Сизҹә, һәјатын мәнасы вар? Тәкамүлчү Вилјам Провајн дејир: «Тәкамүл просеси һаггында өјрәндикләримиз бизим үчүн бөјүк әһәмијјәт кәсб етдијинә ҝөрә һәјатымызын мәнасына тәсир ҝөстәрир». О һансы нәтиҹәјә ҝәлир? «Инсанларын вә ја Каинатын мөвҹудлуғунда һеч бир мәна ҝөрә билмирәм»³².

Ҝәлин бу сөзләрин үзәриндә бир аз дәриндән дүшүнәк. Әҝәр һәјатын һеч бир мәнасы јохдурса, онда белә чыхыр ки, һәјатымызын мәгсәди анҹаг бәзи јахшы ишләри ҝөрмәкдән вә ирси хүсусијјәтләримизи ҝәләҹәк нәслә өтүрмәкдән ибарәтдир. Өләндән сонра биз әбәдилик јох олаҹағыг. Дүшүнмәк, нәтиҹә чыхармаг вә һәјатда мәна ахтармаг хүсусијјәти олан бејнимиз садәҹә тәбиәтин «тәсадүфи» мәһсулудур.

Бу һәлә сон дејил. Тәкамүлә инананларын чоху һесаб едир ки, Аллаһ мөвҹуд дејил. Мөвҹуд олса да, инсанларла марагланмыр. Белә олан һалда, бизим ҝәләҹәјимиз сијасәтчиләрин, алимләрин вә дин рәһбәрләринин әлиндә олмуш олур. Онларын әмәлләрини нәзәрә алсаг, белә чыхыр ки, хаос, әдавәт вә коррупсија инсан ҹәмијјәтинин ајрылмаз һиссәси олараг галаҹаг. Вә әҝәр тәкамүл һәгигәтдирсә, онда бизә нөвбәти сөзләрлә разылашмагдан башга бир шеј галмыр: «Ҝәлин јејиб-ичәк, онсуз да сабаһ өләҹәјик» (1 Коринфлиләрә 15:32).

Лакин бунун әксинә, Мүгәддәс Китабда дејилир ки, «һәјат мәнбәји» Аллаһдыр (Зәбур 36:9). Бу сөзләрдә бөјүк мәна вар.

Әҝәр Мүгәддәс Китабын дедикләри һәгигәтдирсә, демәли, һәјат мәнасыз дејил. Јараданымызын ирадәсинә ујғун јашамаг истәјән һәр кәс үчүн Онун ҝөзәл нијјәти вар (Ваиз 12:13). Аллаһын бу нијјәтинә әсасән Онун гураҹағы јени дүнјада хаосун, әдавәтин, коррупсијанын, һәтта өлүмүн белә әсәр-әламәти галмајаҹаг (Зәбур 37:10, 11; Әшија 25:6—8).

Буна ҝөрә дә, бүтүн дүнјада милјонларла инсан инаныр ки, һәјата мәна гатан Аллаһ һаггында билијә јијәләнмәк вә Она итаәт етмәкдир! (Јәһја 17:3). Бу, хүлја дејил. Чүнки һәр шеј тамамилә ајдындыр — һәјатын Јараданы вар.