1. Сеһрбазлыг, овсун вә ҹадуја инам нә гәдәр ҝениш јајылыб?

 «АФРИКАДА ҹадуҝәрләрин олуб-олмадығыны сорушмаг јерсиз суалдыр. Белә ки, һәр тәбәгәдән олан инсанлар ҹадунун олдуғуна инаныр, үстәлик, буна чох бөјүк өнәм верир», — дејә бир китабда јазылыб («African Traditional Religion»). Сеһрбазлыға, овсуна вә ҹадуја һәм савадсыз инсанлар инаныр, һәм дә али тәһсилли инсанлар. Ислам дининин вә Христиан дининин дә рәһбәрләри онларын сырасындадыр.

2. Инанҹа ҝөрә, кимләр сирли гүввәләрдән истифадә едә билир?

² Африкада белә һесаб едирләр ки, сирли бир гүввә мөвҹуддур. Ону Аллаһ идарә едир. Өлмүш әҹдадларын руһлары да ондан истифадә едир. Һәтта инсанларын дә бәзиләри үчүн бу гүввә әлчатандыр. Ондан ја јахшы мәгсәдлә (ағ маҝија), ја да пис мәгсәдлә (гара маҝија) истифадә едирләр.

3. Гара маҝија нәдир вә инанҹа ҝөрә онун васитәсилә нә етмәк олар?

³ Гара маҝија дүшмәнләрә үнванланыр. Инанҹа ҝөрә, бу маҝијадан истифадә едәнләр јарасалары, гушлары, милчәкләри вә диҝәр ҹанлылары инсанларын үстүнә ҝөндәрмәк гүввәсинә саһибдир. Үстәлик, ҝуја бу маҝија илә инсанлары сонсуз етмәк, хәстәләндирмәк, һәтта өлдүрмәк белә олар.

4. Ҹадуҝәрләрлә бағлы һансы инанҹлар вар вә кечмиш ҹадуҝәрләр нә дејирләр?

⁴ Ҹадуҝәрлик дә буна бәнзәр шејдир. Дејиләнә ҝөрә, ҝуја ҹадуҝәрләр ҝеҹәләр өз бәдәнләрини тәрк едир, учуб ја башга ҹадуҝәрләрлә ҝөрүшүр, ја да инсанларын һәјатыны мәһв едир. Анҹаг буна ҹадуҝәрликдән әл чәкмиш адамларын сөзләриндән башга һеч бир сүбут јохдур. Мәсәлән, Африка журналларынын бириндә кечмиш ҹадуҝәрләрин (әксәријјәти јенијетмә гызлар иди) сөзләри ҝәтирилир: «Мән мотосиклет гәзалары төрәдәрәк 150 нәфәри өлдүрмүшәм», «Мән беш ушағы ганыны ичиб өлдүрмүшәм», «Мәни атдығына ҝөрә үч севҝилими өлдүрмүшәм».

5. Ағ маҝија нәдир вә онунла мәшғул оланлар нә едирләр?

⁵ Ағ маҝија исә ҝуја инсаны писликләрдән горујур. Ағ маҝија илә мәшғул оланлар сеһрли үзүкләр вә ја һәмаилләр тахырлар. Горујуҹу һәбләр гәбул едирләр, јахуд да бәдәнләринә горујуҹу мәлһәмләр сүртүрләр. Евләриндә, јахуд да јердә ҝуја горујуҹу гүввәјә малик олан әшјалар ҝизләдирләр. Ичиндә Гурандан, јахуд да Мүгәддәс Китабдан ајәләр јазылмыш һәмаилләрдән истифадә едирләр.

6. Шејтан вә ҹинләр кечмишдә нәләр етмишләр, анҹаг нәји унутмамалыјыг?

⁶ Дүздүр, Шејтан вә ҹинләр инсанларын тәһлүкәли дүшмәнидир. Онлар инсанларын ағлына, һәјатына тәсир едә билирләр. Әввәлләр һәтта инсанларын вә һејванларын дахилинә ҝириб онлара әзаб верирдиләр (Мәтта 12:43—45). Анҹаг онлар мүәјјән гүввәјә саһиб олсалар да, бу о демәк дејил ки, истәдикләрини едә биләрләр.

7. Шејтан бизи нәјә инандырмаг истәјир вә буна һансы нүмунәни чәкмәк олар?

