1—3. а) Нәјә ҝөрә ана оғлунун тәмизлијинә диггәт јетирир? б) Нәјә ҝөрә Јеһова халгынын тәмиз олмасыны истәјир?

ТӘСӘВВҮР ЕТ КИ, ана балаҹа оғлуну мәктәбә јола салыр. О, ушағын әл-үзүнүн, әјин-башынын тәмизлијинә, сәлигәсинә диггәт јетирир. Чүнки бу, өвладынын сағламлығы үчүн ваҹибдир. Һәмчинин валидејнин өвладына јахшы бахдығыны ҝөстәрир.

² Атамыз Јеһова да бизим тәмиз вә пак олмағымызы истәјир (Лавилиләр 11:44, 45). О билир ки, тәмиз олмаг  бизим хејримизәдир. Һәм дә биз тәмиз оланда Она шәрәф ҝәтиририк (Һизгијал 36:22; 1 Бутрус 2:12 ајәсини оху).

³ Тәмиз олмаг нә демәкдир? Нәјә ҝөрә бу бизим хејримизәдир? Бу суаллары арашдырдыгҹа һәјатымызда дәјишиклик етмәли олдуғумуз саһәләри ҝөрәҹәјик.

4, 5. а) Нәјә ҝөрә тәмиз олмалыјыг? б) Тәбиәтдән Јеһованын тәмизлијә мүнасибәти барәдә нә өјрәнирик?

⁴ Јеһова Өзү тәмиз вә пак олмагда нүмунәдир (Лавилиләр 19:2). Демәли, ән башлыҹасы, биз Аллаһа бәнзәмәк истәдијимиз үчүн тәмиз олмалыјыг (Ефеслиләрә 5:1).

⁵ Тәбиәтдән Јеһованын тәмизлијә мүнасибәти барәдә чох шеј өјрәнә биләрик. Јеһова һаванын вә сујун тәмизләнмәси үчүн тәбиәтдә дөвранлар јарадыб (Әрәмја 10:12). Инсанлар әтраф мүһити чиркләндирсәләр дә, јер бир чох үсулларла өз-өзүнү тәмизләјир. Мәсәлән, Јеһова бактеријалар адланан ҹанлы организмләр јарадыб. Онлары јалныз микроскопла ҝөрмәк олур. Бактеријалар зәрәрли тулантылары зәрәрсиз маддәләрә чевирир. Бу чох мүрәккәб просесдир. Алимләр һәтта бу бактеријаларын бәзиләриндән истифадә едиб, чиркләнмәнин нәтиҹәләрини арадан галдырырлар (Ромалылара 1:20).

6, 7. Төвратда Јеһоваја ибадәт едәнләрдән тәмизлик тәләб олундуғу неҹә вурғуланыр?

⁶ Јеһованын ҝөзүндә тәмизлијин нә дәрәҹәдә ваҹиб олдуғу Төвратдан да ҝөрүнүр. Мәсәлән, исраиллиләр физики ҹәһәтдән тәмиз олмалы идиләр ки, Јеһова  онларын ибадәтини гәбул етсин. Кәффарә ҝүнүндә баш каһин Ән мүгәддәс јерә ҝирдији үчүн ики дәфә чиммәли иди (Лавилиләр 16:4, 23, 24). Башга каһинләр дә гурбан тәгдим етмәздән әввәл әл-ајагларыны јумалы идиләр (Чыхыш 30:17—21; 2 Салнамәләр 4:6). Бәзи һалларда тәмизликлә бағлы гануна әмәл етмәмәјин ҹәзасы өлүм иди (Лавилиләр 15:31; Сајлар 19:17—20).

⁷ Бәс бу ҝүн неҹә? Төвратдан Јеһованын тәмизлијә мүнасибәти барәдә чох шеј өјрәнирик (Мәлаки 3:6). Орадан ајдын ҝөрүнүр ки, Јеһоваја ибадәт едәнләр тәмиз олмалы идиләр. Јеһованын тәләбләри дәјишмәјиб. О бу ҝүн дә халгындан тәмиз вә пак олмағы тәләб едир (Јагуб 1:27).

8. Биз һансы саһәләрдә тәмиз олмалыјыг?

⁸ Јеһованын нөгтеји-нәзәринҹә тәмизлик садәҹә бәдәнин, палтарын вә евин тәмиз олмасы дејил. Бура бизим ибадәтимиз, давранышымыз вә фикирләримиз дә дахилдир. Бәли, Јеһованын ҝөзүндә тәмиз олмаг үчүн биз һәјатымызын һәр саһәсиндә тәмиз вә пак олмалыјыг.

9, 10. Пак ибадәт нә демәкдир?

