ИСА һәјаты боју сәмави Атасынын хүсусијјәтләрини мүкәммәл сурәтдә әкс етдирирди. О демишди ки, өзүндән һеч бир шеј етмир. Сонра исә әлавә етмишди: «Ата мәнә нә өјрәдибсә, мән дә ону данышырам... Мән һәмишә Онун бәјәндији ишләри ҝөрүрәм» (Јәһја 8:28, 29; Колослулара 1:15). Исанын гадынларла рәфтарыны вә онлара һансы мүнасибәти бәсләдијини өјрәнмәклә Аллаһын гадынлара мүнасибәтини вә онлардан нә ҝөзләдијини баша дүшәҹәјик.

Инҹили арашдыран бир сыра алимләр белә гәнаәтә ҝәлмишләр ки, Исанын гадынларла рәфтары о зәманә үчүн сөзүн әсл мәнасында ингилаби иди. Онлар нәји нәзәрдә тутурлар? Вә Исанын тәлимләри бу ҝүн гадынлара азадлыг верирми?

Иса дүшүнмүрдү ки, гадынлар кишиләрин ҹинси һәвәсләрини өдәмәк үчүн јарадылыблар. Јәһуди дининин бәзи рәһбәрләри о фикирдә идиләр ки, гадынларла үнсијјәт мүтләг шәһвәтә ҝәтириб чыхарыр. Гадынын кишини ҝүнаһа сүрүкләдијини дүшүндүкләри үчүн она иҹтимаијјәт ичиндә киши илә сөһбәт етмәјә вә ја евдән өртүксүз чыхмаға иҹазә вермирдиләр. Бунун әксинә олараг, Иса кишиләрә ҹинси истәкләрини ҹиловламағы вә гадынын үнсијјәтинә мәһдудијјәтләр гојмаг әвәзинә она һөрмәтлә јанашмағы төвсијә едирди (Мәтта 5:28).

О дөврдә раввин тәлиминә әсасән, киши «һәр сәбәбә ҝөрә» арвадыны бошаја биләрди (Мәтта 19:3, 9). Анҹаг Иса «арвадыны бошајыб башгасы илә евләнән бошадығы арвада гаршы зина едир» сөзләри илә бу тәлими тәкзиб етмишди (Марк 10:11, 12). Јәһудиләрин әксәријјәти үчүн кишинин арвадына гаршы зина етмәси фикри јени вә гәрибә иди. Чүнки раввин тәлиминә ҝөрә «зина» сөзү гәтијјән кишијә аид дејилди, анҹаг гадын хәјанәткар ола биләрди! Бир китабда белә дејилир: «Кишијә дә, гадына да ејни әхлаг дәјәрләрини шамил етмәклә Иса гадынларын мөвгејини уҹалтды вә онларын һөрмәтә лајиг олдугларыны ҝөстәрди».

Мәсиһин тәлими бу ҝүн инсанларын һәјатыны неҹә дәјишир? Јеһованын Шаһидләринин јығынҹағында гадынлар кишиләрлә сәрбәст шәкилдә үнсијјәт едирләр. Онлар горхмурлар ки, кишиләр онлара пис ҝөзлә бахар вә ја онлара гаршы артыг-әскик һәрәкәт едәрләр, чүнки мәсиһи кишиләр ағбирчәкләрә ана кими, ҹаван гадынлара баҹы кими, тәмиз нијјәтлә јанашырлар (1 Тимутијә 5:2).

Иса гадынлара тәлим верирди. Раввинләрин фикринҹә, гадына савад лазым дејилди. Иса исә әксинә гадынлара тәлим верир вә һәтта истәјирди ки, онлар да өз фикирләрини чәкинмәдән билдирсинләр. О, билик алмаға бөјүк һәвәси олан Мәрјәми тәрифләмәклә ҝөстәрмишди ки, гадынын јери анҹаг мәтбәх дејил (Лука 10:38—42). Мәрјәмин баҹысы Марта да Исанын тәлимләриндән чох шеј өјрәнмишди. Буну Илазәрин өлүмүндән сонра онун Исаја вердији ағыллы ҹаваблардан ҝөрмәк олар (Јәһја 11:21—27).

