Зәбур 119:1—176
א [Алеф]*
119 Нә хошбәхтдир јолунда камил олан,Јеһованын гануну илә аддымлајан инсан!
2 Нә хошбәхтдир Онун өјүдләринә риајәт едән,Бүтүн гәлби илә Ону ахтаран инсан!
3 Беләләри һагсызлыг етмәз,Онун јолларында аддымлајар.
4 Сән бизә әмр етдин ки,Бујругларына диггәтлә әмәл едәк.
5 Гајда-ганунуна риајәт етмәк үчүнТәки јолумда әзмлә дура биләјдим,
6 О заман бүтүн әмрләрини ҝөтүр-гој едәндәХәҹаләт чәкмәздим.
7 Адил һөкмләрини өјрәндикҹәСәни сидги-үрәкдән уҹалдарам.
8 Гајда-ганунуна риајәт едәрәм,
Нә олар, мәни бүсбүтүн тәрк етмә.
ב [Бет]
9 Ҹаван адам јолуну неҹә пак сахлаја биләр?
Сәнин сөзүнә бахыб өзүнү ҝөзләмәклә.
10 Мән бүтүн гәлбимлә Сәни ахтарырам,
Гојма әмрләриндән чыхым.
11 Сөзләрини гәлбимдә һифз едирәм ки,Сәнә гаршы ҝүнаһ етмәјим.
12 Сәнә алгыш олсун, еј Јеһова,Мәнә гајда-ганунуну өјрәт.
13 Ағзындан чыхан бүтүн һөкмләриДилимлә бәјан едирәм.
14 Дүнјанын сәрвәтиндән чохСәнин өјүдләрин мәнә севинҹ верир.
15 Бујругларын барәдә дәриндән дүшүнәрәм,Сәнин јолларындан ҝөзүмү ајырмарам.
16 Тәләбләрин мәнә әзиздир,
Сәнин сөзүнү унутмарам.
ג [Гимел]
17 Бу гулуна јахшылыг ет,Гој јашајыб Сәнин сөзүнә гулаг ассын.
18 Ҝөзләрими ач,Гој ганунундакы ҝөзәлликләри ајдын ҝөрүм.
19 Бу дијарда бир гәрибәм,
Әмрләрини мәндән ҝизләтмә.
20 Даим һөкмләрининИнтизарыны чәкирәм.
21 Сән әмрләрини позанлары,Ләнәтә ҝәлмиш ловғалары мәһкум етдин.
22 Һәгарәти, нифрәти мәндән кәнар ет,Ахы өјүдләринә әмәл етмишәм.
23 Һәтта башчылар топлашыб әлејһимә данышандаБу гулун гајда-ганунун барәдә дүшүнүр.
24 Өјүдләрин мәнә әзиздир,Онлар мәсләһәтчимдир.
ד [Далет]
25 Ҹаным торпаға сәрилиб,
Вердијин сөзә ҝөрә јашат мәни.
26 Јолларымы Сәнә билдирдим, мәнә һај вердин.Гајда-ганунуну өјрәт мәнә.
27 Бујругларынын мәнасыны мәнә анлат ки,Мөһтәшәм ишләринин дәринликләринә варым.
28 Гәм-гүссә әлиндән јата билмирәм,
Вердијин сөзә ҝөрә мәнә гүввәт вер.
29 Гојма јалан јола гәдәм басым,Мәнә лүтф ҝөстәр, ганунуну өјрәт.
30 Мән сәдагәт јолуну сечмишәм,
Һөкмләрини һаглы сајырам.
31 Өјүдләринә сарылмышам,
Мәни пешман ејләмә, еј Јеһова.
32 Әмрләринин јолунда гачаҹағам,Чүнки Сән бу истәји үрәјимә гојмусан*.
ה [Һе]
33 Еј Јеһова, гајда-ганунунун јолуну мәнә өјрәт,Ахырадәк бу јолда јеријәрәм.
34 Мәнә дәрракә вер, ганунуна риајәт едим,Бүтүн гәлбимлә она әмәл едим.
35 Әмрләринин јолунда мәнә бәләдчи ол,Чүнки онлардан һәзз алырам.
36 Үрәјими ҝәлир-газанҹа јох,Өјүдләринә тәрәф јөнәлт.
37 Гојма ҝөзүм пуч шејләрә бахсын,Өз јолунда мәни јашат.
