БУ ҜҮН бир чохлары иманлы олдугларыны иддиа едир. Лакин Иса өјрәдирди ки, јалныз аз сајда инсан һәгиги имана малик олаҹаг. О демишди: «Дар гапыдан ҝирин, чүнки мәһвә апаран гапы енли, јол исә ҝенишдир вә чох адам бу јолла ҝедир. Амма һәјата апаран гапы дар, јол исә енсиздир вә бу јолу аз адам тапыр» (Мәтта 7:13, 14).

Бу ҝүн инсанлар әсл имана саһиб олдугларыны неҹә сүбут едирләр? Иса демишди: «Онлары бәһрәләриндән таныјаҹагсыныз. Һеч тикан колундан үзүм, гангал колундан әнҹир јығарлар? Ејнилә дә һәр јахшы ағаҹ јахшы мејвә верир, чүрүк ағаҹ исә јарарсыз мејвә верир» (Мәтта 7:16, 17). Демәли, әсл иман «јахшы мејвә верир». Бу, инсанлары Аллаһа мәгбул хүсусијјәтләр тәзаһүр етдирмәјә тәшвиг едир. Онлар буну неҹә едирләр?

Һәгиги имана саһиб олан инсанлар ҝүҹләриндән вә сәлаһијјәтләриндән Аллаһы шәрәфләндирмәк вә башгаларынын рифаһы үчүн истифадә едирләр. Иса Мәсиһ өјрәдирди: «Аранызда бөјүк олмаг истәјән гуллуғунузда дурмалыдыр» (Марк 10:43). Иманлы инсанлар нә евдә, нә дә чөлдә залымлыг етмирләр. Онлар һәјат јолдашлары илә нәвазишлә рәфтар едир, онлары гијмәтләндирир вә еһтијаҹларыны мәһәббәтлә тәмин едирләр. Мүгәддәс Китабда дејилир: «Еј әрләр, арвадларынызы һәмишә севин вә онларла сәрт давранмајын» (Колослулара 3:19). «Еј әрләр, һәр бириниз һәјат јолдашынызла анлајышла давранын. Гадын даһа зәиф варлыг олдуғу үчүн она һөрмәт гојун ки, дуаларынызын гаршысыны һеч нә кәсмәсин. Ахы сиз дә онларла бирликдә Аллаһын лүтфү илә верилән һәјат әнамынын варисисиниз» (1 Бутрус 3:7).

Һәгиги имана саһиб олан гадын да, өз нөвбәсиндә, «әринә дәрин һөрмәт» бәсләмәлидир (Ефеслиләрә 5:33). Гадынлар «әрләрини вә ушагларыны» севмәлидирләр (Титуса 2:4). Әсл имана малик олан валидејнләр ушаглары илә вахт кечирир вә онлара Аллаһын ганун вә принсипләрини өјрәдирләр. Онлар евдә, ишдә, бир сөзлә һәр јердә башгаларына һөрмәт вә еһтирам ҝөстәрирләр. Онлар Мүгәддәс Китабын «һөрмәт ҝөстәрмәкдә бир-биринизи габаглајын» мәсләһәтинә әмәл едирләр (Ромалылара 12:10).

Аллаһын хидмәтчиләри Мүгәддәс Јазыларын «рүшвәт алмајын» әмринә риајәт едирләр (Чыхыш 23:8). Өз сәлаһијјәтләриндән һагсыз газанҹ үчүн истифадә етмирләр. Әксинә, онлар башгаларына, хүсусилә дә еһтијаҹы оланлара көмәк етмәк үчүн әлләриндән ҝәләни едирләр. Аллаһын хидмәтчиләри нөвбәти мәсләһәтә диггәт јетирирләр: «Јахшылыг етмәји, варынызы башгалары илә бөлүшмәји јаддан чыхартмајын, чүнки бу ҹүр гурбанлар Аллаһа хошдур» (Ибраниләрә 13:16). Буна ҝөрә дә онлар Исанын: «Вермәк алмагдан даһа чох хошбәхтлик ҝәтирир» сөзләринин һәгигилијинә өзләри әмин олмушлар (Һәвариләрин ишләри 20:35).

