Мән АБШ-ын Лос-Анҹелес шәһәриндә, наркотикләрә вә күчә бандаларына ҝөрә пис ад чыхармыш мәһәлләләрдә бөјүмүшәм. Аиләдә алты ушагдан икинҹиси идим.

Анам бизә дини тәрбијә верирди, јеванҝелист килсәсинин үзвләри идик. Анҹаг јенијетмә јашында икили һәјат сүрмәјә башладым. Базар ҝүнләри килсә хорунда охујурдум, һәфтәнин галан ҝүнләри исә партиләрдән чыхмырдым, наркотикләрә гуршанмышдым вә әхлагсыз һәјат сүрүрдүм.

Үмумијјәтлә кобуд инсан идим, тез өзүмдән чыхырдым. Галиб ҝәлмәк истәјирдимсә, габағымы һеч нә кәсә билмәзди. Килсәдә ешитдикләримин мәнә хејри дәјмирди. Мән дејирдим: «Гисас Аллаһындыр, мән дә Онун әлиндә гисас аләтијәм!» 1960-ҹы илләрин ахырларында јухары синифдә охујан вахт «Гара пантералар» адлы сијаси групун тәсири алтына дүшмүшдүм. Бу груп гарадәрилиләрин һаглары үчүн зоракы јолларла мүбаризә апарырды. Мән дә вәтәндаш һүгуглары уғрунда мүбаризә апаран тәләбә бирлијинә гошулдум. Биз дәфәләрлә етираз аксијалары тәшкил едирдик вә буна ҝөрә дә мәктәбимизи мүвәггәти бағлајырдылар.

Етираз аксијалары кобуд вә ганичән истәкләрими гане етмирди. Мән ҹинајәт төрәтмәјә башладым. Бир дәфә достларымла кечмишдә африкалы гулларын АБШ-да чәкдији зүлмләрә һәср олунмуш бир нечә филмә бахдыг. Бу һагсызлыглары ҝөрәндән сонра елә кинотеатрда отуран ағдәрили ҹаванларын үстүнә һүҹум чәкдик. Сонра даһа чох адам дөјмәк үчүн ағдәрилиләр јашајан мәһәлләләрә ҝетдик.

Ијирми јашына һәлә чатмамыш гардашларымла мән әмәлли башлы «хулиган» ады чыхармышдыг. Һөкумәтлә башымыз бәлада олурду. Диҝәр гардашым пис ад чыхармыш бир банданын үзвү иди, мән дә онлара гошулдум. Һәјатым ҝетдикҹә даһа да бетәр олурду.

Бир достумун валидејнләри Јеһованын Шаһиди иди. Онлар мәни јығынҹаг ҝөрүшләринә дәвәт етдиләр, мән дә ҝетдим. Шаһидләрин башга адамлардан фәргләндијини о саат ҝөрдүм. Һамынын әлиндә Мүгәддәс Китаб варды, ҝөрүш вахты ајәләри ачырдылар, ҝәнҹләр белә, сәһнәдән чыхыш едирдиләр! «Јеһова» адыны илк дәфә ешидәндә вә биләндә ки, бу, Аллаһын адыдыр, тәсирләндим (Зәбур 83:18). Јығынҹаг мүхтәлиф милләтләрин нүмајәндәләриндән ибарәт иди, амма онларын арасында милли вә ја ирги мүнагишә јох иди.

Мүгәддәс Китабы һәлә өјрәнмәк истәмирдим, амма јығынҹаглара мәмнунијјәтлә ҝедирдим. Бир дәфә мән јығынҹагда икән, достларым консертә ҝетдиләр. Орада бир јенијетмә оғланы бәрк дөјүб өлдүрдүләр, нә вар нә вар оғлан онлара өз дәри ҝөдәкҹәсини вермәк истәмәмишди. Сәһәриси достларым адам өлдүрдүкләри илә өјүнүрдүләр. Һәтта мәһкәмәдә белә ҹинајәт төрәтдикләринә ҝүлүрдүләр. Онларын әксәријјәтинә өмүрлүк һәбс ҹәзасы кәсилди. Сөзсүз, о ахшам онларла олмадығыма чох севинирдим. Һәјатымы дәјишмәк гәрарына ҝәлдим вә Мүгәддәс Китабы өјрәнмәјә разылыг вердим.

