Һәвариләрин ишләри 9:1—43
9 Шаул һәлә дә Ағанын шаҝирдләрини һәдәләјир, онлары өлдүрмәк арзусу илә алышыб-јанырды.+ О, баш каһинин јанына ҝедиб
2 ондан Дәмәшг шәһәриндәки синагоглара мәктуб јазмағы хаһиш етди ки, бу јола мәнсуб олан һәр кәси+ — кишиләри, гадынлары һәбс едиб Јерусәлимә ҝәтирә билсин.
3 Јол илә ҝедәркән, Дәмәшгә чатачатда гәфләтән ҝөјдән бир ишыг онун әтрафына нур сачды.+
4 Шаул јерә јыхылды вә бир сәс ешитди. О сәс дејирди: «Шаул, Шаул, мәни нијә тәгиб едирсән?»
5 О деди: «Аға, сән кимсән?» Сәс ҹаваб верди: «Мән сәнин тәгиб етдијин Исајам.+
6 Дур, шәһәрә ҝет, нә етмәк лазымдыр, орада сәнә дејиләҹәк».
7 Шаулла олан адамлар донуб галмышдылар, онлар сәс ешидир, амма һеч кәси ҝөрмүрдүләр.+
8 Шаул ајаға галхды, ҝөзләри ачыг олса да, һеч нә ҝөрмүрдү. Онун әлиндән тутуб Дәмәшгә ҝәтирдиләр.
9 Дүз үч ҝүн онун ҝөзләри кор галды.+ О, нә једи, нә дә ичди.
10 Дәмәшгдә Һәнәнја+ адында бир шаҝирд јашајырды. Аға вәһјдә ону чағырды: «Һәнәнја!» О һај верди: «Бәли, Аға».
11 Аға она деди: «Дур, Дүз адланан күчәјә ҝет, Јәһуданын евиндә тарслы+ Шаул адында адамы тап. О, инди дуа едир.
12 О, вәһјдә ҝөрүб ки, Һәнәнја адында бир адам јанына ҝәлиб вә ҝөзләрини ачмаг үчүн әлләрини онун үзәринә гојуб».+
13 Һәнәнја ҹаваб верди: «Аға, мән чохларындан ешитмишәм ки, о, сәнин Јерусәлимдәки мүгәддәс хидмәтчиләринә зүлмләр едиб.
14 Бурада да сәнин адыны чағыран һәр кәси һәбс етмәк үчүн бөјүк каһинләрдән ихтијар алыб».+
15 Анҹаг Аға она деди: «Ҝет, чүнки бу адам адымы халглара,+ о ҹүмләдән һөкмдарлара+ вә Исраил оғулларына билдирмәк үчүн сечдијим аләтдир.+
16 Адым уғрунда нәләр чәкәҹәјини она ҝөстәрәҹәјәм».+
17 Һәнәнја ҝетди. О, һәмин евә ҝириб әлләрини Шаулун үзәринә гојду вә деди: «Шаул, гардаш, бура ҝәләркән јолда сәнә ҝөрүнән Ағамыз Иса мәни сәнин јанына ҝөндәрди ки, ҝөзләрин ачылсын вә сән мүгәддәс руһла доласан».+
18 О андаҹа Шаулун ҝөзләриндән пулҹуглара охшајан бир шеј төкүлдү вә ҝөзләри ачылды. О дуруб вәфтиз олунду,
19 јемәк јејиб гүввәтләнди.
Шаул бир нечә ҝүн Дәмәшгдә+, шаҝирдләрин јанында галды
20 вә вахт итирмәдән синагогларда Иса һаггында шәһадәт верәрәк онун Аллаһын Оғлу олдуғуну тәблиғ етмәјә башлады.
21 Ону ешидәнләрин һамысы чашбаш галыб дејирди: «Мәҝәр бу адам Јерусәлимдә Исанын адыны чағыранлара ҝөз вериб, ишыг вермәјән адам дејил?+ Бураја да онлары тутуб бөјүк каһинләрин јанына апармаг үчүн ҝәлмәјиб?»+
22 Шаул исә ҝет-ҝедә даһа да ҝүҹләнир, Исанын Мәсиһ олдуғуну мәнтигли сурәтдә сүбут едәрәк Дәмәшг јәһудиләрини мәәттәл гојурду.+
23 Арадан хејли ҝүн кечди. Јәһудиләр ону өлдүрмәк үчүн суи-гәсд һазырладылар.+
24 Лакин бу хәбәр Шаулун гулағына чатды. Онлар Шаулу өлдүрмәк үчүн ҝеҹә-ҝүндүз шәһәр гапыларыны пусурдулар.
