Мүгәддәс Китаб һәјатлары дәјишир

«Јеһоваја ҝери дөнмәли идим» (ИЛИ ХАЛИЛ).

ДОҒУЛДУҒУ ИЛ: 1976

ӨЛКӘ: КИПР

КЕЧМИШДӘ: ЈОЛУНУ АЗМЫШ ОҒУЛ

КЕЧМИШИМ. Мән Кипрдә доғулмушам, анҹаг Австралијада бөјүјүб боја-баша чатмышам. Валидејнләрим Јеһованын Шаһидидир. Онлар мәнә Јеһованы, Мүгәддәс Китабы севдирмәк үчүн әлләриндән ҝәләни едибләр. Анҹаг јенијетмә јашына чатанда јолуму аздым. Ҝеҹәләр евдән чыхыб јенијетмә јашда олан достларымын јанына ҝедирдим. Биз машын оғурлајырдыг, башымыза ҹүрбәҹүр ишләр ҝәлирди.

Әввәлҹә валидејнләримин наразылығындан горхдуғум үчүн һәр шеји ҝизлинҹә едирдим. Амма ҝетдикҹә бу горхуну итирдим. Јашҹа мәндән чох бөјүк олан адамларла достлуг етмәјә башладым. Онлар Јеһованы севмирдиләр, беләҹә, мәнә пис тәсир ҝөстәрирдиләр. Ахырда валидејнләримә дедим ки, даһа онларын дининдә олмаг истәмирәм. Онлар мәнә нә гәдәр көмәк етмәјә чалышсалар да, һеч нә алынмады. Валидејнләрим чох пәришан олмушду.

Евдән ҝедәндән сонра наркотикә гуршандым. Һәтта өзүм дә марихуана әкиб сатырдым. Әхлагсызлыг едирдим, ҝеҹә клубларына даданмышдым. Үстәлик, јаман тез өзүмдән чыхырдым. Кимсә хошума ҝәлмәјән нәсә десәјди, јахуд етсәјди, дәрһал гәзәбләнирдим, гышгырыб-бағырырдым, басыб һәмин адамы дөјүрдүм. Бир сөзлә, мәсиһијә нә олмаздыса, һәр шеји едирдим.

МҮГӘДДӘС КИТАБ ҺӘЈАТЫМЫ ДӘЈИШДИ. Бир наркоманла чох јахын дост олмушдуг. О, балаҹа оланда атасы вәфат етмишди. Биз тез-тез ҝеҹә јарысына кими сөһбәт едирдик. Бир дәфә онун үрәји ачылмышды, дејирди ки, атасы үчүн чох дарыхыр. Мән ушаглыгдан дирилмә үмиди барәдә билирдим. Бир дә ону ҝөрдүм ки, она Исадан, өлүләри дирилтмәсиндән, ҝәләҹәкдә јенә дә дирилдәҹәјиндән данышырам (Јәһја 5:28, 29). Она дејирдим: «Тәсәввүр едирсән, атаны ҝөрәҹәксән. Һәр биримиз әбәдијјән јер үзүндә, Ҹәннәтдә јашаја биләрик». Бу сөзләр достума чох ҝүҹлү тәсир етди.

Башга вахтларда достум ахырзамандан, Үч үгнумдан сөз салырды. Мән онун Мүгәддәс Китабыны ачыб она Јеһова Аллаһ, Иса Мәсиһ, ахырзаман барәдә ајәләри охујурдум (Јәһја 14:28; 2 Тимутијә 3:1—5). Достума Јеһова һагда данышдыгҹа, өзүм дә Јеһова барәдә дүшүнүрдүм.

