Әстәр 2:1—23
2 Бир мүддәт кечди. Шаһ Аһашверошун+ гәзәби сојуду. Ваштинин һәрәкәти+ вә онун барәсиндә верилмиш гәрар шаһын јадына дүшдү.+
2 Онда шаһын вәзир-вәкили она деди: «Гој шаһ үчүн ҝөзәл бакирә гызлар ахтарылсын.
3 Гој шаһ сәлтәнәтинин бүтүн әјаләтләриндә адамлар тәјин етсин.+ Онлар бүтүн ҝөзәл бакирә гызлары топлајыб Шуш галасына, һәрәмханаја ҝәтирсинләр. Гызлар шаһ хаҹәси вә һәрәмағасы Һәгајын+ сәрәнҹамына верилсин. Онлара әтирли јағларла сығал верилсин.
4 Шаһын хошуна ҝәлән гыз Ваштинин јеринә мәликә олсун».+ Шаһ бу фикри бәјәнди вә белә дә етди.
5 Шуш+ галасында Мәрдәһај+ адлы бир јәһуди вар иди. О, бинјаминли+ Киш оғлу, Шимај оғлу, Јаирин оғлу иди.
6 Онлар Бабил падшаһы Навуходоносорун сүрҝүн етдији Јәһуда падшаһы Јәкунја*+ илә бирҝә Јерусәлимдән чыхарылыб сүрҝүн едилмиш ҹамаатдан идиләр.
7 Мәрдәһај әмиси гызы+ Һәдәссәнин*, јәни Әстәрин гәјјуму иди. Гызын ата-анасы өләндә ону өвладлыға ҝөтүрмүшдү. Әстәр шух гамәтли ҝөзәл бир гыз иди.
8 Шаһын әмри вә фәрманы елан едиләндә чохлу сајда гыз Шуш галасында топланыб Һәгајын сәрәнҹамына верилди.+ Әстәр дә шаһын сарајына ҝәтирилиб һәрәмағасы Һәгајын сәрәнҹамына верилди.
9 Бу гыз Һәгајын үрәјинә јатды вә онун һүсн-рәғбәтини газанды. Һәгај гыза әтирли јағларла сығал вермәк+ вә ону хүсуси јемәкләрлә тәмин етмәк барәдә дәрһал ҝөстәриш верди. Үстәлик, о, шаһ евиндән једди гыз ајырыб Әстәрин гуллуғуна верди, ону вә гызлары һәрәмхананын ән ҝөзәл һиссәсинә кечиртди.
10 Әстәр Мәрдәһајын+ тапшырдығы кими, халгы вә нәсли барәдә һеч нә данышмады.+
11 Мәрдәһај Әстәрин һалындан, әһвалындан хәбәр тутмаг үчүн һәр ҝүн һәрәмхананын гаршысында ҝәзиширди.
12 Гызларын һәр бири нөвбә илә шаһ Аһашверошун јанына ҝәтирилирди. Буна гәдәр һәр гыза он ики ај әрзиндә ҝөзәллик гуллуғу тәјин едилирди. Онлара алты ај мүрр јағы+ илә, алты ај балзам јағы+ вә мүхтәлиф мәлһәмләрлә сығал верилирди. Һәр бир гыз бу ҹүр ҝөзәллик гуллуғу кечмәли иди.
13 Јалныз бундан сонра гыз шаһын јанына ҝәлә биләрди. Гыз һәрәмханадан чыхыб шаһын евинә ҝедәндә үрәји истәдији һәр шеј она верилирди.
14 О, ахшам шаһын јанына ҝирир, сәһәр исә шаһ хаҹәси, ҹаријәләрин һәрәмағасы Шәшһазын сәрәнҹамында олан о бири һәрәмханаја гајыдырды.+ Шаһ ону бәјәниб ады илә чағыртдырмаса, о, бир даһа шаһын јанына ҝәлмәзди.+
15 Шаһын јанына ҝирмәк үчүн нөвбә Мәрдәһајын өвладлыға ҝөтүрдүјү,+ әмиси Абиһаилин гызы Әстәрә чатды. Әстәр шаһ хаҹәси вә һәрәмағасы Һәгајын дедијиндән савајы, һеч бир шеј истәмәди. (Бу мүддәт әрзиндә Әстәр ону ҝөрән һәр кәсин һүсн-рәғбәтини газанмышды.)
16 Әстәр шаһ Аһашверошун һакимијјәтинин једдинҹи илиндә,+ онунҹу ај олан тевет* ајында сараја, шаһын јанына апарылды.
17 Шаһ Әстәри диҝәр гызлардан чох севди. Бүтүн гызлар ичиндә шаһын ән чох хошуна ҝәлән вә һүсн-рәғбәтини газанан о олду. Шаһ мәликә өрпәјини онун башына гојду вә ону Ваштинин јеринә+ мәликә етди.+
18 Сонра шаһ Әстәрин шәрәфинә мәҹлис гуруб бүтүн әјанларына вә гуллугчуларына бөјүк зијафәт верди. Шаһ әјаләтләрдә әфв елан етди вә шаһа лајиг һәдијјәләр пајлады.
19 Гызлар+ икинҹи дәфә топлананда Мәрдәһај шаһ дарвазасында отурмушду.
20 Әстәр Мәрдәһајын тапшырдығы кими, халгы вә нәсли барәдә һеч нә данышмырды.+ О, Мәрдәһајын һимајәсиндә олдуғу вахтларда етдији кими, инди дә онун сөзүнә әмәл едирди.+
21 Мәрдәһај шаһ дарвазасында отуран вахтлар шаһын ики мәмуру, гапы кешикчиләри Бигтан вә Тәрәш аҹыгланыб шаһ Аһашвероша суи-гәсд һазырламышдылар.
22 Бу ишдән хәбәр тутан Мәрдәһај дәрһал буну мәликә Әстәрә билдирди, Әстәр дә Мәрдәһајын адындан шаһа чатдырды.
23 Мәсәлә арашдырылды вә сүбута јетирилди. Һәмин ики нәфәр дирәкдән асылды. Бу һадисә шаһын һүзурунда салнамәләр китабына јазылды.+