⁷ Шејтан јаланчылыгда маһирдир. О, инсанлары алдадыр, ҝүҹүнүн сонсуз олдуғуна онлары инандырыр. Белә бир нүмунәјә бахаг: Африка өлкәләринин бириндә әсҝәрләр дүшмәнләрини горхутмаг үчүн дөјүш вахт сәсҝүҹләндириҹиләрдән истифадә етмишдиләр. Онлар дүшмәнләриндә елә тәсәввүр јаратмаг истәјирдиләр ки, ҝуја үстләринә ағыр артиллерија, бөјүк орду ҝәлир. Шејтан да истәјир ки, инсанлар онун сонсуз гүввәјә саһиб олдуғуну дүшүнсүн. Онун мәгсәди инсанлары горхутмаг, онлара Јеһованын јох, өз истәјини еләтдирмәкдир. Ҝәлин ҝөрәк Шејтан инсанлары һансы үч јалана инандырыр.

8. Шејтанын јајдығы јаланлардан бири һансыдыр?

⁸ Шејтанын јајдығы јаланлардан бири будур: һеч бир бәдбәхтлик тәсадүфән баш вермир. Әҝәр бу киминсә тәрәфиндән төрәдилмәјибсә, демәли сеһрли гүввә илә олуб. Мәсәлән, тутаг ки, ушаг малјаријадан өлүб. Онун анасы билир ки, бу хәстәлик ушаға ағҹаганаддан кечиб. Амма о һәм дә фикирләшир ки, кимсә ҹаду едиб ағҹаганады ушағы санҹмаға ҝөндәриб.

9. Мүгәддәс Китаба әсасән, нәјә ҝөрә һәр шејин сәбәбкары Шејтан дејил?

⁹ Дүздүр, Шејтан бәла төрәдә биләр. Амма бу о демәк дејил ки, бүтүн бәлаларын сәбәбкары одур. Мүгәддәс Китабда дејилир: «Гачышы һәмишә бәрк гачанлар удмур, дөјүшдә һәмишә иҝидләр галиб ҝәлмир. Чөрәк һәмишә мүдрикләрә, вар-дөвләт һәмишә ағыллылара нәсиб олмур, уғуру да һәмишә биликли адам газанмыр. Чүнки һамысынын габағына вахт вә тәсадүф чыхыр» (Ваиз 9:11). Елә ола биләр ки, һамыдан бәрк гачан гачышчы јарышда галиб ҝәлмәсин. Тәсадүфән баш верән һадисә уҹбатындан о, мәғлуб ола биләр. Мәсәлән, бүдрәјиб јыхыла биләр, хәстәләнәр, әзәләси дартылар. Бу шејләр һәр адамын башына ҝәлә биләр. Бу о демәк дејил ки, буну Шејтан едиб, јахуд инсана ҹаду олунуб. Бу, садәҹә тәсадүфдүр.

10. Ҹадуҝәрләр һагда нә дејирләр, бәс бунун јалан олдуғуну һарадан билирик?

¹⁰ Шејтанын јајдығы икинҹи јалан будур: ҹадуҝәрләр ҝеҹәләр бәдәнләриндән чыхыб ја башга ҹадуҝәрләрлә ҝөрүшүр, ја да инсанлары өлдүрүр. Дүшүнүн: Ҹадуҝәрин бәдәниндән чыхыб учан нәдир? Артыг әввәлки дәрсләрдә өјрәндик ки, инсанын ҹисминдән һеч нә ајрыла билмәз. Руһ һәјат гүввәсидир. Бу гүввә инсанын ҹисмини ҹанландырыр, амма бәдәндән, инсанын ҹисминдән ајры һеч нә етмәјә гадир дејил.

11. Һарадан билирик ки, ҹадуҝәрләр бәдәнләрини тәрк едә билмәзләр вә сиз буна инанырсыныз?

¹¹ Инсанын ҹисмини тәрк едиб, јахшы, јахуд шәр иш ҝөрән руһ јохдур. Буна ҝөрә дә ҹадуҝәрләр бәдәнләриндән чыха билмәзләр. Онлар данышдыглары шејләри әслиндә етмирләр.

12. Шејтан инсанлары нәләрисә етдикләринә неҹә инандырыр?

