«Инди өзүмә һөрмәт едирәм» (ВИКТОРИЈА ТАНГ).

• ДОҒУЛДУҒУ ИЛ: 1957

• ӨЛКӘ: АВСТРАЛИЈА

• КЕЧМИШДӘ: УШАГЛЫҒЫ ПИС КЕЧИБ

КЕЧМИШИМ.

Мән Јени Ҹәнуби Уелсин Нјукасл шәһәриндә бөјүмүшәм. Једди ушагдан бөјүјү идим. Анам зоракы иди, атам исә һәм зоракы, һәм дә ички дүшкүнү иди. Анам мәни дөјүр, сөјүрдү. Һәмишә дејирди ки, мән јарамаз ушағам, ҹәһәннәмдә јанаҹағам. Бу сөзләр мәни горхуја салырды.

Бәзән анам мәни о гәдәр дөјүрдү ки, мәктәбә дә ҝедә билмирди. Он бир јашым оланда мәни валидејнләримдән алдылар. Әввәлҹә дөвләтин ачдығы ушаг евинә, сонра исә монастыра вердиләр. Он дөрд јашында монастырдан гачдым. Анҹаг евимизә гајытмаг истәмәдим, одур ки, Сиднејин шәһәрдән кәнар әразиси олан Кингс Кроссун күчәләриндә јашамаға башладым.

Күчәдә јашајанда наркотикә, спиртли ичкиләрә гуршандым. Порнографијаја бахыр, фаһишәлик едирдим. Анҹаг бир дәфә башыма чох горхулу һадисә ҝәлди. Ҝеҹә клубунун јијәсинин евиндә галырдым. Бир ахшам онун јанына ики киши ҝәлди. О мәни јатаг отағына ҝөндәрди. Анҹаг орадан онларын сөһбәтини ешидирдим. Клубун саһиби мәни бу кишиләрә сатмаг истәјирди. Онлар мәни јүк ҝәмиси илә ҝизлиҹә Јапонијаја апараҹагдылар ки, орада барда ишләјим. Мән тәлаш ичиндә ејвандан тулланыб гачдым.

Сиднејә гонаг ҝәлмиш бир нәфәрлә растлашдым. Вәзијјәти она данышдым, үмид едирдим ки, мәнә бир аз пул верәр. О исә мәни галдығы јерә дәвәт етди ки, чимим, бир аз јемәк јејим. Иш елә ҝәтирди ки, мән һәмишәлик онунла галдым. Бир илдән сонра исә евләндик.

МҮГӘДДӘС КИТАБ ҺӘЈАТЫМЫ ДӘЈИШДИ.

Јеһованын Шаһидләри илә Мүгәддәс Китабы өјрәнмәјә башладым. Өјрәндикҹә мәни бир тәрәфдән гәзәб һисси чулғајырды, диҝәр тәрәфдән дә гәлбимә раһатлыг чөкүрдү. Әзабларын сәбәбкарынын Шејтан олдуғуну өјрәнәндә она гәзәбләндим. Ахы мәнә һәмишә елә баша салмышдылар ки, әзаблар Аллаһдандыр. Бундан башга, өјрәндим ки, Аллаһ инсанлары ҹәһәннәмдә јандырмыр. Буну биләндә исә санки гәлбимә су сәпдиләр. Чүнки ушаглыгдан бу тәлим мәни чох горхудурду.

Фикир верирдим ки, Јеһованын Шаһидләри һәр нә мәсәлә олурса олсун, гәрар верәндә Мүгәддәс Китабы рәһбәр тутурлар. Онлар һәјатларыны иманлары әсасында гурурлар. Мәним хасијјәтим ағыр иди. Амма нә десәм дә, нә етсәм дә, онлар мәнимлә мәһәббәтлә, һөрмәтлә давранырдылар.

Ән бөјүк чәтинлијим о иди ки, өзүмдән зәһләм ҝедирди, өзүм өзүмдән ијрәнирдим. Һәтта Јеһованын Шаһиди кими вәфтиз олунандан сонра да узун мүддәт өзүмә бу ҹүр јанашырдым. Јеһованы севирдим, амма әмин идим ки, О һеч вахт мәним кими бир адамы севмәз.

Анҹаг вәфтиз олунмағымдан он беш ил сонра ибадәт евиндә ешитдијим бир фикир дүшүнҹәми дәјишди. Нитглә чыхыш едән гардаш Јагуб 1:23, 24 ајәләрини изаһ едирди. Орада Аллаһын Кәламы ҝүзҝүјә бәнзәдилир. Бу ҝүзҝүјә баханда өзүмүзү Јеһованын ҝөзүндә ҝөрүндүјүмүз кими ҝөрүрүк. Бу мәни дүшүндүрдү. Фикирләшдим: «Ҝөрәсән мән, доғрудан, өзүмү Јеһованын ҝөрдүјү кими ҝөрүрәм?» Әввәл-әввәл бу фикри бејнимдән говмаға чалышдым. Һәлә дә дүшүнүрдүм ки, Јеһова мәни севә билмәз.

Бир нечә ҝүн сонра охудуғум ајә бүтүн һәјатымы дәјишди. Бу, Әшија 1:18 ајәси иди. Орада Јеһова дејир: «Ҝәлин арамыздакы мәсәләләри һәлл едәк. Ҝүнаһларыныз ал-гырмызы олса да, онлары гар кими ағаппаг едәҹәјәм». Мәнә елә ҝәлди ки, Јеһова мәнә дејир: «Вики, ҝәл арамыздакы мәсәләләри һәлл едәк. Мән сәнин ҝүнаһларындан аҝаһам, анҹаг үрәјини дә ҝөрүрәм. Сәни чох севирәм».

Һәмин ҝеҹә ҝөзүмә јуху ҝетмәди. Һәлә дә Јеһованын мәни севдијинә инана билмирдим. Амма бирдән Исанын фидјә гурбанлығы барәдә дүшүнмәјә башладым. Елә о ан мәнә чатды ки, ҝөр нечә вахтдыр Јеһова мәнә сәбир едир, ҹүрбәҹүр јолларла мәни севдијини ҝөстәрмәјә чалышыр. Мән исә санки Она дејирәм: «Јох, Сәнин мәһәббәтин о гәдәр дејил ки, мәни дә севәсән. Оғлунун гурбанлығы исә мәним ҝүнаһларымы өртмәјә јетмәз». Бу ҹүр дүшүнмәклә санки гурбанлығы рәдд едирдим. Анҹаг фидјә гурбанлығы барәдә фикирләшәндән сонра, нәһајәт ки, Јеһованын мәнә олан севҝисини дујмаға башладым.

МӘНӘ ФАЈДАСЫ.

Инди өзүмә һөрмәт едирәм, өзүмү тәмиз һисс едирәм. Јолдашымла мүнасибәтләримиз јахшылашыб. Чох севинирәм ки, өз башыма ҝәләнләри данышыб башгаларына көмәк едә билирәм. Ән әсасы исә Јеһоваја ҝүнү-ҝүндән даһа да чох јахынлашырам.