⁹ Пак ибадәт. Бизим јалан динлә һеч бир әлагәмиз олмамалыдыр. Исраиллиләр Бабилдә әсарәтдә оланда әхлагсыз ајинләр иҹра едән бүтпәрәст инсанларын әһатәсиндә идиләр. Әшија пејғәмбәрлик етмишди ки, исраиллиләр Исраилә гајыдаҹаг вә пак ибадәти дирчәлдәҹәкләр. Јеһова онлара демишди: «Ораны тәрк един, мурдар  шејләрә тохунмајын! Ораны тәрк един, өзүнүзү пак сахлајын» . Исраиллиләр Бабилин јалан дининдәки тәлимләри, адәт-әнәнәләри пак ибадәтә гарышдырмамалы идиләр (Әшија 52:11).

¹⁰ Һәгиги мәсиһиләр бу ҝүн дә јалан диндән узаг дурурлар. (1 Коринфлиләрә 10:21 ајәсини оху.) Бүтүн дүнјада ҝениш јајылмыш адәтләрин, етигадларын чоху јалан дини тәлимләрә әсасланыр. Мәсәлән, бир чох халглар инаныр ки, инсан өләндән сонра руһу јашајыр. Бу инанҹла бағлы чохлу адәтләр вар (Ваиз 9:5, 6, 10). Мәсиһиләр белә адәтләрдән узаг дурмалыдырлар. Ола биләр ки, аилә үзвләримиз бизи бу кими адәт-әнәнәләрдә иштирак етмәјә мәҹбур етсин. Амма биз Јеһованын ҝөзүндә тәмиз галмаг истәдијимиз үчүн белә тәзјигләрә тәслим олмуруг (Һәвариләрин ишләри 5:29)

11. Тәмиз әхлаг нәдир?

¹¹ Тәмиз әхлаг. Јеһованын ҝөзүндә тәмиз олмаг үчүн биз һәр ҹүр ҹинси әхлагсызлыгдан узаг дурмалыјыг. (Ефеслиләрә 5:5 ајәсини оху.) Јеһова Мүгәддәс Китабда бујурур: «Әхлагсызлыгдан гачын». О, ајдын шәкилдә билдирир ки, төвбә етмәјән әхлагсыз адамлар «Аллаһын Падшаһлығына ҝирмәјәҹәкләр» (1 Коринфлиләрә 6:9, 10, 18; 22-ҹи әлавәјә бах).

12, 13. Нәјә ҝөрә фикирләримиз тәмиз олмалыдыр?

¹² Тәмиз фикирләр. Адәтән, инсан нә фикирләширсә, ону да едир (Мәтта 5:28; 15:18, 19). Фикирләр тәмиздирсә, әмәлләр дә тәмиз олаҹаг. Дүздүр, биз гејри-камил олдуғумуза ҝөрә һәрдән ағлымыза натәмиз фикирләр ҝәлир. Белә оланда дәрһал бу фикирләри өзүмүздән узаглашдырмалыјыг. Јохса бир дә ҝөрәҹәјик  ки, үрәјимиз тәмиз дејил. Биздә дүшүнҹәмиздәки шејләри әмәлдә етмәк истәји јаранаҹаг. Она ҝөрә дә ағлымызы тәмиз фикирләрлә долдурмалыјыг. (Филиппилиләрә 4:8 ајәсини оху.) Одур ки, биз әхлагсыз вә ја зоракы әјләнҹәләрдән узаг дуруруг. Охудуғумуз, бахдығымыз шејләрә, данышығымыза фикир веририк (Зәбур 19:8, 9).

¹³ Аллаһын мәһәббәтиндә галмаг үчүн ибадәтимиз, әхлагымыз вә фикирләримиз тәмиз олмалыдыр. Анҹаг физики ҹәһәтдән дә тәмиз олмағымыз Јеһова үчүн ваҹибдир.

14. Физики тәмизлик нәјә ҝөрә ваҹибдир?

¹⁴ Бәдәнимизин, ев-ешијимизин тәмизлији һәм өзүмүзүн, һәм дә әтрафымыздакы адамларын хејринәдир. Белә оланда өзүмүзү јахшы һисс едирик, башгаларына да бизимлә олмаг хош олур. Тутаг ки, бир ушаг һәмишә чиркли ҝәзир. Онун валидејни һаггында нә фикирләшәрдик? Әҝәр биз дә өзүмүзә бахмасаг, тәмизлијимизә фикир вермәсәк, инсанлар Јеһова һагда пис фикирләшәрләр. Булус демишди: «Хидмәтимиздә гүсур тапылмасын дејә, биз иман јолунда кимисә бүдрәдән бир иш ҝөрмүрүк, өзүмүзү һәр ҹәһәтдән Аллаһын хидмәтчиләри кими ҝөстәририк» (2 Коринфлиләрә 6:3, 4).