38 Гулуна вердијин сөзү јеринә јетир,Гој Сәндән горхсун*.
39 Горхдуғум биабырчылығы мәндән совушдур,Ахы һөкмләрин доғрудур.
40 Бујругларына неҹә дә тамарзыјам,
Доғрулуғунла мәни јашат.
ו [Вав]
41 Еј Јеһова, гој мәһәббәтини,Вәд етдијин гуртулушу дадым.
42 Онда мәнә лағ едәнин ҹавабыны верәрәм,Ахы мән Сәнин сөзүнә ҝүвәнирәм.
43 Һәгигәт сөзүнү бүсбүтүн дилимдән алма,Ахы үмидими Сәнин һөкмүнә бағламышам.
44 Ганунуна һәмишә бағлы галаҹағам,Әбәдијјән.
45 Архајын ҝәзиб-доланаҹағам,Чүнки бујругларыны арајырам.
46 Өјүдләрин барәдә падшаһларын өнүндә данышарам,Әсла утанмарам.
47 Әмрләрин мәнә әзиздир,Онлары севирәм.
48 Әмрләрини севирәм, әлләрими онлара тәрәф ачарам,Гајда-ганунун барәдә дәриндән дүшүнәрәм.
ז [Зајн]
49 Гулуна вердијин сөзү јада сал,Онунла Сән мәнә үмид вермисән.
50 Мәни дәрд сыханда бундан тәсәлли тапырам,Чүнки сөзүн мәни јашадыр.
51 Мәғрурлар мәнә һәдсиз һәгарәт едирләр,Амма мән Сәнин ганунундан дөнмүрәм.
52 Еј Јеһова, әзәлдән вердијин һөкмләри хатырлајырам,Онлардан тәскинлик тапырам.
53 Ганунуну тәрк едән писләрә ҝөрәГәзәбим алышыб-јаныр.
54 Һарада јашасамГајда-ганунун мәним нәғмәмдир.
55 Ганунунла јашамаг үчүн,Еј Јеһова, ҝеҹәләр адыны јада салырам.
56 Буну адәт етмишәм,Чүнки бујругларына әмәл едирәм.
ח [Хет]
57 Еј Јеһова, нәсибим Сәнсән,Анд ичмишәм, сөзүндән чыхмарам.
58 Бүтүн гәлбимлә Сәнә јалварырам,Нә олар, сөз вердијин кими мәнә лүтф ҝөстәр.
59 Өмүр јолума нәзәр салдым ки,Аддымларымы өјүдләринә сары дөндәрим.
60 Әмрләринә әмәл етмәјә тәләсирәм,Ләнҝимәрәм.
61 Писләрин ипләри мәнә сарыныб,Лакин мән ганунуну унутмамышам.
62 Ҝеҹә јарысы галхыбАдил һөкмләринә ҝөрә Сәнә шүкүр едирәм.
63 Сәндән горханларла,Бујругларына әмәл едәнләрлә достам.
64 Еј Јеһова, мәһәббәтин дүнјаны бүрүјүб.Мәнә гајда-ганунуну өјрәт.
ט [Тет]
65 Еј Јеһова, Өз сөзүнә ҝөрәБу гулунла хош рәфтар етдин.
66 Мәнә бәсирәт вә билик ашыла,Ахы әмрләринә бел бағламышам.
67 Башым мүсибәт чәкмәздән әввәл јолуму азырдым,Инди исә сөзүнә әмәл едирәм.
68 Сән кәрамәт саһибисән, ишләрин дә кәрамәтлидир.
Мәнә гајда-ганунуну өјрәт.
69 Мәғрурлар мәнә гара јахыр,Мән исә бүтүн гәлбимлә бујругларына әмәл едирәм.
70 Онларын үрәји һиссијатсыздыр,Мәнсә ганунуну әзиз тутурам.
71 Әзаба гатлашмағым хејримә олду,Белә ки, Сәнин гајда-ганунуну мәнимсәдим.
72 Ағзындан чыхан ганун хејримәдир,Минләрлә гызыл-ҝүмүшдән дә гијмәтлидир.
י [Јуд]
73 Мәни Сәнин әлләрин јаратды, мәнә онлар шәкил верди.
Мәнә дәрракә вер ки,Әмрләрини дәрк едим.
74 Сәндән горханлар мәнә бахыб севинир,Чүнки Сәнин сөзүнә үмид бағламышам.
