Һизгијал 22:1—31
22 Күлли-Ихтијар Јеһованын сөзү јенә мәнә назил олду:
2 «Еј бәни-адәм, ганлар ахыдан шәһәрә+ чыхардығым һөкмләри чатдырмаға, бүтүн ијрәнҹ әмәлләриндән+ ону аҝаһ етмәјә һазырсанмы?
3 Сөјлә ки, Күлли-Ихтијар Јеһова белә дејир: “Еј ијрәнҹ бүтләр дүзәлдиб өзүнү мурдарлајан,+ ганлар ахыдан шәһәр,+ сәнин вахтын чатыб!+
4 Төкдүјүн ганлар сәнин әлләрини ҝүнаһа булајыб,+ ијрәнҹ бүтләрин сәни мурдарлајыб.+ Өзүн өз сонуну тезләшдирдин. Өмрүнүн ахыры чатыб. Буна ҝөрә дә сәни халгларын ҝөзүндә рүсвај едәҹәјәм, бүтүн өлкәләр сәни мәсхәрәјә гојаҹаг.+
5 Јахын-узаг елләр сәнә ришхәнд едәҹәк,+ сән, еј ады ләкәләнмиш тәлатүмләр шәһәри!
6 Сәндә јашајан Исраил башчыларынын һәр бири вәзифәсиндән истифадә едиб ганлар ахыдыр.+
7 Сәнин сакинләрин ата-ана танымыр,+ гәрибләри алдадыр, јетимләрин, дулларын һаггыны тапдалајыр”».+
8 «“Сән Мәнә мәхсус мүгәддәс јерләрә һәгарәтлә јанашырсан, шәнбә ҝүнләрими һеч јеринә гојурсан.+
9 Сәнин ичиндә гана сусајан бөһтанчылар јашајыр.+ Онлар сәнин дағларында бүтләрә ҝәтирилән гурбанлар јејирләр, рәзиллик едирләр.+
10 Сәнин сакинләрин аталарынын јатағыны ләкәләјир,+ ајбашы олан гадынла јатырлар.+
11 Бири өз гоншусунун арвады илә позғунлуг едир,+ о бири алчаглыг едиб ҝәлинини ләкәләјир,+ диҝәри өз баҹысынын, атасынын гызынын намусуна тохунур.+
12 Сәндә рүшвәт алыб ган төкүрләр.+ Сән сәләмлә,+ мүамилә илә борҹ верирсән, зорла гоншуларынын әлиндән пулларыны алырсан.+ Бәли, сән Мәни тамам јаддан чыхармысан”, — Күлли-Ихтијар Јеһова бәјан едир.
13 “Будур, сәндәки һарам ҝәлирдән, төкүлән ганлардан икраһ едирәм.
14 Ҝөрәсән, сәнә гаршы өлчү ҝөтүрдүјүм ҝүн дә белә ҹәсарәтли, голузорлу олаҹагсан?+ Мән Јеһова буну дејирәм, дедијими дә едәҹәјәм.
15 Сәни халгларын арасына сәпәләјәҹәјәм, өлкәләрә пәрән-пәрән салаҹағам,+ мурдар һәрәкәтләринә сон гојаҹағам.+
16 Халгларын ҝөзүндә хар олаҹагсан, онда биләҹәксән ки, Мән Јеһовајам”».+
17 Мәнә јенә Јеһованын сөзү назил олду:
18 «Еј бәни-адәм, Исраил әһли Мәним ҝөзүмдә зир-зибилә* дөнүб, һамысы собаја гојулан мис, галај, дәмир, гурғушун кимидир. Ҝүмүшдән чыхан зир-зибилә дөнүбләр.+
19 Одур ки, Күлли-Ихтијар Јеһова белә дејир: “Мадам ки һамыныз зибил кими олмусунуз,+ сизи Јерусәлимә топлајаҹағам,
20 ҝүмүшү, миси, дәмири, гурғушуну вә галајы собаја јығдыглары кими, оду үфүрүб онлары әритдикләри кими, Мән дә сизи гејз-гәзәблә бир јерә топлајаҹағам, оду үфүрүб алышдыраҹағам, сизи әридәҹәјәм.+
21 Бәли, сизи бир јерә јығыб үстүнүзә гәзәбимин атәшини пүскүрәҹәјәм,+ һамыныз шәһәрин ичиндә әријәҹәксиниз.+
22 Ҝүмүш собада неҹә әријирсә, сиз дә орада елә әријәҹәксиниз, онда биләҹәксиниз ки, Мән Јеһова гәзәбими үстүнүзә јағдырмышам”».
23 Јенидән мәнә Јеһованын сөзү назил олду:
24 «Еј бәни-адәм, она белә де: “Сән елә бир јерсән ки, гәзәб ҝүнүндә нә тәмизләнәҹәксән, нә дә үстүнә јағыш јағаҹаг.
25 Онун пејғәмбәрләри орада фитнә гурурлар,+ нәрә чәкиб шикарыны парчалајан аслан кими+ инсанлары ашырырлар. Хәзинәләр, ҹаваһирләр әлә кечирирләр, шәһәрдәки гадынлары дул гојурлар.
26 Каһинләри ганунларымы позур,+ Мәнә мәхсус мүгәддәс јерләри мурдарлајырлар.+ Мүгәддәс шејлә ади шеј арасында һеч бир фәрг гојмурлар.+ Пак нәдир, мурдар нәдир ҹамаата өјрәтмирләр,+ шәнбәләримә риајәт етмирләр. Мәнә күфр едирләр.
27 Әјанлары шикары дидиб-парчалајан ҹанавар кимидир, һарам ҝәлир әлдә етмәк үчүн ганлар төкүб ҹанлар алырлар.+
28 Пејғәмбәрләри исә ишләринин үстүнү малалајыр, бош вәһјләр алыр, јаландан фал ачырлар,+ Мән Јеһова һеч нә демәдијим һалда, “Күлли-Ихтијар Јеһова белә-белә дејир” сөјләјирләр.
29 Өлкәнин ҹамааты бир-биринә кәләк ҝәлир, сојғунчулуг едир,+ имкансыза, јохсула зүлм едир, јаделлини алдадыр, һаггыны тапдалајыр”.
30 “Онларын арасында бир адам ахтардым ки, шәһәр диварыны тәмир етсин, ја да өлкә дармадағын едилмәсин дејә, Мәним һүзурума чыхыб дивардакы јарыгларда дурсун,+ амма әфсус ки, тапа билмәдим.
31 Одур ки, онлары һиддәтимә туш едәҹәјәм, гәзәбимин атәши илә онлары мәһв едәҹәјәм, әмәлләринин нәтиҹәсини габагларына чыхараҹағам”, — Күлли-Ихтијар Јеһова бәјан едир».
Һашијәләр
^ Һәрфән: посаја (филиз әридиләндә ајрылан галыг).
