Ибраниләрә 4:1—16
4 Беләликлә, Аллаһын истираһәтинә говушмаг вәди һәлә гүввәдә икән диггәтли олаг ки, ондан мәһрум олмајаг.+
2 Мүждә онлара тәблиғ олундуғу кими, бизә дә тәблиғ олунуб.+ Лакин ешитдикләри сөзүн онлара хејри олмады, чүнки онларын иманы итаәт едәнләрин иманы кими дејилди.
3 Иман едән бизләр истираһәтә говушуруг. Онлар һагда исә О, белә дејиб: «Буна ҝөрә гәзәбләниб анд ичдим: “Онлар истираһәтимә говушмајаҹаглар”»,+ һәрчәнд О, ишләрини бәшәрин тәмәли гојулан вахтдан битириб.+
4 Бир јердә једдинҹи ҝүн һаггында белә дејир: «Аллаһ једдинҹи ҝүн иш ҝөрмәјиб истираһәт етмәјә башлады»+
5 вә јенә тәкрар едир: «Онлар истираһәтимә говушмајаҹаглар».+
6 Беләликлә, мүждәни илк ешидәнләр итаәтсизлик уҹбатындан истираһәтә говушмадылар. Анҹаг бәзиләри һәлә истираһәтә говушмалыдырлар дејә,+
7 О, хејли вахтдан сонра Давудун мәзмурунда «бу ҝүн» дејәрәк јенидән бир ҝүн тәјин едир. Неҹә ки јухарыда дејилиб: «Бу ҝүн Мәнә гулаг асын: үрәјинизи инадкар етмәјин».+
8 Јушә+ онлары истираһәт јеринә ҝәтирсәјди, Аллаһ артыг башга бир ҝүн һаггында данышмазды.
9 Демәли, Аллаһын халгыны һәлә шәнбә истираһәти ҝөзләјир.+
10 Аллаһ иш ҝөрмәјиб истираһәт етдији кими, Аллаһын истираһәтинә говушмуш адам да иш ҝөрмәјиб истираһәт едир.+
11 Буна ҝөрә дә ҝәлин вар ҝүҹүмүзлә чалышыб бу истираһәтә говушаг ки, һеч кәс онлар кими итаәтсизлик јолуна дүшмәсин.+
12 Чүнки Аллаһын сөзү ҹанлы вә гүдрәтлидир;+ о, һәр ҹүр икиағызлы гылынҹдан+ итидир вә о гәдәр дәринә ишләјир ки, бәдәнлә руһу, ојнагларла илији бир-бириндән ајырыр, үрәјин дүшүнҹә вә нијјәтләрини үзә чыхарыр.
13 Һеч кәс вә һеч нә Онун ҝөзүндән ҝизли гала билмәз,+ һәр шеј апачыг Онун ҝөзү өнүндәдир. Биз Она ҹаваб верәҹәјик.+
14 Беләликлә, ҝөјләрә дахил олмуш Аллаһын Оғлу Исанын+ шәхсиндә али баш каһинимиз вар дејә, ҝәлин јорулмадан онун һагда шәһадәт верәк.+
15 Чүнки о, елә баш каһин дејил ки, зәифликләримизи анлаја билмәсин,+ һалымыза аҹымасын, ахы о да бизим кими, һәр ҹәһәтдән сынаныб, лакин ҝүнаһ етмәјиб.+
16 Буна ҝөрә дә ҝәлин Аллаһын лүтф тахтына јахынлашыб Она ҹәсарәтлә дуа едәк+ ки, дара дүшәндә Аллаһдан мәрһәмәт вә лүтф ҝөрәк.