75 Һөкмләрин һагдыр, еј Јеһова, билирәм,Мәни ҹәзаландырмагла да сәдагәт ҝөстәрмисән.
76 Бу гулуна вәд етдијин кими,Мәһәббәтин мәнә тәсәлли олсун.
77 Мәнә мәрһәмәт ҝөстәр, гој јашајым,Чүнки ганунун мәнә әзиздир.
78 Гој мәғрурлар утансын,Чүнки наһагдан* мәнә пислик едирләр.
Мән исә бујругларыны дүшүнүрәм.
79 Гој Сәндән горханлар,Өјүдләрини биләнләр јаныма гајытсын.
80 Гој үрәјим гајда-ганунуна камил риајәт етсин ки,Һеч хәҹаләт чәкмәјим.
כ [Каф]
81 Хиласынын һәсрәтиндәјәм,Ахы Сәнин сөзүнә үмид бағламышам.
82 Ҝөзүм сөзүнүн интизарындадыр,Дејирәм: «Мәнә нә вахт тәсәлли верәҹәксән?»
83 Түстүдән гурумуш тулуг кими олмушам,Амма гајда-ганунуну унутмурам.
84 Бу гулун даһа нә гәдәр ҝөзләсин?
Мәни тәгиб едәнләрин ҹәзасыны нә вахт верәҹәксән?
85 Ганунуну позан мәғрурларМәнә гују газырлар.
86 Бүтүн әмрләрин етибарлыдыр.
Мәни наһаг јерә тәгиб едирләр, имдадыма јетиш.
87 Аз гала мәни јер үзүндән јох едәҹәкдиләр,Амма мән бујругларыны позмадым.
88 Мәһәббәтинлә мәни јашат,Гој ағзындан чыхан өјүдләрә әмәл едим.
ל [Ламед]
89 Еј Јеһова, Сәнин сөзүн ҝөјләрдәӘбәди дураҹаг.
90 Сәдагәтин нәсилдән-нәслә галыр.
Јери мөһкәм гурмусан ки, дурдугҹа-дурсун.
91 Һөкмләринә әсасән онлар бу ҝүн дә дурур,Һамысы* Сәнин гуллуғундадыр.
92 Әҝәр ганунун мәнә әзиз олмасајды,Әзаб-әзијјәтдән мәһв олуб ҝетмишдим.
93 Бујругларыны һеч вахт унутмарам,Чүнки онларла мәни јашадырсан.
94 Мән Сәнә мәхсусам, мәнә ниҹат вер,Ахы мән бујругларыны арамышам.
95 Шәр адамлар өлдүрмәк үчүн мәни ҝүдүрләр,Мән исә Сәнин өјүдләринә диггәт верирәм.
96 Һәр ҹүр камиллијин һәддини ҝөрмүшәм,Анҹаг Сәнин әмрин интәһасыздыр*.
מ [Мем]
97 Ганунуну елә севирәм ки!
Ҝеҹә-ҝүндүз ону дүшүнүрәм.
98 Әмрләрин мәни дүшмәнләримдән ағыллы едир,Чүнки әбәдијјән мәнимләдир.
99 Мүәллимләримдән дә зәкалы олмушам,Чүнки өјүдләринә фикир верирәм.
100 Аһыл адамлардан да мүдрик давранырам,Чүнки бујругларына әмәл едирәм.
101 Һәр ҹүр пис јолу рәдд едирәм ки,Сәнин сөзүнә бағлы галым.
102 Һөкмләриндән чыхмырам,Ахы мәни өјрәдән Сәнсән.
103 Сөзләрин дамағыма неҹә шириндир,Онлар ағзымда балдан да шириндир.
104 Бујругларын сајәсиндә мүдрик давранырам,
Һәр ҹүр әјри јола нифрәт едирәм.
נ [Нун]
105 Сөзүн аддымларыма чыраг,Јолларыма ишыгдыр.
106 Анд ичмишәм адил һөкмләринә әмәл едим,Андымы јеринә јетирәҹәјәм.
107 Бөјүк мүсибәт ҝөрдүм,
Сөзүнә ҝөрә мәни јашат, еј Јеһова.
108 Мәдһләрдән ҝәтирдијим көнүллү тәгдимәләри гәбул ет, еј Јеһова,Һөкмләрини мәнә өјрәт.