15, 16. Өз тәмизлијимизә неҹә фикир вермәлијик?

¹⁵ Ҝиҝијена вә ҝејим. Тәмизлијимизә һәр ҝүн фикир вермәлијик. Мәсәлән, вахтлы-вахтында, әҝәр мүмкүндүрсә, һәр ҝүн чиммәлијик. Әлләримизи сабунла  јумалыјыг. Јемәк биширмәјә һазырлашанда, јемәк јемәмишдән әввәл, ајагјолундан чыхандан, чиркли нәјәсә тохунандан сонра әлләри сабунла јумаг лазымдыр. Әлләри јумаг ади бир иш олса да, бактеријаларын вә хәстәлијин јајылмасынын гаршысыны алыр. Бу һәтта инсаны өлүмдән хилас едә биләр. Әҝәр ајагјолу, јахуд канализасија системи јохдурса, нәҹиси басдырмаг лазымдыр. Гәдимдә исраиллиләрин канализасија системләри јох иди. Она ҝөрә дә онлар нәҹиси евдән вә су мәнбәләриндән узагда басдырырдылар (Ганунун тәкрары 23:12, 13).

¹⁶ Ҝејимимизин баһалы, дәбдәбәли олмасы ваҹиб дејил. Әсас одур ки, үст-башымыз тәмиз вә сәлигәли олсун. (1 Тимутијә 2:9, 10 ајәләрини оху.) Биз  истәјирик ки, хариҹи ҝөрүнүшүмүзлә һәмишә Јеһованы шәрәфләндирәк (Титуса 2:10).

17. Нәјә ҝөрә ев-ешијимизи тәмиз сахламалыјыг?

¹⁷ Ев-ешијимиз. Һарада јашајырыгса-јашајаг, евимизи тәмиз сахламалыјыг. Һәмчинин автомобил, мотосиклет, велисопед вә ја диҝәр нәглијјат васитәмиз варса, ону тәмиз сахламалыјыг, хүсусилә дә јығынҹаға вә ја тәблиғә ҝедәндә. Ахы тәблиғ вахты биз инсанлара дүнјанын тәмиз, ҝөзәл ҹәннәтә чевриләҹәјиндән данышырыг (Лука 23:43; Вәһј 11:18). Ев-ешијимизи тәмиз сахламагла ҝөстәририк ки, индидән ҹәннәтә һазырлашырыг.

18. Нәјә ҝөрә ибадәт евини тәмиз сахламаг истәјирик?

¹⁸ Ибадәт евимиз. Ибадәт евләрини вә топланты залларыны тәмиз сахламагла ҝөстәририк ки, тәмизлик бизим үчүн ваҹибдир. Биринҹи дәфә ибадәт евинә ҝәлән адамларын диггәтини чох вахт оранын тәмизлији ҹәлб едир. Бу, Јеһоваја шәрәф ҝәтирир.Јығынҹаг үзвү кими, һәр биримизин имканы вар ки, ибадәт евинин тәмизлијинә вә тәмиринә өз төһфәмизи верәк (2 Салнамәләр 34:10).

19. Һансы вәрдишләри тәрҝитмәлијик?

¹⁹ Мүгәддәс Китабда бүтүн пис вәрдишләр садаланмыр. Амма орада Јеһованын бу кими әмәлләрә мүнасибәтини ҝөстәрән принсипләр вар. Јеһова сигарет чәкмәјимизи, спиртли ичкиләрдән суи-истифадә етмәјимизи, јахуд наркотик гәбул етмәјимизи истәмир. Әҝәр биз Аллаһын достујугса, белә шејләрдән узаг  дураҹағыг. Чүнки биз һәјат әнамына һөрмәт едирик. Бу ҹүр вәрдишләр өмрү ҝөдәлдир, һәм адамын өзүнүн, һәм дә әтрафдакыларын сәһһәтинә зәрәр вурур. Бәзи адамлар сағламлыгларына ҝөрә пис вәрдишләри тәрҝидирләр. Биз исә Јеһованын досту олдуғумуз үчүн буну али мәгсәддән — Аллаһа мәһәббәтдән ирәли ҝәләр едирик. Бир ҝәнҹ гадын өзү һагда дејир: «Јеһованын көмәјилә мән һәјатымы сәлигә-сәһмана салдым. Бүтүн натәмиз вәрдишләрдән јаха гуртардым... Бунлары өз ҝүҹүмә едә билмәздим». Ҝәл зәрәрли вәрдишләри тәрҝитмәјә көмәк едән беш принсипи нәзәрдән кечирәк.

