Бәли, бүтүн дүнјада Јеһованын Шаһидләри арасында милјонларла гадын дини хидмәтчи кими фәалијјәт ҝөстәрир. Онлар Аллаһын Падшаһлығы һаггындакы мүждәни һәр јердә тәблиғ едирләр. Зәбур 68:11 ајәсиндә онлар һагда пејғәмбәрлик едилмишди: «Бујруг Јеһовадан ҝәлир; мүждәни бәјан едән гадынлар бөјүк ордудур».

Амма бу дини хидмәтчиләри диҝәр динләрдәки гадын дин хадимләринин иши илә бир тутмаг олмаз. Онларын арасында чох бөјүк фәрг вар. Инди бу суала јахындан бахаҹағыг.

Илк нөвбәдә онларын хидмәти ајры-ајры груп инсанларла бағлыдыр. Гадын дин хадимләри, әләлхүсус да Христиан динләриндә фәалијјәт ҝөстәрән гадынлар, өз иҹмаларында рәһбәр вәзифәләр тутур, тәлим вердикләри күтлә килсәләринә ҝәлән инсанлардыр. Јеһованын Шаһидләриндә гадын дини хидмәтчиләр исә јығынҹагдан кәнарда, иҹтимаи јерләрдә, јәни ев-ев вә диҝәр јердә хидмәт едәркән растлашдыглары инсанлара тәблиғ едирләр.

Бундан башга, Јеһованын Шаһидләриндә гадын дини хидмәтчиләрин јығынҹагдакы фәалијјәти дә диҝәр динләрдәки гадын дин хадимләринин фәалијјәтиндән фәргләнир. Христиан динләриндә гадын хадимләр иҹма үзвләринә рәһбәрлик едир вә онлара динләринин еһкамларыны вәз едирләр. Јеһованын гадын хидмәтчиләри исә вәфтиз олунмуш кишиләр олан јердә јығынҹаға тәлим вермирләр. Јығынҹаға тәлим вермәјә јалныз кишиләр тәјин олунур (1 Тимутијә 3:2; Јагуб 3:1).

Мүгәддәс Китаба әсасән, јығынҹаға анҹаг кишиләр рәһбәрлик едә биләрләр. Ҝөрүн һәвари Булус мәсләкдашы вә нәзарәтчи јолдашы Титуса нә јазмышды: «Мән сәни Критдә она ҝөрә гојдум ки,.. шәһәрләрдә ағсаггаллар тәјин едәсән». Булус әлавә етди ки, тәјин олунмуш кишиләр «гүсурсуз вә тәк бир гадынла евли» олмалыдырлар (Титуса 1:5, 6). Булус ејни ҝөстәриши Тимутијә јаздығы мәктубунда да вермишди: «Нәзарәтчи олмаға ҹан атан јахшы шеј арзулајыр. Елә исә нәзарәтчи гүсурсуз, тәк бир гадынла евли,.. тәлим вермәкдә сәриштәли» олмалыдыр (1 Тимутијә 3:1, 2).

Нә үчүн нәзарәтчи мәсулијјәти тәкҹә кишиләрә һәвалә олунуб? Булус белә јазмышды: «Гадынын тәлим вермәсинә, јахуд киши үзәриндә башчылыг етмәсинә иҹазә вермирәм. О сусуб гулаг асмалыдыр. Чүнки әввәл Адәм јарадылды, сонра Һәвва» (1 Тимутијә 2:12, 13). Беләликлә, Адәми илк нөвбәдә јаратмагла Јарадан ҝөстәрди ки, Онун мәгсәдинә ујғун олараг, руһани тәлим вермәк вә рәһбәрлик етмәк мәсулијјәтини киши дашымалыдыр.

Јеһованын хидмәтчиләри рәһбәрләри Иса Мәсиһи өрнәк алырлар. Мүждәчи Лука Исанын хидмәти һагда белә јазмышды: «Иса шәһәрбәшәһәр, кәндбәкәнд ҝәзәрәк Аллаһын Падшаһлығы һаггында мүждәни тәблиғ едирди». Бир гәдәр сонра Иса шаҝирдләрини дә бу вәз ишинә јоллады: «Шаҝирдләр јола чыхдылар. Онлар бүтүн о әразини кәндбәкәнд ҝәзиб мүждәни тәблиғ едир»диләр (Лука 8:1; 9:2—6).

Бу ҝүн Јеһованын һәм киши, һәм гадын хидмәтчиләри Исанын тапшырығыны һәвәслә јеринә јетирирләр. Иса бизим ҝүнләр һагда демишди: «Падшаһлыг һаггындакы бу мүждә халгларын һамысына шәһадәт олсун дејә, бүтүн јер үзүндә тәблиғ едиләҹәк вә сон о вахт ҝәләҹәк» (Мәтта 24:14).