Иса гадынларын фикирләринә биҝанә дејилди. О дөврдә әксәр јәһуди гадынлары дүшүнүрдүләр ки, һәјатда ән бөјүк сәадәт дүнјаја лајигли бир оғул ҝәтирмәкдир. Пејғәмбәрләрин аналарыны исә дүнјанын ән хошбәхт гадынлары санырдылар. Бир дәфә бир гадын Исаја демишди: «Сәни бәтниндә дашыјан... гадын нә хошбәхтдир!» Иса она билдирмишди ки, бундан да бөјүк хошбәхтлик вар (Лука 11:27, 28). Изаһ етмишди ки, әсл хошбәхтлик Аллаһла мүнасибәтләрин олмасындадыр, гадынын әнәнәви ролунда дејил (Јәһја 8:32).

Мәсиһин тәлими бу ҝүн инсанларын һәјатыны неҹә дәјишир? Мәсиһи јығынҹағында гадынларын шәрһ вермәси хош гаршыланыр. Јығынҹаға тәлим верән кишиләр руһән јеткин гадынлары јүксәк гијмәтләндирир, чүнки онлар һәм сөздә, һәм әмәлдә јахшы шејләр өјрәдирләр (Титуса 2:3). Гадынлар һәмчинин Аллаһын Падшаһлығы һагда хош хәбәри һәр јердә бәјан едирләр (Зәбур 68:11; доггузунҹу сәһифәдәки  «Һәвари Булус гадынлара данышмағы гадаған едирди?» адлы чәрчивәјә бах).

Иса гадынлара гајғы илә јанашырды. Гәдимдә оғлан ушагларына гыз ушагларындан даһа чох дәјәр верилирди. О вахткы дүшүнҹә тәрзи Талмудда белә әкс олунуб: «Оғул саһибләри нә бәхтәвәрдир, вај гыз саһибинин һалына!» Бәзиләри үчүн гыз ушағы бөјүк јүк демәк иди; гыз ушағыны әрә вермәк, онун үчүн ҹеһиз јығмаг лазым иди. О, јашлы валидејнләринә арха-дајаг олмајаҹагды.

Анҹаг Иса ҝөстәрди ки, гыз ушағынын һәјаты оғлан ушағынын һәјаты гәдәр дәјәрлидир. О һәм Јаирин гызыны, һәм дә Наин шәһәриндән олан дул гадынын оғлуну дирилтмишди (Марк 5:35, 41, 42; Лука 7:11—15). Иса «ичинә ҹин ҝирмиш» вә «дүз он сәккиз ил иди ки, нахош олан» гадыны сағалдандан сонра ону «Ибраһимин гызы» адландырмышды. Бу ифадәјә јәһуди әдәбијјатында демәк олар ки, раст ҝәлинмир (Лука 13:10—16). Бу һөрмәтҹил вә ејни заманда меһрибан ифадәни ишләтмәклә Иса ҝөстәрди ки, о, һәмин гадыны нәинки ҹәмијјәтин тамһүгуглу үзвү, һәм дә бөјүк иман саһиби һесаб едир (Лука 19:9; Галатијалылара 3:7).

Мәсиһин тәлими бу ҝүн инсанларын һәјатыны неҹә дәјишир? Шәргдә јајылмыш бир мәсәлдә дејилир: «Гыз бөјүтмәк гоншунун бағыны суламаг кими бир шејдир». Мәсиһиләр јол вермирләр ки, бу ҹүр фикирләр онлара тәсир ҝөстәрсин. Әксинә, мәсиһи аталар һәм гыз, һәм дә оғлан өвладларыны севирләр. Онларын сағламлығынын вә лазыми тәһсил алмасынын гајғысына галырлар.

Иса гадынлара етибар едирди. Јәһуди мәһкәмәләриндә гадынын вердији шәһадәт гулун вердији шәһадәтә бәрабәр тутулурду. Ерамызын биринҹи әсриндә јашамыш јәһуди тарихчиси Иосиф Флави белә төвсијә едирди: «Гадынларын хисләтиндәки јелбејинлијә вә дүшүнҹәсизлијә ҝөрә онлардан һеч бир шәһадәт гәбул едилмәмәлидир».

