ФӘСИЛ 37

Нә үчүн вәфтиз олунум?

Доғру вә ја јанлыш олдуғуну гејд ет:

Вәфтиз мәсиһиләр үчүн шәртдир.

□ Доғру

□ Јанлыш

Вәфтизин әсас мәгсәди сәни ҝүнаһдан чәкиндирмәкдир.

□ Доғру

□ Јанлыш

Вәфтиз хиласа јол ачыр.

□ Доғру

□ Јанлыш

Вәфтиз олунмамысанса, һәрәкәтләринә ҝөрә Аллаһын гаршысында мәсулијјәт дашымырсан.

□ Доғру

□ Јанлыш

Достларынын артыг вәфтиз олунубса, сән дә вәфтиз олуна биләрсән.

□ Доғру

□ Јанлыш

ӘҜӘР Аллаһын ганунларына ујғун јашајырсанса, Она јахынлашмаға чалышырсанса вә әгидән барәдә башгаларына данышырсанса, вәфтиз олунмаг барәдә дүшүнмәјин тәбиидир. Бәс неҹә дүшүнүрсән, бу аддымы атмаға һазырсан? Ҝәл јухарыдакы фикирләри мүзакир едәк.

● Вәфтиз мәсиһиләр үчүн шәртдир.

Доғру. Иса Мәсиһ демишди ки, онун шаҝирдләри вәфтиз олунмалыдыр (Мәтта 28:19, 20). О өзү дә вәфтиз олунмушду. Онун ардынҹа ҝетмәк үчүн сән дә вәфтиз олунмалысан. Амма бу гәрары вермәк үчүн кифајәт гәдәр јеткин олмалысан вә буну үрәкдән истәмәлисән.

● Вәфтизин әсас мәгсәди сәни ҝүнаһдан чәкиндирмәкдир.

Јанлыш. Вәфтиз олунан кәс һамыја бәлли едир ки, һәјатыны Аллаһа һәср едиб. Һәсролунма сәнә әслиндә ҝөрмәк истәдијин шејләри гадаған едән мүгавилә дејил. Әксинә, Јеһованын нормаларына ујғун јашамаг истәдијин үчүн һәјатыны Она һәср едирсән.

● Вәфтиз хиласа јол ачыр.

Доғру. Мүгәддәс Китабда дејилир ки, вәфтиз хилас олмаг үчүн ваҹиб аддымдыр (1 Бутрус 3:21). Амма вәфтиз бәдбәхт һадисәләр вахты бизи горујан сығорта сәнәдинә бәнзәмир. Инсан Јеһованы севдији вә Она бүтүн гәлбилә әбәдијјәт боју хидмәт етмәк истәдији үчүн вәфтиз олунур (Марк 12:29, 30).

● Вәфтиз олунмамысанса, һәрәкәтләринә ҝөрә Аллаһын гаршысында мәсулијјәт дашымырсан.

Јанлыш. Јагуб 4:17 ајәсиндә јазылыб: «Әҝәр кимсә дүзҝүн иши неҹә ҝөрмәји билир, амма ҝөрмүрсә, о, ҝүнаһ едир». Шәрт дејил инсан вәфтиз олунуб, ја јох. Буна ҝөрә дә нәјин дүзҝүн олдуғуну билирсәнсә, һәјат јолун барәдә дүшүнә биләҹәк гәдәр јеткинсәнсә, бәлкә дә инди бу барәдә валидејнләринлә вә ја јеткин мәсиһи илә данышмағын әсл вахтыдыр. Онлар сәнә вәфтиз олунмағын үчүн нә етмәли олдуғуну дејәҹәкләр.

● Достларынын артыг вәфтиз олунубса, сән дә вәфтиз олуна биләрсән.

Јанлыш. Вәфтиз олунмаг истәји сәнин үрәјиндән ҝәлмәлидир (Зәбур 110:3). Сән Јеһованын Шаһиди олмағын нә демәк олдуғуну там баша дүшәндә вә үзәринә бу өһдәлији ҝөтүрмәјә һазыр олдуғуна әмин оланда вәфтиз олмалысан (Ваиз 5:4, 5).

