1. Јеһованын халгы арасында һазырлыг руһунун олдуғу нәдән ҝөрүнүр?

 БУ ДҮНЈА сонуна јахынлашдығы үчүн ҝөрүләси чох ишимиз вар (Мәт. 24:14; Лука 10:2; 1 Бут. 5:2). Һамымыз Јеһоваја мүмкүн гәдәр чох хидмәт етмәк истәјирик. Бир чох мәсиһи хидмәтини ҝенишләндирир. Кимиси өнҹүл олмағын, кимиси Бејтелдә вә ја тикинти лајиһәләриндә хидмәт етмәјин арзусундадыр. Чохлу сајда гардаш исә јығынҹаг хидмәтчиси вә ја ағсаггал олмаға ҹан атыр (1 Тим. 3:1, 8). Сөзсүз ки, Јеһова халгы арасында бу ҹүр һазырлыг руһуну ҝөрәндә чох севинир! (Зәб. 110:3; Әшј. 6:8).

2. Бәзи руһани мәгсәдләрә наил ола билмәјәндә һансы һиссләри кечиририк?

² Амма ола билсин, руһани мәгсәдләримизин бәзиләринә хејли вахт кечсә дә, наил ола билмәмишик. Бу да бизим әл-голумузу јанымыза сала биләр. Јахуд јашымыза вә ја башга сәбәбләрә ҝөрә бәзи руһани мәгсәдләр бизим үчүн әлчатмаздыр вә буна ҝөрә руһдан дүшә биләрик (Мәс. 13:12). Мелиса * адлы баҹы да Бејтелдә хидмәт етмәји вә ја Падшаһлыг Мүждәчиләри Мәктәбиндә охумағы чох истәјирди. Анҹаг о дејир: «Јашым чох олдуғуна ҝөрә бунлар мәним үчүн јалныз хәјалдыр. Буна ҝөрә бәзән мәјус олурам».

3. Бәзиләри мүәјјән мәсулијјәтләри алмаға јарарлы олмаг үчүн нә етмәлидир?

³ Елә мәсиһиләр дә вар ки, ҝәнҹ вә сағламдыр, амма онлар мүәјјән мәсулијјәтләрә јарарлы олмаг үчүн бәзи хүсусијјәтләрә јијәләнмәлидирләр. Ола билсин, онлар зәкалы, гәтијјәтли вә шөвглүдүрләр, амма иши дәгигликлә ҝөрмәји, сәбирли вә һөрмәтҹил олмағы өјрәнмәлидирләр. Әҝәр диггәтинизи лазыми хүсусијјәтләри јетишдирмәјә ҹәмләсәниз,  хидмәтлә бағлы арзуладығыныз мәгсәдләри ҝөзләмәдијиниз анда алаҹагсыныз. Ҝәлин Ник адлы гардашын һадисәсинә бахаг. Онун 20 јашы оланда јығынҹаг хидмәтчиси тәјин олунмадығына ҝөрә чох пис олмушду. О дејир: «Елә дүшүнүрдүм ки, јәгин, мәндә нәсә проблем вар». Амма Ник лазыми хүсусијјәтләрә јијәләнмәјә давам етди. Һәмчинин чалышырды ки, јығынҹагда вә тәблиғ ишиндә өһдәсинә дүшән иши јахшы јеринә јетирсин. Инди о, филиал комитәсинин үзвү кими хидмәт едир.

4. Бу мәгаләдә нә һагда данышаҹағыг?

