1, 2. а) Өтән фәсилдә Һизгијалын ҝөрдүјү мәбәд барәдә нә ачыгланды? б) Бу фәсилдә һансы ики суал нәзәрдән кечирилир?

 ӘВВӘЛКИ фәсилдә Һизгијалын ҝөрдүјү мәбәдлә бағлы бир сыра мәгамлар ачыгланды. Ајдын олду ки, Һизгијал һәвари Булусун әсрләр сонра бәһс етдији бөјүк руһани мәбәди ҝөрмәмишди. Һәмчинин өјрәндик ки, бу ҝөрүнтү Аллаһын пак ибадәт үчүн тәсис етдији ганунларын ваҹиблијини халга баша салмалы иди. Јалныз бу ганунлара риајәт едәрәк халг Јеһова илә мүнасибәтләрини бәрпа едә биләрди. Буну нәдән ҝөрмәк олар? Тәкҹә бир ајәдә Јеһова нөвбәти ваҹиб фикри ики дәфә вурғуламышды: «Мәбәдлә бағлы ганун будур». (Һизгијал 43:12 ајәсини охујун.)

² Инди исә даһа ики суала ҹаваб тапмаг лазымдыр. Биринҹиси, Һизгијалын дөврүндәки јәһудиләр бу ҝөрүнтүдән Јеһованын пак ибадәт үчүн гојдуғу ганунларла бағлы нә өјрәнә биләрдиләр? Икинҹиси, бу ҝөрүнтү ахырзаманда јашајан бизләр үчүн һансы мәнаны кәсб едир? Биринҹи суалын ҹавабы бизә икинҹи суала да ҹаваб тапмаға көмәк едәҹәк.

3. Ҝөрүнтүнүн һүндүр бир дағда ваге олмасы нә үчүн халгы утандырмалы иди?

³ Биринҹи суала ҹаваб тапмаг үчүн ҝәлин мәбәдлә бағлы ҝөрүнтүнүн бир сыра әламәтдар мәгамларына диггәт јетирәк. Һүндүр дағ. Халг еһтимал ки, ҝөрүнтүнүн ваге олдуғу јери Әшијанын дирчәлишлә бағлы пејғәмбәрлији илә әлагәләндирәҹәкди (Әшј. 2:2). Ҝөрүнтүдә мәбәдин һүндүр дағда јерләшмәси нә демәк иди? Јеһова халга баша салмаг истәјирди ки, пак ибадәт јүксәлмәли, һәр шејдән уҹа тутулмалыдыр. Сөзсүз ки, пак ибадәт онсуз да уҹадыр. Чүнки бу, бүтүн аллаһлардан гат-гат уҹа олан Јеһованын тәсис етдији гурулушдур (Зәб. 97:9). Лакин халг өз өһдәсинә дүшәни етмәмишди. Әсрләр әрзиндә онлар дөнә-дөнә пак ибадәти ләкәләмиш, она арха чевирмишдиләр. Аллаһын мүгәддәс евинин јүксәлдијини, лајиг олдуғу мөһтәшәм мөвгеји тутдуғуну ҝөрән тәмизгәлбли инсанлар, сөзсүз ки, хәҹаләт чәкмишди.

4, 5. Мәбәдин һүндүр дарвазалары Һизгијалын дөврүндәки јәһудиләрә нә өјрәдирди?

⁴ Һүндүр дарвазалар. Ҝөрүнтүнүн әввәлиндә Һизгијал мәләјин дарвазалары өлчдүјүнү ҝөрмүшдү. Бу тикилиләрин һүндүрлүјү тәхминән 30 метр иди (Һизг. 40:14). Ҝиришләрдә кешикчи отаглары вар иди. Бүтүн бунлар лајиһәни өјрәнәнләр үчүн нә мәна кәсб едирди? Јеһова Һизгијала деди: «Мәбәдин ҝиришләринә... диггәт јетир». Чүнки халг «үрәји вә бәдәни сүннәт олунмамыш»лары дүз Аллаһын мүгәддәс мәбәдинә ҝәтирирди. Бунун нәтиҹәси нә олмушду? Јеһова демишди: «Онлар да мәбәдими мурдарлајырлар» (Һизг. 44:5, 7).

