Зәбур 68:1—35
Дирижора. Давудун мәзмуру.
68 Гој Аллаһ ајаға галхсын, дүшмәнләри пәрән-пәрән олсун,Она нифрәт едәнләр гачсын өнүндән.
2 Думан неҹә дағылырса, онлары елә дағыт.Мум одда неҹә әријирсә,Писләр дә Аллаһын өнүндән еләҹә јох олсун.
3 Салеһләр исә севинсин,Аллаһын өнүндә шәнләнсин,Севинҹдән ҹуша ҝәлсинләр.
4 Аллаһын шәнинә нәғмә дејин, адыны нәғмәләрдә вәсф един,
Сәһралары ашыб кечәнин* шәнинә нәғмә дејин,
Онун ады Јаһдыр*! Севинин Онун өнүндә!
5 Аллаһ мүгәддәс мәскәниндәдир,О, јетимләрә ата, дул гадынлара архадыр.
6 Аллаһ кимсәсизләрә јурд верир, јува верир,Дустаглары азад едир, онлары фираванлыға чыхарыр,
Дикбашлар исә гарсымыш торпагда јашајаҹаг.
7 Пәрвәрдиҝара, Сән халгыны апараркән,Сәһрада өнләриндә ҝедәркән (Селаһ)
8 Гаршында јер титрәди,Ҝөјләр јағыш олуб төкүлдү.Сина дағы Аллаһын, Исраилин Аллаһынын өнүндә әсди.
9 Ҝур јағышлар јағдырдын, Худаја,Тагәтдән дүшмүш халгына јени ҝүҹ вердин.
10 Онлар дүшәрҝәндә јашады,Еј Аллаһ, мәзлумлара рузи вердин кәрамәтинлә.
11 Бујруг Јеһовадан ҝәлир;Мүждәни бәјан едән гадынлар бөјүк ордудур.
12 Гошунларын падшаһлары гачырлар, гачырлар!
Евдә отурмуш гадынса гәнимәтдән пај алыр.
13 Ордуҝаһын тонгаллары арасында* узансаныз да,Ҝөјәрчин ганадларыныз олаҹаг, үстү ҝүмүшдән,Ләләкләри халис гызылдан.
14 Сәлмуна гар јағды,Гадири-Мүтләг онун падшаһларыны јер үзүнә пәрән-пәрән саланда.
15 Башан дағы Аллаһын дағыдыр*,Башан дағы зирвәли дағдыр.
16 Еј зирвәли уҹа дағлар,Нијә Аллаһын Өзүнә мәскән сечдији даға һәсәдлә бахырсыныз?
Бәли! Јеһова орада әбәдијјән галаҹаг.
17 Аллаһын ҹәнҝ арабалары чохдур, минләрҹә, он минләрҹәдир.
Јеһова Сина дағындан мүгәддәс мәканына ҝәлди.
18 Сән ҝөјә галхдын,Өзүнлә әсирләр апардын,Инсан тимсалында һәдијјәләр ҝөтүрдүн, һәтта инадкарларыКи, онларын арасында оласан, еј Јаһ, еј Аллаһ.
19 Һәр ҝүн јүкүмүзү дашыјан Јеһоваја,Бизә гуртулуш верән Аллаһа шүкүрләр олсун. (Селаһ)
20 Аллаһ бизим үчүн гуртулуш Аллаһыдыр,Өлүмдән гуртулуш Күлли-Ихтијар Јеһованын әлиндәдир.
21 Худавәнд дүшмәнләрин башыны,Ҝүнаһындан әл чәкмәјәнләрин тәпәсини әзәҹәк.
22 Јеһова деди: «Онлары Башандан гајтараҹағам,Дәнизин дибиндән чәкиб чыхараҹағам ки,
23 Ајағыныз ганда јујунсун,Итләриниз дүшмән ганыны јаласын».
24 Еј Аллаһ, онлар Сәнин зәфәр јүрүшүнү ҝөрүрләр,Аллаһымын, Падшаһымын мүгәддәс мәкана зәфәр јүрүшүнү.
25 Өндә мәзмур охујанлар, архада телли аләтләрдә чаланлар,Ортада дәфчалан гызлар ҝедир.
26 Еј һәјатыны Исраилин чешмәсиндән аланлар,Бөјүк мәҹлисләрдә Јеһова Аллаһы мәдһ един.
27 Онлары кичик Бинјаминин гәбиләси рам едәр,Сәс-күјлү издиһамла Јәһуда бәјләри,Зәбулун бәјләри, Нифталы бәјләри.
28 Аллаһын фәрман вериб, сәнә гүввәт ҝәлсин.
Ҝүҹүнү ҝөстәр, Пәрвәрдиҝара, индијәдәк уғрумузда ҝөстәрдијин кими.
29 Јерусәлимдәки мәбәдинә ҝөрәПадшаһлар Сәнә бәхшиш ҝәтирәҹәк.
30 Гамышлыгдакы вәһши һејванлары,Өкүз сүрүләрини вә даналарыны әһлиләшдир,Та ки халглар ҝүмүш ҝәтириб* бојун әјсин.
Вурушган халглары исә О пәрән-пәрән салыр.
31 Мисирдән тунҹ ҝәтирәҹәкләр*,Куш өлкәси Аллаһа бәхшиш ҝәтирмәјә тәләсәҹәк.
32 Еј дүнја сәлтәнәтләри, Аллаһы нәғмәләрдә тәрәннүм един,Нәғмәләрдә вәсф един Јеһованы, (Селаһ)
33 Әзәли ҝөјләр ҝөјүнә сүвар оланы.
Ешидин! Онун сәси, Онун ҝур сәси ҝурулдајыр.
34 Аллаһын гүдрәтини таныјын,
Онун әзәмәти Исраилин үзәриндәдир,Гүдрәти асимандадыр.
35 Мүгәддәс мәканындан чыхан Аллаһ зәһмлидир,
О, Исраилин Аллаһыдыр,Халгына ҝүҹ, гүввәт верир.
Аллаһа алгыш олсун!
Һашијәләр
^ Диҝәр вариант: булудлара сүвар оланын.
^ Јеһова адынын гыса формасы.
^ Диҝәр вариант: гојун ағылында.
^ Јахуд әзәмәтли дағдыр.
^ Диҝәр вариант: ҝүмүшү тапдалајыб.
^ Диҝәр вариант: Мисирдән елчиләр ҝәләҹәк.
