1. Мәсиһи һәјаты вә ибадәти ҝөрүшү иш дәфтәриндәки вә ашағыдакы тәлиматлара әсасән кечирилир. Бүтүн тәблиғчиләри тапшырыгларда иштирак етмәјә тәшвиг етмәк лазымдыр. Ибадәт ҝөрүшләриндә мүнтәзәм иштирак едән диҝәрләри дә, әҝәр Мүгәддәс Китаб тәләбләринә мүвафиг ҝәлирләрсә вә мәсиһи принсипләринә ујғун һәјат тәрзи сүрүрләрсә, тапшырыгларда иштирак едә биләрләр (be с. 282).

 2. Ҝириш сөзләр (3 дәгигә вә ја аз). Һәр һәфтә илк нәғмә вә дуадан сонра Мәсиһи һәјаты вә ибадәти ҝөрүшүнүн сәдри бүтүн ҝөрүшә даир динләјиҹиләрдә мараг ојатмалыдыр. Һәмчинин «Мәсиһи һәјаты вә ибадәти ҝөрүшү үчүн ҹаваблар» бланкындакы суалы вурғула.

 3. Аллаһын Кәламындакы хәзинә

• Нитг (10 дәгигә). Мөвзу вә гејд олунмуш ики-үч әсас фикир «Мәсиһи һәјаты вә ибадәти. Иш дәфтәри»ндә ҝөстәрилир. Бу нитги ағсаггал вә ја тәҹрүбәли јығынҹаг хидмәтчиси тәгдим едир. Мүгәддәс Китабын һәфтәлик мүталиәсиндә Мүгәддәс Китабын һәр јени бөлмәси (китабы) видео-чарх васитәсилә тәгдим олунур. Натиг мөвзуну видео илә әлагәләндирә биләр. Анҹаг иш дәфтәриндәки верилән бәндләрә мүтләг ачыглама верилмәлидир. Һәмчинин вахт олса, верилән материала аид шәкилләрдән дә истифадә етмәли вә ајәләрдәки фикирләри вурғуламалыдыр.

• Һикмәт хәзинәсиндән инҹиләр (8 дәгигә). Суал-ҹаваб шәклиндә кечирилир. Ачылыш вә јекун сөзләрини демәк лазым дејил. Бәнди ағсаггал вә ја тәҹрүбәли јығынҹаг  хидмәтчиси тәгдим едир. Бәнди апаран гардаш дөрд суал арасындакы вахты јығынҹағын тәләбатына ујғун шәкилдә бөлүшдүрә биләр. Бунунла белә, бүтүн суалларын мүзакирә едилмәси мүтләгдир. Һәмчинин илк ики суалда ҝәтирилән бүтүн ајәләрин охунулуб-охунулмајаҹағыны мүәјјән етмәлидир. Верилән шәрһләр 30 санијәни ашмамалыдыр.

• Мүгәддәс Китабын гираәти (4 дәгигә вә ја аз). Бу тапшырыг гардаша верилир. Шаҝирд тәјин олунмуш материалы ҝириш вә јекун сөзләр әлавә етмәдән охумалыдыр. Ҝөрүшүн сәдри шаҝирдә дүзҝүн, ајдын, рәван, тәбии, һабелә дүзҝүн мәнтиги вурғу, интонасија вә фасилә илә охумаг саһәсиндә сәриштәли олмаға көмәк етмәлидир.

  4. Сәриштәли мүждәчи олун (15 дәгигә вә ја аз). Ҝөрүшүн бу һиссәси һамыја тәблиғ вә тәлим ишиндә пүхтәләшмәк үчүн мәшг етмәк имканыны јарадыр. Шаҝирдләр илк вә тәкрар сөһбәтләрини «Мәсиһи һәјаты вә ибадәти. Иш дәфтәри»нин биринҹи сәһифәсиндә нүмунә үчүн тәгдиматлара әсасландырмалыдырлар. Тәблиғчиләр истәсәләр, тәблиғ үчүн әсас вәсаитләримиздән истәнилән нәшри вә ја видеону истифадә едә биләрләр. Иш дәфтәриндә һәр шаҝирд тапшырығы үчүн вахт ҝөстәрилир вә һәрдән әлавә ҝөстәришләр верилир. Шәрт дејил ки, шаҝирдләр верилән вахты тамамламаг үчүн әлавә материал вә фикирләрдән истифадә етсинләр. Јахшы һазырланмыш сәһнәҹикләри бир дәгигә, јахуд да ондан да аз вахт әрзиндә тамамламаг олар. Лазым оланда ағсаггаллара да бу тапшырыглары вермәк олар.

