1—3. а) Һизгијалын ҝөрдүјү мәнзәрәни тәсвир един. (Фәслин әввәлиндәки шәклә бахын.) б) Һизгијал нәјин тәсири илә бу ҝөрүнтүнү ҝөрдү вә ҝөрдүкләри она неҹә тәсир етди?

 ҜӨЗ ОХШАДЫГҸА узанан гумсаллығын һәмишәки сүкунәтини гејри-ади бир мәнзәрә позур. Һизгијал ҝөзләрини гыјараг үфүгдә пејда олан бу мәнзәрәни ҝөрмәјә чалышыр. Мәнзәрә ајдынлашдыгҹа һејрәтдән онун ҝөзләри бәрәлә галыр. Илаһи, бу нәдир белә?! Үфүгдән она сары гасырға ҝәлир. Лакин бу, ади гасырға дејил. Шималдан әсән шиддәтли күләк онун сачларыны һаваја совурур, аз галыр палтарыны әјниндән чыхартсын. Ҝөјүн үзүнү бөјүк бир булуд алыр. Булудун ичиндә јанан алов булуду ҝур ишыға бүрүјүб. О, гызылла ҝүмүшүн гарышығы кими шөлә сачыр. Булуд јахынлашдыгҹа Һизгијал даһа да һејрәтләнир. Бөјүк гошунун сәсинә бәнзәр бир сәс ҝет-ҝедә ҝүҹләнәрәк аләми бүрүјүр (Һизг. 1:4, 24).

² Тәхминән отуз јашында олан бу ҹаван өмрүндә биринҹи дәфәдир ки, белә бир унудулмаз мәнзәрәнин шаһиди олур. О һисс едир ки, «Јеһованын руһу», мүгәддәс руһун гүввәси онун үзәринә енир. Бу елә бир гүввәдир ки, онун гаршысында башга һеч бир гүввә дајана билмәз. Руһун тәсири илә Һизгијал мөһтәшәм  бир сәһнәни сејр едир. Хүсуси сәс вә ҝөрүнтү еффектләри илә чәкилән мүасир филмләрин һеч бири бу сәһнә илә мүгајисәјә ҝәлә билмәз. Бу ҝөрүнтү Һизгијалы елә һејрәтә салыр ки, о, үзүгојлу јерә дөшәнир (Һизг. 1:3, 28).

³ Бу ҝөрүнтүнү ҝөстәрмәкдә Јеһованын мәгсәди Һизгијалы, садәҹә һејрәтә салмаг дејил. Онун ҝөрдүјү бу илк ҝөрүнтү, сонралар шаһиди олуб гәләмә алдығы диҝәр ҝөрүнтүләр кими, һәм онун үчүн, һәм дә Јеһованын мүасир хидмәтчиләри үчүн бөјүк мәна дашыјыр. Ҝәлин инди биз дә Һизгијалын ҝөрдүјү сәһнәни, гијаби дә олса, сејр едәк.

4, 5. Һизгијала ҝөрүнтү назил олан вахт мөвҹуд олан вәзијјәти тәсвир един?

⁴ Һизгијал 1:1—3 ајәләрини охујун. Ҝәлин әввәлҹә ҝөрүнтү назил олан вахт мөвҹуд олан вәзијјәтлә таныш олаг. Ерамыздан әввәл 613-ҹү ил иди. Өтән фәсилдән өјрәндијимиз кими, Һизгијал Бабилдә, Кәбәр чајынын кәнарында, әсир апарылмыш јәһудиләрин арасында јашајырды. (Еһтимал ки, Кәбәр чајы Фәрат чајындан ајрылыб сонра јенә Фәрата төкүлән вә ҝәмичилијә јарарлы сүни канал олуб.)