20, 21. Јеһова һансы вәрдишләри тәрҝитмәјимизи истәјир?

²⁰ «Беләликлә, әзизләрим, бизә верилмиш вәдләрин мүгабилиндә ҝәлин ҹисми вә руһу мурдарлајан һәр шејдән өзүмүзү тәмизләјәк вә Аллаһ горхусу илә там мүгәддәслијә јетишәк» (2 Коринфлиләрә 7:1). Јеһова истәјир ки, биз әглимизә вә бәдәнимизә зәрәр вуран натәмиз вәрдишләрдән узаг олаг.

²¹ Өзүмүзү һәр ҹүр мурдарлыгдан тәмизләмәк үчүн 2 Коринфлиләрә 6:17, 18 ајәләриндә тутарлы сәбәб ҝәтирилир. Јеһова дејир: «Бир дә мурдар шејләрә тохунмајын». Сонра вәд едир: «Мән сизи гәбул едәҹәјәм. Мән сизә Ата олаҹағам, сиз исә Мәним оғулларым вә гызларым олаҹагсыныз». Бәли, әҝәр бизи Јеһованын ҝөзүндә мурдар едән әмәлләрдән узаг дурсаг, О бизи өвлады кими севәҹәк.

22—25. Һансы принсипләр бизә натәмиз вәрдишләрдән јаха гуртармаға көмәк едәҹәк?

²² «Аллаһын Јеһованы бүтүн гәлбинлә, бүтүн  варлығынла вә бүтүн ағлынла сев» (Мәтта 22:37). Бу ән ваҹиб әмрдир (Мәтта 22:38). Јеһова сидги-үрәкдән севилмәјә лајигдир. Бәс әҝәр өмрүмүзү гысалдан, јахуд бејнимизи зәдәләјән бир шеји едириксә, Ону сидги-үрәкдән неҹә севә биләрик? Биз әлимиздән ҝәләни етмәлијик ки, Аллаһын вердији һәјата һөрмәт едәк.

²³ «[Јеһова] һамыја һәјат, нәфәс — һәр шеј верир» (Һәвариләрин ишләри 17:24, 25). Әҝәр достун сәнә хүсуси бир һәдијјә версә, ону атарсан, јахуд мәһв едәрсән? Һәјат да Јеһовадан һејрәтамиз бир һәдијјәдир. Биз бу һәдијјәни үрәкдән гијмәтләндиририк. Она ҝөрә дә һәјатымызы елә јашамаг истәјирик ки, Јеһова шәрәфләнсин (Зәбур 36:9).

²⁴ «Башгасыны өзүнү севдијин кими сев» (Мәтта 22:39). Натәмиз вәрдишләр тәкҹә бизә зәрәр јетирмир. Бунлар әтрафымыздакы инсанлара да зәрәр јетирир вә әксәр һалларда, ән чох зәрәр чәкән бизим севдијимиз инсанлар олур. Мәсәлән, сигарет чәкән адамла бир евдә јашајанлар түстү удмагдан ҹидди хәстәлијә тутула биләрләр. Амма биз пис вәрдишләри тәрҝитмәклә онлары севдијимизи ҝөстәририк (1 Јәһја 4:20, 21).

²⁵ «Даима онлара хатырлат ки, һакимијјәтә вә һөкумәтә табе олсунлар, итаәт етсинләр» (Титуса 3:1). Бир чох өлкәләрдә наркотик маддәләр сахламаг вә ја онлардан истифадә етмәк ганунла гадаған олунур. Јеһова бизә һөкумәтә һөрмәт етмәји бујурдуғу үчүн бу ганунлара табе олмалыјыг (Ромалылара 13:1).

26. а) Јеһованын ибадәтимизи гәбул етмәси үчүн нә етмәлијик? б) Нәјә ҝөрә пак вә тәмиз галмаг истәјирик?

 ²⁶ Әҝәр биз Јеһованын досту олмаг истәјириксә, јәгин бәзи дәјишикликләр етмәли олдуғумузу баша дүшәҹәјик. Әҝәр беләдирсә, о заман дәрһал һәрәкәтә кечмәлијик. Натәмиз вәрдиши тәрҝитмәк һәмишә асан олмаса да, мүмкүндүр! Јеһова бизә көмәк едәҹәјинә сөз верир. О дејир: «Мән сәнин Аллаһын Јеһовајам, Мән сәнин хејринә сәни өјрәдирәм, сәни ҝетмәли олдуғун јолла апарырам» (Әшија 48:17). Биз тәмиз вә пак галмаг үчүн әлимиздән ҝәләни едәндә Аллаһы шәрәфләндирдијимизә әмин ола биләрик.