Мүгәддәс Китабдакы пејғәмбәрликләр вә тарих бирмәналы шәкилдә сүбут едир ки, Иса Мәсиһ 1914-ҹү илдә ҝөјдә падшаһ олду. Бу, Шејтан дүнјасынын сонунун, јәни ахырзаманын башладығындан хәбәр верирди. Иса Падшаһ олан кими нә етди? Дәрһал јер үзүндәки хидмәтчиләрини Бөјүк Бабилин әсарәтиндән гуртардымы? 1914-ҹү илдә «садиг вә ағыллы нөкәри» тәјин едиб бөјүк бичин ишинә башладымы? (Мәт. 24:45).

Ҝөрүнүр, јох. Һәвари Бутрус јазмышды: «Һөкм Аллаһын евиндән башлајаҹаг» (1 Бут. 4:17). Буна бәнзәр тәрздә Мәлаки пејғәмбәр дә Јеһованын «әһд елчиси» илә, јәни Оғлу илә бирҝә мәбәдинә ҝәләҹәјини демишди (Мәл. 3:1—5). Бу, тәмизләнмә вә сынаг дөврү олмалы иди. Бәс тарих бу пејғәмбәрликләрлә узлашырмы?

 Әлбәттә! 1914-ҹү илдән 1919–ҹу илин әввәлинә гәдәрки вахты әһатә едән дөвр Мүгәддәс Китаб Тәдгигатчылары (Јеһованын Шаһидләринин әввәлки ады) үчүн сынаг вә тәмизләнмә дөврү иди. 1914-ҹү илдә Аллаһын халгы үмид едирди ки, бу дүнјанын сону ҝәләҹәк. Амма сон ҝәлмәјәндә онларын арасында чохлары мәјус олду. 1916-ҹы илдә Аллаһын халгынын рәһбәри Чарлз Рассел гардаш вәфат едәндә бу мәјуслуг лап артды. Рассел гардаша һәддән артыг бағлы оланлар Рассели әвәз едән Ҹозеф Рутерфорд гардаша фәал сурәтдә гаршы чыхмаға башладылар. Парчаланма јаранды вә 1917-ҹи илдә тәшкилат демәк олар ки, бөлүндү. 1918-ҹи илдә, ҝөрүнүр, килсә хадимләринин тәһрикилә Рутерфорд гардаш вә онун једди әмәкдашы мәһкәмәјә верилди вә јалан иттиһамлар әсасында һәбсә атылды. Бруклиндәки баш идарә бағланды. Ајдын мәсәләдир ки, Аллаһын халгы һәлә Бөјүк Бабилин әсарәтиндән азад едилмәмишди.

Бәс 1919-ҹу илдә нә баш верди? Һәр шеј сүрәтлә дәјишди. Илин әввәлиндә Рутерфорд вә онун әмәкдашлары һәбсдән азад едилдиләр. Онлар дәрһал ишә башладылар. Гыса вахт әрзиндә тарихи топланты тәшкил олунду вә јени журнал, «Гызыл әср» (индики «Ојанын!») журналы чапа һазырланды. Бу јени журнал тәблиғ кампанијалары үчүн нәзәрдә тутулмушду. Бундан әлавә һәр јығынҹагда тәблиғ ишини тәшкил етмәк вә ирәли апармаг үчүн нәзарәтчи тәјин олунду. Һәмин ил тәблиғ ишинин тәшкилинә көмәк етмәк мәгсәдилә «Бүллетен» вәрәгәси (индики ады «Мәсиһи һәјаты вә ибадәти. Иш дәфтәри») чап олунду.

Бу нә демәк иди? Ајдын ҝөрүнүрдү ки, Мәсиһ халгыны Бөјүк Бабилин әсарәтиндән азад етмишди. О, садиг вә ағыллы нөкәр тәјин етмишди. Бичин иши башламышды. Һәлледиҹи ил олан 1919-ҹу илдән бәри тәблиғ иши һејрәтамиз шәкилдә ирәлиләјир.