⁴ Һансыса руһани мәгсәдә һәлә дә наил олмадығыныз үчүн руһдан дүшмүсүнүз? Әҝәр беләдирсә, онда нараһатчылығыныз барәдә Јеһоваја дуа един (Зәб. 37:5—7). Бундан әлавә, јеткин гардашлардан хидмәтинизи пүхтәләшдирмәклә бағлы мәсләһәт ала биләрсиниз. Сонра исә онларын вердији мәсләһәтә әмәл етмәјә чалышын. Әҝәр белә етсәниз, мәгсәдинизә наил ола биләҹәксиниз. Амма бајаг ады чәкилән Мелиса кими, бәзиләри үчүн арзуладыглары мәгсәдә чатмаг һал-һазырда мүмкүн дејил. Бәс белә һалда севинҹинизи неҹә горуја биләрсиниз? Бу суалын ҹавабыны тапмаг үчүн ҝәлин ҝөрәк 1) бизә нә севинҹ верә биләр, 2) севинҹимизи неҹә артыра биләрик вә 3) һансы мәгсәдләр севинҹимизә севинҹ гата биләр.

5. Севинҹ дујмаг үчүн диггәтимизи нәјә ҹәмләмәлијик? (Ваиз 6:9).

⁵ Ваиз 6:9 ајәсиндә изаһ олунур ки, бизә нә севинҹ ҝәтирә биләр. (Ајәни охујун.) Диггәтини ҝөзлә ҝөрдүјү шејләрә ҹәмләјән инсан саһиб олдуғу шејләри гијмәтләндирир, мәсәлән, о, һазыркы вәзијјәтиндән мәмнундур. Бунун әксинә олараг, хәјал далынҹа дүшән инсан, саһиб ола билмәјәҹәји шејләри арзулајыр. Бурадан һансы нәтиҹәни чыхарырыг? Севинҹ дујмаг үчүн биз диггәтимизи әлимиздә олан шејләрә ҹәмләмәлијик вә бизим үчүн реал олан шејләрә ҹан атмалыјыг.

6. Биз һансы мәсәл һагда данышаҹағыг вә бу мәсәлдән нә өјрәнәҹәјик?

⁶ Бәс, доғруданмы, саһиб олдуғумуз шејләрдән мәмнунлуг дујмаг мүмкүндүр? Бәзиләри фикирләшир ки, бу, мүмкүн дејил, чүнки инсан вахт кечдикҹә һәјатында јени-јени шејләр өјрәнмәк истәјир. Әслиндә, бу, мүмкүндүр. Биз саһиб олдуғумуз шејләрдән, сөзүн әсл мәнасында, севинҹ дуја биләрик. Неҹә? Бу суалын ҹавабыны тапмаг үчүн ҝәлин Исанын Мәтта 25:14—30 ајәләриндә чәкдији талант һагда мәсәлә бахаг. Бу мәсәлдән өјрәнәҹәјик ки, һал-һазыркы вәзијјәтимиздә севинҹ дујмаг вә севинҹимизи артырмаг неҹә мүмкүндүр.

7. Исанын талант һагда мәсәлини гысаҹа нәгл един.

⁷ Бу мәсәлдә бир адам сәфәрә чыхмаға һазырлашыр. Ҝетмәмишдән әввәл о, нөкәрләрини јанына чағырыр вә дөвријјәјә бурахмалары үчүн онлара талант * верир. О, нөкәрләринин баҹарығыны нәзәрә алараг, биринә беш, о бирисинә ики, диҝәринә бир талант верир. Биринҹи вә икинҹи нөкәр өз тапшырыгларыны лајигинҹә јеринә јетирир, үчүнҹү нөкәр исә һеч нә етмир, буна ҝөрә ағасы ону говур.

8. Мәсәлдәки биринҹи нөкәрин севинмәси үчүн һансы сәбәб вар иди?

⁸ Биринҹи нөкәр үчүн бөјүк шәрәф иди ки, ағасы она беш талант етибар едиб. Бу,  күллү мигдарда пул иди вә ағасынын она нә гәдәр ҝүвәндијини ҝөстәрирди. Бәс икинҹи нөкәр һагда нә демәк олар? Биринҹи нөкәр кими, она да беш талант верилмәдијинә ҝөрә о, руһдан дүшә биләрди. Бәс о нә етди?

9. Иса мәсәлдәки икинҹи нөкәр һагда нә демәмишди? (Мәтта 25:22, 23).

