Ганунун тәкрары 27:1—26
27 Сонра Муса Исраил ағсаггаллары илә бирликдә халга тапшырды: «Бу ҝүн сизә вердијим һәр бир әмрә риајәт един.
2 Иорданы кечиб Аллаһыныз Јеһованын сизә вердији торпаға гәдәм басанда ири дашлар сечиб үстүнә әһәнҝ чәкин.+
3 О таја кечәндә бу Ганунун бүтүн сөзләрини һәмин дашларын үстүнә јазын ки, ата-бабаларынызын Аллаһы Јеһованын сөз вердији кими, сүд-бал ахан дијара, Аллаһыныз Јеһованын вердији өлкәјә дахил ола биләсиниз.+
4 Иорданы кечәндә бу ҝүн сизә әмр етдијим кими, бу дашлары Ејбал+ дағында гојуб үстүнү әһәнҝләјәрсиниз.
5 Һәмчинин орада Аллаһыныз Јеһованын адына дашлардан гурбанҝаһ дүзәлдәрсиниз. Амма дашлара дәмир аләт дәјмәмәлидир.+
6 Аллаһыныз Јеһованын адына олан бу гурбанҝаһы јонулмамыш дашлардан дүзәлтмәли, үстүндә Аллаһыныз Јеһоваја јандырма гурбанлары тәгдим етмәлисиниз.
7 О јердә үнсијјәт гурбанлары+ да кәсиб јејин вә Аллаһыныз Јеһованын өнүндә севиниб-шадланын.+
8 Ганунун бүтүн сөзләрини дашларын үстүнә ајдын јазын».+
9 Сонра Муса вә лавили каһинләр бүтүн Исраилә хитаб едиб деди: «Еј Исраил, сус вә динлә! Бу ҝүн сиз Аллаһыныз Јеһованын халгы олдунуз.+
10 Сиз Аллаһыныз Јеһованын сөзүнә гулаг асмалы, бу ҝүн сизә чатдырдығым әмрләринә+ вә ганунларына риајәт етмәлисиниз».
11 Һәмин вахт Муса халга тапшырыб деди:
12 «Иорданын о тајына кечәндә Шәмун, Лави, Јәһуда, Јәсакир, Јусиф вә Бинјамин гәбиләләри халга хејир-дуа вермәк үчүн Гәризим+ дағында дурмалыдырлар.
13 Рубән, Ҹад, Ашир, Зәбулун, Дан вә Нифталы гәбиләләри ләнәтләри бәјан етмәк үчүн Ејбал+ дағында дурмалыдырлар.
14 Лавилиләр исә уҹадан бүтүн исраиллиләрә сөјләмәлидирләр:+
15 “Јеһованын икраһ етдији,+ сәнәткарын әл иши олан ојма+ бүт, төкмә+ бүт дүзәлдәнә вә ҝизләдәнә ләнәт олсун! (Һамы “амин” дејә ҹаваб версин.)
16 Ата-анасына сајғысызлыг ҝөстәрәнә ләнәт олсун!+ (Һамы “амин” дејә ҹаваб версин.)
17 Гоншусунун сәрһәдини дәјишдирәнә ләнәт олсун!+ (Һамы “амин” дејә ҹаваб версин.)
18 Кору аздырана ләнәт олсун!+ (Һамы “амин” дејә ҹаваб версин.)
19 Гәрибин, јетимин, дулун+ ишинә бахаркән әдаләти+ позана ләнәт олсун! (Һамы “амин” дејә ҹаваб версин.)
20 Атасынын арвады илә јахынлыг едиб атасынын шәрәфини ләкәләјәнә ләнәт олсун!+ (Һамы “амин” дејә ҹаваб версин.)
21 Һејванла ҹинси әлагәјә ҝирәнә ләнәт олсун!+ (Һамы “амин” дејә ҹаваб версин.)
22 Доғма баҹысыјла, атабир баҹысыјла, анабир баҹысыјла јахынлыг едәнә ләнәт олсун!+ (Һамы “амин” дејә ҹаваб версин.)
23 Гајынанасыјла јахынлыг едәнә ләнәт олсун!+ (Һамы “амин” дејә ҹаваб версин.)
24 Пусгу гуруб сојдашыны өлдүрәнә ләнәт олсун!+ (Һамы “амин” дејә ҹаваб версин.)
25 Рүшвәт алыб ҝүнаһсыз ган төкәнә ләнәт олсун!+ (Һамы “амин” дејә ҹаваб версин.)
26 Бу Ганунда дејиләнләрә риајәт етмәјәнә ләнәт олсун!+ (Һамы “амин” дејә ҹаваб версин.)”