• Сөһбәт планына аид видеолар. Сөһбәт планына аид видеолар ардыҹыл олараг һәр ајын һәр һәфтәси ҝөстәриләҹәк вә мүзакирә олунаҹаг. Бу видеоларда биринҹи, икинҹи вә үчүнҹү сөһбәт ҝөстәриләҹәк. Бу бәнди Мәсиһи һәјаты вә ибадәти ҝөрүшүнүн сәдри апарыр.

• Илк сөһбәт. Бу тапшырыг һәм гардаша, һәм дә баҹыја верилә биләр. Шаҝирдин көмәкчиси ејни ҹинсдән, јахуд аилә үзвләриндән бири олмалыдыр. Шаҝирд вә онун көмәкчиси истәсәләр ја ајаг үстә, ја да отурараг тапшырығы јеринә јетирә биләрләр. Онлар саламлашыб башлаја биләрләр. Сөһбәтә әсас кими сөһбәт планындан истифадә олунмалыдыр.

• Икинҹи сөһбәт. Бу тапшырыг һәм гардаша, һәм дә баҹыја верилә биләр. Көмәкчи әкс-ҹинсдән олмамалыдыр (km 10/13 с. 1). Шаҝирд вә онун көмәкчиси ја маса архасында отура, ја да ајаг үстә дајана биләр. Шаҝирд тапшырығында артыг илк сөһбәт заманы мараг ҝөстәрән адама тәкрар (икинҹи) сөһбәт заманы сөһбәти апармаг үсулуну ҝөстәрмәлидир. Сөһбәт заманы сөһбәт планындан истифадә олунмалыдыр.

• Үчүнҹү сөһбәт. Бу тапшырыг һәм гардаша, һәм дә баҹыја верилә биләр. Көмәкчи әкс-ҹинсдән олмамалыдыр (km 10/13 с. 1). Шаҝирд вә онун көмәкчиси ја маса архасында отура, ја да ајаг үстә дајана биләр. Шаҝирд тапшырығында артыг икинҹи сөһбәт заманы мараг ҝөстәрән адама үчүнҹү сөһбәт заманы сөһбәти апармаг үсулуну ҝөстәрмәлидир. Сөһбәт заманы сөһбәт планындан истифадә олунмалыдыр.

• Мүгәддәс Китаб дәрси. Бу тапшырыг һәм гардаша, һәм дә баҹыја верилә биләр. Көмәкчи әкс-ҹинсдән олмамалыдыр (km 10/13 с. 1). Шаҝирд вә онун көмәкчиси ја отура, ја да ајаг үстә дајана биләр. Бу тапшырыгда ҝедән дәрс просесинин фрагменти (гыса парчасы) нүмајиш олунур. Әҝәр шаҝирд мүвафиг дәрсин үзәриндә ишләмирсә, ачылыш вә ја јекун сөзләри демәјә еһтијаҹ јохдур. Верилән бүтүн материалы уҹадан охумаг тәләб дејил, амма јенә дә истәсәләр, бүтүн материалы охуја биләрләр. Әсас одур ки, тәлим вермәк мәһарәти нүмајиш олунсун.

•   Нитг. Бу тапшырыг гардаша верилмәли вә о, бу тапшырығы јығынҹаг гаршысында нитг формасында тәгдим етмәлидир.

  5. Мәсиһи һәјаты. Нәғмәдән сонра бу һиссәнин 15 дәгигәсиндә аудиторијаја Аллаһын Кәламында јазыланлара әмәл етмәјә көмәк етмәк мәгсәдинә хидмәт едән бир-ики бәнд тәгдим олунаҹаг. Әҝәр конкрет ҝөстәриш јохдурса, бу бәндләри ағсаггал вә ја тәҹрүбәли јығынҹаг хидмәтчиси апара биләр. Анҹаг «Јығынҹағын тәләбатлары» бәнди јалныз ағсаггала тәјин едилир.