Бунун там әксинә олараг, Иса мәһз гадынлара өз дирилмәси һагда хәбәри башгаларына чатдырмағы бујурду (Мәтта 28:1, 8—10). Бу вәфалы гадынлар Ағаларынын едамыны вә дәфнини өз ҝөзләрилә ҝөрмүшдүләр, буна бахмајараг, онларын сөзләри һәвариләрә инандырыҹы ҝәлмәди (Мәтта 27:55, 56, 61; Лука 24:10, 11). Анҹаг Иса дириләндән сонра илк өнҹә гадынлара ҝөрүнмәклә ҝөстәрди ки, гадынлар да диҝәр шаҝирдләри кими шаһидлик етмәјә лајигдирләр (Һәвариләрин ишләри 1:8, 14).

Мәсиһин тәлими бу ҝүн инсанларын һәјатыны неҹә дәјишир? Јеһованын Шаһидләринин јығынҹағында мәсул кишиләр гадынларын фикирләринә вә мүшаһидәләринә һөрмәтлә јанашырлар. Мәсиһи әрләр дә арвадларыны динләмәклә онлара һөрмәт гојурлар (1 Бутрус 3:7; Јарадылыш 21:12).

Кишиләр Иса Мәсиһи һәјатларында өрнәк тутанда гадынлара һөрмәтлә јанашыр вә онларын сәрбәстлијини мәһдудлашдырмырлар. Беләҹә гадынлара Аллаһын әзәлдән онлар үчүн нәзәрдә тутдуғу мүнасибәти ҝөстәрирләр (Јарадылыш 1:27, 28). Кишиләрин гадынлардан даһа үстүн олмасы принсипини дәстәкләмәк әвәзинә, мәсиһи әрләр Мүгәддәс Китаб принсипләринә ујғун һәрәкәт едәрәк арвадларыны хошбәхт едирләр (Ефеслиләрә 5:28, 29).

Јелена адлы гадына һәјат јолдашы ҝөз вериб ишыг вермирди. Әринин бөјүдүјү мүһитдә гыз гачыртмаг вә аиләдә гадынлара гаршы зоракы давраныш ади шејләр иди. Јелена Мүгәддәс Китабы өјрәнмәјә башлады. «Мүгәддәс Китабдан өјрәндикләрим мәни мәнән ҝүҹлү етди», — дејә Јелена бөлүшүр. «Мән дәрк етдим ки, Јарадан мәни чох севир, бир шәхсијјәт кими мәни гијмәтләндирир, мәнә гаршы биҝанә дејил. Мән бир шеји билирдим: әрим дә Мүгәддәс Китабы өјрәнмәјә башласа, мәнә гаршы мүнасибәти дәјишәҹәк». Јеленанын арзусу ҝөзүндә галмады. Әри Мүгәддәс Китабы өјрәнмәјә разылашды вә Јеһованын Шаһиди кими вәфтиз олунду. Јеленанын аилә һәјаты неҹә дәјишди? «Инди әрим тәмкинли инсандыр, өзүнү әлә алмағы баҹарыр. Биз бир-биримизи үрәкдән бағышламағы өјрәндик. Мүгәддәс Китаб принсипләри сајәсиндә инди өзүмү аиләмдә лазымлы һисс едирәм. Өзүмү артыг тәһлүкәсизликдә һисс едирәм» (Колослулара 3:13, 18, 19).

Јелена кими, Јеһованын милјонларла гадын хидмәтчиси хошбәхтдир, чүнки онлар әрләри илә бәрабәр аиләдә Мүгәддәс Китаб принсипләринә ујғун јашамаға чалышырлар. Мәсиһи диндашлары арасында да лајиг олдуглары һөрмәти ҝөрүрләр, һеч кәс онларын сәрбәстлијини әлиндән алмыр (Јәһја 13:34, 35).

Мәсиһиләр дәрк едирләр ки, кишили гадынлы бүтүн инсан нәсли ҝүнаһлыдыр вә «пучлуға табедир». Анҹаг меһрибан Атамыз Јеһоваја јахынлашдыгҹа онларын үмиди даһа да мөһкәмләнир. Онлар билирләр ки, «чүрүклүк әсарәтиндән гуртулуб Аллаһын өвладларынын шанлы азадлығына говушаҹаглар». Бәли, һәм кишиләри, һәм дә гадынлары чох ҝөзәл ҝәләҹәк ҝөзләјир! (Ромалылара 8:20, 21).