⁵ Бәдәни сүннәт олунмамышлар Ибраһимин дөврүндә Аллаһын ајдын шәкилдә вердији әмрә итаәт етмирдиләр (Јар. 17:9, 10; Лав. 12:1—3). Үрәји сүннәт олунмамышларын исә вәзијјәти даһа бетәр иди. Онлар инадла үсјан едир, Јеһованын ҝөстәриш вә рәһбәрлијинә мәһәл гојмурдулар. Бу адамлара Јеһованын мүгәддәс мәбәдинә дахил олмаға иҹазә верилмәмәли иди. Јеһова икиүзлүлүјә нифрәт едир. Халг исә Онун евиндә икиүзлүлүјүн јајылмасына шәраит јаратмышды. Ҝөрүнтүдәки мәбәдин дарвазалары вә кешикчи отаглары ајдын бир хәбәри чатдырырды: бир даһа бу ҹүр тәһгирә јол верилмәјәҹәк. Аллаһын мәбәдинә дахил олмаг үчүн гојулан али ганунлара риајәт олунмалыдыр. Јалныз бу һалда Јеһова халгынын ибадәтини гәбул едәҹәкди.

6, 7. а) Јеһова ҝөрүнтүдә мәбәдин әтрафындакы дивары ҝөстәрмәклә халгына һансы хәбәри чатдырмаг истәјирди? б) Јеһованын халгы әввәлки мәбәдә гаршы неҹә давранмышды? (Һашијәјә бахын.)

⁶ Диварлар. Ҝөрүнтүдәки мәбәдин диҝәр валеһедиҹи ҹәһәти мәбәдин әтрафындакы саһәни әһатә едән диварлар иди. Һизгијал дејир ки, дивар һәр тәрәфдән 500 чубуг, јәни 1555 метр узунлуғунда иди (Һизг. 42:15—20). Мәбәд биналары вә һәјәтләр исә бирликдә бир тәрәфи ҹәми 500 гулаҹ, јәни 259 метр узунлугда  олан дөрдбуҹаглыны тәшкил едирди. Беләликлә, мәбәдлә дивар арасында бөјүк бош саһә вар иди *. Бу, һансы мәгсәд үчүн иди?

⁷ Јеһова деди: «Гој инди өз хәјанәтләрини вә падшаһларынын ҹәсәдләрини Мәндән узаг етсинләр. Онда әбәдијјән онларын арасында јашајарам» (Һизг. 43:9). «Падшаһларын ҹәсәдләри» ифадәси, ҝөрүнүр, бүтләрә аид иди. Беләликлә, ҝөрүнтүдә мәбәдин әтрафында ҝениш саһәни ҝөстәрмәклә Јеһова, маһијјәт етибарилә дејирди: «Бүтүн бу чиркабы мәндән узаг един. Мәнә ҹүзи дә олса, јахын бурахмајын». Халг пак ибадәтин тәмизлијини горусајды, Јеһова лүтф ҝөстәриб онлара Өз һүзуруну бәхш едәҹәкди.

8, 9. Јеһованын мәсул кишиләрә ҹидди мәсләһәт вермәси халга нә өјрәдирди?

