«Һизгијал» китабынын 23-ҹү фәслиндә Аллаһ Өз халгыны хәјанәтинә ҝөрә ифша едир. Бу фәсил чох шејдә 16-ҹы фәслә ујғун ҝәлир. 16-ҹы фәсилдә олдуғу кими, 23-ҹү фәсилдә дә фаһишә образындан истифадә олунур. Јерусәлим кичик баҹы, Сәмәријјә исә онун бөјүк баҹысы адланыр. Һәр ики фәсилдә ҝөстәрилир ки, кичик баҹы бөјүк баҹынын јолу илә ҝедир, анҹаг мәнфурлугда вә әхлагсызлыгда ону өтүб кечир. 23-ҹү фәсилдә Јеһова бу баҹылара ад верир. Бөјүк баҹыны, јәни онгәбиләли Исраил падшаһлығынын мәркәзи олан Сәмәријјәни Өһла адландырыр, кичик баҹыны, јәни Јәһуданын мәркәзи шәһәри олан Јерусәлими исә Өһлүба адландырыр * (Һизг. 23:1—4).

Бу ики фәсил арасында башга охшарлыглар да вар. Ән мүһүм охшарлыглар бунлардыр: һәр ики фаһишә башланғыҹда мәҹази мәнада Јеһованын арвады иди, амма сонрадан она хәјанәт етди. Бурада һәмчинин үмид хәбәри дә вар. 23-ҹү фәсилдә халгын јенидән дирчәләҹәји үмиди нисбәтән үстүөртүлү ифадә олунур. Анҹаг бу фәсил Јеһованын: «Позғунлуғуна,.. фаһишәлијинә сон гојаҹағам», — сөзләринә ҝөрә 16-ҹы фәсиллә узлашыр (Һизг. 16:16, 20, 21, 37, 38, 41, 42; 23:4, 11, 22, 23, 27, 37).

Әввәлләр нәшрләримиздә дејилирди ки, Өһла вә Өһлүба баҹылары христиан дүнјасынын, хүсусилә онун ики голу олан католик вә протестант дининин тимсалыдыр. Лакин дуа едиб арашдырма апарандан сонра бәзи суаллар ортаја чыхды. Мәҝәр христиан дүнјасы нә вахтса мәҹази мәнада Јеһованын арвады олуб? Јеһова онунла нә вахтса әһд бағлајыб? Әлбәттә ки, јох. Јеһова Исанын васитәчилијилә руһани Исраиллә јени әһд бағлајанда Христиан дүнјасы мөвҹуд дејилди. Христиан дүнјасы һеч вахт мәсһ олунмушлардан ибарәт руһани халгын бир һиссәси олмајыб (Әрм. 31:31; Лука 22:20). О, һәвариләрин өлүмүндән хејли сонра јараныб. О, Исанын «буғда вә алаг оту» мәсәлиндәки алаг отларындан, јәни јаланчы мәсиһиләрдән ибарәт дөнүк бир тәшкилат олараг ерамызын IV әсриндә пејда олуб (Мәт. 13:24—30).

Диҝәр әсас фәрг бундан ибарәтдир: Јеһова хәјанәткар Јерусәлими вә Сәмәријјәни азад едәҹәјинә сөз вермишди (Һизг. 16:41, 42, 53—55). Бәс Мүгәддәс Китаб Христиан дүнјасы илә әлагәдар белә бир үмид верир? Хејр. Онун агибәти Бөјүк Бабилин диҝәр һиссәләринин агибәти илә ејни олаҹаг.

Беләликлә, Өһла вә Өһлүба Христиан дүнјасынын тимсалы дејил. Лакин онлар даһа ваҹиб бир мәсәләјә ајдынлыг ҝәтирирләр. Бу образлар әсасында мәлум олур ки, Јеһова мүгәддәс адыны јанлыш тәгдим едәнләрә вә Онун пак ибадәт үчүн гојдуғу ганунлары тәһриф едәнләрә неҹә јанашыр. Бу бахымдан Христиан дүнјасы бөјүк ҝүнаһ саһибидир, чүнки онун чохсајлы ҹәрәјанлары иддиа едирләр ки, ҝуја Мүгәддәс Китабда бәһс олунан Аллаһы тәмсил едирләр. Үстәлик, иддиа едирләр ки, Јеһованын севимли Оғлу Иса Мәсиһ онларын рәһбәридир. Анҹаг Исаны Үч үгнумун бир һиссәси кими тәгдим етмәклә вә онун дүнјаја мәхсус олмамаг әмринә зидд ҝетмәклә бу иддианын әксинә давранырлар (Јәһ. 15:19). Христиан дүнјасы бүтпәрәстликдә вә сијаси мүнагишәләрдә хүсуси шәкилдә иштирак етмәклә «бөјүк фаһишә»нин бир һиссәси олдуғуну сүбут едиб (Вәһј 17:1). Бәли, о, бүтүн дүнјаны әһатә едән јалан динин агибәтини мүтләг пајлашмалыдыр!