ЈЕҺОВАНЫН ШАҺИДЛӘРИ Мүгәддәс Китаб үзрә маарифләндирмә фәалијјәтинә чох ҹидди јанашдыглары үчүн бәзиләринә елә ҝәлә биләр ки, онлары дүнјәви тәһсил марагландырмыр. Лакин бу һеч дә белә дејил. Башгаларына нә исә өјрәтмәк үчүн, әввәлҹә мүәллимин ҝәрәк өзү лазыми тәһсил алсын. Буна ҝөрә дә Јеһованын Шаһидләри мәктәбдә алдыглары тәһсилдән әлавә,  артыг чох илләрдир ки, Ҝөзәтчи Гүлләси Ҹәмијјәти тәрәфиндән тәшкил олунан мүхтәлиф тәлим програмларындан вә мәктәбләрдән фајдаланырлар. Бунларын сајәсиндә Јеһованын Шаһидләри вә диҝәр адамлар өзләринин зеһни, әхлаги вә мәнәви сәвијјәләрини әһәмијјәтли дәрәҹәдә јахшылашдырмышлар.

Мәсәлән, бир чох өлкәләрдә Јеһованын Шаһидләри азтәһсилли вә савадсыз инсанлара јазыб-охумағы өјрәтмәли олмушлар. Бу проблеми һәлл етмәк үчүн Ҝөзәтчи Гүлләси Ҹәмијјәти савад курслары тәшкил едиб.

Мисал үчүн, Јеһованын Шаһидләри Ниҝеријада бу ҹүр курслары 1949-ҹу илдән етибарән кечирирләр. Бу курсларын сајәсиндә минләрлә ниҝеријалы охумағы өјрәниб. Бир арашдырма ҝөстәрди ки, ниҝеријалы Јеһованын Шаһидләринин 90 фаизиндән чоху охумағы вә јазмағы баҹарыр, һалбуки јердә галан әһалинин арасында бу ҝөстәриҹи 50 фаиздән ашағыдыр. Мексикада исә савад курслары Јеһованын Шаһидләри тәрәфиндән 1946-ҹы илдә тәшкил едилди. Бир ил әрзиндә 6500-дән чох адам охумағы вә јазмағы өјрәнди. Беләҹә, 100 000-дән артыг адама савад алмаға көмәк едилди. Савад курслары һәмин илләрдә Боливија, Камерун, Непал вә Замбија кими өлкәләрдә дә тәшкил олунмушду. Јеһованын Шаһидләри «Охумагла вә јазмагла мәшғул ол» адлы дәрслији 100-дән чох дилдә једди милјондан артыг нүсхәсини пајламышдылар.

Чох вахт бу ҹүр програмлар јерли тәһсил назирликләри тәрәфиндән бәјәнилир. Мексиканын дөвләт ишчиләриндән бири јазмышды: «Әмәкдашлығыныза ҝөрә сизә миннәтдарам вә јазы-позу билмәјән инсанлар арасында билик нуруну јајмаг кими ҝөзәл фәалијјәтиниз үчүн һөкумәтимиз адындан сизә үрәкдән тәшәккүрүмү билдирмәк истәјирәм... Маарифләндирмә фәалијјәтиниздә сизә уғурлар арзулајырам».

Јеһованын Шаһидләри Мүгәддәс Китаб үзрә маарифләндирмә ишинә бөјүк әһәмијјәт вердикләри үчүн, Мүгәддәс Китаб тәлимләрини башгаларына изаһ етмәк баҹарыгларыны тәкмилләшдирмәјә чалышырлар. Елә бу сәбәбдән бүтүн дүнјада мөвҹуд олан 119 000-дән артыг јығынҹагда һәр һәфтә шаҝирдләрә аудиторија гаршысында охумаг вә нитг сөјләмәк габилијјәтини јахшылашдырмаг үчүн тапшырыглар верилир. Үздән охумағы баҹаран ушаглара да бу тапшырыглар верилир. Бунун онлара һәјатын башга саһәләриндә, о ҹүмләдән тәһсил оҹагларында да бөјүк фајдасы дәјәҹәк. Бир чох мүәллимләр гејд едирләр ки, Јеһованын Шаһидләринин ушаглары фикирләрини долғун ифадә етмәји баҹарырлар.

Бундан әлавә, Јеһованын Шаһидләринин јығынҹаг ҝөрүшләрини кечирдикләри ибадәт евиндә Мүгәддәс Китаб үзрә вәсаитләр, лүғәтләр вә башга  мәнбәләрдән ибарәт китабханалар вар. Һәмин китабханалардан јығынҹаглара ҝәлән һәр кәс истифадә едә биләр. Јығынҹаға ҝәләнләрин һамысы охумаға тәшвиг олунур, һәмчинин аиләләрә мәсләһәт ҝөрүлүр ки, евләриндә һәм ушаглар, һәм дә бөјүкләр үчүн нәзәрдә тутулмуш чохлу әдәбијјатдан ибарәт бөјүк китабхана тәшкил етсинләр.

Бундан әлавә, Ҝөзәтчи Гүлләси Ҹәмијјәти киши вә гадынларын хүсуси тәјинатлы мүждәчи хидмәтинә һазырланмасы вә һәмчинин јығынҹагларда хидмәти мәсулијјәт дашыјан кишиләрин  тәлим алмасы үчүн мәктәбләр тәшкил едир. Бу мәктәбләр Јеһованын Шаһидләринин тәһсилә чох ҹидди јанашдыгларыны бир даһа сүбут едир.