⁸ Мәсул кишиләрә ҹидди мәсләһәт. Јеһова бөјүк мәсулијјәт һәвалә олунан кишиләрә дә мәһәббәтдән ирәли ҝәләрәк ҹидди мәсләһәт верди. Исраиллиләр бүтпәрәстлијә гуршаныб Јеһовадан үз дөндәрәндә лавилиләр дә Ондан узаглашмышды, Садығын оғуллары исә Јеһованын мүгәддәс мәканындакы ишләрә бахмаға давам етмишди. Јеһова лавилиләрә шиддәтли төһмәт верди, Садығын оғулларыны исә тәрифләди. Беләликлә, О, һәр ики тәрәфлә әдаләтлә вә мәрһәмәтлә рәфтар етди, онларла һәрәкәтләринә мүвафиг олараг давранды (Һизг. 44:10, 12—16). Јеһова Исраил рәһбәрләрини дә ҹидди шәкилдә данлады (Һизг. 45:9).

⁹ Беләликлә, Јеһова билдирди ки, сәлаһијјәтли мөвгејә саһиб олан вә халга нәзарәт едән кишиләр өз мәсулијјәтләрини неҹә иҹра етдикләринә ҝөрә ҹаваб вермәлидирләр. Мәсләһәт, дүзәлиш вә ҹәзаја ҝәлдикдә онлар тохунулмазлыг һүгугуна малик дејилләр. Әксинә, онлар Јеһованын ганунларына риајәт етмәк мәсәләсиндә өндә ҝетмәлидирләр.

10, 11. Сүрҝүндән гајыдан бәзи јәһудиләрин ҝөрүнтүдән өзүнә дәрс ҝөтүрдүјү нәдән ҝөрүнүр?

¹⁰ Бәс сүрҝүндән гајыдан јәһудиләр Һизгијалын ҝөрдүјү ҝөрүнтүдән өзләринә дәрс ҝөтүрдүләр? Дәгиг дејә билмәрик, о дөврдәки садиг киши вә гадынлар бу мөһтәшәм ҝөрүнтү барәдә нә фикирләширдиләр. Амма Аллаһын Кәламында әсарәтдән гајыдан јәһудиләрин ҝөрдүјү ишләр, онларын пак ибадәтә мүнасибәти барәдә ҝениш мәлумат вар. Онлар ҝөрүнтүдәки принсипләри мүәјјән дәрәҹәдә тәтбиг етмишдиләр. Хүсусилә дә, Бабил әсарәтиндән әввәлки әҹдадлары илә мүгајисәдә бу, ајдын ҝөрүнүрдү.

¹¹ Һәггај вә Зәкәријјә пејғәмбәр, каһин вә мирзә Үзејир, вали Нәһәмја вә диҝәр мөмин кишиләр халга мәбәдлә бағлы ҝөрүнтүдәкинә бәнзәр принсипләри ашыламаг үчүн чох зәһмәт чәкирдиләр (Үзр. 5:1, 2). Онлар халга баша салырдылар ки, пак ибадәт јүксәлмәли, мал-мүлкдән, худбин арзулардан уҹа тутулмалыдыр  (Һәг. 1:3, 4). Халгдан пак ибадәт үчүн гојулан ганунлара һөрмәт етмәји тәләб едирдиләр. Мәсәлән, Үзејир вә Нәһәмја кишиләри јаделли арвадлардан ајрылмаға, демәк олар ки, мәҹбур етдиләр, чүнки бу арвадлар халгын руһанилији үчүн тәһлүкә иди. (Үзејир 10:10, 11 ајәләрини охујун; Нәһ. 13:23—27, 30.) Бәс тарих бојунҹа исраиллиләрин дөнә-дөнә дүшдүјү бүтпәрәстлик тәләси барәдә нә демәк олар? Ҝөрүнүр, сүрҝүндән сонра халг нәһајәт ки, бу ҝүнаһдан икраһ етди. Бәс каһинләр вә башчылар барәдә нә демәк олар? Һизгијалын алдығы ҝөрүнтүдән дә ҝөрүндүјү кими, Јеһова онлара да мәсләһәт вә дүзәлиш етди (Нәһ. 13:22, 28). Чохлары гүруруну сындырыб бу мәсләһәтә бојун әјди (Үзр. 10:7—9, 12—14; Нәһ. 9:1—3, 38).