• Мүгәддәс Китаб дәрси (30 дәгигә). Бу бәнд тәҹрүбәли ағсаггаллара тәјин едилир. (Ағсаггалларын сајы аз олдуғу јығынҹагларда бу бәнд баҹарыглы јығынҹаг хидмәтчиләринә верилә биләр.) Ағсаггаллар шурасы Мүгәддәс Китаб дәрсини апармаг үчүн елә гардашлар сечмәлидир ки, онлар верилән вахтдан чыхмамаг шәртилә, материалы мәналы мүзакирә етмәли, әсас ајәләри вурғуламалы вә аудиторијаја материалын практики дәјәрини ҝөрмәјә көмәк етмәлидир. «Ҝөзәтчи гүлләси» мүзакирәсинин апарылмасы үзрә верилән ҝөстәришләр бу гардашлар үчүн фајдалы ола биләр. Мүмкүнсә, һәр һәфтә ајры-ајры апарыҹылар вә охуҹулар олсун. Әҝәр Мәсиһи һәјаты вә ибадәти ҝөрүшүнүн сәдри Мүгәддәс Китаб дәрсини гысалтмаг гәрарына ҝәлирсә, ҝөрүшүн бу һиссәсини апаран гардаш бәнди неҹә гысалтмағы дүшүнмәлидир. Бунун үчүн әҝәр истәсә, мүәјјән абзаслары охумамаг олар.

  6. Јекун сөзләр (3 дәгигә вә ја аз). Сәдр һәр ҝөрүшүн сонунда ҝөрүш заманы сәсләнән фајдалы фикирләри, о ҹүмләдән «Мәсиһи һәјаты вә ибадәти ҝөрүшү үчүн ҹаваблар» бланкындакы суалы вә ҹавабы тәкрарламалыдыр. Һәмчинин нөвбәти һәфтәнин гыса иҹмалыны вермәли, һабелә истәсә, һансы суала ҹаваб вериләҹәјини гејд етмәлидир. Вахт варса, о, ҝәлән һәфтә чыхыш едәҹәк шаҝирдләрин адларыны елан едә биләр. Әлавә ҝөстәриш јохдурса, сәдр еланлары вә ја ваҹиб мәктублары јекун заманы охуја биләр. Һәфтәлик ҹәдвәлә аид олан мәлуматлары, мәсәлән, һәр һәфтә кечирилән тәблиғ үчүн ҝөрүшләрин вә ја тәмизлик ҹәдвәли сәһнәдән елан едилмәмәли, бунун үчүн нәзәрдә тутулмуш еланлар лөвһәсиндән асылмалыдыр. Әҝәр һансыса еланы вә ја мәктубу охумаг чох вахт алаҹагса, онда о, Мәсиһи һәјаты һиссәсиндә чыхыш едәҹәк гардашлардан хаһиш едә биләр ки, өз бәндләрини бир аз гысалтсынлар. ( 5 вә  8-ҹи абзаслара бах.) Ибадәт ҝөрүшү нәғмә вә дуа илә битмәлидир.

 7. «Өзүнү охумаға вә тәлим вермәјә һәср ет». 7 јанвар 2019-ҹу ил тарихиндән башланан һәфтәдән етибарән Мәсиһи һәјаты вә ибадәти ҝөрүшүнүн сәдри шаҝирдләри тәрифләмәк вә онлара мәсләһәт вермәк үчүн «Тәлим» брошүрүндән истифадә етмәлидир. Һәр бир шаҝирд «Мәсиһи һәјаты вә ибадәти ҝөрүшү. Иш дәфтәри»ндә тапшырыгларын гаршысында мөтәризәдә ҝөстәрилмиш дәрсин үзәриндә ишләмәлидир. Һәр ајын биринҹи һәфтәсиндә Мәсиһи һәјаты вә ибадәти ҝөрүшүнүн сәдри «Тәлим» брошүрүндән бир дәрси аудиторија илә бирликдә мүзакирә едәҹәк. «Мүвәффәгијјәт ҹәдвәли» шаҝирдләрин истифадәси үчүн нәзәрдә тутулуб, сәдр орада һеч нә гејд етмәмәлидир.