⁵ Әсирликдә олан јәһудиләр өз вәтәнләри Јерусәлимдән тәгрибән 800 километр узагда идиләр *. Бир вахтлар Һизгијалын атасынын каһин кими хидмәт етдији мәбәд јалан ибадәтлә, бүтпәрәстликлә мурдарланмышды. Давудун, Сүлејманын дөврүндә әзәмәтә бүрүнән тахт-таҹ инди рүсвајчылыг ичиндә иди. Јеһованын јолу илә ҝетмәјән Јәһјакин падшаһ Бабилдә әсирләрин арасында јашајырды. Онун јеринә тахта чыхарылмыш Сидгијјә дә Јеһованын  бәјәнмәдији ишләри ҝөрүрдү, үстәлик, Бабил падшаһынын әлиндә ојунҹаға чеврилмишди (2 Пад. 24:8—12, 17, 19).

6, 7. Нәјә ҝөрә Һизгијала елә ҝәлә биләрди ки, өмрүнүн ән зүлмәт чағыны јашајыр?

⁶ Бөјүк иман саһиби олан Һизгијал јәгин өмрүнүн ән зүлмәт чағыны јашајырды. Бәлкә дә онун һәмвәтәнләрини шүбһәләр боғурду: «Ҝөрәсән, Јеһова биздән бирдәфәлик үз дөндәриб? Доғруданмы, сајсыз-һесабсыз јалан аллаһларын мәскәни олан Бабил пак ибадәтин көкүнү кәсәҹәк, јер үзүндә Јеһованын һакимијјәтинә сон гојаҹаг?»

⁷ Ҝәлин бу вәзијјәти нәзәрдә сахлајараг Һизгијалын илк ҝөрүнтүсүнү охујаг вә мөвзуну әтрафлы арашдыраг (Һизг. 1:4—28). Өзүмүзү Һизгијалын јериндә тәсәввүр едәк, онун ҝөрдүкләрини ҝөрмәјә, ешитдикләрини ешитмәјә чалышаг.

8. Һизгијал ҝөрүнтүдә нә ҝөрмүшдү вә о, нәји тәмсил едир?

⁸ Ҝәлин Һизгијалын шаһиди олдуғу мәнзәрәни үмуми шәкилдә нәзәрдән кечирәк. Бу, нәһәнҝ, һејрәтамиз арабаја бәнзәјирди. Арабанын дөрд бөјүк чархы вар иди, чархларын һәр биринин јанында гејри-ади руһани варлыг дурурду. Сонралар һәмин варлыгларын кәрруб олдуғу мәлум олду (Һизг. 10:1). Онларын башы үстүндә, бүллура бәнзәр бөјүк бир фәза, фәзанын да үстүндә тахт вар иди. Бу тахтда Јеһова Аллаһ әјләшмишди. Бәс араба нәјин рәмзидир?  Һизгијалын ҝөрдүјү араба јалныз бир шеји тәмсил едә биләр: Јеһованын һәшәмәтли тәшкилатынын сәмави һиссәсини. Буну нәјә әсасланараг дејирик? Ҝәлин бу нәтиҹәјә ҝәлмәјә әсас верән үч амили нәзәрдән кечирәк.

9. Ҝөрүнтүдәки араба Јеһованын Һөкмдар мөвгејини неҹә вурғулајыр?

⁹ Јеһованын руһани варлыглар үзәриндәки һакимијјәти. Диггәт јетирин ки, ҝөрүнтүдә Јеһованын тахты кәррубларын башы үстүндә јерләшир. Мүгәддәс Китабын диҝәр бөлмәләриндә дә Јеһованын кәррублар үзәриндә тахтда отурдуғу вә ја кәррубларын арасында әјләшдији јазылыб. (2 Падшаһлар 19:15 ајәсини охујун; Чых. 25:22; Зәб. 80:1.) Әлбәттә, бу о демәк дејил ки, Јеһова һәрфи мәнада кәррубларын үстүндә отурур. Онун нә бу гүдрәтли варлыгларын үстүндә отурмаға, нә дә араба сүрмәјә еһтијаҹы јохдур. Бәс онда һансы мәнада Јеһова кәррубларын үстүндә әјләшиб? Кәррублар Јеһованын һакимијјәтинә табе олур. Јеһова бир Һөкмдар кими ирадәсини јеринә јетирмәк үчүн онлары хәлг етдији аләмин истәнилән нөгтәсинә ҝөндәрир. Аллаһын диҝәр мүгәддәс мәләкләри кими, кәррублар да Јеһованын һөкмләрини хидмәтчи, јахуд елчи гисминдә иҹра едирләр (Зәб. 104:4). Онлар, санки, нәһәнҝ, ваһид бир арабаны тәшкил едирләр. Јеһова да бир Һөкмдар кими бу «арабаны» идарә едир.