12. Јеһова сүрҝүндән гајыдан халгына һансы немәтләри верди?

¹² Бунун мүгабилиндә Јеһова халгына немәтләр верди. Халг Јеһова илә јахын мүнасибәти бәрпа едә билди. Өлкә чохдан ҝөрмәдији асајишә јетишди (Үзр. 6:19—22; Нәһ. 8:9—12; 12:27—30, 43). Нәјин сајәсиндә? Халг нәһајәт ки, Јеһованын пак ибадәт үчүн гојдуғу али ганунлара риајәт етмәјә башлады. Мәбәдлә бағлы ҝөрүнтүдән чох адам өзүнә дәрс ҝөтүрдү. Хүласә, Һизгијалын мәбәдлә бағлы ҝөрдүјү ҝөрүнтү әсарәтдә олан јәһудиләрә ики мүһүм саһәдә көмәк етди. 1) Онлара пак  ибадәт үчүн олан ганунларын әһәмијјәтини вә бу ганунлара неҹә риајәт етмәли олдугларыны баша салды. 2) Бу ҝөрүнтү онлара ҝәләҹәклә бағлы әминлик верди. Онлара әјан олду ки, бир ҝүн пак ибадәт дирчәләҹәк вә халг пак шәкилдә ибадәт етдији мүддәтдә Јеһова онлара һансы немәтләри верәҹәк. Анҹаг инди бизи бир суал да марагландырыр: Бәс бу ҝөрүнтү мүасир дөврә дә аиддир?

13, 14. а) Һизгијалын мәбәдлә бағлы алдығы ҝөрүнтүнүн бизим дөврә дә аид олдуғуну һарадан билирик? б) Бу ҝөрүнтүнүн бизә һансы ики фајдасы вар? (Һәмчинин «Фәргли мәбәдләр, фәргли мәналар» адлы 13А чәрчивәсинә бахын.)

¹³ Әмин ола биләрик ки, Һизгијалын мәбәдлә бағлы ҝөрдүјү ҝөрүнтү бу ҝүн бизә дә аиддир. Һизгијалын ҝөрдүјү ҝөрүнтү илә Әшијанын сөјләдији пејғәмбәрлик арасындакы охшарлыға диггәт јетирәк. Һизгијал Аллаһын мүгәддәс евинин «чох һүндүр бир дағын» башында олдуғуну ҝөрмүшдү. Әшија да пејғәмбәрлик етмишди ки, «Јеһованын евинин дурдуғу дағ дағлардан уҹа бәргәрар олаҹаг». Әшија бу пејғәмбәрлијин «заманын сонунда» јеринә јетәҹәјини демишди (Һизг. 40:2; Әшј. 2:2—4; һәмчинин Микә 4:1—4 ајәләринә бахын). Бу пејғәмбәрликләр ахырзамана аиддир. Белә ки, 1919-ҹу илдән пак ибадәт уҹалыр, јәни дирчәлир, санки һүндүр бир дағын башында бәргәрар олур *.

¹⁴ Белә исә гәтијјәтлә дејә биләрик ки, Һизгијалын ҝөрдүјү ҝөрүнтү мүасир дөврдәки пак ибадәтә дә аиддир. Ҝөрүнтү әсир јәһудиләр кими, бизә дә ики саһәдә көмәк едә биләр. 1) Ҝөрүнтүдән Јеһованын пак ибадәт үчүн гојдуғу ганунлара неҹә риајәт етмәли олдуғумузу өјрәнирик. 2) Ҝөрүнтү бизи пак ибадәтин дирчәлдијинә вә Јеһованын јенидән халгына немәтләр вердијинә әмин едир.

15. Һизгијалын ҝөрдүјү мәбәдлә бағлы нәји јадда сахламалыјыг?

