2 Салнамәләр 2:1—18
-
Мәбәдин тикинтисинә һазырлыг (1—18)
2 Сүлејман Јеһованын адына ев+ вә өзү үчүн сарај тикмәк барәдә фәрман верди.+
2 Сүлејман 70 000 фәһлә, дағларда даш кәсмәк үчүн 80 000 ишчи+ вә бүтүн бу адамлара нәзарәт етмәк үчүн 3600 нәзарәтчи сечди.+
3 Сонра о, Сур падшаһы Һирама+ хәбәр ҝөндәрди: «Атам Давудла әлагәләриниз сых иди. О, өзүнә ев тикәндә она сидр тирләри ҝөндәрмишдин.+
4 Инди мән Аллаһым Јеһоваја һәср етмәк үчүн Онун адына ев тикирәм. Истәјирәм ки, һәр сәһәр-ахшам,+ шәнбә ҝүнләриндә,+ тәзә ај мәрасимләриндә+ вә Аллаһымыз Јеһованын бајрамларында+ орада, Аллаһын өнүндә әтирли бухур јандырым,+ һүзур чөрәји+ гојум вә јандырма гурбанлары тәгдим едим. Бу, Исраил үчүн әбәди гајдадыр.
5 Тикдијим ев бөјүк олаҹаг, чүнки бизим Аллаһымыз бүтүн аллаһлардан уҹадыр.
6 Онун үчүн ев тикмәјә кимин ҝүҹү чатар? О, ҝөјләрә, ҝөјләрин ҝөјүнә сығмаз.+ Мән кимәм ки, Онун үчүн ев тиким. Тәкҹә өнүндә гурбан түстүсү тәгдим етмәк үчүн ев тикә биләрәм.
7 Мәнә гызыл, ҝүмүш, мис,+ дәмир, бәнөвшәји јун, түнд-гырмызы, ҝөј ипликлә ишләмәји баҹаран, һәккаклыг сәнәтиндән башы чыхан сәнәткар ҝөндәр. О, Јәһуда вә Јерусәлимдә атам Давудун ихтијарыма вердији сәнәткарларла бирликдә ишләјәр.+
8 Мәнә Ливандан сидр, ардыҹ+ вә сәндәл+ тирләри ҝөндәр. Мән билирәм ки, сәнин хидмәтчиләрин Ливан ағаҹлары кәсмәји баҹарырлар.+ Мәним хидмәтчиләрим сәнинкиләрлә бирликдә ишләјиб+
9 мәним үчүн чохлу тир һазырлајар, чүнки тикдијим ев чох бөјүк олаҹаг.
10 Мән исә сәнин хидмәтчиләрини, ағаҹ кәсәнләри әрзагла тәмин едәрәм.+ Онлара 20 000 кор* буғда, 20 000 кор арпа, 20 000 бат* шәраб вә 20 000 бат јағ верәрәм».
11 Сур падшаһы Һирам Сүлејмана намә ҝөндәрди: «Јеһова Өз халгыны севдији үчүн сәни онларын падшаһы едиб».
12 Ардынҹа белә деди: «Јери-ҝөјү јарадан Исраилин Аллаһы Јеһоваја алгыш олсун! О, Давуд падшаһа ағыллы, һикмәтли, дәрракәли оғул вериб!+ Бу оғул Јеһова үчүн ев тикәҹәк, падшаһ сарајы инша едәҹәк.
13 Будур, сәнә баҹарыглы, ишинин устасы олан Һирамабини ҝөндәрирәм.+
14 О, данлы гадынын оғлудур. Атасы сурлудур. Гызыл, ҝүмүш, мис, дәмир, даш, тир, бәнөвшәји јун, түнд-гырмызы вә ҝөј иплик, зәриф парча илә ишләмәји баҹарыр,+ һәккаклығын һәр сирринә бәләддир, әлиндән һәр иш ҝәлир.+ О, сәнин вә атанын, ағам Давудун баҹарыглы сәнәткарлары илә бирҝә ишләјәр.
15 Гој ағам да сөз вердији кими, хидмәтчиләринә буғда, арпа, јағ, шәраб ҝөндәрсин.+
16 Биз дә сәнә лазым олан гәдәр Ливан ағаҹлары кәсиб ҝөндәрәрик.+ Онлары салларын үстүндә дәниз јолу илә Јаффаја ҝәтирәрик,+ сән дә орадан Јерусәлимә апарарсан».+
17 Сүлејман атасы Давуд кими, Исраилдә јашајан бүтүн јаделлиләри сајды.+ Онларын сајы 153 600 нәфәр иди.
18 Сүлејман онларын 70 000 нәфәрини фәһлә, 80 000 нәфәрини дағларда даш кәсән,+ 3600 нәфәрини исә бу ишчиләрә нәзарәтчи гојду.+
Һашијәләр
^ Кор 220 литрлик габын тутумуна бәрабәрдир. Б14 әлавәсинә бах.
^ Бат 22 л-ә бәрабәрдир. Б14 әлавәсинә бах.