Бир вахтлар валидејнләримин ағыр зәһмәтлә үрәјимә әкдији, мәним исә сүкунәтә гәрг етдијим һәгигәт тохумлары јаваш-јаваш ҹүҹәрмәјә башлады. Мәсәлән, бәзән достларымла наркотик гәбул едәндә бирдән Јеһова јадыма дүшүрдү. Достларымын чоху иддиа едирди ки, Аллаһы севир. Амма әмәлләри башга шеј дејирди. Мән онлар кими олмаг истәмирдим. Баша дүшүрдүм ки, нәсә етмәк лазымдыр. Јеһоваја ҝери дөнмәли идим.

Сөзсүз ки, баша дүшмәк бир шејдир, баша дүшдүјүнү етмәк ајры шеј. Бәзи дәјишикликләри етмәк асан олду. Чәтинлик чәкмәдән наркотики тәрҝитдим. Һәмчинин достларымла әлагәни кәсдим вә ағсаггалла Мүгәддәс Китабы өјрәнмәјә башладым.

Диҝәр дәјишикликләри исә етмәк чәтин олду. Гәзәбими һеч ҹүр ҹиловлаја билмирдим. Бәзән бир мүддәт һәр шеј јахшы ҝедирди, сонра исә өзүмү сахлаја билмирдим. Белә оланда өзүмү чох пис һисс едирдим, дүшүнүрдүм ки, бунун өһдәсиндән ҝәлә билмәјәҹәјәм. Пәришан һалда мәнимлә дәрс кечән ағсаггала јанашырдым. О, сәбирлә, мүлајимҹәсинә мәнә көмәк едирди. Бир дәфә мәнә «Ҝөзәтчи гүлләси»ндән тәслим олмамагла бағлы мәгаләни охутдурду *. Сонра мүзакирә етдик ки, гәзәбләнәндә һансы аддымлары атмалыјам. Тәдриҹән, һәмин мәгаләдәки фикирләри дүшүнәрәк, Јеһоваја чохлу дуа едәрәк гәзәбими ҹиловламағы баҹардым. 2000-ҹи илин апрел ајында Јеһованын Шаһиди кими вәфтиз олундум. Валидејнләрим сон дәрәҹә хошбәхт иди.

МӘНӘ ФАЈДАСЫ. Инди үрәјим раһатдыр, виҹданым исә тәмиздир. Ахы артыг наркотиклә, әхлагсызлыгла бәдәними мурдарламырам. Һәр нә илә мәшғул олсам да, истәр ишләјәндә, истәр ибадәт ҝөрүшүндә оланда, истәрсә дә әјләнәндә өзүмү хошбәхт һисс едирәм. Һәјата никбин ҝөзлә бахырам.

Јеһоваја шүкүр едирәм ки, елә валидејнләрим вар. Онлар һеч вахт мәндән әлләрини үзмәдиләр. Һәмчинин Јәһја 6:44 ајәси дә фикримдән чыхмыр: «Әҝәр мәни ҝөндәрмиш Атам ҹәлб етмәсә, һеч ким мәним ардымҹа ҝәлә билмәз». Баша дүшүрәм ки, Јеһова мәни ҹәлб етдији үчүн Она ҝери дөнә билдим. Бу исә мәним үчүн һәр шејдән гијмәтлидир.

«Атамын һәсрәтини чәкирдим» (МАРКО АНТОНИО АЛВАРЕЗ СОТО).

ДОҒУЛДУҒУ ИЛ: 1977

ӨЛКӘ: ЧИЛИ

КЕЧМИШИ: АҒЫР МЕТАЛ ГРУПУНУН ҮЗВҮ

КЕЧМИШИМ. Мән Ҹәнуби Американын ҹәнуб гуртараҹағында, Маҝеллан боғазынын саһилиндә јерләшән ҝөзохшајан Пунта-Аренас шәһәриндә бөјүмүшәм. Беш јашым оланда анамла атам бошанды. Буна ҝөрә дә мәни анам бөјүтдү. Өзүмү атылмыш һисс едирдим. Атамын һәсрәтини чәкирдим.

