БУ АДАМЛАР Исанын давамчыларыдыр. Онлар Исанын сөзүнә гулаг асыб Јерусәлимдән ҝетмәдиләр. Бир ҝүн бу шаҝирдләр бир јерә јығышаркән ҝүҹлү күләјин сәсинә охшајан сәс бүтүн еви бүрүјүр. Сонра шаҝирдләрдән һәр биринин башы үзәриндә алов дилләри ҝөрүнүр. Шәкилдә алов дилләрини ҝөрүрсән? Бүтүн бунлар нә демәкдир?

Бу бир мөҹүзәдир! Иса ҝөјдә Атасынын јанындадыр вә өз давамчыларынын үзәринә Аллаһын мүгәддәс руһуну төкүр. Билирсән мүгәддәс руһун көмәјилә онлар нә едирләр? Шаҝирдләр ҹүрбәҹүр дилләрдә данышмаға башлајыр.

Јерусәлимдә јашајан адамларын чоху бу сәси ешидиб, шаҝирдләрин јығышдығы евин габағына ҝәлирләр. Онлардан бәзиләри исраиллиләрин Пентикост адланан бајрамында иштирак етмәк үчүн узаг өлкәләрдән ҝәлән адамлардыр. Бу гонаглар чох тәәҹҹүбләнирләр! Онлар доғма дилләриндә һәвариләрин Аллаһын ҝөзәл ишләри һаггында данышдыгларыны ешидирләр.

‘Ахы бу адамларын һамысы Галилејалыдыр, неҹә олур ки, онлар бизим ана дилимиздә данышырлар?’, дејә онлар сорушурлар.

Петер баш верәнләри халга изаһ етмәк үчүн габаға чыхыр. О, јүксәк сәслә халга Исанын өлдүрүлмәси вә сонра Јеһованын ону дирилтмәси һаггында данышыр. О дејир: ‘Инди Иса ҝөјдә Аллаһын сағында отуруб вә сөз вердији мүгәддәс руһу да үзәримизә төкүб. Буна ҝөрә дә бу мөҹүзәләри ҝөрүб ешидирсиниз’.

Петерин бу сөзләриндән сонра бир чохлары Исаја гаршы едилән һагсызлыглара ҝөрә пешман олур. Онлар сорушурлар: ‘Бәс биз нә едәк?’ Петер ҹаваб верир: ‘Сиз һәјат јолунузу дәјишиб вәфтиз олунмалысыныз’. Елә һәмин ҝүн 3 000 адам вәфтиз олунуб Исанын давамчысы олур.