2 Ишмуил 9:1—13
-
Давуд Мефибошетә јахшылыг едир (1—13)
9 Давуд деди: «Талут евиндән кимсә галыб? Јонатанын хатиринә она јахшылыг едим».+
2 Талут евиндән Зибаһ адлы бир гуллугчу вар иди.+ Ону Давудун јанына чағырдылар. Падшаһ ондан сорушду: «Зибаһ сәнсән?» О: «Бәли, гуллуғунда һазырам», — дејә ҹаваб верди.
3 Падшаһ сорушду: «Талут евиндән кимсә галыб, она Аллаһын мәһәббәтини ҝөстәрим?» Зибаһ ҹаваб верди: «Јонатанын бир оғлу галыб; ики ајағындан шикәстдир».+
4 Падшаһ сорушду: «О һарададыр?» Зибаһ деди: «Лә-Дибәрдә, Әмаил оғлу Маһирин+ евиндәдир».
5 Давуд падшаһ дәрһал адам ҝөндәриб ону Лә-Дибәрдән, Әмаил оғлу Маһирин евиндән ҝәтиртди.
6 Талут оғлу Јонатанын оғлу Мефибошет Давудун јанына ҝәлди вә ҝәлән кими үзүстә јерә дөшәнди. Давуд деди: «Мефибошет!» О ҹаваб верди: «Бәли, ағам. Гуллуғунда һазырам».
7 Давуд она деди: «Горхма. Атан Јонатанын хәтринә сәнә лүтф ҝөстәрәҹәјәм,+ бабан Талутун бүтүн торпагларыны сәнә гајтараҹағам. Сән һәмишә мәним сүфрәмдә чөрәк јејәҹәксән».+
8 Мефибошет тәзим едиб деди: «Ахы мән гулун кимәм ки, мәним кими өлү бир көпәјә+ лүтф ҝөстәрирсән?»
9 Падшаһ Талутун гуллугчусу Зибаһы чағыртдырыб она деди: «Аған Талута вә евинә мәхсус һәр шеји ағанын нәвәсинә верирәм.+
10 Сән, оғулларын вә гулларын онун үчүн торпағы беҹәрәҹәксиниз, мәһсулу јығаҹагсыныз. Бу, ағанын аиләси үчүн азугә олаҹаг. Ағанын нәвәси Мефибошет исә һәмишә мәним сүфрәмдә јејәҹәк».+
Зибаһын он беш оғлу вә ијирми гуллугчусу вар иди.+
11 Зибаһ падшаһа деди: «Һөкмдарым бу гулуна нә әмр едибсә, гулун һамысыны јеринә јетирәҹәк». Беләҹә, Мефибошет шаһзадә кими Давудун сүфрәсиндә* чөрәк јејирди.
12 Мефибошетин балаҹа оғлу вар иди. Онун ады Микә иди.+ Зибаһын евиндә јашајанларын һамысы Мефибошетин гуллугчусу олду.
13 Мефибошет Јерусәлимдә јашајыб һәмишә падшаһын сүфрәсиндә чөрәк јејирди.+ О, ики ајағындан шикәст иди.+
Һашијәләр
^ Диҝәр вариант: мәним сүфрәмдә.