  8. Мәсләһәт. Мәсиһи һәјаты вә ибадәти ҝөрүшүнүн сәдри һәр шаҝирдин тапшырығынын ардынҹа тәхминән бир дәгигә әрзиндә ону һәм тәрифләмәли, һәм дә «Тәлим» брошүрүнә әсасланан мәсләһәт вермәлидир. О, шаҝирдин һансы дәрс үзәриндә ишләдијини әввәлҹәдән елан етмәмәлидир. Шаҝирд тапшырығы битирдикдән сонра сәдр шаҝирди тәрифләјиб онун һансы дәрсин үзәриндә ишләдијини демәлидир. Шаҝирдин бу дәрсин өһдәсиндән јахшы ҝәлдијини ҝөстәрән конкрет мәгамлары вурғуламалы, јахуд онун бу дәрсин үзәриндә нәјә ҝөрә јенә ишләмәли олдуғуну нәзакәтлә изаһ етмәлидир. Шаҝирдә вә ја аудиторијаја фајдалы олаҹагса, сәһнәҹијин диҝәр мәгамларыны да гејд  едә биләр. Әлавә мәсләһәти «Тәлим» брошүрүнә вә ја «Хидмәт Мәктәби» китабына әсасланараг ҝөрүшдән сонра ајрылыгда вә ја башга вахт вермәк олар. Һәм тәјин олунмуш, һәм дә башга дәрсә аид мәсләһәт верә биләр. ( 13 вә  16-ҹы абзаслардакы Мәсиһи һәјаты вә ибадәти ҝөрүшүн нәзарәтчиси вә мәсләһәт вермәјә мәсул гардашын ролу илә бағлы ҝөстәришләрә бах.)

    9. Шаҝирдләрин тапшырыглары, еләҹә дә тапшырыглара даир Мәсиһи һәјаты вә ибадәти ҝөрүшүнүн сәдринин вердији шәрһләр онлар үчүн ајрылан вахты ашмамалыдыр. Әҝәр тапшырыглар ајрылмыш вахтдан кәнара чыхырса, онлары нәзакәтлә дајандырмаг лазымдыр. Ҝөрүшүн диҝәр һиссәләринә ајрылмыш вахт ашылырса, мәсләһәт вермәјә мәсул гардаш тәкликдә һәмин гардашлара мәсләһәт вермәлидир. Нәғмәләр вә дуалар дахил олмагла бүтүн ҝөрүш 1 саат 45 дәгигә чәкмәлидир.

 10. Рајон нәзарәтчисинин зијарәти. Рајон нәзарәтчисинин јығынҹағы зијарәт етдији һәфтә програм нөвбәти истисна илә «Мәсиһи һәјаты вә ибадәти. Иш дәфтәри»ндә ҝөстәрилдији кими апарылмалыдыр: Мәсиһи һәјаты һиссәсинин «Мүгәддәс Китаб дәрси» бәнди рајон нәзарәтчисинин 30 дәгигәлик хидмәт чыхышы илә әвәз едилмәлидир. Мәсиһи һәјаты вә ибадәти ҝөрүшүнүн сәдри хидмәт чыхышындан әввәл програмын кечирилмиш һиссәләрини тәкрарламалы, нөвбәти һәфтәнин програмынын гыса иҹмалыны етмәли, ваҹиб еланлары вә мәктублары сәсләндирмәли, сонра исә рајон нәзарәтчисини тәгдим етмәлидир. Хидмәт чыхышы битдикдән сонра рајон нәзарәтчиси сечдији нәғмә илә ҝөрүшү јекунлашдырмалыдыр. Рајон нәзарәтчисинин зијарәти заманы ибадәт ҝөрүшүнүн әсас дилиндә кечирилән һеч бир әлавә синиф кечирилмәмәлидир. Јығынҹағын нәздиндә башга дилдә кечирилән груп рајон нәзарәтчисинин зијарәти заманы өз ҝөрүшләрини ади гајда үзрә кечирә биләр. Амма рајон нәзарәтчисинин хидмәт чыхышы заманы груп бүтүн јығынҹагла рајон нәзарәтчисинин чыхышына гулаг асмалыдыр.