Иманлы инсанлар Аллаһын ганунларына ҹанла-башла табе олурлар вә онлар үчүн  «Онун әмрләри... ағыр дејил» (1 Јәһја 5:3). Онлар баша дүшүрләр ки, «Јеһованын гануну камилдир,.. бујруглары доғрудур, үрәји севиндирир, Јеһованын әмри сафдыр, ҝөзләрә нур верир» (Зәбур 19:7, 8).

Һәмчинин әсл иман Аллаһын хидмәтчиләрини ајры-сечкилик етмәмәјә тәшвиг едир. Онлар һеч бир ирги, өлкәни вә ја фәргли сосиал тәбәгәдән олан инсанлары диҝәриндән үстүн тутмур, әксинә, Аллаһын дүшүнҹә тәрзини әкс етдирирләр. «Аллаһ ајры-сечкилик етмәјән Аллаһдыр, һәр халгын ичиндә Ондан горхан вә дүзҝүн иш ҝөрән адамдан разыдыр» (Һәвариләрин ишләри 10:34, 35).

Һәгиги иман инсанлары «һәр саһәдә дүрүст» олмаға тәшвиг едир (Ибраниләрә 13:18). Һәмчинин иманлы инсан гејбәтдән вә бөһтандан чәкинир. Аллаһын бәјәндији инсаны Давуд пејғәмбәр белә тәсвир едир: «Дилиндән бөһтан чыхмаз, башгасына пислик етмәз, достуна гара јахмаз» (Зәбур 15:3).

Әсл имана малик олан инсанларын инанҹлары јалныз Мүгәддәс Китаба әсасланыр. Онлар инанырлар ки, «Мүгәддәс Јазылардакы һәр кәлмә Аллаһдандыр вә тәлим, тәнбеһ, ислаһ үчүн, һәм дә салеһлијә ујғун тәрбијә үчүн фајдалыдыр» (2 Тимутијә 3:16). Онлар башгалары илә мүнасибәтләриндә «јухарыдан назил олан һикмәт»и әкс етдирирләр; бу һикмәт «сафдыр, сонра сүлһпәрвәр, мүлајим, итаәткардыр, мәрһәмәтли вә фајдалы бәһрәләрлә долудур» (Јагуб 3:17). Онлар Аллаһа мәгбул олмајан адәт-әнәнәләрдән вә спиритизмин бүтүн нөвләриндән — фалчылыг, ҹадуҝәрлик вә бу кими шејләрдән гачыр, о ҹүмләдән өзләрини бүтләрдән горујурлар (1 Јәһја 5:21).

Муса пејғәмбәр демишди: «Аллаһын Јеһованы бүтүн гәлбинлә, бүтүн варлығынла, вар ҝүҹүнлә севмәлисән» (Ганунун тәкрары 6:5). Иманлы инсанлар бу ҹүр мәһәббәти Аллаһа тәзаһүр етдирирләр. Онлар Аллаһын адына һөрмәтлә јанашырлар. Онлар Јеһоваја шүкүр едир вә Онун адыны иманла чағырырлар (Зәбур 105:1). Аллаһын хидмәтчиләри: «Башгасыны өзүнүзү севдијиниз кими севин» әмринә риајәт едирләр (Лавилиләр 19:18). Онлар зоракылығы рәдд едир вә «һамы илә сүлһдә олмаға» чалышырлар (Ромалылара 12:18). Онлар мәҹази мәнада «гылынҹларындан ҝаваһын, низәләриндән ораг» дүзәлдирләр, јәни мүһарибә етмәји өјрәнмирләр (Әшија 2:4). Бунун сајәсиндә онларын арасында мәһәббәт вар вә онлар үмумдүнја гардашлыгдан һәзз алырлар (Јәһја 13:35). Бәс сиз бу ҝүн белә инсанлар таныјырсыныз?