МҮГӘДДӘС КИТАБЫН БАХЫШЫ
Аборт
Һәр ил он милјонларла ушаг аборт едилир. Бу сај бир чох өлкәнин әһалисиндән чохдур.
Аборт шәхси сечимдир?
ИНСАНЛАР НӘ ДЕЈИР?
Гадынлар мүхтәлиф сәбәбләрә ҝөрә аборт етдирирләр. Буна игтисади чәтинликләр, аилә проблемләри, тәһсил вә карјераны давам етдирмәк истәји, јахуд ушағыны тәк бөјүтмәк горхусу сәбәб ола биләр. Анҹаг бәзи инсанлар абортун әхлаги ҹәһәтдән дүзҝүн олмадығыны — бунунла һамилә гадынын она верилән әманәтә хәјанәт етдијини дүшүнүр.
МҮГӘДДӘС КИТАБДА НӘ ДЕЈИЛИР?
Аллаһын ҝөзүндә инсан һәјаты мүгәддәсдир (Јарадылыш 9:6; Зәбур 36:9). Бу, ушағын инкишафы үчүн Аллаһын јаратдығы ән тәһлүкәсиз јердә — ана бәтниндә бөјүјән ушаға да аиддир. «Анамын бәтниндә мәни ҝизләтдин... Ҝөзләрин рүшејмими ҝөрмүшдү. Һәлә һеч бири јох икән бәдәнимин бүтүн һиссәләри, онларын әмәлә ҝәләҹәји ҝүнләр», — дејә пејғәмбәр сөјләмишди (Зәбур 139:13, 16).
Һәлә дүнјаја ҝәлмәмиш ушағын һәјатынын Аллаһ үчүн нә гәдәр дәјәрли олдуғуну Онун вердији ганунлардан вә виҹдан әнамындан ҝөрмәк олар. Аллаһын вердији ганунда дејилирди ки, әҝәр кимсә һамилә гадына әл галдырар вә бәтниндәки ушаг өләрдисә, һәмин адама өлүм һөкмү кәсилмәлијди, јәни о, өлдүрдүјү ҹанын гаршылығында өз ҹаныны вермәлијди (Чыхыш 21:22, 23). Әлбәттә, һакимләр бу заман вәзијјәти вә инсанын нијјәтини нәзәрә алмалы иди (Сајлар 35:22—24, 31).
Аллаһ инсана виҹдан вериб. Гадын виҹданын сәсинә гулаг асыб дүнјаја ҝәлмәмиш ушағынын һәјатына һөрмәт едирсә, виҹданы раһат олаҹаг *. Јох әҝәр о, виҹданынын сәсини боғуб ушағынын һәјатына гыјарса, виҹданы ону иттиһам едәҹәк вә раһат бурахмајаҹаг (Ромалылара 2:14, 15). Тәдгигатлар ҝөстәрир ки, аборт едән гадынлар даһа чох нараһатлыг кечирир вә депрессијаја дүшүрләр.
Ушағы неҹә бөјүдәҹәјинин фикрини чәкән вә еһтимал ки, истәмәдән һамилә галан аналар һагда бәс нә демәк олар? Ҝөрүн Мүгәддәс Китабда Аллаһын ганунларына садиг галан инсанлара һансы вәд верилир: «Садиг адамла садигсән, пак адама [гадына] гаршы паксан» (Зәбур 18:25). Орада һәмчинин јазылыб: «Јеһова әдаләти севир, садиг бәндәләрини тәрк етмәз» (Зәбур 37:28).
«Бу адамларын виҹданы онларла бәрабәр шаһидлик едир, дүшүнҹәләри онлары ја иттиһам едир, ја да онлара һагг газандырыр» (Ромалылара 2:15).
Әҝәр сиз артыг аборт етмисинизсә, онда неҹә?
ИНСАНЛАР НӘ ДЕЈИР?
Рут * адлы тәнһа бир ана дејир: «Онсуз да үч ушағым вар иди, дүшүнүрдүм дөрдүнҹү ушаға баха билмәјәҹәјәм. Амма аборт едәндән сонра ағыр бир ҝүнаһ ишләдијими һисс еләдим». Доғруданмы, Аллаһ онун етдији бу һәрәкәти һеч вахт бағышламајаҹаг?
МҮГӘДДӘС КИТАБДА НӘ ДЕЈИЛИР?
Иса пејғәмбәр демишди: «Мән салеһләри јох, ҝүнаһлылары төвбәјә чағырмаға ҝәлмишәм» (Лука 5:32). Бу сөзләрлә о, Аллаһын ҝүнаһ ишләдәнләрә олан мүнасибәтини ифадә етмишди. Әҝәр биз етдијимиз сәһвә ҝөрә һәгигәтән дә пешманыгса, төвбә едириксә вә Аллаһдан әфв диләјириксә, О һәтта ҹидди ҝүнаһларымызы да бағышлајаҹаг (Әшија 1:18). «Чилик-чилик олмуш, пешман үрәји рәдд етмәзсән, еј Аллаһ», — дејә Зәбур 51:17 ајәсиндә јазылыб.
Әҝәр ҝүнаһ ишләмиш шәхс тәвазөкарлыг ҝөстәриб Аллаһдан бағышланмағы диләјәрсә, Аллаһ-Таала онун һәм виҹданыны сакитләшдирәҹәк, һәм дә гәлб раһатлығы верәҹәк. Мүгәддәс Китабда дејилир: «Һеч нәјә ҝөрә нараһат олмајын. Һәр мәсәлә барәдә диләјинизи дуа вә јалварышла, шүкр едә-едә Аллаһа билдирин. Онда Аллаһын һәр бир ағылдан үстүн олан сүлһү үрәјинизи вә фикирләринизи... горујаҹаг» (Филиппилиләрә 4:6, 7) *. Рут Аллаһын Кәламыны мүталиә едәндән вә дуада үрәјини Аллаһа бошалдандан сонра дахилән сакитләшди. О өјрәнди ки, Аллаһ бағышлајан Аллаһдыр (Зәбур 130:4).
«[Аллаһ] бизимлә ҝүнаһларымыза ҝөрә рәфтар етмир, тәгсирләримизә ҝөрә пајымыза дүшән ҹәзаны вермир» (Зәбур 103:10).
^ абз. 8 Ананын вә ја ушағын сағламлығы илә бағлы тәһлүкәнин олаҹағы еһтимал едилирсә, бу, аборт етмәјә һагг вермир. Әҝәр доғуш заманы ушагла ана арасында сечим етмәк лазым ҝәләрсә, буна әр-арвад өзү гәрар вермәлидир. Амма бир чох инкишаф етмиш өлкәләрдә тибдә әлдә олунан наилијјәтләр сајәсиндә бу кими вәзијјәтләр надир һалларда баш верир.
^ абз. 12 Ад шәртидир.
^ абз. 14 Өлүләрин дирилмәси һаггында үмид дә инсана тәсәлли верә биләр. «Ҝөзәтчи гүлләси» журналынын 2009-ҹу ил 15 апрел сајынын «Охуҹуларын суаллары» мәгаләсинә бахын. Орада ана бәтниндә өлән ушағын дирилмәсинин мүмкүнлүјүнә даир Мүгәддәс Китаб принсипләри арашдырылыр.