10. Нәјә әсасән демәк олар ки, сәмави араба тәкҹә дөрд кәррубдан ибарәт дејил?

 ¹⁰ Араба јалныз кәррублары тәмсил етмир. Һизгијал ҝөрүнтүдә дөрд кәрруб ҝөрмүшдү. Дөрд рәгәми Мүгәддәс Китабда чох вахт бүтөвлүјү, јәни һамыны еһтива едән тамлығы билдирир. Демәли, дөрд кәрруб Јеһованын садиг руһани оғулларынын ҹәмини тәмсил едир. Һәмчинин диггәт јетирин ки, чархлар, һәтта кәррублар ҝөзлә долу иди. Онларын ҝөзлә долу олмасы ајыг-сајыглыға ишарәдир. Бу ајыг-сајыглыг тәкҹә дөрд руһани варлыға јох, бүтүн руһани варлыглара хас бир кејфијјәтдир. Һизгијал арабаны елә нәһәнҝ тәсвир едир ки, һәтта әзәмәтли кәррублар белә, бу араба илә мүгајисәдә кичик ҝөрүнүрләр (Һизг. 1:18, 22; 10:12). Демәли, Јеһованын тәшкилатынын сәмави һиссәси тәкҹә дөрд кәррубдан ибарәт дејил, чох бөјүкдүр.

11. Дәнјал пејғәмбәрә һансы ҝөрүнтү назил олмушду вә бундан һансы нәтиҹәјә ҝәлирик?

¹¹ Дәнјала да руһани аләми тәсвир едән охшар ҝөрүнтү назил олмушду. Дәнјал пејғәмбәр узун илләр Бабил шәһәриндә сүрҝүндә јашамышды. Она да сәмави аләмлә бағлы ҝөрүнтү назил олмушду. Мараглыдыр ки, һәмин ҝөрүнтүдә дә Јеһованын тахтынын чархлары вар иди. Дәнјалын алдығы ҝөрүнтүдә Јеһованын ҝөјдәки руһани аиләсинин бөјүклүјү габарыр. Дәнјал ҝөрмүшдү ки, «минләрлә минләр... он минләрлә он минләр» Јеһованын һүзурунда дуруб. Јеһованын бу руһани оғуллары сәмада гурулан мәһкәмәнин үзвләри гисминдә тәсвир олунмушду. Мәһкәмә башлајанда һәр бири, ҝөрүнүр, онлара ајрылмыш јердә әјләшмишди (Дән. 7:9, 10, 13—18). Белә исә, мәнтигәујғундур ки, Һизгијала назил олан ҝөрүнтүдә дә һәмин әзәмәтли, руһани мәҹлис тәсвир олунмушду.

12. Мүгәддәс Китабда сәмави аләмин тәсвир олундуғу ҝөрүнтүләри арашдырмаг бизи нәдән горујур?