 11. Бөјүк топланты олан һәфтә. Бөјүк топланты олан һәфтә јығынҹаг ҝөрүшү кечирилмир. Буна ҝөрә дә һәмин һәфтә үчүн олан материал фәрди вә ја аиләви шәкилдә мүзакирә олунмалыдыр..

 12. Анма мәрасими һәфтәси. Анма мәрасими һәфтәарасы ҝүнә дүшәрсә, Мәсиһи һәјаты вә ибадәти ҝөрүшү кечирилмәјәҹәк. Анҹаг анма мәрасими ҝүнү тәблиғ үчүн ҝөрүшләр кечирилмәлидир.

  13. Мәсиһи һәјаты вә ибадәти ҝөрүшүнүн нәзарәтчиси. Мәсиһи һәјаты вә ибадәти ҝөрүшүнүн нәзарәтчиси ағсаггаллар шурасы тәрәфиндән сечилмиш ағсаггал олмалыдыр. О, ҝөрүшүн јахшы тәшкил олунмасына вә бу ҝөстәришләрә ујғун кечирилмәсинә ҝөрә мәсулијјәт дашыјыр. Нәзарәтчи мәсләһәт вермәјә мәсул гардашла јахшы әмәкдашлыг етмәлидир. «Мәсиһи һәјаты вә ибадәти. Иш дәфтәри»ни алан кими нәзарәтчи һәмин ајын тапшырыгларыны шаҝирдләрә вермәлидир. ( 4-ҹү абзаса бах.) Тапшырыг «Мәсиһи һәјаты вә ибадәти ҝөрүшүндә тапшырыг» (S-89) адлы бланка гејд олунараг шаҝирдә чыхышындан ән азы үч һәфтә әввәл верилмәлидир.

 14. Мәсиһи һәјаты вә ибадәти ҝөрүшүнүн сәдри. Һәр һәфтә ағсаггаллардан бири ҝөрүшә сәдрлик едир. (Ағсаггалларын сајы аз олдуғу јығынҹагларда сәдрлик баҹарыглы јығынҹаг хидмәтчиләринә верилә биләр.) Сәдр ҝириш вә јекун сөзләр һазырламалы вә бүтүн һиссәләри тәгдим етмәлидир. Сөһбәт планына аид видеолары вә «Тәлим» брошүрүндәки јени дәрсә аид видеолары мүзакирә етмәјә һазырлашмалыдыр. Ағсаггалларын сајындан асылы олараг, о да ҝөрүшүн диҝәр бәндләрини апара биләр. Сәдрин бәндләрарасы шәрһләри чох гыса олмалыдыр. Ағсаггаллар шурасы бу мәсулијјәтә тәҹрүбәли ағсаггаллары тәјин етмәлидир. Адәтән сечилмиш гардашлар нөвбә илә ҝөрүшдә сәдрлик етмәлидирләр. Вәзијјәтдән асылы олараг Мәсиһи һәјаты вә ибадәти ҝөрүшүнүн нәзарәтчиси диҝәр тәҹрүбәли ағсаггаллардан даһа тез-тез сәдрлик едә биләр. Әҝәр ағсаггала «Мүгәддәс Китаб дәрси»  бәндини апармаг тапшырылыбса, демәли, о, сәдр кими тәјин олунмаға јарарлыдыр. Зәһмәт олмаса, унутма: сәдр кими тәјин олунан ағсаггал шаҝирдләри үрәкдән тәрифләмәли вә онлара фајдалы мәсләһәт вермәлидир. Сәдр ҝөрүшүн вахтында битмәсинә дә нәзарәт етмәлидир. ( 6 вә  9-ҹу абзаслара бах.) Сәдр истәсә вә әҝәр кифајәт гәдәр јер варса, сәһнәдә дајаглы микрофон гурашдырыла биләр. Беләҹә сәдр бу микрофондан нөвбәти бәнди елан едәркән бәнди тәгдим едәҹәк гардаш күрсүдә өз јерини ала биләр. Һәмчинин сәдр истәсә, Мүгәддәс Китаб гираәти вә Сәриштәли мүждәчи олун тапшырыглары заманы сәһнәдә маса архасында отура биләр. Бунунла вахта гәнаәт олунар.