109 Һәјатым һәр ан тәһлүкәдәдир,Лакин ганунуну унутмурам.
110 Шәр адамлар мәнә тәлә гурублар,Лакин мән бујругларындан чыхмамышам.
111 Өјүдләрини өзүмә мирас едирәм,Чүнки онлар гәлбимин севинҹидир.
112 Өзүм үчүн гәрар вермишәм ки,Даима, сонадәк гајда-ганунуна табе олум.
ס [Самех]
113 Үрәји һачаланан адамлара нифрәт едирәм,Лакин ганунуну севирәм.
114 Сән мәним пәнаһымсан, галханымсан,Ахы Сәнин сөзүнә үмид бағламышам.
115 Мәндән узаг дурун, сиз, еј писләр,Гојун Аллаһымын әмрләринә риајәт едим.
116 Вәд етдијин кими мәнә дајаг ол, јашајым,Гојма үмидим боша чыхсын.
117 Мәнә дајаг ол, гуртулум,Онда ҝөзүмү гајда-ганунуна дикәрәм.
118 Гајда-ганунуну позанлары рәдд едирсән,Чүнки онлар һијләҝәр, сахтакардырлар.
119 Дүнјанын бүтүн писләрини зибил* кими јох едирсән,
Буна ҝөрә дә өјүдләрини севирәм.
120 Зәһминдән бәдәним тир-тир әсир,Һөкмләриндән горхурам.
ע [Ајн]
121 Мән инсафла, дүрүстлүклә давранырам,
Мәни зүлмкарларыма тәслим етмә.
122 Бу гулун хејри үчүн она замин дур,Гојма мәғрурлар мәнә зүлм етсин.
123 Гуртулушунун, һагг вәдинин интизарынданҜөзүмүн көкү саралыб.
124 Гулуна мәһәббәтини ҝөстәр,Мәнә гајда-ганунуну өјрәт.
125 Мән Сәнин гулунам. Мәнә дәрракә вер ки,Өјүдләрини гаврајым.
126 Јеһованын һәрәкәтә кечмәк вахты јетишиб,Чүнки онлар ганунуну позублар.
127 Әмрләрини гызылдан,Саф гызылдан да чох севирәм.
128 Буна ҝөрә Сәндән ҝәлән һәр бујруг мәним үчүн доғрудур;Һәр ҹүр әјри јола нифрәт едирәм.
פ [Пе]
129 Өјүдләрин ҝөзәлдир,
Буна ҝөрә дә онлара әмәл едирәм.
130 Сөзүн ачыглананда нур сачылыр,Нашы адама дәрракә верир.
131 Ағзымы ачыб аһ чәкирәм,Чүнки әмрләрини ешитмәјин интизарындајам.
132 Адыны севәнләр үчүн гојдуғун адәтә ҝөрә,Мәнә сары дөн, мәнә лүтф ҝөстәр.
133 Сөзүнлә аддымларымы тәһлүкәсиз јола јөнәлт,Гој һеч бир пислик мәнә ағалыг етмәсин.
134 Зүлмкарларын әлиндән мәни гуртар,Сәнин бујругларына әмәл едәҹәјәм.
135 Үзүнүн нуруну гулунун үстүнә сал,Гајда-ганунуну мәнә өјрәт.
136 Ҝөз јашларым сел кими ахыр,Чүнки инсанлар ганунуна табе олмур.
צ [Тсаде]
137 Сән һагсан, еј Јеһова,Һөкмләрин дә һагг.
138 Өјүдләрин һаггдыр,Там етибарлыдыр.
139 Гејрәтим мәни јандырыб-јахыр,Чүнки рәгибләрим Сәнин сөзләрини унудублар.
140 Сәнин сөзүн бүсбүтүн сафдыр,Гулун ону севир.
141 Мәни сајмырлар, һәгарәтлә бахырлар,Амма мән бујругларыны унутмадым.
142 Әдаләтин әбәди әдаләтдир,Ганунун һәгигәтдир.
143 Башыма дәрд-бәла ҝәлсә дә,Әмрләрин мәним үчүн әзиздир.
144 Өјүдләринин доғрулуғу әбәдидир.
Мәнә дәрракә вер, гој јашајым.
ק [Коф]
145 Бүтүн гәлбимлә јалварырам, еј Јеһова, мәнә һај вер.
Гајда-ганунуна әмәл едәрәм.