25 Онда Шаулун шаҝирдләри ону ҝеҹә икән сәбәтин ичиндә шәһәр диварындакы пәнҹәрәдән ашағы ендирдиләр.+
26 Јерусәлимә ҝәләндә+ Шаул шаҝирдләрә гошулмаға чалышды, амма һамы ондан горхурду, чүнки онун шаҝирд олдуғуна инана билмирдиләр.
27 Барнәба+ онун көмәјинә ҝәлди. О, Шаулу һәвариләрин јанына ҝәтириб онун јолда Ағаны неҹә ҝөрдүјүнү,+ Ағанын онунла данышдығыны, сонра Дәмәшгдә Исанын ады илә ҹәсарәтлә тәблиғ етдијини онлара әтрафлы данышды.+
28 Беләликлә, Шаул шаҝирдләрлә галды. О, Јерусәлимдә сәрбәст ҝәзир, Ағанын ады илә ҹәсарәтлә данышыр,
29 јунандилли јәһудиләрлә сөһбәтләр едир, гызғын мүзакирәләр апарырды. Онларса Шаулу өлдүрмәјә ҹәһд ҝөстәрирдиләр.+
30 Гардашлар бундан хәбәр тутанда ону Гејсәријјәјә ҝәтириб орадан Тарса јола салдылар.+
31 Бундан сонра бүтүн Јәһудијјә, Ҹәлилә вә Сәмәријјәдәки јығынҹаг+ үчүн әмин-аманлыг дөврү башланды. Јығынҹаг мөһкәмләнир, Јеһова Аллаһын горхусу вә мүгәддәс руһун+ тәсәллиси илә јашајараг бөјүјүрдү.
32 Бутрус бүтүн о бөлҝәни ҝәзә-ҝәзә Лидда шәһәриндә+ јашајан мүгәддәсләрин јанына ҝәлди.
33 Орада сәккиз ил иди ки, ифлиҹ олуб јатагдан галхмајан Енеј адлы бир хәстә ҝөрдү.
34 Бутрус она деди: «Енеј, Иса Мәсиһ сәнә шәфа верир.+ Дур, јорған-дөшәјини јығ».+ О, дәрһал ајаға дурду.
35 Лидда шәһәринин вә Шарон дүзүнүн бүтүн сакинләри ону ҝөрәндә Ағаја иман ҝәтирди.
36 Јаффа шәһәриндә Табитә адында бир шаҝирд вар иди. (Бу адын јунан гаршылығы Дорка* иди.) Бу гадын чох хејирхаһ иди вә касыблара һәмишә әл тутурду.
37 О ҝүнләрдә Табитә хәстәләниб өлдү. Ону јујуб үст мәртәбәдә бир отаға гојдулар.
38 Лидда шәһәри Јаффаја јахын иди. Шаҝирдләр Бутрусун орада олдуғуну ешидәндә ики адам ҝөндәриб дедиләр: «Хаһиш едирик, тез јанымыза ҝәл».
39 Бутрус дуруб онларла ҝетди. Ораја ҝәләндә ону үст мәртәбәдәки отаға апардылар. Бүтүн дул гадынлар ағлаша-ағлаша Бутрусун јанына ҝәлдиләр, Табитәнин сағлығында тикдији пал-палтарлары она ҝөстәрдиләр.
40 Бутрус һамыны отагдан чыхартды,+ диз чөкүб дуа етди, сонра өлүјә үз тутуб деди: «Табитә, галх!» Гадын ҝөзләрини ачды, Бутрусу ҝөрәндә дуруб отурду.+
41 Бутрус онун әлиндән тутуб ајаға галдырды, сонра гардашлары вә дул гадынлары чағырды вә дирилмиш Табитәни онларын габағына чыхартды.+
42 Бу хәбәр бүтүн Јаффаја јајылды вә хејли адам Ағаја иман ҝәтирди.+
43 Бутрус бир мүддәт Јаффада даббағ Шимонун евиндә галды.+
Һашијәләр
^ Дорка адынын вә онун арами гаршылығы олан Табитә адынын мәнасы ҹејрандыр.