¹² Јеһова Аллаһ билир ки, диггәтимизи руһани аләмдәки ҝерчәкликләрә, һәвари Булусун дили илә десәк, ҝөрүнмәјән шејләрә ҹәмләмәк бизи горујур. Биз әтдән-гандан ибарәт ҹисмани варлыглар олдуғумуз үчүн даһа чох ҝөрүнән шејләр барәдә дүшүнмәјә мејиллијик. Амма ҝөрүнән шејләр, јәни физики тәләбатларымыз мүвәггәтидир. (2 Коринфлиләрә 4:18 ајәсини охујун.) Шејтан чох вахт бу мејилимиздән истифадә едәрәк бизи ҹисмани дүшүнҹәли инсана чевирмәјә чалышыр. Бу тәсирә ујмајаг дејә, Јеһова Һизгијала назил етдији ҝөрүнтүјлә вә диҝәр ҝөрүнтүләр васитәсилә бизә Өз сәмави аиләсинин нә гәдәр һәшәмәтли олдуғуну хатырладыр.

13, 14. а) Һизгијал чархлары неҹә тәсвир етмишди? б) Јеһованын арабасында чархларын олмасы һансы мәнаны дашыјыр?

¹³ Әввәлҹә Һизгијал диггәтини дөрд кәрруба ҹәмләјир. Бу нәшрин дөрдүнҹү фәслиндә һәмин варлыгларын, онларын гејри-ади ҝөркәминин бизә Јеһова Аллаһ барәдә нә өјрәтдији арашдырылыр. Һизгијал кәррубларын јанында дөрд чарх да ҝөрмүшдү — һәр кәррубун јанында бир чарх. Еһтимал ки, онларын һәрәси бир тәрәфдә  дурараг нәһәнҝ бир дөрдбуҹаг әмәлә ҝәтирмишди. (Һизгијал 1:16—18 ајәләрини охујун.) Ҝөрүнүр, чархлар хризолит дашындан иди. Шәффаф, гызылы вә ја јашымтыл-сары рәнҝә чалан бу гијмәтли даш пар-пар парылдајырды.

¹⁴ Һизгијала назил олан ҝөрүнтүдә арабанын чархларына бөјүк вурғу вурулур. Чархлы тахт! Бу, чох гејри-ади бир шејдир. Тахт дејәндә инсанын ағлына јерә бәркидилмиш отураҹаг ҝәлир. Бу, әслиндә, тәбиидир. Чүнки јер үзүндәки һөкмдарларын нүфуз даирәси јалныз ораја гәдәр олур. Јеһованын һакимијјәти исә инсан һакимијјәтиндән тамамилә фәрглидир. Јеһованын һакимијјәти һүдудсуздур (Нәһ. 9:6). Јеһова елә бир Һөкмдардыр ки, Онун һакимијјәти, сөзүн әсл мәнасында, һәр јаны әһатә едир. Һизгијал тезликлә буну дәрк едәҹәк.

15. Һизгијал чархлар барәдә нә јазмышды?

¹⁵ Чархларын өлчүсү Һизгијалы валеһ едир. О јазмышды: «Чархларын чәнбәрләри о гәдәр һүндүр иди ки, һејрәт доғурурду». Тәсәввүр един, Һизгијал бу нәһәнҝ, ҝөјә дирәнән парлаг чәнбәрләрә бахмаг үчүн башыны неҹә ҝери атыр. Сонра о, белә бир мараглы мәгамы гејд етмишди: «Һәр дөрд чархын чәнбәрләринин үстү ҝөзлә долу иди». Лакин ән чох һејрәт доғуран чархларын гејри-ади гурулушу иди. О јазмышды: «Чархларын... гурулушу исә елә иди ки, санки, чарх ичиндә чарх вар иди». Ҝәлин ҝөрәк бу нә демәкдир.

16, 17. а) Арабанын чархларынын гурулушу неҹә иди? б) Чархлар Јеһованын арабасынын һәрәкилији барәдә нә дејир?

¹⁶ Ҝөрүнүр, Һизгијалын ҝөрдүјү чархларын һәр бири, әслиндә ики чархын бирләшмәси иди. Ола билсин, бунлар дүз буҹаг алтында бир-биринә кечирилмиш ејни диаметрли чархлар иди. Буна ҝөрә дә «онлар дөрд сәмтин һәр биринә ҝедә билирдиләр, һәрәкәт едәндә саға-сола дөнмүрдүләр». Бәс бу чархлар Һизгијалын ҝөрдүјү сәмави араба барәдә бизә нә дејир?

