1, 2. Јени дүнја ҝәләнә гәдәр нә етмәлијик?

 ТЕЗЛИКЛӘ бу шәр дүнја олмајаҹаг, биз салеһлијин һөкм сүрәҹәји јени дүнјада јашајаҹағыг (2 Бут. 3:13). Бу вәдинә ҝөрә Јеһоваја нә гәдәр шүкүр етсәк аздыр. Дүздүр, биз билмирик, јени дүнја нә вахт ҝәләҹәк. Амма дүнјада баш верән һадисәләр ачыг-ајдын ҝөстәрир ки, о ҝүнә чох аз галыб (Мәт. 24:32—34, 36; Һәв. 1:7).

² Һәмин ҝүнә гәдәр исә иманымызы даима мөһкәмләндирмәлијик. Чүнки һәгигәтә тәзә ҝәләнләрин дә, илләрдир һәгигәтдә оланларын да иманы ҝетдикҹә зәифләјә биләр. Һәвари Булус зәиф иманы «бизә әнҝәл төрәдән ҝүнаһ» адландырмышды, јәни бу, елә бир ҝүнаһдыр ки, асанлыгла онун торуна дүшә биләрик (Ибр. 12:1). Иманымызын зәифләмәмәси үчүн јени дүнјанын јахын олдуғуну ҝөстәрән сүбутлары һәмишә арашдырмалыјыг (Ибр. 11:1).

3. Бу мәгаләдә нә һагда данышаҹағыг?

³ Бу мәгаләдә биз Јеһованын ҝәләҹәклә бағлы вәдинә иманымызы мөһкәмләндирмәјин үч јолундан данышаҹағыг. Ҝөрәҹәјимиз кими, 1) фидјәнин дәјәри барәдә фикирләшмәлијик, 2) Јеһованын гүдрәти барәдә дүшүнмәлијик вә 3) ибадәтимизлә бағлы ишләрә вахт ајырмалыјыг. Даһа сонра мүзакирә едәҹәјик ки, Јеһованын Һәбгуг пејғәмбәрә дедији сөзләр бизим иманымызы неҹә мөһкәмләндирир. Амма әввәлҹә ҝәлин ҝөрәк һансы вәзијјәтләрдә јени дүнја вәдинә иманымыз сынана биләр.

 ҺАНСЫ ВӘЗИЈЈӘТЛӘРДӘ МӨҺКӘМ ИМАН ЛАЗЫМДЫР?

4. Һансы гәрарлары верәркән ҝүҹлү иман лазымдыр?

⁴ Һәр ҝүн ирили-хырдалы гәрарлар веририк. Бу гәрарларымыз дост, әјләнҹә, тәһсил, никаһ, ушагларымыз вә дүнјәви ишимизлә бағлы олур. Гәрарлар верәркән бизә мөһкәм иман лазымдыр. Бу суаллар үзәриндә дүшүнүн: «Әминәм ки, бу дүнја ҝәлди-ҝедәрдир вә јени дүнјанын бир аддымлығындајам? Вердијим гәрарлардан бу ајдын ҝөрүнүр? Јохса “өлүм һәр шејин сонудур” дејиб, бу дүнјадан икиәлли јапышан инсанлар кими гәрарлар верирәм?» (Мәт. 6:19, 20; Лука 12:16—21). Әҝәр јени дүнјанын овуҹумузун ичиндә олдуғуна иманымызы мөһкәмләндирсәк, онда даһа јахшы гәрарлар верәҹәјик.

5, 6. Нәјә ҝөрә сынаглар заманы бизә ҝүҹлү иман лазымдыр? Нүмунә чәкин.

⁵ Һәмчинин сынаглар заманы да бизә ҝүҹлү иман лазымдыр. Ола билсин, тәгибләрлә үзләшәк, хроники хәстәлијимиз вә ја бизи руһдан салан башга чәтинлијимиз олсун. Әввәл-әввәл бизә елә ҝәлә биләр ки, үзләшдијимиз сынаға таб ҝәтирә биләҹәјик. Амма бу ҹүр проблемләр адәтән узун мүддәт давам едир. Буна ҝөрә дә иманымыз ҝүҹлү олмалыдыр ки, дөзүм ҝөстәрәк вә Јеһоваја хидмәтдә севинҹимизи итирмәјәк (Ром. 12:12; 1 Бут. 1:6, 7).