Анам Јеһованын Шаһидләри илә Мүгәддәс Китабы өјрәнирди вә мәни ибадәт евиндәки јығынҹаглара апарырды. Амма мәним јығынҹаглара ҝетмәкдән зәһләм ҝедирди. Јолда тез-тез гангарачылыг салырдым. 13 јашым оланда јығынҹаглара ҝетмәји тамамилә дајандырдым.

Һәмин вахтлар мусигини севирдим, бу саһәдә баҹарығымын олдуғуну да сездим. 15 јашымда фестивалларда, барларда вә шәнликләрдә ағыр метал мусигиси ифа едирдим. Чеврәмдә истедадлы мусигичиләрин олмасы мәндә классик мусигијә мараг ојатды. Јашадығым шәһәрдәки мусиги консерваторијасында тәһсил алдым. 20 јашым оланда тәһсилими давам етдирмәк үчүн пајтахт шәһәрә, Сантјагоја көчдүм. Ејни заманда ағыр метал групларында чалырдым.

Бу мүддәт әрзиндә ичимдә бир бошлуг вар иди. Бу бошлуғу долдурмаг үчүн аиләм һесаб етдијим груп јолдашларымла бирҝә ички ичир, наркотик чәкирдим. Ҝөрүнүшүмдән дә бәлли олдуғу кими, үсјанкар инсан идим. Гара рәнҝдә палтар ҝејинирдим, саггал сахлајырдым, сачымы һарадаса белимә гәдәр узатмышдым.

Ҝүнүм дава-далашла кечирди, полисләрлә арамда проблем јаранырды. Бир дәфә о гәдәр ичмишдим ки, мәни вә достларымы нараһат едән наркотик сатанларла далашдым. Онлар мәни елә дөјдүләр ки, чәнәм сынды.

Амма ән ағыр зәрбәни мәнә јахынларым вурмушду. Бир ҝүн өјрәндим ки, севҝилим илләрдир мәнә хәјанәт едир, өзү дә ән јахын достумла. Бүтүн достларым буну билирди, амма мәндән ҝизләдирдиләр. Чох сарсылмышдым.

Пунта-Аренаса гајытдым. Орада мусиги дәрси кечмәјә вә виолончел чалмаға башладым. Һәмчинин ағыр метал групларында чалмаға давам едирдим. Сусан адлы ҝөзәл гызла таныш олдум вә биз бирликдә јашамаға башладыг. Онун анасы Үч үгнума инанырды. Бир гәдәр сонра Сусан билди ки, мән Үч үгнума инанмырам. Мәндән сорушду: «Онда һансы дүздүр?» Дедим ки, Үч үгнум тәлими, әминәм, јаландыр, ди ҝәл, буну сәнә Мүгәддәс Китабдан сүбут едә билмәрәм. Амма билирдим буну ким едә биләр. Она дедим ки, Јеһованын Шаһидләри Мүгәддәс Китабдан һәгигәти ҝөстәрә биләрләр. Сонра узун илләрдир етмәдијим бир шеји етдим, Аллаһа дуа едиб Ондан көмәк истәдим.

Бир неҹә ҝүндән сонра мәнә үздән таныш ҝәлән бир кишидән Јеһованын Шаһиди олуб-олмадығыны сорушдум. Хариҹи ҝөрүнүшүм ону үркүтсә дә, ибадәт евиндәки ҝөрүшләрлә бағлы вердијим суаллара нәзакәтлә ҹаваб верди. Әмин идим ки, бу, дуама ҹавабдыр. Мән ибадәт евинә ҝетдим вә ән сон ҹәрҝәдә отурдум ки, мәни һеч ким ҝөрмәсин. Амма ушаглыгдан мәни ибадәт ҝөрүшләриндә ҝөрәнләрин чоху о дәгигә таныды. Онлар мәни саламлајыб, елә сәмими гуҹагладылар ки, гәлбимә сакитлик чөкдү. Санки евимә гајытмышдым. Балаҹа вахты мәнә Мүгәддәс Китаб дәрси кечән адамы ҝөрәндә ондан хаһиш етдим ки, мәнимлә јенидән дәрс кечсин.