¹⁵ Ҝәлин Һизгијалын алдығы ҝөрүнтүнүн бәзи ҹәһәтләрини нәзәрдән кечирәк. Тәсәввүр едәк ки, Һизгијалла бирликдә нәһәнҝ мәбәди ҝәзирик. Јадда сахлајаг ки, бу, бөјүк руһани мәбәд дејил вә биз, садәҹә олараг, өзүмүзә ибадәтлә бағлы дәрс ҝөтүрмәк истәјирик. Бу ҝөрүнтүдән нә өјрәнә биләрик?

16. Һизгијалын ҝөрдүјү ҝөрүнтүдәки мәләјин мәбәдин һәр тәрәфини өлчмәсиндән нә өјрәнирик? (Фәслин әввәлиндәки шәклә бахын.)

¹⁶ Өлчмәкдә мәгсәд. Һизгијал ҝөрмүшдү ки, ҝөркәми мисә бәнзәјән мәләк мәбәди, онун диварларыны, дарвазаларыны, кешикчи отагларыны, һәјәтләрини вә гурбанҝаһыны өлчүр. Бу гәдәр тәфәррүатын өзү артыг охуҹуну һејрәтә сала биләр (Һизг. 40:1—42:20; 43:13, 14). Амма бу тәфәррүатларда чох ваҹиб мәгамлар ҝизләниб. Јеһова бунунла ганунларынын ваҹиблијини вурғулајырды. Бу ганунлары гојан Одур, фани инсан дејил. Ким дејирсә ки, Аллаһа неҹә ибадәт етмәјин фәрги јохдур, чох јанылыр. Үстәлик, мәбәди һәртәрәфли өлчмәклә Јеһова тәсдиг етди  ки, пак ибадәт мүтләг дирчәләҹәк. Өлчүләрин дәгиг олмасы исә ҝөстәрирди ки, Аллаһын вәди һөкмән, дәгигликлә јеринә јетәҹәк. Беләликлә, Һизгијал тәсдиг едирди ки, ахырзаманда пак ибадәт мүтләг вә мүтләг дирчәләҹәк!

17. Мәбәдин әразисини әһатә едән дивар бизә нә барәдә јаддашлыг едир?

¹⁷ Диварлар. Билдијимиз кими, ҝөрүнтүдә мәбәдин әтрафындакы саһә диварла әһатә олунмушду. Бу, ҹидди сурәтдә хатырладырды ки, Аллаһын халгы бүтүн дини натәмизлији пак ибадәтдән узаг сахламалы, Аллаһын евини мурдарламамалы иди. (Һизгијал 43:7—9 ајәләрини охујун.) Бу мәсләһәт бизим үчүн дә ваҹибдир. Аллаһын халгы Бөјүк Бабилин әсрләрлә сүрән руһани әсарәтиндән азад оландан сонра Мәсиһ 1919-ҹу илдә садиг вә ағыллы нөкәр тәјин етди. Хүсусилә һәмин вахтдан Аллаһын халгы јалан еһкамлардан, бүтпәрәстликлә әлагәли олан ајинләрдән јаха гуртармаг үчүн әлиндән ҝәләни едир. Биз ҹидд-ҹәһдлә пак ибадәти руһани натәмизликдән узаг сахлајырыг. Бундан башга ибадәт евләриндә бизнес ачмырыг. Бу кими ҹисмани шејләри ибадәтә гарышдырмырыг (Марк 11:15, 16).

18, 19. а) Ҝөрүнтүдәки мәбәдин һүндүр дарвазалары нәји билдирир? б) Инсанлар Јеһованын али ганунларыны дәјәрдән салмаға чалышанда биз нә етмәлијик? Нүмунә чәкин.