¹⁷ Бу һүндүрлүкдә чархлар тәкҹә бир дәфә дөвр етмәклә чох бөјүк мәсафәни гәт едә биләр. Ҝөрүнтүјә әсасән, араба илдырым сүрәти илә һәрәкәт едирди (Һизг. 1:14). Үстәлик, тәсәввүр един, дөрд истигамәтә һәрәкәт едә билән бу гејри-ади чархлар неҹә һәрәки идиләр. Бу һәрәкилијә мүһәндисләр һәсәд апарар. Араба сүрәти азалтмадан, саға-сола дөнмәдән истигамәти дәјишә билирди. Амма бу о демәк дејил ки, о, кор-коранә һәрәкәт едирди. Чәнбәрләрин ҝөзләрлә өртүлү олмасы ҝөстәрир ки, араба әтрафында, үмумијјәтлә һәр јанда баш верән бүтүн шејләрдән там хәбәрдардыр.

18. Чархларын өлчүсү вә үстүнүн ҝөзлә долу олмасы нәдән хәбәр верир?

¹⁸ Бәс Јеһова бу ҝөрүнтү илә Һизгијала вә бүтүн мөмин инсанлара Өз тәшкилатынын сәмави һиссәси барәдә нә өјрәтмәк истәјирди? Ҝәлин нәзәрдән кечирдијимиз шејләри бир дә тәкрарлајаг. Чархларын парылтысы вә өлчүсү Јеһованын тәшкилатынын сәмави һиссәсинин һәшәмәтли вә һејрәтамиз олдуғуна ишарәдир. Чархларын  үстүнүн ҝөзлә долу олмасы тәшкилатын сәмави һиссәсинин һәр шејдән аҝаһ олдуғуна дәлаләт едир. Јеһованын ҝөзләри һәр шеји ҝөрүр (Мәс. 15:3; Әрм. 23:24). Үстәлик, Онун милјонларла мәләји вар. О, бу мәләкләри дүнјанын һәр бир нөгтәсинә ҝөндәрир. Онлар да һәр шеји диггәтлә мүшаһидә едиб өз Һөкмдарларына хәбәр апарырлар. (Ибраниләрә 1:13, 14 ајәләрини охујун.)

19. Ҝөрүнтүдәки арабанын сүрәти вә һәрәкилији Јеһова вә Онун тәшкилатынын сәмави һиссәси һаггында бизә нә өјрәдир?

¹⁹ Бундан башга араба сон дәрәҹә сүрәтли вә һәрәкидир. Јеһованын тәшкилатынын сәмави һиссәси илә инсан һөкумәтләри, институтлары вә тәшкилатлары арасындакы фәргә фикир верин. Инсанларын тәсис етдији һеч бир гурулуш дәјишән вәзијјәтә ујғунлаша билмир. Нәтиҹәдә, онлар уғурсузлуға мәһкум олур вә фәалијјәтләрини дајандырыр. Сәмави араба исә ону идарә едән Јеһова Аллаһын хисләтини мүкәммәл сурәтдә әкс етдирир. О Аллаһын ки, мүлајимдир вә һәр вәзијјәтдә мүвафиг сифәтлә чыхыш едир. Адынын мәнасындан ҝөрүндүјү кими, Јеһова нијјәтини јеринә јетирмәк үчүн лазым олан Кәс ола биләр (Чых. 3:13, 14). Мәсәлән, Јеһова гүдрәтли Ҹәнҝавәр олуб халгы уғрунда вуруша биләр. Лакин дәрһал да чеврилиб мәрһәмәтли Аллаһ олар, етдији ҝүнаһа ҝөрә гәм дәрјасына батмыш инсанлары әфв едиб онлара нәвазиш ҝөстәрәр, онлары дирчәлдәр (Зәб. 30:5; Әшј. 66:13).