Һәјаты дәјишән гәрар

Вәфтиздән сонра һәјатын дәјишәҹәк. Бу гәрар чохлу немәтләрә јол ачыр. Һәмчинин үзәринә бөјүк мәсулијјәт гојур. Јәни сән һәср олунаркән Јеһоваја вердијин сөзә ујғун јашамалысан.

Һәјатыны Аллаһа һәср етмәјә һазырсан? Онда хошбәхт инсансан. Гаршында шәрәфли бир јол ачылыб: өмүр боју Јеһоваја ҹанла-башла хидмәт едиб Она там сәдагәтини сүбут едә биләрсән (Мәтта 22:36, 37).

НӨВБӘТИ ФӘСИЛДӘ Ән јахшы һәјат јолуну сечмәк үчүн гаршына һансы мәгсәдләри гоја биләрсән?

АЧАР АЈӘ

«Бәдәнинизи дири, мүгәддәс вә мәгбул гурбан кими Аллаһа тәгдим един. Бу јолла сиз ағылла ибадәт етмиш олаҹагсыныз» (Ромалылара 12:1).

МӘСЛӘҺӘТ

Валидејнләринлә мәсләһәтләшиб јығынҹагда кимдәнсә хаһиш ет ки, сәнә руһани инкишаф етмәјә көмәк еләсин (Һәвариләрин ишләри 16:1—3).

БИЛИРСӘН?

Вәфтиз инсаны хилас олмаг үчүн ишарәләјир (Һизгијал 9:4—6).

ҺӘРӘКӘТ ПЛАНЫ!

Вәфтиз олунмаг үчүн Мүгәддәс Китабдакы нөвбәти тәлимләри даһа дәриндән өјрәнәҹәјәм: ․․․․․

Бу мөвзу илә бағлы валидејнләримә вермәк истәдијим суаллар: ․․․․․

НЕҸӘ ДҮШҮНҮРСӘН?

● Нә үчүн вәфтиз ҹидди аддымдыр?

● Ҝәнҹин вәфтиз олунмаг гәрарыны тез вермәсинә сәбәб нә ола биләр?

● Һансы сәбәбә ҝөрә ҝәнҹ һәсролунманы вә вәфтизи јубада биләр?

[Јазы]

«Вәфтиз олундуғуму јадда сахламаг мәнә дүзҝүн гәрарлар вермәјә вә јанлыш јола гәдәм гојмамаға көмәк едирди» (Һоли).

[Чәрчивә/шәкил]

Вәфтизлә бағлы тез-тез верилән суаллар

Вәфтиз нәјин символудур? Суја тамамилә батырылыб чыхарылмаг о демәкдир ки, сән өзүн үчүн јашадығын һәјат тәрзи үчүн өлүб, Јеһованын ирадәсини јеринә јетирмәк үчүн дирилирсән.

Һәјатыны Јеһоваја һәср етмәк нә демәкдир? О демәкдир ки, сән өзүнү инкар едирсән вә һәр шејдән өнҹә Јеһованын ирадәсини јеринә јетирәҹәјинә сөз верирсән (Мәтта 16:24). Вәфтиз олунмаздан әввәл дуа едиб өзүнү Јеһоваја һәср етмәк лазымдыр.

Вәфтиз олунмаг үчүн неҹә бир һәјат сүрмәк лазымдыр? Аллаһын Кәламында јазыланлара ујғун јашамаг вә иманын барәдә башгаларына данышмаг лазымдыр. Һәмчинин дуа етмәклә вә Аллаһын Кәламыны арашдырмагла Онунла достлуг мүнасибәтини мөһкәмләндирмәк лазымдыр. Башгалары сәни мәҹбур едир дејә јох, өз истәјинлә Јеһоваја хидмәт етмәлисән.

