«САЛЕҺ иманы сајәсиндә јашајаҹаг»,— дејә Мүгәддәс Китабда јазылыр (Ромалылара 1:17). Бу ајәдәки севиндириҹи вәдин сизә дә аидијјәти вар. Ҝәлин ҝөрәк неҹә.

Јер үзүндәки тапшырығыны баша вурдугдан сонра Иса Мәсиһ ҝөјләрә, Аллаһын јанына гајытды. О, шаҝирдләринин ҝөзү өнүндә «јухары галдырылды вә булуд ону өртүб ҝөрүнмәз етди» (Һәвариләрин ишләри 1:9). Ҝөјләрдә Аллаһ ону гүдрәтли сәмави Падшаһ тәјин етди. Јахын ҝәләҹәкдә «Инсан Оғлу [Иса] бүтүн мәләкләрлә бирҝә өз ҹалалында ҝәлиб шанлы тахтына әјләшәҹәк. Бүтүн халглар онун өнүндә јығышаҹаг вә о, инсанлары чобан гојунлары кечиләрдән ајырдығы кими, бир-бириндән ајыраҹаг» (Мәтта 25:31, 32). Бу нә заман баш верәҹәк?   

Мүгәддәс Китабда Мәсиһин халглар үзәриндә һөкмүнүн јахынлашмасына әламәт олараг бүтүн дүнјада әзаб-әзијјәтин олаҹағы бир дөвр һагда габагҹадан пејғәмбәрлик едилмишди. Иса бу әламәтә нәләрин дахил олаҹағыны садаламышды: «Милләт милләтә гаршы, дөвләт дөвләтә гаршы галхаҹаг. Ҝүҹлү зәлзәләләр олаҹаг, ҝаһ бурада, ҝаһ орада гытлыглар вә хәстәликләр олаҹаг. Инсанлар дәһшәтли мәнзәрәләрин... шаһиди олаҹаг» (Лука 21:7, 10, 11).

Бу ҝүн биз Исанын сөзләринин јеринә јетдијини ајдын ҝөрүрүк. Тезликлә Иса писләри мәһв етмәк үчүн ҝәләҹәк. Сонда һәтта Шејтан да мәһв олунаҹаг! Бүтүн јер үзү Ҹәннәтә чевриләҹәк. Һамы бир-бирилә, һәтта һејванларла сүлһ ичиндә јашајаҹаг. «Гурдла гузу сүлһдә јашајаҹаг, бәбирлә чәпиш јан-јана узанаҹаг. Бузов, аслан вә бәсләнмиш һејван бир јердә олаҹаг. Онлары балаҹа ушаг отараҹаг... Онлардан хәтәр ҝәлмәјәҹәк» (Әшија 11:6, 9). «Һеч бир сакин “хәстәјәм” демәјәҹәк... О вахт корларын ҝөзләри ачылаҹаг, карларын гулаглары ешидәҹәк» (Әшија 33:24; 35:5). Һәтта өлүләр дә дирилдиләҹәк. «Күлли-Ихтијар Јеһова бүтүн үзләрдән ҝөз јашларыны силәҹәк», һәмчинин «артыг өлүм олмајаҹаг. Нә дәрд, нә фәрјад, нә дә ағры олмајаҹаг» (Әшија 25:8; Вәһј 21:4). Аллаһын јер үзүнә даир илк нијјәти о заман јеринә јетәҹәк. Неҹә дә ҝөзәл үмиддир!

Аллаһ Ҹәннәтдә јашамаг мүкафатыны кимләрә верәҹәк? Иманлы инсанлара — һәгиги имана саһиб олан инсанлара!

Унутмајын ки, һәгиги иман Аллаһын Кәламындан олан дәгиг билијә әсасланыр. Буна ҝөрә дә Аллаһы вә Исаны даһа јахшы танымаға чалышын!

Һәгиги иман салеһ әмәлләрлә тәсдигләнир. Аллаһын Кәламында дејилир: «Руһсуз бәдән өлү олдуғу кими, әмәлсиз иман да өлүдүр» (Јагуб 2:26). Јахшы ишләр ҝөрмәклә сиз Аллаһын гүввә, әдаләт, һикмәт вә мәһәббәт кими ҝөзәл  кејфијјәтләрини әкс етдирәҹәксиниз. Аллаһа мәгбул олан бу хүсусијјәтләри өзүнүздә јетишдирмәјә чалышын!

Һәгиги имана саһиб олмаг сизә бол немәтләр ҝәтирәҹәк. Һәгигәтән дә, әсл иман хошбәхтлијин ачарыдыр. Онун сајәсиндә биз инди вә ҝәләҹәкдә әбәдијјән хошбәхтлијә наил ола биләрик!