20. Нәјә ҝөрә Јеһованын арабасы биздә еһтирам доғурмалыдыр?

²⁰ Бу мәгамда өзүмүздән соруша биләрик: «Јеһованын арабасы мәндә еһтирам доғурур?» Јадда сахламалыјыг ки, бу араба һал-һазырда мөвҹуд олан ҝерчәклији әкс етдирир. Ҝәлин һеч вахт дүшүнмәјәк ки, Јеһова, Онун Оғлу вә мәләкләр бизи руһдан салан һансыса проблемә ҝөз јумур. Һәмчинин биз нараһат олмамалыјыг ки, бирдән Аллаһымыз Јеһова еһтијаҹымызы вахтында өдәмәз, јахуд Онун тәшкилаты бу дәјишкән дүнјада баш галдыран јени чәтинликләрә ујғунлаша билмәз. Ҝәлин унутмајаг, Јеһованын тәшкилаты һәмишә фәалијјәтдәдир. Һизгијал ҝөјдән чархлары һәрәкәтә сәсләјән бир һајгырты ешитмишди: «Чархлар, ирәли!» (Һизг. 10:13). Јеһованын Өз тәшкилатыны неҹә һәрәкәтә ҝәтирдији барәдә дүшүнмәк инсаны валеһ едир. Лакин бизи биринҹи нөвбәдә мәфтун едән Јеһованын Өзүдүр.

21, 22. Арабанын һиссәләрини бир јерә ҹәм едән нәдир?

²¹ Сонра Һизгијал диггәти чархларын үстүндәки мәнзәрәјә ҹәмләјир. Орада «санки, фәза вар иди. О, бүллур кими, һејрәтамиз шәкилдә бәрг вурурду» (Һизг. 1:22). Кәррубларын башынын үстүндә, јухарыда шәффаф бир фәза бәрг вурурду. Бу мәгамда механикадан башы чыхан адамын ағлында чохлу суаллар јарана биләр. Мәсәлән, бу фәзаны чархларын үстүндә нә сахлајыр? Чархлар онлары бирләшдирән охлар олмадан неҹә һәрәкәт едир? Анҹаг бир шеји јадда сахлајын ки, бу араба физики ганунлар әсасында  гурулмајыб. Араба рәмзи мәна дашыјыр, руһани аләмдәки ҝерчәкликләри тәсвир едир. Нөвбәти сөзләрә фикир верин, бурада ваҹиб бир һәгигәт ҝизләниб: «Мәхлуглары һәрәкәтә ҝәтирән руһ чархлары да һәрәкәтә ҝәтирирди» (Һизг. 1:20, 21). Бәс кәррублары вә чархлары һәрәкәтә ҝәтирән руһ нә руһ иди?

²² Шүбһәсиз, бу, Јеһованын руһудур. Каинатда ән бөјүк гүввә олан бу руһ арабанын һиссәләрини бир јерә ҹәм едиб, она ҝүҹ верир, онун һәрәкәтинин мүкәммәл һәмаһәнҝлијини тәнзимләјир. Буну јадда сахлајараг ҝәлин арабаны идарә едән Кәсдән данышаг.

23. Һизгијал Јеһованы тәсвир етмәк үчүн һансы сөзләрдән истифадә едир вә нәјә ҝөрә?

²³ Һизгијал 1:26—28 ајәләрини охујун. Һизгијал бу ҝөрүнтүнү тәсвир едәркән тез-тез «бәнзәјән», «бәнзәр», «кими», «охшар» вә саирә сөзләрдән истифадә едиб. Лакин бу ајәләрдә белә сөзләрә даһа тез-тез раст ҝәлинир. Ҝөрдүјү мәнзәрә елә мөһтәшәмдир ки, Һизгијал ону тәсвир етмәк үчүн сөз тапмаға чәтинлик чәкир. О, «тахты хатырладан, ҝөј јагута бәнзәјән бир шеј» ҝөрүр. Тәсәввүр едирсиниз, нәһәнҝ ҝөј јагутдан ојулмуш бөјүк бир тахт. Тахтда бир Варлыг әјләшиб. Онун ҝөрүнүшү инсана бәнзәјир.