¹² Бәс әввәлләр ҹадуҝәрликлә мәшғул олмуш адамларын сөзләрини неҹә баша дүшәк? Шејтан инсанлары инандырыр ки, һансыса һадисәләр онларын башына ҝәлир, әслиндә исә белә шеј баш вермир. Шејтан ҝөрүнтүләр васитәсилә инсанларда елә тәсәввүр јарадыр ки, ҝуја онлар нәјисә ҝөрүрләр, ешидирләр, јахуд да едирләр. Бүтүн бунларла Шејтан инсанлары Јеһовадан узаглашдырмаг, Мүгәддәс Китабын сәһв олдуғуна инандырмаг истәјир.

13. а) Ағ маҝија јахшы маҝијадыр? б) Мүгәддәс Китабда ҹиндарлыгла бағлы нә дејилир?

¹³ Үчүнҹү јалан будур: ағ маҝија јахшы маҝијадыр, гара маҝијанын гаршыны алыр. Мүгәддәс Китабда дејилмир ки, јахшы вә пис маҝија вар. Орада ҹиндарлығын бүтүн нөвләри мүһакимә олунур. Ҝөрүн Јеһова исраиллиләрә ҹиндарлыгла бағлы һансы ганунлары вермишди:

•   «Фала бахмајын, сеһрбазлыг етмәјин» (Лавилиләр 19:26).

•   «Ҹиндарлыг, јахуд бахыҹылыг едән киши вә ја гадын һөкмән өлдүрүлмәлидир. Онлары дашгалаг етмәк лазымдыр. Ганлары да өз бојунларына олаҹаг» (Лавилиләр 20:27).

•   «Аранызда... сеһрбаз, фала бахан, ҹадуҝәр, овсунчу, ҹиндар јанына ҝедән, ҝәләҹәји дејән, өлүләри чағыран олмамалыдыр» (Ганунун тәкрары 18:10—14).

14. Нәјә ҝөрә Јеһова ҹиндарлығы гадаған етмишди?

¹⁴ Бу ганунлардан ҝөрүнүр ки, Аллаһ халгынын ҹиндарлыгла мәшғул олмасыны истәмир. Јеһова халгыны севдији үчүн онлара бу ганунлары вермишди. О истәмирди ки, онлар горхунун, мөвһуматын әсарәтиндә јашасынлар, ҹинләрин зүлмүнә мәруз галсынлар.

15. Мүгәддәс Китаб Јеһованын Шејтандан ҝүҹлү олдуғуну неҹә ҝөстәрир?

¹⁵ Мүгәддәс Китабда ҹинләрлә бағлы чох шеј јазылмајыб, онлар нәји едә биләрләр, нәји едә билмәзләр. Орада јазылыб ки, Јеһова Аллаһ Шејтандан вә ҹинләрдән гүдрәтлидир. Јеһова Шејтаны ҝөјдән говуб (Вәһј 12:9). Диггәт јетирин ки, Шејтан Әјјубу сынаға чәкмәк үчүн Аллаһдан иҹазә истәмишди. Үстәлик, Аллаһ она Әјјубу өлдүрмәмәји тапшыранда бу әмрә табе олмушду (Әјјуб 2:4—6).

16. Биз кимә сығынмалыјыг?

¹⁶ Мәсәлләр 18:10 ајәсиндә дејилир: «Јеһованын ады мөһкәм галадыр. Салеһ ора гачыб горунар». Демәли, биз Јеһоваја сығынмалыјыг. Аллаһын хидмәтчиләри Шејтанын вә ҹинләрин шәр әмәлләриндән горунмаг үчүн овсунлар, һәбләр гәбул етмирләр, ҹадудан да горхмурлар. Онлар Мүгәддәс Китабдакы бу вәдә үрәкдән инанырлар: «Јеһова бүтүн јер үзүнү нәзәрдән кечирир ки, сидги-үрәкдән Она бағлы оланларын рифаһы үчүн ҝүҹүнү ҝөстәрсин» (2 Салнамәләр 16:9).

17. Јагуб 4:7 ајәси бизи нәјә әмин едир, анҹаг биздән нә тәләб олунур?

¹⁷ Әҝәр Јеһоваја ибадәт едирсинизсә, сиз дә буна әмин ола биләрсиниз. Јагуб 4:7 ајәсиндә јазылыб: «Аллаһа табе олун, Иблисә мүгавимәт ҝөстәрин вә о, сиздән гачаҹаг» (Јагуб 4:7). Әҝәр сиз Аллаһа-Таалаја хидмәт едирсинизсә, Она табе олурсунузса, әмин олун ки, О сизи горујаҹаг.