ИНСАНЛАР НӘ ДЕЈИР?

Бир чох инсан гануни олдуғу мүддәтдә гумары зәрәрсиз әјләнҹә һесаб едир. Бәзи гумар ојунлары ганунидир, мәсәлән, дөвләтин дәстәји илә олан лоторејалар. Бунлар халгын рифаһы наминә кечирилир.

МҮГӘДДӘС КИТАБДА НӘ ДЕЈИЛИР?

Мүгәддәс Китабда «гумар» сөзүнә раст ҝәлинмир. Бунунла белә, орадакы бир сыра принсипләр бизә көмәк едир ки, Аллаһын гумарла бағлы нә дүшүндүјүнү мүәјјән едәк.

Гумарын көкүндә башгасынын удуздуғу пуллары газанмаг дајаныр. Бу исә Мүгәддәс Китабын нөвбәти мәсләһәтинә зиддир: «Өзүнүзү һәр ҹүр тамаһкарлыгдан горујун» (Лука 12:15). Һәгигәтән дә гумар ојнамағын көкүндә тамаһкарлыг дурур. Гумар ширкәтләри удмаг еһтималынын нә гәдәр аз олдуғуну нәзәрә чарпдырмадан газанылаҹаг бөјүк мәбләғдә пуллары реклам едирләр. Чүнки онлар билирләр ки, инсанлар варланмаг үчүн гумарханаларда бөјүк мәбләғдә пуллар гојмаға һазырдылар. Гумар инсана тамаһкарлыға гаршы дурмаға көмәк еләмир, әксинә асан јолла пул газанмаг арзусуну аловландырыр.

Гумарын көкүндә худбин бир истәк дајаныр: башгаларынын удуздуғу пулларын һесабына пул газанмаг. Амма Мүгәддәс Китаб бизи тәшвиг едир: «Гој һеч кәс өз хејрини дүшүнмәсин, башгасынын хејрини дүшүнсүн» (1 Коринфлиләрә 10:24). Диҝәр бир ајәдә исә белә дејилир: «Һеч кимин һеч нәјиндә... ҝөзүнүз олмасын» (Чыхыш 20:17). Гумар ојнајанлар ојуну удмаға чалышанда, әслиндә, үмид едирләр ки, башгалары пулларыны удузаҹаг.

Мүгәддәс Китаб бизи сәсләјир ки, бәхтә бәрәкәт ҝәтирән мистик гүввә кими бахмајаг. Гәдим Исраилдә бәзи инсанларын Аллаһа иманы олмадығындан «бәхт аллаһына сүфрә» ачмаға башламышдылар. Онларын бәхт аллаһына бу ҹүр мүнасибәти Јеһоваја мәгбул иди? Хејр. Аллаһ онлара демишди: «Хошламадығым әмәлләри ҝөрүрдүнүз, хошума ҝәлмәјән шејләри үстүн тутдунуз» (Әшија 65:11, 12).

Дүздүр, дүнјанын бәзи јерләриндә гануниләшдирилмиш гумардан ҝәлән пуллар тәһсилә, игтисадијјатын инкишафына вә диҝәр сосиал фәалијјәтләрә хәрҹләнир. Амма бу пулларын һара хәрҹләндији онун һансы јолларла газанылдығы барәдәки һәгигәти дәјишмир. Бу пуллар ачыг шәкилдә тамаһкарлыға вә худбинлијә сәсләјән, мүфтә ҝәлир әлдә етмәји вәд едән фәалијјәт нөвләри һесабына газанылыр.

«Һеч кимин һеч нәјиндә... ҝөзүнүз олмасын» Чыхыш 20:17).

МҮГӘДДӘС КИТАБДА НӘ ДЕЈИЛИР?

Мүгәддәс Китабда белә бир хәбәрдарлыг вар: «Варланмаг истәјәнләр ширникләниб тәләјә дүшүрләр, инсаны фәлакәтә вә мәһвә апаран бир чох мәнасыз вә зәрәрли хәјаллара гапылырлар» (1 Тимутијә 6:9). Гумар аҹҝөзлүкдән гајнагланыр. Аҹҝөзлүк елә бир мәнфи хүсусијјәтдир ки, Мүгәддәс Китабда гачмалы олдуғумуз хүсусијјәтләр арасында садаланыр (Ефеслиләрә 5:3).

Гумарын мәгсәди мүфтә јолла варланмаг олдуғу үчүн пулпәрәстлик хүсусијјәтини аловландырыр. Мүгәддәс Китаба әсасән исә, «һәр ҹүр пислијин көкү пулпәрәстликдир». Пул газанмаг арзусу инсанын һәјатына бүсбүтүн тәсир едә биләр вә нәтиҹәдә инсан һәддән артыг нараһатлыг кечирә вә Аллаһа иманыны итирә биләр. Мүгәддәс Китабда мәҹази диллә дејилир ки, пулпәрәст инсанлар «өзләрини башдан-ајаға јараламышлар» (1 Тимутијә 6:10, һашијә).

Аҹҝөз инсанын ҝөзләри дојмур, мадди вәзијјәтинә ҝөрә даима ҝилејләнир вә хошбәхтлији итир. «Ҝүмүш севән ҝүмүшдән дојмаз, вар-дөвләт севән дә газанҹдан» (Ваиз 5:10).

Гумар ојунларынын ҹазибәсинә алданан милјонларла инсан бир ајылыблар ки, гумар алудәчисинә чеврилибләр. Бу проблем чох ҝениш јајылыб. Еһтимал едилир ки, тәкҹә АБШ-да милјонларла инсан гумар алудәчисидир.

Мәсәлләр 21:21 ајәсиндә дејилир: «Тамаһла јијәләнмиш мирасын сонда хејир-бәрәкәти олмаз». Гумар ојнајан инсанларын чоху борҹа ҝириб вә ја ифлас олуб, ишини, аиләсини, достларыны итириб. Мүгәддәс Китаб принсипләринә әмәл етмәк инсаны гумарын мәнфи тәсирләриндән горујур вә хошбәхт һәјат бәхш едир.

«Варланмаг истәјәнләр ширникләниб тәләјә дүшүрләр, инсаны фәлакәтә вә мәһвә апаран бир чох мәнасыз вә зәрәрли хәјаллара гапылырлар» (1 Тимутијә 6:9).