⁹ Мәтта 25:22, 23 ајәләрини охујун. Исанын мәсәлиндә дејилмир ки, икинҹи нөкәр ҹәми ики талант алдығына ҝөрә пис олду вә ја инҹиди. Нә дә јазылмајыб ки, о, ҝилејләнәрәк белә десин: «Елә бу? Мән буна лајигәм? Беш талант алан нөкәрдән нәјим әскикдир? Аға мәнә лазымынҹа дәјәр вермирсә, мән дә бу ики таланты апарыб басдыраҹағам, ҝедиб өз ишимлә мәшғул олаҹағам».

10. Икинҹи нөкәр она һәвалә олунмуш талантларла нә етди?

¹⁰ Биринҹи нөкәр кими, икинҹи нөкәр дә она һәвалә олунмуш мәсулијјәтә чох ҹидди јанашды вә ағасы үчүн ҹанла-башла ишләди. Нәтиҹәдә, ағасынын она вердији таланты икигат артырды. О, зәһмәтинә вә баҹарығына ҝөрә мүкафат алды. Ағасы чох севинди, үстәлик, она даһа чох шеј һәвалә етди!

11. Севинҹимизи неҹә артыра биләрик?

¹¹ Ејнилә биз дә Јеһоваја хидмәтдә алдығымыз истәнилән тапшырығы ҹанла-башла ҝөрмәклә севинҹимизи артыра биләрик. «Бүтүн вахтыны»зы тәблиғ ишинә һәср един вә јығынҹагла бағлы ишләрдә там иштирак един (Һәв. 18:5; Ибр. 10:24, 25). Јығынҹаға јахшы һазырлашын ки, руһландырыҹы шәрһләр  верә биләсиниз. Һәфтәарасы ҝөрүшләрдә сизә верилән истәнилән шаҝирд тапшырығына ҹидди јанашын. Әҝәр јығынҹагда сизә һансыса иши тапшырыбларса, пунктуал олун вә етибары доғрулдун. Сизә һәвалә олунан һеч бир ишә вахт иткиси кими бахмајын. Даима өз ишиниздә пүхтәләшмәјә чалышын (Мәс. 22:29). Руһани ишләрә вә тапшырыгларыныза нә гәдәр чох ҹан јандырсаныз, бир о гәдәр чох инкишаф едәҹәксиниз вә севинҹиниз дә артаҹаг (Гал. 6:4) Һәмчинин арзуладығыныз тәјинаты башгасы аланда онунла бирҝә севинә биләҹәксиниз (Ром. 12:15; Гал. 5:26).

12. Ики Јеһованын Шаһиди севинҹләрини артырмаг үчүн нә етди?

¹² Ҝәлин бир даһа Мелисаны хатырлајаг. Гејд етдијимиз кими, о, ја Бејтелдә хидмәт етмәк, ја да Падшаһлыг Мүждәчиләри Мәктәбиндә охумаг истәјирди, амма бу онун үчүн мүмкүн дејилди. Ҝөрүн о нә дејир: «Чалышырам, өнҹүл кими әлимдән ҝәләни едим вә тәблиғин бүтүн нөвләриндә иштирак едим. Бу мәнә бөјүк севинҹ бәхш едир». Бәс Ник һагда нә демәк олар? О, јығынҹаг хидмәтчиси тәјин олунмајанда мәјус олмушду. Она мәјуслуғун өһдәсиндән ҝәлмәјә нә көмәк етди? О дејир: «Диггәтими әлимдә олан имканлара — тәблиғ ишиндә иштирак етмәјә вә јығынҹагда долғун шәрһләр вермәјә ҹәмләдим. Һәмчинин Бејтел хидмәти үчүн әризә бланкы долдурдум вә нөвбәти ил Бејтелә дәвәт олундум».

13. Индики тәјинатынызда ҹанла-башла чалышмағын бәһрәси нә олаҹаг? (Ваиз 2:24).

