Һизгијал 38:1—23
38 Јенә мәнә Јеһованын сөзү назил олду:
2 «Еј бәни-адәм, үзүнү Мәҹуҹ өлкәсиндән олан Јәҹуҹа,+ Мәшәг вә Тубалын+ баш әмиринә тут вә она гаршы пејғәмбәрлик едиб+
3 сөјлә ки, Күлли-Ихтијар Јеһова белә дејир: “Мән сәнә гаршыјам, еј Јәҹуҹ, еј Мәшәг вә Тубалын баш әмири!
4 Сәни јолундан гајтараҹағам. Сәнин чәнәләринә гармаг кечирәҹәјәм,+ сәни дәбдәбә илә ҝејинмиш, бөјүк вә кичик галханла силаһланмыш, гылынҹ ојнадан бөјүк издиһамла — ордунла,+ сүвариләринлә, атларынла бирҝә чәкиб сүрүјәҹәјәм.
5 Һәр бири сипәрлә, дәбилгә илә јарагланан Фарс, Һәбәш вә Пут,+
6 һәмчинин Ҝүмәрлә ордусу, уҹгар шималдан Түҹарма+ еви вә бүтүн ордусу — чохлу-чохлу халглар сәнинләдир.+
7 Һајды, һазыр олун! Сән дә, сәнинлә топлашан бүтүн ордулар да. Онлара сән башчылыг едәҹәксән.
8 Хејли вахт кечәндән сонра чағырылаҹагсан*. Узун илләр сонра халгларын ичиндән топланан, гылынҹдан гуртулараг чохдандыр хараба галмыш Исраил дағларында мәскунлашан, диҝәр халгларын арасындан чыхарылыб динҹлик ичиндә јашајан инсанларын торпағына сохулаҹагсан.+
9 Сән, бүтүн ордун вә сәнинлә бирҝә чохлу халглар туфантәк онларын үстүнә ҝәләҹәксиниз, өлкәни булуд кими өртәҹәксиниз”.
10 Күлли-Ихтијар Јеһова белә дејир: “О ҝүн сәнин ағлына бәзи фикирләр ҝәләҹәк, пис нијјәтә дүшәҹәксән.
11 Дејәҹәксән: “Мүдафиәсиз кәндләри олан өлкәјә һәмлә едәҹәјәм.+ Динҹ јашајан, горху-һүркү билмәјән, диварлары, дарвазалары, ҹәфтәләри олмајан кәндләрдә јашајанларын үстүнә ҝәләҹәјәм”.
12 Сән чохлу гәнимәт, талан малы газанмаг ешгинә дүшәҹәксән. Бир заманлар виран галмыш, сонрадан мәскунлашмыш+ јерләрә һүҹум едәҹәксән, халгларын ичиндән топланмыш,+ инди вар-дөвләт, мал-мүлк јыған,+ дүнјанын мәркәзиндә јашајан халгын үстүнә гошун чәкәҹәксән.
13 Сәба+ илә Дидан,+ Таршиш+ таҹирләри илә дөјүшчүләри сәнә сөјләјәҹәкләр: “Чохлу гәнимәт, талан малы јығмаға ҝедирсән? Ордуну сәфәрбәр етмисән ки, гызыл-ҝүмүш ҝөтүрәсән, вар-дөвләт, мал-мүлк апарасан, чохлу гәнимәт әлә кечирәсән?”
14 Буна ҝөрә, еј бәни-адәм, Јәҹуҹа сөјлә ки, Күлли-Ихтијар Јеһова белә дејир: “О ҝүн баша дүшәҹәксән ки, халгым Исраил әмин-аманлыгда јашајыр.+
15 Сән өз јериндән, узаг шималдан ҝәләҹәксән,+ јанында да чохлу халглардан атлара сүвар олмуш гошун-ләшкәр, бөјүк бир издиһам.+
16 Өлкәни бүрүјән булудлар кими, халгым Исраилин үстүнә һүҹум чәкәҹәксән. Заманын сонунда сәни, еј Јәҹуҹ, өз өлкәмә гаршы галдыраҹағам ки,+ халгларын ҝөзү өнүндә мүгәддәслијими сәнин васитәнлә ҝөстәрим, гој һамысы Мәни танысын”.+
17 Күлли-Ихтијар Јеһова белә дејир: “Гәдим ҝүнләрдә гулларым Исраил пејғәмбәрләринин дилилә һаггында данышдығым кәс сән дејилсәнми? О пејғәмбәрләр сәни онларын үстүнә ҝәтирәҹәјим барәдә илләр узуну пејғәмбәрлик едибләр”.
18 “Һәмин ҝүн, Јәҹуҹ Исраил торпағына сохулан ҝүн Мән гәзәбдән алышыб-јанаҹағам, — Күлли-Ихтијар Јеһова бәјан едир.+ —
19 Гејзимлә, аловлу гәзәбимлә данышаҹағам. О ҝүн Исраил торпағында ҝүҹлү зәлзәлә олаҹаг.
20 Дәрјадакы балыглар, ҝөјдәки гушлар, мешәдәки һејванлар, јердә сүрүнән ҹанлылар, ҹүмлә ҹаһан өнүмдә зағ-зағ әсәҹәк, дағлар көкүндән гопаҹаг,+ гајалар парчаланаҹаг, диварлар јерә чөкәҹәк”.
21 “Бүтүн дағларымда Јәҹуҹун үстүнә ҝетмәјә гылынҹ чағыраҹағам, — Күлли-Ихтијар Јеһова бәјан едир. — Һәр кәс өз гардашынын үстүнә гылынҹ чәкәҹәк.+
22 Ону мүһакимә едәҹәјәм. Ҹанына азар салыб, үстүнә өлүм ҝөндәриб ону ҹәзаландыраҹағам.+ Онун да, гошунларынын да, онунла олан халгларын да үзәринә+ лејсан, долу,+ алов,+ күкүрд+ јағдыраҹағам.
23 Халгларын гаршысында Өзүмү уҹалдаҹағам, мүгәддәслијими ҝөстәрәҹәјәм, Өзүмү таныдаҹағам. Онда биләҹәкләр ки, Мән Јеһовајам”.
Һашијәләр
^ Јахуд сәнә фикир вериләҹәк.