МҮГӘДДӘС КИТАБ ҺӘЈАТЫМЫ ДӘЈИШДИ. Бир ҝүн Мәсәлләр 27:11 ајәсини охујурдум, орада дејилир: «Оғлум, һикмәтли ол, гәлбим севинсин». Ади инсанын Каинатын Јараданыны севиндирә биләҹәји фикри мәнә чох тәсир етди. Баша дүшдүм ки, Јеһова өмрүм боју һәсрәтиндә олдуғум Атадыр!

Сәмави Атамын үрәјини шад етмәк, Онун истәјини јеринә јетирмәк истәјирдим, фәгәт узун илләрдир ичкинин, наркотикин гулу идим. Мән Исанын Мәтта 6:24 ајәсиндәки сөзләрини баша дүшдүм. Орада дејилир ки, «һеч ким ики ағаја гуллуг едә билмәз». Вар ҝүҹүмлә дәјишикликләр етмәјә башлајанда 1 Коринфлиләрә 15:33 ајәсиндәки бу сөзләр мәнә тәсир етди: «Пис достлар јахшы әхлагы позур». Баша дүшдүм ки, ејни мәканлара ҝетсәм, ејни достларла отуруб-дурсам, бу вәрдишләрдән јаха гуртара билмәјәҹәјәм. Мүгәддәс Китабдакы мәсләһәт ајдындыр: гәти аддым атыб, мәни ҝүнаһа сүрүкләјән һәр шејдән тамамилә јаха гуртармалыјам (Мәтта 5:30).

Мәним үчүн ән чәтини ағыр метал мусигисини чалмағы вә динләмәји тәрҝитмәјим иди, чүнки мусигини чох севирдим. Амма јығынҹагдакы достларымын сајәсиндә нәһајәт буну баҹардым. Әјјашлығы вә наркотики атдым. Һәмчинин сачларымы кәсдим, саггалымы гырхдым вә тәкҹә гара рәнҝдә ҝејинмәдим. Сусана дејәндә ки, сачымы кәсдирмәк истәјирәм, бу она чох мараглы ҝәлди. О деди: «Ҝәлән дәфә мән дә сәнинлә ибадәт евинә ҝедәҹәјәм, ҝөрүм ора неҹә јерди!» Орада ҝөрдүкләри Сусанын хошуна ҝәлди вә о да Мүгәддәс Китаб дәрсинә башлады. Нәһајәт, Сусанла евләндик. 2008-ҹи илдә вәфтиз олунуб, Јеһованын Шаһиди олдуг. Биз чох шадыг ки, анамла бирликдә Јеһоваја хидмәт едирик.

МӘНӘ ФАЈДАСЫ. Мән бу дүнјадакы сахта хошбәхтликдән вә етибарсыз достлардан гуртулдум. Мусигини һәлә дә севирәм, амма инди бу мәсәләдә сечим едирәм. Өз тәҹрүбәмдән аиләмә вә башгаларына, хүсусилә дә ҝәнҹләрә көмәк етмәк үчүн истифадә едирәм. Истәјирәм онлара көмәк едим ки, бу дүнјанын тәклиф етдији шејләрин садәҹә үздән ҹәлбедиҹи ҝәлдијини, амма, әслиндә, зибил олдуғуну анласынлар (Филиппилиләрә 3:8).

Мәһәббәтин вә сүлһүн һөкм сүрдүјү мәсиһи јығынҹағында өзүмә сәдагәтли достлар тапдым. Ән әсасы, Јеһоваја јахынлашмагла, нәһајәт, ән јахшы Атаны тапдым!

[Һашијә]

[Јазы]

«Јеһова мәни ҹәлб етдији үчүн Она ҝери дөнә билдим»