¹³ Бәс индики тәјинатынызда ҹанла-башла чалышсаныз, ҝәләҹәкдә әлавә мәсулијјәтләр алаҹагсыныз? Ола билсин, һә. Никин вәзијјәтиндә белә олду. Амма Мелиса кими, сиз дә әлавә мәсулијјәтләр алмасаныз да, јенә дә севинҹиниз артаҹаг вә бөјүк мәмнунлуг дујаҹагсыныз. (Ваиз 2:24 ајәсини охујун.) Бундан әлавә, Ағамыз Иса Мәсиһи разы салдығыныз үчүн хошбәхт олаҹагсыныз.

14. Руһани мәгсәдләримизлә бағлы нәји унутмамалыјыг?

¹⁴ Диггәтимизи һал-һазыркы тәјинатымыза ҹәмләмәк о демәкдирми ки, артыг хидмәтимизи ҝенишләндирмәјә ҹан атмамалыјыг? Хејр, биз јенә дә гаршымыза руһани мәгсәдләр гоја биләрик вә гојмалыјыг да. Бу мәгсәдләр бизә хидмәтдә даһа да сәриштәли олмағымыза вә баҹы-гардашлар үчүн даһа чох јарарлы олмағымыза көмәк едәҹәк. Әҝәр һикмәтли вә тәвазөкар олуб гаршымыза реал мәгсәдләр гојсаг вә өзүмүзү јох, башгаларына хидмәт етмәји дүшүнсәк, мәгсәдләримизә чатаҹағыг вә севинҹ дујаҹағыг (Мәс. 11:2; Һәв. 20:35).

15. Һансы мәгсәдләр севинҹинизи артыра биләр?

¹⁵ Гаршыныза һансы мәгсәдләри гоја биләрсиниз? Сизин үчүн һансы мәгсәдләрин реал олдуғуну мүәјјән етмәк үчүн дуада Јеһовадан көмәк истәјин (Мәс. 16:3; Јаг. 1:5). Бу мәгаләнин  биринҹи абзасында јазылан мәгсәдләрә ҹан ата биләрсиниз? Мәсәлән, көмәкчи өнҹүл вә ја өнҹүл олмағы, Бејтелдә хидмәт етмәји вә ја тикинти лајиһәләриндә иштирак етмәји гаршыныза мәгсәд гоја биләрсиниз? Јахуд мүждәни јајмаг вә ја башга әразидә хидмәт етмәк үчүн јени дил өјрәнә биләрсиниз. Бу мәгсәдләр барәдә даһа әтрафлы мәлумат алмаг үчүн «Аллаһын ирадәсини јеринә јетирән тәшкилат» китабынын 10-ҹу фәслини охујун, јахуд јығынҹағынызын ағсаггаллары илә бу  барәдә данышын *. Мәгсәдинизә доғру ирәлиләдикҹә, инкишафыныз ҝөз габағында олаҹаг вә севинҹиниз артаҹаг.

16. Әҝәр һансыса мәгсәдләрә наил олмағыныз һал-һазырда мүмкүн дејилсә, нә едә биләрсиниз?

¹⁶ Бәс бу мәгаләдә данышдығымыз мәгсәдләр һал-һазырда сизин үчүн әлчатан дејилсә, онда неҹә? Гаршыныза сизин үчүн мүмкүн олан мәгсәдләр гојун. Ҝәлин ҝөрәк бу нә кими мәгсәдләр ола биләр.

17. 1 Тимутијә 4:13, 15 ајәләринә әсасән, гардаш јахшы мүәллим олмаг үчүн нә едә биләр?