146 Сәни сәсләјирәм, гуртар мәни!
Сәнин өјүдләринә гулаг асарам.
147 Дан јери сөкүлмәмиш ојаныб Сәндән имдад диләјирәм.Ахы Сәнин сөзләринә үмид бағламышам.
148 Ҝеҹә јарысы ојанырам ки,Вердијин сөз һаггында дүшүнүм.
149 Мәһәббәтин наминә сәсими ешит,
Еј Јеһова, әдаләтинлә мәни јашат.
150 Позғунлуг дүшкүнләри мәнә јахынлашыр,Онлар Сәнин ганунундан узагдырлар.
151 Еј Јеһова, Сән мәнә јахынсан,Бүтүн әмрләрин һәгигәтдир.
152 Өјүдләрини әбәдилик бәргәрар етмисән,Буну чохдан өјрәнмишәм.
ר [Рејш]
153 Әзаб-әзијјәтими ҝөр, мәни гуртар,Ахы ганунуну унутмадым.
154 Мәни мүдафиә ет, мәни гуртар,Вәд етдијин кими мәни јашат.
155 Шәр адамлар гуртулуш ҝөрмәјәҹәк,Чүнки онлар гајда-ганунуну ахтармырлар.
156 Мәрһәмәтин бөјүкдүр, еј Јеһова,
Әдаләтинә ҝөрә мәни јашат.
157 Мәнә зүлм едән, мәнә дүшмән кәсилән чохдур,Амма мән өјүдләриндән ајрылмадым.
158 Хаинләрә икраһла бахырам,Чүнки Сәнин сөзүнә әмәл етмирләр.
159 Ҝөр бујругларыны нә гәдәр севирәм!
Еј Јеһова, мәһәббәтинлә мәни јашат.
160 Сөзүнүн бүнөврәси һәгигәтдир,Бүтүн адил һөкмләрин әбәдидир.
ש [Син], јахуд [Шин]
161 Сәрдарлар наһагдан мәни тәгиб едир,Мәнимсә үрәјим Сәнин сөзләриндән горхур.
162 Бөјүк хәзинә тапан адам кимиСәнин сөзләринә севинирәм.
163 Јалана нифрәт едирәм, икраһ едирәм,Ганунуну исә севирәм.
164 Адил һөкмләриндән өтрүҜүндә једди дәфә Сәнә алгыш едирәм.
165 Ганунуну севәнләрин әмин-аманлығы болдур,Онлары һеч нә бүдрәтмәз.
166 Гуртулушуна үмид едирәм, еј Јеһова,Әмрләрини јеринә јетирирәм.
167 Өјүдләринә гулаг асырам,Онлары елә севирәм ки!
168 Бујругларына, өјүдләринә әмәл едирәм,Бүтүн јолларымдан хәбәрдарсан.
ת [Тав]
169 Гој фәрјадым Сәнә јетишсин, Јеһова,
Дедијин кими, мәнә ағыл-камал вер.
170 Гој илтифат диләјим дәрҝаһына галхсын.
Вәд етдијин кими, мәнә ниҹат вер.
171 Гој додагларымдан Сәнә мәдһләр төкүлсүн,Чүнки мәнә гајда-ганунуну өјрәдирсән.
172 Гој дилим сөзләрини нәғмәдә охусун,Чүнки бүтүн әмрләрин салеһдир.
173 Гој әлин көмәјим олсун,Чүнки бујругларына табе олмағы сечмишәм.
174 Еј Јеһова, гуртулушунун интизарындајам,Ганунун мәнә әзиздир.
175 Јашат мәни, гој Сәни мәдһ едим,Гој һөкмләрин көмәјим олсун.
176 Итмиш гојун кими азмышам; бу гулуну ахтар,Ахы Сәнин әмрләрини унутмамышам.
Һашијәләр
^ Ибрани әлифбасынын илк һәрфидир. Бу мәзмур орижинал мәтндә әлифба сырасы илә јазылмышдыр.
^ Диҝәр вариант: Сән мәним үрәјимә әминлик верирсән.
^ Диҝәр вариант: Сәндән горханлара вердијин сөзү.
^ Диҝәр вариант: јаланларла.
^ Јәни Аллаһын јаратдыглары.
^ Һәрфән: чох ҝенишдир.
^ Һәрфән: поса (филиз әридиләндә ајрылан галыг).
