ДӘНЈАЛЫН пејғәмбәрлијиндән тәхминән 500 ил сонра Аллаһын мәләји Ҹәбрајыл Давуд падшаһын нәслиндән олан Мәрјәм адлы бакирә гыза ҝөрүндү. «Салам, еј Аллаһын мүбарәк бәндәси! Јеһова сәнинләдир!» — дејә Ҹәбрајыл ону саламлады (Лука 1:28). Мәрјәм бундан бәрк горхду. Ҝөрәсән, Ҹәбрајылын бу саламы нә демәк иди?

«Мәрјәм, горхма, сән Аллаһын ҝөзүндә лүтф тапмысан. Сән һамилә галыб оғул доғаҹагсан. Онун адыны Иса гојарсан... Јеһова Аллаһ она атасы Давудун тахтыны верәҹәк... Онун Падшаһлығынын сону олмајаҹаг»,— дејә Ҹәбрајыл изаһ етди (Лука 1:30—33). Неҹә дә ҝөзәл хәбәр иди! Мәрјәм Мәсиһи, узун илләрдир ҝөзләнилән «өвлады» дүнјаја ҝәтирәҹәкди!

Нөвбәти ил Иса Бејтләһмдә доғулду. Һәмин ҝеҹә Аллаһын мәләји о әразидәки чобанлара хәбәр чатдырды: «Мән сизә... мүждәни чатдырмаға ҝәлмишәм. Бу ҝүн Давудун шәһәриндә сизин үчүн хиласкар, Аға Мәсиһ доғулуб» (Лука 2:10, 11). Сонралар Исанын аиләси Насирәјә көчдү вә Иса орада бөјүјүб боја-баша чатды.

Ерамызын 29-ҹу илиндә — Мәсиһин пејда олаҹағы илдә — Иса «тәгрибән отуз јашында» Аллаһын пејғәмбәри кими хидмәт етмәјә башлады (Лука 3:23). Инсанларын чоху онун Аллаһ тәрәфиндән ҝөндәрилдијини гәбул едирди. Онлар дејирдиләр: «Арамызда бөјүк бир пејғәмбәр зүһур едиб» (Лука 7:16, 17). Бәс Иса нә һагда өјрәдирди?

Иса инсанлара Аллаһы севмәји вә Она ибадәт етмәји өјрәдирди. О белә бәјан етмишди: «Аллаһымыз Јеһова тәк олан Јеһовадыр. Аллаһын Јеһованы бүтүн гәлбинлә, бүтүн варлығынла, бүтүн ағлынла вә вар ҝүҹүнлә сев» (Марк 12:29, 30). О һәмчинин демишди: «Аллаһын Јеһоваја сәҹдә гыл вә јалныз Она гуллуг ет» (Лука 4:8).

Иса инсанлара бир-бириләрини севмәји өјрәдирди. О демишди: «Башгасыны өзүнү севдијин кими сев» (Марк 12:31). Еләҹә дә о белә демишди: «Инсанларын сизинлә неҹә рәфтар етмәсини истәјирсинизсә, сиз дә онларла елә рәфтар един. Әслиндә, Төврат вә Пејғәмбәрләрин китабы да мәһз буну дејир» (Мәтта 7:12).

 Иса шөвглә Аллаһын Падшаһлығы һаггында инсанлара тәблиғ едирди. «Мән Аллаһын Падшаһлығы һаггында мүждәни башга шәһәрләрә дә чатдырмалыјам, ахы Аллаһ мәни бу иш үчүн ҝөндәриб» (Лука 4:43). Аллаһын Падшаһлығы нәјә ҝөрә бу гәдәр ваҹибдир?

Мүгәддәс Китаб өјрәдир ки, Аллаһын Падшаһлығы јер үзүнү ҝөјдән идарә едәҹәк сәмави һөкумәтдир. Иса Мәсиһ Аллаһ тәрәфиндән тәјин олунмуш Падшаһдыр. Дәнјал пејғәмбәр јухуда ҝөрүнтү алараг Аллаһын ҝөјләрдә Мәсиһә «һакимијјәт, шәрәф вә падшаһлыг» вердијини ҝөрмүшдү (Дәнјал 7:14). Бу Падшаһлыг јер үзүнү ҹәннәтә чевирәҹәк вә Аллаһын хидмәтчиләринә әбәди һәјат мүкафатыны верәҹәк. Бундан шад хәбәр ола биләр?!