Вәфтиз олмаг үчүн нечә јашда олмалысан? Јаш ваҹиб амил дејил. Бунунла белә, һәсролунманын мәнасыны баша дүшмәк үчүн кифајәт гәдәр бөјүк олмалысан, јеткин олмалысан.

Бәс әҝәр сән вәфтиз олунмаг истәјирсән, амма валидејнләрин дејир бир аз ҝөзлә, онда неҹә? Ҝөрүнүр онлар истәјир ки, сән мәсиһи һәјатында бир аз тәҹрүбә газанасан. Онларын мәсләһәтинә гулаг ас, бу вахтдан Јеһова илә достлуг мүнасибәтини инкишаф етдирмәк үчүн истифадә ет (1 Ишмуил 2:26).

[Чәрчивә]

Ҹәдвәл

Вәфтиз олунмаг барәдә дүшүнүрсән?

Ашағыдакы суаллар вә фикирләр васитәсилә вәфтизә нә дәрәҹәдә һазыр олуб-олмадығыны мүәјјәнләшдир. Ҹавабларыны јазмаздан әввәл ҝәтирилмиш ајәләри оху.

Һал-һазырда Јеһоваја етибар етдијин нәләрдән ҝөрүнүр? (Зәбур 71:5). ․․․․․

Ағлыны јахшыны писдән ајырмаға өјрәшдирдијин нәдән ҝөрүнүр? (Ибраниләрә 5:14). ․․․․․

Нә гәдәр чох дуа едирсән? ․․․․․

Конкрет мөвзулар барәдә дуа едирсән? Дуаларын Јеһоваја олан мәһәббәтин һагда нә дејир? (Зәбур 17:6). ․․․․․

Дуаларынла бағлы мәгсәдләрини јаз. ․․․․․

Мүгәддәс Китабы мүнтәзәм мүталиә едирсән? (Јушә 1:8). ․․․․․

Фәрди мүталиәндә нәләри арашдырырсан? ․․․․․

Фәрди мүталиәнлә бағлы мәгсәдләрини јаз. ․․․․․

Тәблиғ хидмәтин сәмәрәлидир? (Мәсәлән: Мүгәддәс Китабын әсас тәлимләрини кимәсә изаһ едә билирсән? Мараг ҝөстәрән инсанла тәкрар сөһбәт едирсән? Мүгәддәс Китаб дәрси башламаг үчүн әлиндән ҝәләни едирсән?)

□ Бәли □ Хејр

Валидејнләрин хидмәтә чыхмајанда да сән чыхырсан? (Һәвариләрин ишләри 5:42).

□ Бәли □ Хејр

Тәблиғ хидмәтинлә бағлы мәгсәдләрини јаз (2 Тимутијә 2:15). ․․․․․

Јығынҹаг ҝөрүшләриндә мүнтәзәм, јохса һәрдәнбир иштирак едирсән? (Ибраниләрә 10:25). ․․․․․

Ҝөрүшләрдә фәал олдуғун нәдән ҝөрүнүр? ․․․․․

Валидејнләрин ҝөрүшләрдә иштирак етмәјәндә дә сән иштирак едирсән (әҝәр онлар иҹазә верирләрсә)?

□ Бәли □ Хејр

Аллаһын истәјини үрәкдән јеринә јетирирсән? (Зәбур 40:8).

□ Бәли □ Хејр

Һәмјашыдларынын тәсиринә ујмадығын һаллар олубса, онлары јаза биләрсән? (Ромалылара 12:2). ․․․․․

Јеһоваја мәһәббәтинин сојумамасы үчүн нә етмәји мәгсәд гојмусан? (Јәһуда 20, 21). ․․․․․

Валидејнләрин вә достларын Јеһоваја ибадәт етмәји дајандырсалар, сән ибадәт етмәјә давам едәрсән? (Мәтта 10:36, 37).

□ Бәли □ Хејр

[Шәкил]

Никаһ кими вәфтиз дә инсанын һәјатыны дәјишир. Бу аддыма гејри-ҹидди јанашмаг олмаз