24, 25. а) Јеһованын тахтынын әтрафындакы ҝөј гуршағы бизә нәји хатырладыр? б) Бу ҹүр ҝөрүнтүләр бәзән пејғәмбәрләрә неҹә тәсир етмишди?

 ²⁴ Бу әзәмәтли Варлығын јалныз үмуми ҹизҝиләрини сезмәк мүмкүндүр. Чүнки О, белдән јухары вә белдән ашағы алов кими шөлә сачыр. Тәсәввүр един, пејғәмбәр ҝөзләрини гыјыр, әлини ҝөзләринин үстүнә гојуб бу һәшәмәтли Варлыға бахыр. Нәһајәт, Һизгијал ҝөрүнтүнүн ән мүһүм мәгамыны гејд едир. Тахтда Отуранын әтрафында «јағышлы ҝүндә булудлар арасындан чыхан ҝөј гуршағына охшар парылты вар иди». Ҝөј гуршағы ҝөрәндә һансы һиссләри кечирирсиниз? Мәҝәр бу заман үрәјиниз фәрәһлә долмур? Ҝөј гуршағы бизә Јараданымызын ҹалалыны ајдын шәкилдә хатырладыр. Бу һүзур долу, рәнҝарәнҝ гуршаг Дашгындан сонра Јеһованын бағладығы сүлһ әһдини јадымыза салыр (Јар. 9:11—16). Јеһова гүдрәтлидир, һәр шејә гадирдир, анҹаг буна бахмајараг, О, сүлһ Аллаһыдыр (Ибр. 13:20). Онун гәлбиндә сүлһ һөкмранлыг едир вә бу сүлһ Она сәдагәтлә ибадәт едән һәр кәсә сирајәт едир.

²⁵ Јеһова Аллаһын ҹалалыны ҝөрмәк ҝөрүн Һизгијала неҹә тәсир едир. О јазмышды: «Буну ҝөрәндә үзүстә јерә дөшәндим». Һизгијалын бүтүн варлығыны һејрәт, горху елә бүрүмүшдү ки, о, үзүгојлу јерә дөшәнмишди. Јеһовадан ҝөрүнтү алан башга пејғәмбәрләр дә бу һалы јашамышдылар. Бу ҝөрүнтүләри ҝөрәндә, јәгин онлар өзләрини ҹылыз вә аҹиз һисс етмишдиләр (Әшј. 6:1—5; Дән. 10:8, 9; Вәһј 1:12—17). Лакин вахт кечдикҹә Јеһованын ачдығы һәгигәтләр онлары чох мөһкәмләндирмишди. Һизгијалла да мәһз бу баш вермишди. Бәс Мүгәддәс Китабдакы бу ҹүр парчалар бизә неҹә тәсир етмәлидир?

26. Һизгијала назил олан ҝөрүнтү ону неҹә мөһкәмләндирмишди?

²⁶ Бәлкә дә Һизгијалын үрәјини Аллаһын халгынын Бабилдәки вәзијјәти илә бағлы шүбһәләр, нараһатлыглар дидиб-парчалајырды. Анҹаг еһтимал ки, бу ҝөрүнтүдән сонра о, тохтаглыг тапды. Аллаһын садиг бәндәләринин Јерусәлимдә, Бабилдә, јахуд башга јердә олмасынын һеч бир әһәмијјәти јох иди. Онлар һарада олурлар-олсунлар, һәр јердә Јеһованын мөһтәшәм арабасынын нүфуз даирәси дахилиндә идиләр. Бу ҹүр мөһтәшәм сәмави тәшкилатын Һөкмдары гаршысында һеч бир шејтани гүввә дуруш ҝәтирә билмәз. (Зәбур 118:6 ајәсини охујун.) Һизгијал һәм дә ҝөрмүшдү ки, сәмави араба бәшәријјәтдән узаг дејил. Һәтта арабанын тәкәрләри јерә дәјирди (Һизг. 1:19). Бу о демәк иди ки, Јеһова Бабилдә сүрҝүндә олан садиг бәндәләри илә јахындан марагланыр. О, бир Ата кими онлардан Өз мәһәббәтини, гајғысыны һеч вахт әсирҝәмәјәҹәкди.

