Һизгијал 25:1—17
25 Мәнә јенә Јеһованын сөзү назил олду:
2 «Еј бәни-адәм, үзүнү әмуниләрә+ тутуб онлара гаршы пејғәмбәрлик ет.+
3 Әмуниләр һагда белә де: “Ешидин, ҝөрүн Күлли-Ихтијар Јеһова нә дејир. Күлли-Ихтијар Јеһованын сөзү будур: “Сиз ки мүгәддәс мәканым мурдарлананда, Исраил виранә галанда, Јәһуда әһли сүрҝүнә ҝедәндә “әҹәб олду!” дединиз,
4 Мән дә сизи шәрглиләрин ихтијарына верәҹәјәм. Онлар мәмләкәтиниздә јурд салаҹаг, аранызда чадырларыны гураҹаглар. Торпағынызын мәһсулуну јејәҹәк, мал-һејванынызын сүдүнү ичәҹәкләр.
5 Раббаһы+ дәвәләрин отлаг јери едәҹәјәм, әмуниләрин өлкәси сүрүләрин өрүш јери олаҹаг. Онда биләҹәксиниз ки, Мән Јеһовајам”».
6 «Күлли-Ихтијар Јеһова белә дејир: “Әлинизи әлинизә вуруб+ ајагларынызы јерә дөјдүјүнүз, Исраилин пис ҝүнүнә ҝүлүб севиндијиниз үчүн+
7 әлим сизә гаршы галхаҹаг. Сизи халглара гәнимәт едәҹәјәм. Халглар сырасындан адынызы силәҹәјәм. Көкүнүзү јер үзүндән кәсәҹәјәм,+ сизи мәһв едәҹәјәм. Онда биләҹәксиниз ки, Мән Јеһовајам”.
8 Күлли-Ихтијар Јеһова дејир: “Муабла+ Саир+: “Будур, Јәһуда әһли башга халглардан һеч нә илә фәргләнмир”, — дедији үчүн
9 Муабын дағ јамаҹларындакы шәһәрләри, өлкәнин ән сәфалы ҝушәси олан сәрһәд шәһәрләрини — Бејт-Јәшимуту, Баал-Мәуну, та Кирјатаимә+ гәдәр узанан әразини дүшмән һүҹумлары гаршысында аҹиз гојаҹағам.
10 Онлары да әмуниләрлә бирликдә шәрглиләрин ихтијарына верәҹәјәм.+ Әмунун ады халгларын арасында анылмајаҹаг.+
11 Муабда һөкмүмү иҹра едәҹәјәм,+ онда биләҹәкләр ки, Мән Јеһовајам”.
12 Күлли-Ихтијар Јеһова белә дејир: “Әдум Јәһуда әһли илә кин-күдурәтлә давранды. Онлардан интигам алыб бөјүк ҝүнаһа батды.+
13 Бу сәбәбдән Күлли-Ихтијар Јеһова белә дејир: “Мән дә әлими Әдума гаршы галдырыб адамлары да, һејванлары да гыраҹағам, ораны виранәлијә чевирәҹәјәм.+ Тәһмандан тутмуш дүз Диданадәк һамы гылынҹын гурбаны олаҹаг.+
14 “Халгым Исраилин әли илә Әдумдан гисас алаҹағам.+ Онлар Әдумдан Мәним аҹығымы, һејфими чыхаҹаглар. Әдумиләр Мәним интигамымын аҹысыны дадаҹаг”+ — Күлли-Ихтијар Јеһова бәјан едир”.
15 Күлли-Ихтијар Јеһова белә дејир: “Филиштлиләрин* әдавәти битиб-түкәнмир, кин-күдурәтлә Исраилдән гисас алыб ону тар-мар етмәјә ҹан атырлар.+
16 Бу сәбәбдән Күлли-Ихтијар Јеһова бәјан едир: “Әлими филиштлиләрә гаршы галдыраҹағам,+ кәритиләрин көкүнү кәсәҹәјәм,+ саһилдә јашајанлардан сағ галанлары мәһв едәҹәјәм.+
17 Онлардан шиддәтли гисас алаҹағам, онлары амансыз ҹәзалара дүчар едәҹәјәм. Интигам ҹәнҝиндә оланда биләҹәкләр ки, Мән Јеһовајам”».
Һашијәләр
^ Бәзи мәнбәләрә әсасән, филистимлиләр.