¹⁸ Һүндүр дарвазалар. Һизгијалын ҝөрдүјү һүндүр дарвазалар нәји билдирир? Ҝөрүнтүдәки мәбәдин бу ҹәһәти јәһуди әсирләрә хатырладырды ки, Јеһова хидмәтчиләринин јүксәк әхлаг гајдаларына риајәт етмәсини тәләб едир. Гәдимдә белә иди. Бәс бу ҝүн барәдә нә демәк олар? Биз Јеһованын бөјүк руһани мәбәдиндә ибадәт едирик. Демәли, бу ҝүн ријакарлыгдан узаг олан дүзҝүн давраныш даһа ваҹибдир (Ром. 12:9; 1 Бут. 1:14, 15). Јашадығымыз бу ахырзаман әрзиндә Јеһова тәдриҹән халгына Өз әхлаг гајдаларыны баша дүшмәјә көмәк едир *. Мәсәлән, төвбә етмәјән ҝүнаһкарлар јығынҹагдан кәнар едилирләр (1 Кор. 5:11—13). Бундан башга, дарвазаларын ҝиришләриндәки кешикчи отаглары бизә хатырладыр ки, бу ҝүн Јеһованы разы салмајан адам руһани мәбәдә дахил ола билмәз. Мәсәлән, икили һәјат сүрән адам ибадәт евинә ҝирә биләр, амма нә гәдәр ки, Јеһованын тәләбләринә риајәт етмир, Онун разылығыны газана билмәз (Јаг. 4:8). Чиркаба булашмыш бу дүнјада пак ибадәтин бу ҹүр һифз олунмасы мөҹүзәдир!

¹⁹ Мүгәддәс Китабда дејилмишди ки, сон ҝәлмәздән әввәл бу дүнја позулаҹаг. Орада јазылыб: «Пис адамлар вә фырылдагчылар исә алдадыб алданараг ҝет-ҝедә даһа бетәр ишләр ҝөрәҹәкләр» (2 Тим. 3:13). Ҝүнү-ҝүндән даһа чох инсан алданыб белә гәнаәтә ҝәлир ки, Јеһованын али ганунлары чох сәртдир, артыг көһнәлиб вә ја сәһвдир. Сиз дә бу фикрә алданаҹагсыныз? Мәсәлән, әҝәр кимсә сизи инандырмаға чалышса ки, Аллаһын һомосексуализмлә бағлы ганунлары јанлышдыр, нә едәҹәксиниз?  Онунла разылашаҹагсыныз, јохса Јеһова Аллаһла? Онун Кәламында бирмәналы шәкилдә дејилир ки, бу ҹүр әмәл саһибләри әхлагсызлыг едир. Аллаһ хәбәрдарлыг едир ки, әхлагсызлығы алгышламајаг, јәни белә һәрәкәтә бәраәт газандырмајаг (Ром. 1:24—27, 32). Белә һалларла үзләшәндә јахшы олар ки, Һизгијалын ҝөрдүјү мәбәдин һүндүр дарвазаларыны тәсәввүрүмүздә ҹанландыраг вә јадда сахлајаг ки, бу мәнфур дүнја нә гәдәр әлләшиб-вурушса да, Јеһова Өз али ганунларындан кечмәјәҹәк. Бәс биз сәмави Атамызла разылашыб дүзҝүнлүјүн тәрәфини тутуруг?

20. Һизгијалын ҝөрдүјү ҝөрүнтү бөјүк издиһамын үзвләрини неҹә руһландырыр?