27. Һизгијалын ҝөрүнтүсү бизим үчүн һансы мәнаны кәсб едир?

²⁷ Һизгијалын ҝөрдүјү ҝөрүнтү бу ҝүн бизим үчүн һансыса мәнаны кәсб едирми? Сөзсүз! Шејтан бу ҝүн пак ибадәтә һүҹумларыны  даһа да артырыб. О, бизи инандырмаг истәјир ки, биз тәнһајыг, тәҹрид олунмушуг, сәмави Атамыздан, Онун тәшкилатындан ајры дүшмүшүк. Һеч вахт јол вермәјин ки, бу ҹүр јаланлар сизин гәлбинизә вә ағлыныза һаким кәсилсин (Зәб. 139:7—12). Јеһованын сәмави арабасы Һизгијал кими, бизи дә валеһ едир. Ола билсин, биз Һизгијал кими јерә дөшәнмәјәҹәјик, анҹаг Јеһованын тәшкилатынын сәмави һиссәсинин гүдрәти, сүрәти, һәрәкилији, һәр бир шәраитә ујғунлашмасы вә ҹалалы бизи мәфтун едир.

28, 29. Јеһованын арабасынын һәрәкәтдә олдуғуну өтән әсрдә әлдә олунан һансы наилијјәтләрдән ҝөрмәк олар?

²⁸ Һәмчинин унутмајын ки, Јеһованын тәшкилатынын бир һиссәси јер үзүндәдир. Дүздүр, јер үзүндәки һиссә гејри-камил инсанлардан ибарәтдир. Амма ҝәлин Јеһованын јердә һансы ишләри һәјата кечирдији барәдә дүшүнәк. Јеһова бүтүн дүнјада ади инсанлары өз ҝүҹләринә едә билмәјәҹәкләри ишләри етмәјә тәшвиг едир (Јәһ. 14:12). Тәкҹә «Аллаһын Падшаһлығы һөкмранлыг едир!» китабыны охумаг кифајәт едәр ки, өтән әсрдә тәблиғ ишинин неҹә бөјүк мигјасда кечирилдијини ҝөрәк. Бундан башга, Јеһованын тәшкилатынын һәгиги мәсиһиләрә тәлим вермәкдә, мәһкәмәләрдә гәләбә газанмагда, Аллаһын ирадәсини иҹра етмәк үчүн сон технолоҝијалардан истифадә етмәкдә атдығы аддымлары јадыныза салын.

²⁹ Өз сонуна јахынлашан бу аллаһсыз дүнјада пак ибадәтин дирчәлмәси үчүн ҝөрүлән ишләри нәзәрдән кечирдикдә Јеһованын арабасынын һәрәкәтдә олдуғу ҝүн кими ајдын олур. Бу тәшкилатда олмаг, бу ҹүр Һөкмдара гуллуг етмәк неҹә дә бөјүк шәрәфдир! (Зәб. 84:10).

30. Нөвбәти фәсилдә сөһбәт нәдән ҝедир?

³⁰ Һизгијала назил олан ҝөрүнтүдән башга шејләр дә өјрәнирик. Нөвбәти фәсилдә дөрд варлыға, јәни кәррублара јахындан нәзәр салыныр. Ҝәлин ҝөрәк онлар әзәмәтли Һөкмдарымыз Јеһова Аллаһ һаггында бизә нәләр дејәҹәк.