¹⁷ 1 Тимутијә 4:13, 15 ајәләрини охујун. Әҝәр сиз вәфтиз олунмуш гардашсынызса, натиглик вә мүәллимлик габилијјәтинизи пүхтәләшдирә биләрсиниз. Өзүнүзү охумаға, натиглик вә мүәллимлик габилијјәтинизи јахшылашдырмаға һәср етсәниз, сизи динләјән инсанлара даһа бөјүк фајданыз олаҹаг. «Өзүнү охумаға вә тәлим вермәјә һәср ет» брошүрүндәки бүтүн дәрсләри охумағы вә тәтбиг етмәји гаршыныза мәгсәд гојун. Һәр дәфә бир дәрси арашдырын, евдә јахшы-јахшы мәшг един вә чыхышыныз заманы өјрәндикләринизи әкс етдирмәјә чалышын. Мәсләһәт вермәјә мәсул гардашдан * вә ја «ҹидд-ҹәһдлә данышан вә өјрәдән» башга ағсаггалдан мәсләһәт алын (1 Тим. 5:17). Мәгсәдиниз тәкҹә дәрсләрдәки мәсләһәтләрә әмәл етмәк јох, һәмчинин диндашларынызын иманыны мөһкәмләндирмәк вә онлары һәрәкәтә тәшвиг етмәк олсун. Бу һәм сизин севинҹинизи артыраҹаг, һәм дә онларын.

18. Тәблиғ хидмәтиндә гаршымыза гојдуғумуз мәгсәдләрә чатмаға нә көмәк едә биләр?

 ¹⁸ Һәр биримизин тәблиғ етмәк вә шаҝирд һазырламаг кими тәјинаты вар (Мәт. 28:19, 20; Ром. 10:14). Бу мүһүм ишдә даһа сәриштәли олмаг истәјәрдиниз? «Тәлим» брошүрүнү охујун вә орадан өјрәндикләринизә әмәл етмәјә көмәк едәҹәк конкрет мәгсәдләр гојун. Һәмчинин «Мәсиһи һәјаты вә ибадәти. Иш дәфтәри» вәрәгәсиндән вә һәфтәарасы ҝөрүшләрдә ҝөстәрилән сөһбәт планына аид видеолардан фајдалы фикирләр тапа биләрсиниз. Сизин әразиниздә нәјин даһа јахшы ишә јарадығыны билмәк үчүн мүхтәлиф мәсләһәтләри сынагдан кечирин. Бу мәсләһәтләрә әмәл етдикҹә даһа сәриштәли тәблиғчи олаҹагсыныз вә бундан бөјүк севинҹ дујаҹагсыныз (2 Тим. 4:5).

19. Мәсиһи хүсусијјәтләрини неҹә инкишаф етдирә биләрсиниз?

¹⁹ Һәмчинин унутмајын ки, гаршыныза гоја биләҹәјиниз ән ваҹиб мәгсәдләрдән бири дә мәсиһи хүсусијјәтләрини јетишдирмәкдир (Гал. 5:22, 23; Кол. 3:12; 2 Бут. 1:5—8). Бу мәгсәдә неҹә чата биләрсиниз? Тутаг ки, өзүнүздә мөһкәм иман јетишдирмәк истәјирсиниз. Нәшрләримиздән иманымызы мөһкәмләндирмәк үчүн мәсләһәтләрин јазылдығы мәгаләләр охуја биләрсиниз. Һәмчинин JW телевизијасынын ајлыг програмында олан һиссәләрдән фајдалана биләрсиниз. Орада мүхтәлиф сынаглар гаршысында мөһтәшәм иман тәзаһүр етдирән баҹы-гардашларын нүмунәси јер алыр. Сонра онларын иманындан неҹә өрнәк ала биләҹәјиниз барәдә дүшүнүн.

20. Севинҹимизи артырмаг вә мәјуслуғумузу азалтмаг үчүн нә едә биләрик?

²⁰ Шүбһәсиз, һәр биримиз истәјәрдик ки, һал-һазырда Јеһованын јолунда даһа чох иш ҝөрәк. Бизим јени дүнјада Она там шәкилдә хидмәт етмәк имканымыз олаҹаг. О вахта гәдәр исә инди ҝөрә биләҹәјимиз ишләрә ҹан јандырсаг, севинҹимиз артаҹаг, мәјуслуғумуз азалаҹаг. Ән әсасы исә хошбәхт Аллаһымыз Јеһованы шәрәфләндирәҹәјик (1 Тим. 1:11). Буна ҝөрә дә ҝәлин диггәтимизи әлимиздәки мәсулијјәтләрә ҹәмләјәк вә бундан севинҹ дујаг!