Зәбур 35:1—28
Давудун мәзмуру.
35 Еј Јеһова, мәнимлә чәкишәнләрлә чәкиш,Дөјүшәнләрлә дөјүш.
2 Сипәр-галханыны* ҝөтүр,Ҝәл, гору мәни.
3 Низәни, балтаны далымҹа дүшәнләрин үстүнә галдыр,
«Сәнин ниҹатынам» де мәнә.
4 Гој ҹаныма гәсд едәнләр рүсвај олсунлар, алчалсынлар,
Мәнә гаршы пис нијјәти оланлар биабыр олуб ҝери чәкилсинләр.
5 Күләјин совурдуғу саман чөпү кими олсунлар,Јеһованын мәләји онлары габағына гатыб говсун.
6 Гој јоллары сүрүшкән олсун, зүлмәт олсун,Јеһованын мәләји онлары гованда.
7 Наһагдан ҹаным үчүн чала газдылар,Үзәринә тор сәрдиләр.
8 Гој башларына гәфил фәлакәт ҝәлсин,Гурдуглары тора өзләри дүшсүн,Чалаја јыхылыб тәләф олсунлар.
9 Гәлбимин севинҹи Јеһова олаҹаг,Көнлүм Онун вердији гуртулуша шадланаҹаг.
10 Бүтүн варлығымла дејим:
«Еј Јеһова, мәзлуму голузорлунун әлиндән,
Бичарәни, касыбы гәсбкардан гуртаран,Сәнин кимиси вармы?»
11 Фитнәкар шаһидләр галхыр,Билмәдијим шејләри сорушурлар.
12 Ҹаным матәм ичиндәдир,Јахшылығымын әвәзиндә јаманлыг едирләр.
13 Анҹаг онлар хәстәләнәндә мән чула бүрүнәрдим,Оруҹ тутуб ҹаныма гәсд едәрдим,Дуам ҹавабсыз галанда,
14 Санки, достум, гардашымдан өтрү гәмә батардым;Анасына јас тутан адам кими кәдәрдән гәддим бүкүләрди.
15 Онлар исә мән ахсајанда севиндиләр, топлашдылар,Топлашыб бирләшдиләр, мәни хәлвәтдән вурмаг үчүн.Мәни парчаладылар, мәнә һеј бөһтан атдылар.
16 Аллаһсызлар мәни лаға гојурлар*.Мәнә диш гыҹајырлар.
17 Еј Јеһова, нә вахтадәк дуруб бахаҹагсан?
Ҹанымы онларын һәмләсиндән,Ширин ҹанымы ҝәнҹ асланын пәнҹәсиндән гуртар.
18 Онда бөјүк мәҹлис ичрә Сәнә һәмд едәрәм,Ҹамаат арасында Сәни мәдһ едәрәм.
19 Гојма наһагдан мәнә дүшмән кәсиләнләр һалыма севинсин,Наһаг јерә мәнә нифрәт едәнләр бир-биринә ҝөз вурсун.
20 Чүнки онларын дилиндән хош сөз* чыхмаз,Дүнјанын динҹ сакинләринә гаршы фитнә-фәсад гурарлар.
21 Мәни иттиһам етмәк үчүн ағызларыны ҝениш ачыр,«Аһа! Ҝөзүмүзлә ҝөрдүк!» — дејирләр.
22 Еј Јеһова, бүтүн бунлары ҝөрүрсән, сусма.
Јеһова, мәндән узаг дурма.
23 Галх, мәни мүдафиә ет,Еј Аллаһым Јеһова, мәһкәмәдә тәрәфими тут.
24 Мәни әдаләтинлә мүһакимә ет, еј Аллаһым Јеһова,Гој онлар һалыма севинмәсин.
25 Үрәкләриндә: «Охај! Мурадымыза чатдыг», — демәсинләр,
«Әҹәб онун башыны једик», — сөјләмәсинләр.
26 Пис ҝүнүмә севинәнләринҺамысы хәҹил, биабыр олсун.
Өнүмдә гүррәләнәнләр рүсвајчылыға, рәзиллијә бүрүнсүнләр.
27 Гој салеһлијимә севиниб-шадлананларДурмадан десинләр:
«Гулунун әмин-аманлығына севинән Јеһоваја ешг олсун!»
28 Онда әдаләтин дилимдән дүшмәз,Бүтүн ҝүнү Сәнә алгыш едәрәм.
Һашијәләр
^ Јахуд кичик галханыны вә бөјүк галханыны.
^ Диҝәр вариант: аллаһсызлар бир көкәјә мәни лаға гојурлар.
^ Һәрфән: сүлһ сөзләри.