Һәјатымда инсанларын бир-биринә ирги зәминдә гәрәз бәсләдикләринин о гәдәр шаһиди олмушам ки, Јеһованын Шаһидләри арасындакы мүнасибәти ҝөрдүкҹә ҝөзләримә инана билмирдим. Мисал ҝәтирим: Ағдәрили гардаш иш далынҹа башга јерә сәфәр етмәли оланда ушагларыны гарадәрили аиләјә тапшырды. Башга бир ағдәрили аилә евсиз бир гарадәрили оғлана евләриндә јашамағы тәклиф етди. Јеһованын Шаһидләри доғрудан да Исанын Јәһја 13:35 ајәсиндә дедији сөзләрә ујғун јашајырдылар: «Аранызда мәһәббәт олса, һамы биләҹәк ки, сиз мәним шаҝирдимсиниз». Буну өз ҝөзүмлә ҝөрүб әмин олдум ки, әсл аилә, гардашлыг тапмышам.

Мүгәддәс Китабы өјрәндикҹә баша дүшдүм ки, мүтләг дүшүнҹәми дәјишмәлијәм. Јәни сүлһпәрвәр давранмалы, һәмчинин бунун ән јахшы вә дүзҝүн һәјат јолу олдуғуну дәрк етмәли идим (Ромалылара 12:2). Руһани аддымлар атмаға башладым. 1974-ҹү илин јанварында Јеһованын Шаһиди кими вәфтиз олундум.

Вәфтиздән сонра да хасијјәтим үзәриндә ишләмәјә давам етмәли идим. Мәсәлән, бир дәфә хидмәтдә ев-ев тәблиғ едән заман машынымдан радио-магнитофон оғурланды. Мән һәр шеји атыб оғрунун далынҹа гачмаға башладым. Ону тутмаға аз галмыш, о, радиону јерә атыб ҝөздән итди. Баҹы-гардашлара радиому неҹә ҝери алдығымы данышанда бир ағсаггал сорушду: «Стивен, бәс оғруну тутсајдын, нә едәҹәкдин?» Бу суал мәни дүшүндүрдү. Мән һәлә там олараг сүлһпәрвәр дејилдим. Бунун үзәриндә ишләмәјә давам етмәли идим.

1974-ҹү илин октјабрында таммүддәтли хидмәтә башладым. Һәр ај инсанлары Мүгәддәс Китабла таныш етмәјә 100 саат вахт ајырырдым. Бир мүддәт сонра мәнә һәтта Јеһованын Шаһидләринин Нју-Јоркдакы баш идарәсиндә көнүллү кими хидмәт етмәк шәрәфи нәсиб олду. 1978-ҹи илдә хәстә анама бахмаг үчүн Лос-Анҹелесә гајытмалы олдум. Ики илдән сонра Аронда илә евләндик. Сон нәфәсинә кими анама гуллуг еләдик. Аронда мәнә бөјүк дајаг олду. Сонра онунла бир јердә Ҝилад мәктәбини битирдик вә Панамаја тәјинат алдыг. Индијәдәк бурада хүсуси тәјинатлы мүждәчи кими хидмәт едирик.

Вәфтиздән сонра дәфәләрлә мәни өзүндән чыхараҹаг вәзијјәтләрлә үзләшмишәм. Белә һалларда мәни гызышдырмаг истәјән адамлардан узаглашмағы вә ја ҝәрҝинлији диҝәр јолларла азалтмағы өјрәндим. Чохлары, о ҹүмләдән, арвадым бу ҹүр вәзијјәтләри јолуна гоја билдијимә ҝөрә мәни тәрифләјир. Өзүм дә өзүмә тәәҹҹүб едирәм. Хасијјәтимдәки бу дәјишикликләрә өз ҝүҹүм сајәсиндә наил олмамышам. Онлар бир даһа сүбут едир ки, Мүгәддәс Китаб инсанлары дәјишмәјә гадирдир (Ибраниләрә 4:12).

Мүгәддәс Китаб һәјатымы мәналы етди вә мәнә сүлһпәрвәр олмағы өјрәтди. Мән артыг инсанлары дөјмүрәм. Инди онлара руһани шәфа тапмаға көмәк едирәм. Һәтта мәктәбдән мәнә дүшмән кәсилән бир оғлана Мүгәддәс Китабы өјрәтмишәм. О, вәфтиз олунандан сонра бир мүддәт бир евдә јашамышыг. Бу ҝүнә кими мөһкәм достуг. Һәјат јолдашымла 80-дән чох адамла Мүгәддәс Китабы өјрәнәрәк онлара Јеһованын Шаһиди олмаға көмәк етмишик.

Јеһова Аллаһымыза һәдсиз дәрәҹәдә миннәтдарам. О, мәним һәјатыма бөјүк мәна гатды, мәнә севинҹ, һәгиги достлар бәхш етди.