МҮГӘДДӘС КИТАБДА Аллаһын бир чох ҝөзәл хүсусијјәтләриндән бәһс едилир вә бу хүсусијјәтләр Ону танымаға көмәк едир. Мәсәлән, Мүгәддәс Китабда Аллаһын дөрд әсас хүсусијјәти — гүввәси, әдаләти, мүдриклији вә мәһәббәти һаггында бәһс едилир. Ҝәлин онлары бир-бир нәзәрдән кечирәк.

Јеһова Ибраһим пејғәмбәрә деди: «Мән Гадир Аллаһам» (Јарадылыш 17:1). Бәли, Онун ҝүҹү мисилсиз, һәдсиз вә түкәнмәздир. Аллаһ Өз ҝүҹү васитәсилә бүтүн Каинаты јарадыб.

Аллаһ һеч вахт Өз ҝүҹүндән суи-истифадә етмир, әксинә, ондан мәгсәдјөнлү шәкилдә истифадә едир вә онун нәзарәтдән чыхмасына јол вермир. О Өз ҝүҹүнү әдаләт, мүдриклик вә мәһәббәтлә мүкәммәл сурәтдә таразлашдырыр.

Јеһова Өз ҝүҹүндән садиг хидмәтчиләринин рифаһы үчүн әлиачыглыгла истифадә едир. «Јеһова бүтүн јер үзүнү нәзәрдән кечирир ки, сидги-үрәкдән Она бағлы оланларын рифаһы үчүн ҝүҹүнү ҝөстәрсин» (2 Салнамәләр 16:9). Сиз бу ҹүр гүдрәтли, гајғыкеш Аллаһа јахынлашмаг истәмәздиниз?

«Јеһова әдаләти севир» (Зәбур 37:28). О, мүкәммәл принсипләринә ујғун олараг һәмишә дүзҝүн вә әдаләтли оланы едир.

Аллаһ әдаләтсизлијә нифрәт едир. «О тәрәфкешлик етмәз, рүшвәт алмаз» (Ганунун тәкрары 10:17). О, залым инсанлара гаршыдыр, кимсәсизләрә, о ҹүмләдән дул гадына вә јетимә исә дајагдыр (Чыхыш 22:22). Аллаһ инсанлара гәрәзли јанашмыр. «Аллаһ ајры-сечкилик етмәјән Аллаһдыр, һәр халгын ичиндә Ондан горхан вә дүзҝүн иш ҝөрән адамдан разыдыр» (Һәвариләрин ишләри 10:34, 35).

Јеһованын әдаләти мүкәммәлдир. О, нә һәддән артыг мүлајим, нә дә һәддән артыг сәртдир. О, төвбә етмәјән ҝүнаһкарлары ҹәзаландырыр, төвбә едәнләрә исә мәрһәмәт ҝөстәрир. «Јеһова мәрһәмәт, шәфгәт саһибидир, сәбирлидир, мәһәббәти болдур. Даим нөгсан ахтармаз, әбәдијјән аҹыглы галмаз. Бизимлә ҝүнаһларымыза ҝөрә рәфтар етмир, тәгсирләримизә ҝөрә пајымыза дүшән ҹәзаны вермир» (Зәбур 103:8—10). Аллаһ садиг хидмәтчиләринин хејирхаһ әмәлләрини һеч вахт унутмур вә онлары мүкафатландырыр. Сизҹә, белә әдаләтли Аллаһ етибара лајиг дејил?

Јеһованын һикмәт мәнбәјидир. Мүгәддәс Китабда дејилир: «Аллаһын немәтләри  ҝөр неҹә болдур, һикмәти, билији дәрин үммандыр!» (Ромалылара 11:33). Онун һикмәти мүгајисәјәҝәлмәз вә сонсуздур.

Аллаһын һикмәти јаратдыгларындан ҝөрүнүр. Мәзмурчу нида едәрәк дејирди: «Еј Јеһова, ҝөрдүјүн ишләр неҹә дә чохдур! Һәр бирини һикмәтлә ҝөрмүсән. Јер үзү хилгәтинлә долудур» (Зәбур 104:24).

