ПАВЕЛИН голларында гандалы ҝөрүрсән? Онун јанында нәзарәтчи дајаныб. Павел Рома шәһәриндә дустагдыр вә Гејсәрин онун һаггында гәрар чыхармасыны ҝөзләјир. Дустаг олмасына бахмајараг, Павелин јанына адам бурахырлар.

Ромаја чатандан үч ҝүн сонра Павел адлы-санлы јәһудиләри јанына дәвәт едир. Онун јанына чохлу ромалы јәһуди ҝәлир. Павел онлара Иса вә Аллаһын Падшаһлығы һаггында данышыр. О адамлардан бәзиләри иман ҝәтириб мәсиһчи олур, диҝәрләри исә инанмыр.

Павел һәм дә она нәзарәт едән әсҝәрләрә дә Аллаһ һаггында данышыр. Ромада дустаг олдуғу ики ил әрзиндә јанына ҝәләнләрин һамысына тәблиғ едир. Нәтиҹәдә, Падшаһлыг һаггында хош хәбәри һәтта Гејсәрин сарајындакылар да ешидир. Онлардан бәзиләри мәсиһчи олур.

Стол архасында отуруб јазы јазан бу адам кимдир? Ону таныдын? Һә, бу Тимотејдир. О да Падшаһлыг һаггында тәблиғ етдијинә ҝөрә һәбс едилмишди, амма инди азадлыгдадыр. Тимотеј Павелә көмәк етмәк үчүн бура ҝәлиб. Һеч билирсән о нә јазыр? Инди ҝөрәрик.

Јадындадыр, 110-ҹу һекајәдә Филипи вә Ефес шәһәрләри һаггында охумушдуг. Павел о шәһәрләрдә мәсиһчи јығынҹагларынын јаранмасына көмәк етмишди. Һәбсдә олдуғу вахт Павел орадакы мәсиһчиләрә мәктублар јазыр. Бу мәктублары инди Мүгәддәс Китабда охумаг олар. Онлар «Ефеслиләрә мәктуб» вә «Филипилиләрә мәктуб» адланырлар. Павел Филипидәки достларына демәк истәдији сөзләри Тимотејә јаздырыр.

Филипилиләр Павелә вахтилә чох көмәк едибләр. Бу дәфә һәбсханаја онун үчүн пај ҝөндәрибләр. Мәктубда Павел онлара миннәтдарлығыны билдирир. Һәдијјәни ҝәтирән адамын ады Епафродитдир. Амма о, Ромада бәрк хәстәләнир вә аз галыр өлсүн. Сонра Епафродит сағалыр вә евә гајытмаға һазылашыр. О, Филипијә ҝедәндә Павеллә Тимотејин јаздыглары бу мәктубу өзү илә апарыр.

Павел дустаг олдуғу вахт әрзиндә даһа ики мәктуб јазыр. Онлары да Мүгәддәс Китабда тапмаг олар. Онлардан бири Колос шәһәриндәки мәсиһчиләрә јазылыб. Билирсән о мәктубун ады нәдир? «Колослулара мәктуб». Павел о бири мәктубуну исә досту Филимона јазыб. Филимон да Колос шәһәриндә јашајыр. Мәктубда Павел Филимонун гуллугчусу Онисим һаггында јазыр.

Онисим Филимонун јанындан Ромаја гачыб. О неҹәсә Павелин дә Ромада олдуғундан хәбәр тутур. Павели ҝөрмәјә ҝәләндә Павел она да тәблиғ едир. Онисим тезликлә мәсиһчи олур. О, ағасындан гачдығы үчүн инди чох пешмандыр. Билирсән Павел Филимона мәктубунда нә јазыр?

Павел Филимондан Онисими бағышламасыны хаһиш едир: ‘Ону сәнә ҝери ҝөндәрирәм. Амма инди о јалныз сәнин гуллугчун дејил, о һәм дә чох ҝөзәл бир мәсиһчи гардашдыр’. Онисим Колос шәһәринә гајыданда өзү илә колослулара вә Филимона олан бу ики мәктубу апарыр. Тәсәввүр едирсән, Филимон гуллугчусунун мәсиһчи олдуғуну биләндә неҹә севинир?

Павелин филипилиләрә вә Филимона хош хәбәри вар. О, филипилиләрә јазыр: ‘Тимотеји јаныныза ҝөндәрирәм. Өзүм дә бир аздан јаныныза ҝәләҹәјәм’. Филимондан исә онун үчүн бир отаг һазырламасыны хаһиш едир.

Павел азадлыға бурахыланда бир чох шәһәрләрдә јашајан мәсиһчи баҹы-гардашларыны ҝөрмәјә ҝедир. Амма сонра о јенидән Ромада дустаг олур. Павел билир ки, бу дәфә ону өлүм ҝөзләјир. Она ҝөрә дә Тимотејә јазыб тезликлә јанына ҝәлмәсини хаһиш едир. О јазыр: ‘Мән Аллаһа садиг галдығым үчүн Аллаһ мәни мүкафатландыраҹаг’. Бундан сонра Павели өлдүрүрләр. Јерусәлим дә, бир нечә ил сонра ромалылар тәрәфиндән јерлә-јексан едилир.

Мүгәддәс Јазыларда башга шејләр һаггында да јазылыб. Јеһова Аллаһ Мүгәддәс Китабын сонунҹу китабларыны һәвари Јәһјаја јаздырыб. «Вәһј» китабыны да һәвари Јәһја гәләмә алыб. Бу китабда ҝәләҹәк һаггында данышылыр. Ҝәл өјрәнәк ҝөрәк ҝәләҹәкдә бизи нә ҝөзләјир.