 15. Ағсаггаллар шурасынын координатору. Шаҝирдләрин тапшырыгларындан савајы ҝөрүшүн бүтүн бәндләрини гардашлара ағсаггаллар шурасынын координатору тәјин едир. Ағсаггаллар шурасынын тәсдиг етдији ағсаггаллары һәр һәфтә сәдр кими тәјин етмәк дә онун ишинә дахилдир. Ағсаггаллар шурасынын координатору Мәсиһи һәјаты вә ибадәти ҝөрүшүнүн нәзарәтчиси илә әмәкдашлыг едәрәк бүтүн ҝөрүшүн ҹәдвәлини тәртиб едиб мәлумат лөвһәсиндән асмалыдыр.

  16. Мәсләһәт вермәјә мәсул гардаш. Имкан дахилиндә, бу мәсулијјәтә тәјин олунан ағсаггал тәҹрүбәли натиг олмалыдыр. Бу гардаш еһтијаҹ јарананда ағсаггала вә ја јығынҹаг хидмәтчисинә Мәсиһи һәјаты вә ибадәти ҝөрүшүнүн бәндләри, ачыг мәрузәләр, «Ҝөзәтчи гүлләси» мүзакирәсинин вә «Мүгәддәс Китаб дәрси»нин кечирилмәси вә ја охунмасы да дахил олмагла, истәнилән чыхышла бағлы тәкликдә мәсләһәт вермәлидир. ( 9-ҹу абзаса бах.) Әҝәр јығынҹагда јахшы натиглик вә мүәллимлик габилијјәти олан бир нечә ағсаггал варса, онда бу мәсулијјәт һәр ил бир ағсаггала һәвалә олуна биләр. Мәсләһәт вермәјә мәсул гардашын һәр чыхышдан сонра ағсаггала вә ја јығынҹаг хидмәтчисинә мәсләһәт вермәјинә лүзум јохдур.

 17. Әлавә синифләр. Шаҝирдләрин сајындан асылы олараг јығынҹаглар әлавә синифләр тәшкил едә биләр. Һәр бир әлавә синифдә мәсләһәт верән тәҹрүбәли гардаш олмалыдыр, үстүнлүк ағсаггаллара верилир. Еһтијаҹ оларса, бу иши тәҹрүбәли јығынҹаг хидмәтчиси иҹра едә биләр. Бу мәсулијјәти јеринә јетирәҹәк гардашы ағсаггаллар шурасы тәјин етмәлидир. Мәсләһәт верән гардаш  8-ҹи абзасда ҝәтирилән ҝөстәришләрә әмәл етмәлидир. Әлавә синиф(ләр) варса, ҝөрүшүн «Аллаһын Кәламындакы хәзинә» һиссәсинин «Һикмәт хәзинәсиндән инҹиләр» бәндиндән сонра шаҝирдләрдән чыхыш едәҹәкләри синиф(ләр)ә ҝетмәләри хаһиш олунмалыдыр. Онлар ҝөрүшүн «Сәриштәли мүждәчи олун» һиссәсиндән сонра јенидән өз јерләрини тута биләрләр. Видеоларын мүзакирәси заманы әлавә синифдә оланлар өз јерләриндән әҝәр мүмкүнсә, видеоларын нүмајишини изләмәли вә мүзакирәсини динләмәлидирләр. Әҝәр бу мүмкүн дејилсә, әлавә синифдә мәсләһәт верән гардаш бу видеолары мобил ҹиһазда нүмајиш етдирмәли вә мүзакирә етмәлидир.

 18. Видеолар. Бу ҝөрүшлә бағлы олан сечилмиш видеолар нүмајиш етдирилир. Һәфтәарасы ҝөрүш үчүн видеолары «JW Library» програмында јүкләмәк вә мүхтәлиф ҹиһазларда нүмајиш етдирмәк олар. Сөһбәт планына аид видеолар Мәсиһи һәјаты вә ибадәти ҝөрүшүндә нүмајиш етдирилдикдән сонра тәблиғ үчүн ҝөрүшләрдә дә ҝөстәрилә биләр.