²⁰ Һәјәтләр. Һизгијал мәбәдин ҝениш бајыр һәјәтини ҝөрәндә јәгин ону һејрәт бүрүмүшдү. Тәсәввүр етмишди ки, Јеһоваја ибадәт едән нә гәдәр инсан орада топлаша биләр. Бу ҝүн мәсиһиләр ондан гат-гат бөјүк мәбәддә ибадәт едирләр. Һизгијалын ҝөрдүјү ҝөрүнтү Јеһованын руһани мәбәдинин бајыр һәјәтиндә хидмәт едән бөјүк издиһамын үзвләрини руһландырыр (Вәһј 7:9, 10, 14, 15). Һизгијал ҝөрмүшдү ки, һәјәтләрдә јемәк отаглары вар. Бу отагларда инсанлар тәгдим етдикләри үнсијјәт гурбанларындан јејә биләрдиләр (Һизг. 40:17). Бунунла, онлар, санки Јеһова Аллаһла бир сүфрәјә әјләширдиләр. Бу исә Јеһова илә араларындакы сүлһүн вә достлуғун рәмзи иди. Бу ҝүн биз Төвратын табелијиндә олан јәһудиләр кими һејван  гурбаны ҝәтирмирик. Биз пак шәкилдә ибадәт едәндә мәдһ гурбаны тәгдим едирик, мәсәлән, јығынҹагда шәрһләр веририк, хидмәтдә иманымызы дилә ҝәтиририк (Ибр. 13:15). Һәмчинин Јеһованын вердији руһани гида илә бәсләнирик. Биз Јеһоваја мәдһ сөјләјән Гарун оғулларынын сөзләри илә үрәкдән разыјыг: «Сәнин һәјәтиндә кечән бир ҝүнү, өзҝә јердә кечирдијим мин ҝүнә дәјишмәрәм» (Зәб. 84:10).

21. Мәсһ олунмуш мәсиһиләр Һизгијалын ҝөрдүјү ҝөрүнтүдәки каһин тајфасындан нә өјрәнә биләр?

²¹ Каһин тајфасы. Һизгијал ҝөрмүшдү ки, каһинләрлә лавилиләрин ичәри һәјәтә ҝирдији дарвазалар каһин олмајан гәбиләләрин бајыр һәјәтә ҝирдији дарвазаларла ејнидир. Бу, каһин тајфасына хатырладырды ки, онлар да Јеһованын пак ибадәт үчүн гојдуғу ганунлара табе олмалыдыр. Бәс бу ҝүн неҹә? Бу ҝүн Аллаһын хидмәтчиләри арасында һеч ким ирс олараг каһинлик һүгугу алмыр, лакин мәсһ олунмуш мәсиһиләр «сечилмиш сој, падшаһ вә каһин тајфасы» адланыр (1 Бут. 2:9). Гәдим Исраилдә каһинләр ајрыҹа һәјәтдә ибадәт едирдиләр. Бу ҝүн мәсһ олунмушлар диндашларындан ајры бир јердә ибадәт етмир, анҹаг онларын Јеһова илә хүсуси мүнасибәтләри вар — Јеһова онлары өвладлыға ҝөтүрүб (Гал. 4:4—6). Амма мәсһ олунмушлар Һизгијалын ҝөрдүјү ҝөрүнтүдән чох шеј өјрәнә биләр. Мәсәлән, ҝөрүнтүдә каһинләрә дә мәсләһәт вә дүзәлиш едилмишди. Бүтүн мәсиһиләр јадда сахламалыдыр ки, биз «бир чобан»ын рәһбәрлији алтында хидмәт едән «бир сүрү»нүн үзвләријик. (Јәһја 10:16 ајәсини охујун.)

22, 23. а) Мәсиһи ағсаггаллар ҝөрүнтүдә тәсвир олунан сәрдардан нә өјрәнә биләр? б) Ҝәләҹәкдә нәләр ола биләр?

