Тәхминән 3500 ил бундан әввәл Јеһова Аллаһ Өз хидмәтчиләринә билдирмишди ки, хошбәхт олмаг үчүн нә етмәлидирләр. «Гаршыныза һәјатла өлүмү, хејир-дуа илә ләнәти гојдум. Һәјаты сечин ки, өзүнүз дә, өвладларыныз да сағ галасыныз» (Ганунун тәкрары 30:19).

Хошбәхт олмаг үчүн онлар дүзҝүн сечим етмәли идиләр. Бу ҝүн бизим дә гаршымызда бу ҹүр сечим дурур. Мүгәддәс Китабда изаһ олунур ки, хошбәхт ҝәләҹәјә неҹә наил ола биләрик: Аллаһымыз Јеһованы севмәклә, Онун сөзүнә гулаг асмагла (Ганунун тәкрары 30:20).

АЛЛАҺЫН КӘЛАМЫНЫ ӨЈРӘНИН. Јеһованы севмәк үчүн, илк нөвбәдә, Мүгәддәс Китабдан Онун һаггында өјрәнмәк лазымдыр. Онун һаггында өјрәндикҹә исә ҝөрәҹәксиниз ки, О, инсанлары севир, сизин јахшылығынызы истәјир. Аллаһ истәјир ки, сиз Она дуа едәсиниз, «чүнки О, гајғынызы чәкир» (1 Бутрус 5:7). Мүгәддәс Китабда вәд олунур ки, әҝәр сиз Аллаһ һагда өјрәнмәјә чалышсаныз, «О да сизә јахынлашаҹаг» (Јагуб 4:8).

ӨЈРӘНДИКЛӘРИНИЗӘ ӘМӘЛ ЕДИН. Аллаһын сөзүнә гулаг асмаг Онун Кәламындан өјрәндијиниз һикмәтли мәсләһәтләрә әмәл етмәк демәкдир. Бу мәсләһәтләрә әмәл етдикҹә һәр ишиниз аванд олаҹаг, һикмәтлә һәрәкәт едәҹәксиниз (Јушә 1:8).