәһмәтлә вә алын тәрилә әкиб-беҹәрмәклә өзләрини тәмин етмәли идиләр. Сонра Һәвва һамилә галды вә илк өвладлары олан Габили дүнјаја ҝәтирди. Онларын Һабил вә Нуһун улу бабасы Шејс дә дахил олмагла башга оғул вә гызлары да олду.
Јарадылыш 3—5-дәк фәсилләринә; Вәһј 12:9 ајәсинә әсасланыб.
