Мүгәддәс Китаб һәјатлары дәјишир

ГУМАРБАЗЫ вә оғруну асылылыгдан гуртулуб, һәјатыны дәјишмәјә нә тәшвиг етди? Ҝөрәк о өзү нә дејир.

«Јарыш атларыны чох севирдим» (РИЧАРД СТЈУАРТ).

ДОҒУЛДУҒУ ИЛ: 1965

ӨЛКӘ: ЈАМАЈКА

КЕЧМИШИ: ГУМАРБАЗ ВӘ ҸИНАЈӘТКАР

КЕЧМИШИМ. Мән Јамајканын пајтахты Кингстонун әһалинин сых мәскунлашдығы касыб әразисиндә бөјүмүшәм. Бурада ишсизлик вә ҹинајәт баш алыб ҝедирди. Гулдурлар инсанлары горху алтында сахлајырдылар. Демәк олар ки, һәр ҝүн силаһ сәсләри ешидирдим.

Анам мәним, балаҹа гардашымын вә баҹымын гејдинә галмаг үчүн ҝеҹә-ҝүндүз чалышырды. О истәјирди ки, биз јахшы тәһсил алаг. Амма мән дәрс охумағы севмирдим, јарыш атларыны чох севирдим. Дәрсдән гачыб, јарыш мејданына ҝедирдим. Орада ат чапырдым.

Чох кечмәмиш, ат јарышларына пул гојмаға башладым. Әхлагсыз һәјат сүрүрдүм, шорҝөз идим. Марихуана чәкирдим, бу ҹүр һәјат сүрмәјә давам етмәк үчүн оғурлуг едирдим. Чохлу силаһларым варды, амма чох шүкүр, етдијим чохлу оғурлуглар заманы һеч ким өлмәди.

Ахырда полис мәни тутду вә төрәтдијим ҹинајәтләрә ҝөрә мәни һәбсә атды. Азадлыға бурахыландан сонра әввәлки һәјатыма давам етдим. Һәтта әввәлкиндән дә бетәр олдум. Үздән мәсум ҝөрүнсәм дә, тәрс, әсәби вә гәддар идим. Анҹаг өзүмү дүшүнүрдүм.

МҮГӘДДӘС КИТАБ ҺӘЈАТЫМЫ ДӘЈИШДИ. Һәјатымын бу чәтин дөнәминдә анам Мүгәддәс Китабы өјрәнди вә Јеһованын Шаһиди олду. Анамдакы мүсбәт дәјишикликләри ҝөрдүм вә бу мәнә мараглы ҝәлди. Гәрара ҝәлдим ки, анамдакы бу дәјишиклијин сәбәбини өјрәним, буна ҝөрә дә Јеһованын Шаһидләри илә Мүгәддәс Китаб дәрсинә башладым.

Јеһованын Шаһидләринин тәлимләри диҝәр динләрин тәлимләриндән фәргли иди. Бу диггәтими чәкди. Онларын өјрәтдији һәр шеј Мүгәддәс Китаба әсасланырды. Тәкҹә онлар, биринҹи әсрдәки мәсиһиләр кими, ев-ев тәблиғ едирдиләр (Мәтта 28:19; Һәвариләрин ишләри 20:20). Араларындакы сәмими мәһәббәти ҝөрәндә әмин олдум ки, һәгиги дини тапмышам (Јәһја 13:35).

Анладым ки, Мүгәддәс Китабдан өјрәндикләримә әсасән, һәјатымда бөјүк дәјишикликләр етмәлијәм. Өјрәндим ки, Јеһова Аллаһ әхлагсызлыға нифрәт едир, Ону разы салмаг истәјирәмсә, ҹисмими мурдарлајан шејләрдән узаг дурмалыјам (2 Коринфлиләрә 7:1; Ибраниләрә 13:4). Јеһованын һиссләри олдуғуну вә әмәлләримлә Ону ја севиндирә, ја да кәдәрләндирә биләҹәјими өјрәнәндә чох тәсирләндим (Мәсәлләр 27:11). Буна ҝөрә дә марихуананы тәрҝитдим, силаһларымы атдым вә хасијјәтимдә дәјишикликләр етмәјә башладым. Мәним үчүн ән чәтини әхлагсыз һәјат тәрзиндән вә гумардан әл чәкмәк иди.

Әввәл-әввәл истәмирдим ки, достларым Јеһованын Шаһидләри илә Мүгәддәс Китабы өјрәндијими билсин. Лакин Мәтта 10:33 ајәсини охудугдан сонра фикрими дәјишдим. Орада Исанын бу сөзләри ҝәтирилир: «Ким инсанларын гаршысында мәни данса, мән дә ҝөјдәки Атамын гаршысында ону данаҹағам». Бу сөзләр мәни тәшвиг етди ки, Јеһованын Шаһидләри илә Мүгәддәс Китабы өјрәндијими достларыма дејим. Онлар чох тәәҹҹүбләндиләр. Инана билмирдиләр ки, мәним кими адам мәсиһи олмаг истәјир. Онлара дедим ки, даһа әввәлки кими јашамаг истәмирәм.

МӘНӘ ФАЈДАСЫ. Анам Мүгәддәс Китаб принсипләри әсасында јашамаға башладығымы ҝөрәндә чох севинди. Артыг үрәји раһатдыр, пис ишләр ҝөрәҹәјими дүшүнмүр. Јеһоваја олан севҝимиз бизи бир-биримизә јахынлашдырды. Һәрдән әввәлки һалымы јадыма саланда инана билмирәм ки, Аллаһын көмәји илә бу гәдәр дәјишмишәм. Артыг әхлагсызлыг вә вар-дөвләт мәни өзүнә ҹәлб еләмир.

Әҝәр Мүгәддәс Китабдакы хәбәрә һај вермәсәјдим, индијә ја өлмүшдүм, ја да һәбсдә идим. Инди мәним ҝөзәл, хошбәхт аиләм вар. Мәнә дәстәк олан һәјат јолдашым вә ағыллы гызымла бирликдә Јеһова Аллаһа бөјүк севинҹлә ибадәт едирәм. Јеһоваја миннәтдарам ки, мәнә Өз аиләсинин үзвү олмаг шәрәфини нәсиб едиб. Һәмчинин мәнә Мүгәддәс Китаб һәгигәтләрини өјрәдән инсана да миннәтдарам. Инсанлара Мүгәддәс Китаб тәлимләрини өјрәтмәк мәним үчүн бөјүк шәрәфдир. Ән әсасы, Јеһова Аллаһа миннәтдарам ки, мәнә лүтф ҝөстәрди, Өзүнә јахынлашдырды.

[Јазы]

Јеһованын һиссләри олдуғуну вә әмәлләримлә Ону ја севиндирә, ја да кәдәрләндирә биләҹәјими өјрәнәндә чох тәсирләндим»

[Шәкил]

Анамдакы мүсбәт дәјишикликләри ҝөрдүм

[Шәкил]

Һәјат јолдашымла вә гызымла бирликдә