Һәмчинин Аллаһын һикмәти Онун Кәламында әкс олунур. Давуд падшаһ јазмышды: «Јеһованын өјүдләри етибарлыдыр, нашы адамы мүдрик едир» (Зәбур 19:7). Бир тәсәввүр един: Аллаһын сонсуз һикмәти сизә фајда ҝәтирә биләр! Сиз бу имкандан истифадә едәҹәксиниз?

Мәһәббәт Аллаһын әсас хүсусијјәтидир. Мүгәддәс Китабда дејилир ки, «Аллаһ мәһәббәтдир» (1 Јәһја 4:8). О, һәр шеји мәһәббәтдән ирәли ҝәләрәк едир.

Аллаһ бизә мәһәббәтини мүхтәлиф јолларла ҝөстәрир. О бизә јахшы шејләр бәхш едир. Мүгәддәс  Китабда дејилир: «Сизә јахшылыг едәрәк ҝөјдән јағыш јағдырыр, бәрәкәтли мөвсүмләр вә бол-бол гида верир, үрәјинизи шадлыгла дојдурурду» (Һәвариләрин ишләри 14:17). Бәли, «һәр бир ҝөзәл пај вә һәр бир камил немәт јухарыдан, сәмави нурларын Атасындан назил олур» (Јагуб 1:17). Олдугҹа дәјәрли олан Мүгәддәс Китаб васитәсилә Аллаһ Өзү һаггында һәгигәти ачыглајыр, мәһәббәт долу ганун вә принсипләрини өјрәдир. «Һәгигәт Сәнин сөзүндүр»,— дејә Иса дуа етмишди (Јәһја 17:17).

Аллаһ бизә сынаглар заманы да көмәк едир. «Сән гајғы јүкүнү Јеһоваја вер, О, сәнә дајаг олар, О, һеч вахт салеһ инсаны јыхылмаға гојмаз» (Зәбур 55:22). Аллаһ бизим ҝүнаһларымызы бағышлајыр. «Еј Јеһова, кәрамәтлисән, бағышлајансан, Сәни чағыранлара гаршы мәһәббәтин болдур» (Зәбур 86:5). Үстәлик, О һәр бир инсана әбәди һәјат тәклиф едир. «Аллаһ инсанларын ҝөзләриндән бүтүн јашлары силәҹәк. Артыг өлүм олмајаҹаг. Нә дәрд, нә фәрјад, нә дә ағры олмајаҹаг, чүнки әввәлки шејләр кечиб ҝетди» (Вәһј 21:4). Сиз Аллаһын мәһәббәтинә неҹә һај верәҹәксиниз? Онун мәһәббәтинә мәһәббәтлә гаршылыг верәҹәксиниз?

Аллаһ истәјир ки, сиз Ону јахындан таныјасыныз. Онун Кәламы тәшвиг едир: «Аллаһа јахынлашын, О да сизә јахынлашаҹаг» (Јагуб 4:8). Аллаһ садиг Ибраһим пејғәмбәрә «достум» дејә мүраҹиәт етмишди (Әшија 41:8). Јеһова сизин дә Онунла дост олмағынызы истәјир.

Аллаһ һаггында даһа чох өјрәндикҹә, Она даһа јахын олаҹагсыныз вә өзүнүзү хошбәхт һисс едәҹәксиниз. О адам хошбәхтдир ки, «Јеһованын ганунундан һәзз алыр, ҝеҹә-ҝүндүз Онун ганунунун дәринлијинә варыр» (Зәбур 1:1, 2). Буна ҝөрә дә, Мүгәддәс Китабы арашдырмаға давам един. Аллаһын хүсусијјәтләри вә ҝөрдүјү ишләр барәдә дүшүнүн. Аллаһа олан мәһәббәтинизи өјрәндикләринизә әмәл етмәклә ҝөстәрин. «Аллаһы севмәк Онун әмрләринә риајәт етмәк демәкдир, Онун әмрләри исә ағыр дејил» (1 Јәһја 5:3). Мәзмурчу кими сиз дә Аллаһа белә дуа един: «Мәнә јолларыны ҝөстәр, еј Јеһова, мәнә јолларыны өјрәт. Мәни һагг јолунда јерит» (Зәбур 25:4, 5). Онда анлајаҹагсыныз ки, Аллаһ «һеч биримиздән узаг дејил» (Һәвариләрин ишләри 17:27).