²² Сәрдар. Һизгијалын ҝөрдүјү ҝөрүнтүдә сәрдар ҝөркәмли јер тутур. О, каһин гәбиләсиндән дејилди, мәбәддә каһинләрин рәһбәрлијинә табе олмалы иди. Амма о, халгын арасында нәзарәтчи ролуну ојнајырды вә онлары гурбанларла тәмин едирди (Һизг. 44:2, 3; 45:16, 17; 46:2). Беләликлә, о, бу ҝүн јығынҹагда мәсулијјәт дашыјан мәсиһи кишиләр үчүн нүмунәдир. Мәсиһи ағсаггаллар, еләҹә дә сәјјар нәзарәтчиләр мәсһ олунмуш садиг нөкәрин итаәтиндә галмалыдыр (Ибр. 13:17). Онлар Аллаһын халгына мәсиһи ҝөрүшләриндә вә хидмәтдә мәдһ гурбанлары ҝәтирмәјә көмәк етмәк үчүн әлләриндән ҝәләни едирләр (Ефес. 4:11, 12). Ағсаггаллар һәмчинин диггәт јетирмәлидир ки, Јеһова Исраил рәһбәрләрини һакимијјәтдән суи-истифадә етдикләринә ҝөрә тәнбеһ етмишди (Һизг. 45:9). Ејнилә, ағсаггаллар дүшүнмәмәлидир ки, онларын мәсләһәт вә тәнбеһә еһтијаҹы јохдур. Әксинә, һәр һансы бир вәзијјәтдә Јеһова онлары сафлашдыранда онлар чох севинирләр, чүнки бунун сајәсиндә даһа јахшы чобан вә нәзарәтчи ола биләрләр. (1 Бутрус 5:1—3 ајәләрини охујун.)

 ²³ Јеһова Ҹәннәтдә дә баҹарыглы вә гајғыкеш нәзарәтчиләр тәјин едәҹәк. Әслиндә, бу ҝүн чохлу ағсаггалын алдығы тәлим онлары Ҹәннәтдә баҹарыглы, јарарлы ағсаггал олмаға һазырлајыр (Зәб. 45:16). Бу кишиләрин јени дүнјада неҹә бир немәт олаҹағы барәдә дүшүнәндә чох руһланырыг. Ола билсин, дирчәлишлә бағлы диҝәр пејғәмбәрликләр кими, Һизгијалын ҝөрдүјү ҝөрүнтүнү дә Јеһованын лазым билдији вахтда даһа ајдын баша дүшәҹәјик. Бәлкә дә ҝәләҹәкдә онун бәзи ҹәһәтләри елә јеринә јетәҹәк ки, инди буну һеч ағлымыза белә ҝәтирә билмәрик. Буну заман ҝөстәрәҹәк.

24, 25. Һизгијалын алдығы ҝөрүнтү Јеһованын Өз халгына вердији немәтләри неҹә тәсвир едир?

²⁴ Јекунда ҝәлин Һизгијалын ҝөрдүјү ҝөрүнтүдә баш верән мөһтәшәм бир һадисәни јада салаг. Јеһова мәбәдә ҝәлир вә халга вәд едир ки, нә гәдәр ки онлар пак ибадәт үчүн олан ганунлара сәдагәтлә риајәт едирләр О, орада галаҹаг (Һизг. 43:4—9). Јеһованын орада олмасы халг үчүн, мәмләкәт үчүн нә мәна кәсб едәҹәкди?

²⁵ Ҝөрүнтүдә ики пејғәмбәрлик сәһнәси васитәсилә Аллаһдан ҝәлән немәтләр тәсвир олунур: 1) Мәбәддән чај ахыр вә бу чај ахдығы һәр јерә һәјат, бәрәкәт ҝәтирир. 2) Өлкә низамла, дәгигликлә бөлүнүр, мәбәд вә мәбәдин торпаглары исә ортада јерләшир. Бу пејғәмбәрликләри бу ҝүн неҹә баша дүшмәк олар? Биз елә бир дөврдә јашајырыг ки, Јеһова даһа мүгәддәс бир мәбәдә, бөјүк руһани мәбәдә дахил олуб, бу мәбәди сафлашдырыб вә ондан разы галдығыны билдириб (Мәл. 3:1—4). Һәмин ики пејғәмбәрлик сәһнәси бу нәшрин 19—21 фәсилләриндә арашдырылыр.