Јушә 11:1—23
11 Һәзур падшаһы Јавин бунлары ешитдикдә Мадон падшаһы Јубаба,+ Шимрун падшаһына, Ахшаф падшаһына,+
2 шимал дағлыг бөлҝәсиндә, Кинарәтин шималындакы дүзәнликләрдә, Шәфлада вә гәрбдә Дор+ дағлыг бөлҝәсиндә олан падшаһлара,
3 шәргдә вә гәрбдә јашајан кәнаниләрә+, дағлыг бөлҝәдәки амориләрә+, һетләрә, фәризиләрә, јәбусиләрә, Миспаһ дијарындакы Һәрмун дағынын+ әтәјиндә јашајан һивиләрә+ хәбәр ҝөндәрди.
4 Онлар гошунларыны јығыб јола чыхдылар, дөјүшчүләр дәниз гуму гәдәр чох иди, атла ҹәнҝ арабалары саја-һесаба ҝәлмирди.
5 Бүтүн бу падшаһлар ҝөрүшмәји гәрарлашдырдылар вә Исраиллә дөјүшмәк үчүн Мером булагларынын јанына ҝәлиб бирҝә ордуҝаһ гурдулар.
6 Јеһова Јушәјә деди: «Онлардан горхма,+ сабаһ бу вәдә онлары Исраилә тәслим едәҹәјәм, һамысы өләҹәк. Сән онларын атларыны шикәст едәҹәксән*,+ арабаларына од вураҹагсан».
7 Беләҹә, Јушә дөјүшчүләрлә бирҝә Мером булаглары јанында ҝөзләнилмәдән онлара һүҹум етди.
8 Јеһова онлары исраиллиләрин әлинә верди,+ онлар мәғлуб олдулар. Исраиллиләр бөјүк Сидон шәһәринә,+ Мизрефот-Маимә+ вә шәргдәки Миспиһ вадисинә гәдәр онлары тәгиб едиб һамысыны гырдылар, бир нәфәри дә сағ гојмадылар.+
9 Јушә Јеһованын дедији кими еләди: атлары шикәст етди, ҹәнҝ арабаларыны јандырды.+
10 Бундан сонра Јушә гајыдыб Һәзуру тутду, падшаһы гылынҹла өлдүрдү.+ Чүнки Һәзур әввәлләр бүтүн бу мәмләкәтләрин башы иди.
11 Онлар шәһәрдә олан һәр кәси гылынҹдан кечириб мәһв етдиләр,+ һамысынын нәфәсини кәсдиләр.+ Сонра да Һәзуру јандырдылар.
12 Јушә бу падшаһларын бүтүн шәһәрләрини әлә кечирди, өзләрини исә гылынҹла өлдүрдү.+ Јеһованын гулу Мусанын әмр етдији кими, онлары мәһв етди.+
13 Лакин исраиллиләр Јушәнин јандырдығы Һәзурдан башга тәпәләрдә јерләшән шәһәрләрдән һеч бирини јандырмадылар.
14 Исраиллиләр бу шәһәрләрдәки бүтүн әмлакы вә мал-һејваны өзләринә гәнимәт ҝөтүрдүләр.+ Ҹамааты исә гылынҹдан кечириб гырдылар,+ һамысынын нәфәсини кәсдиләр.+
15 Јеһова гулу Мусаја нә әмр етмишдисә, Муса онлары Јушәјә чатдырмышды.+ Јушә дә Јеһованын Мусаја бујурдуғу шејләрин һамысыны иҹра етди, јеринә јетирмәдији һеч нә галмады.+
16 Јушә бүтүн бу өлкәни, дағлыг бөлҝәни, Неҝеви+, Гошен дијарыны, Шәфланы+, Әрәбәни+, Исраилин дағлыг бөлҝәсини вә орадакы овалыглары —
17 Саирин јахынлығындакы Һәләг дағындан тутмуш Һәрмун дағынын+ әтәјиндәки Ливан вадисиндәки Баал-Ҹада+ гәдәр бүтүн әразини фәтһ еләди вә падшаһларыны әлә кечириб өлдүрдү.
18 Јушәнин бу падшаһларла мүһарибәси хејли сүрдү.
19 Ҝибјонда јашајан һивиләрдән башга һеч бир шәһәр әһалиси исраиллиләрлә сүлһ бағламады.+ Бүтүн шәһәрләр мүһарибә јолу илә алынды.+
20 Онларын инад едиб исраиллиләрлә дөјүшмәји Јеһовадан иди+ ки, онлара рәһм етмәјиб һамысыны мәһв етсин.+ Јеһованын Мусаја әмр етдији кими, онларын көкү кәсилмәли иди.+
21 О вахт Јушә дағлыг бөлҝәдә, Һәбрунда, Дәбирдә, Анабда, Јәһуда вә Исраилин дағлыг бөлҝәләриндә јашајан анагларын+ һамысыны гырды. Јушә онлары да, шәһәрләрини дә мәһв етди.+
22 Исраил өлкәсиндә анагларын изи-тозу галмады. Онлар анҹаг Гәззәдә+, Ҹатда+ вә Ашдодда+ галдылар.+
23 Јушә Јеһованын Мусаја вәд етдији кими, бүтүн өлкәни әлә кечирди.+ Сонра о, өлкәни гәбиләләрә дүшән пајлара ҝөрә ирс олараг Исраилә верди. Өлкә гәбиләләр арасында бөлүшдүрүлдү.+ Беләҹә, мүһарибәләр битди, өлкә әмин-аманлыға говушду.+
Һашијәләр
^ Јахуд атларынын ајаг вәтәрләрини кәсәҹәксән.
