АМЕРИКАНЫН Милли Руһи Сағламлыг Институту, 21 јашындан јухары олан вә өзләрини «ҹәмијјәтин дәјәрли вә фајдалы үзвләри кими ҝөстәрән» өвладлар бөјүтмүш мүвәффәгијјәтли валидејнләр арасында кечирилән сорғунун нәтиҹәсини дәрҹ етмишди. Һәмин валидејнләрә белә бир суалла мүраҹиәт олунмушдур: «Сиз шәхси тәҹрүбәниз  әсасында башга валидејнләрә илк нөвбәдә нә төвсијә едәрдиниз?» Ҹавабларын чоху белә олмушду: «Мәһәббәтинизи әсирҝәмәјин», «ағылла ҹәзаландырын», «асудә вахтларынызы бирҝә кечирин», «ушагларыныза јахшыны писдән ајырмағы өјрәдин», «гаршылыглы һөрмәт ашылајын», «диггәтлә динләјин», «узун-узады нәсиһәтләрдән гачынын» вә «реалист олун».

Лакин ушаглары ҹәмијјәтин дәјәрли үзвләри кими тәрбијә етмәк мәсулијјәти јалныз валидејнләрин үзәринә дүшмүр. Бу ишдә мүәллимләр дә ваҹиб рол ојнајырлар. Узун мүддәт мәктәбдә ишләмиш бир мәсләһәтчи гејд етмишди: «Иҹбари тәһсилин башлыҹа мәгсәди — әгли, физики вә емосионал ҹәһәтдән јахшы инкишаф етмиш мәсулијјәтли инсан бөјүтмәкдә валидејнләрә көмәк етмәкдир».

Буна ҝөрә дә валидејнләр вә мүәллимләр ејни мәгсәдә хидмәт едир: онлар нәтиҹәдә јеткин, сағламдүшүнҹәли, шән, ҹәмијјәтдә өз јерини тапмыш инсан тәрбијә етмәлидирләр.

Валидејнләр мүәллимләрлә үмуми дил тапмајанда проблемләр јараныр. Мәсәлән, бәзи валидејнләри ушагларынын неҹә охумасы үмумијјәтлә марагландырмыр, диҝәрләри исә, әксинә, һәр шејдә мүәллимләри өтүб-кечмәјә чалышырлар. Бу ҹүр вәзијјәт бир франсыз журналында белә тәсвир едилир: «Артыг чохдандыр ки, мүәллим өз ишинин ағасы дејил. Ушагларынын наилијјәтләринә ифрат дәрәҹәдә әһәмијјәт верән валидејнләр дәрсликләри, тәдрис методикасыны тәнгид едир, өвладларынын алдығы илк пис гијмәт онлара чох пис тәсир бағышлајыр». Белә мүнасибәт нәтиҹәсиндә мүәллимләрин һүгуглары тапдаланыр.

Јеһованын Шаһидләри инанырлар ки, әҝәр валидејнләр мүәллимләрлә әмәкдашлыг етсәләр вә ушагларынын тәһсили илә һәгиги мәнада мараглансалар, бу, онларын хејринә олаҹаг. Онлар бизим зәманәдә мүәллимләрин ишләринин ҝет-ҝедә чәтинләшдијини нәзәрә алараг, бу ҹүр әмәкдашлығын хүсусилә ваҹиб олдуғуну дүшүнүрләр.

Мәктәбләр ҹәмијјәтин бир һиссәсидир, буна ҝөрә дә мүасир ҹәмијјәтин гаршылашдығы бүтүн проблемләр мәктәбләрдән дә јан кечмир. Сон илләр әрзиндә иҹтимаи проблемләр даһа да чохалыб. «Нју-Јорк Тајмс» гәзетиндә Бирләшмиш Штатлардакы бир мәктәбдә баш верәнләр тәсвир олунурду: «Шаҝирдләр дәрсдә јатыр, тәнәффүс заманы диварларында әдәбсиз јазылар олан коридорларда бир-бирләрини һәдәләјир, дәрсләрини јахшы охујанлары алчалдырлар... Демәк олар ки, бүтүн мәктәблиләрин проблемләри вар: бәзиләри ушаг сахлајыр, диҝәрләринин валидејнләри һәбсдәдир, бир башгалары исә азјашлы ҹинајәткар дәстәләрин һүҹумларына мәруз галыр. Һәр ҝүн шаҝирдләрин, демәк олар ки, бешдәбир һиссәси дәрсә ҝәлмир».

 Бүтүн дүнјада мәктәбләрдә зоракылығын ҝениш јајылмасы, хүсусилә тәлаш доғурур. Шаҝирдләр арасында һәрдәнбир баш верән давалар, адәт һалына чеврилмиш атышма вә бычаглашма илә әвәз олунуб. Силаһ ҝәздирмәк ади һала чеврилиб, һүҹумлар хүсуси гәддарлыгла едилир, ушаглар зоракылыға һәддиндән артыг тез вә еркән јашларындан әл атмаға башлајырлар.

Әлбәттә, бу ҹүр амансыз шәраит һәр өлкәдә һөкм сүрмүр. Лакин бүтүн дүнјада мүәллимләр Франсанын һәфтәлик гәзетиндә гејд олунан проблемлә үзләширләр. Орада дејилир: «Мүәллимләрә һөрмәт етмирләр, инди онлары сајан јохдур» («Le Point»).

Рәһбәрлијә гаршы лагејдлик ушаглара бөјүк зәрәр вурур. Буна ҝөрә дә Јеһованын Шаһидләри өвладларына мүасир мәктәбләрдә надир һалларда раст олунан кејфијјәтләри — бөјүкләрә һөрмәти вә итаәткарлығы ашыламаға чалышырлар.