⁶ Үзләшдијимиз сынаг битмәдикҹә бизә елә ҝәлә биләр ки, Јеһованын вәд етдији јени дүнја тез бир заманда ҝәлмәјәҹәк. Бу, о демәкдир ки, иманымыз зәифдир? Јох. Ҝәлин бир нүмунәјә бахаг. Сәрт гыш мөвсүмү давам етдикҹә адамда елә фикир јараныр ки, јаја һәлә чох вар. Амма билирик ки, јај ҝәләҹәк. Ејнилә руһдан дүшәндә елә фикирләшә биләрик ки, јени дүнјанын ҝәлмәјинә һәлә чох вар. Бунунла белә, мөһкәм иман сајәсиндә билирик ки, јени дүнја ҝәләҹәк, чүнки буну Јеһова вәд едиб (Зәб. 94:3, 14, 15; Ибр. 6:17—19). Бу әминлик көмәк едир ки, Јеһоваја ибадәти һәр шејдән үстүн тутаг.

7. Һансы дүшүнҹәдән өзүмүзү ҝөзләмәлијик?

⁷ Һәмчинин тәблиғ етмәк үчүн дә бизә ҝүҹлү иман лазымдыр. Тәблиғ етдијимиз инсанларын чохуна Аллаһын јени дүнја илә бағлы вәди инандырыҹы ҝәлмир (Мәт. 24:14; Һизг. 33:32). Еһтијатлы олмалыјыг ки, онлар кими биз дә Јеһованын вәдләринә шүбһә илә јанашмајаг. Бунун үчүн иманымызы даима мөһкәм сахламалыјыг. Ҝәлин буну етмәјин үч јолуна бахаг.

ФИДЈӘ БАРӘДӘ ФИКИРЛӘШИН

8, 9. Фидјә барәдә фикирләшмәк иманымызы неҹә мөһкәмләндирир?

⁸ Иманымызы артырмағын бир јолу фидјә барәдә фикирләшмәкдир. Фидјә Аллаһын вәдләринин ҝерчәкләшәҹәјинә бир зәманәтдир. Фидјәнин нәјә ҝөрә верилдији вә бунун Јеһова үчүн нә гәдәр бөјүк гурбан олдуғу һагда дүшүнәндә иманымыз мөһкәмләнир. Даһа да әмин олуруг ки, Аллаһын вәди ҝерчәкләшәҹәк вә биз ҝөзәл дүнјада сонсуз өмүр сүрәҹәјик. Нәјә ҝөрә белә дејә биләрик?

⁹ Бир дүшүнүн, фидјәни өдәмәк Јеһоваја нәјин баһасына баша ҝәлиб? Јеһова Она әзиз олан илк Оғлуну, ән јахын әмәкдашыны ҝөјдән јер үзүнә ҝөндәрди вә о, камил инсан кими доғулду. Јер үзүндә оларкән Исанын үзләшмәдији чәтинлик галмады. Сонра она ишҝәнҹә верилди вә о, әзаб чәкәрәк өлдү. Ҝөрүн Јеһова бизим үчүн неҹә бөјүк дәјәр өдәјиб! Јеһова нәјә ҝөрә белә едиб? Бизим садәҹә даһа јахшы, амма гыса өмрүмүз  олсун дејә? Хејр. Мәһәббәтли Аллаһымыз әзиз Оғлунун бундан өтрү әзаб чәкиб өлмәсинә изин вермәзди (Јәһ. 3:16; 1 Бут. 1:18, 19). Демәли, Јеһова бу ҹүр бөјүк дәјәри бизим јени дүнјада әбәди јашамағымыз үчүн өдәјиб.

ЈЕҺОВАНЫН ГҮДРӘТИ БАРӘДӘ ДҮШҮНҮН

10. Ефеслиләрә 3:20 ајәсинә әсасән, Јеһова нәјә гадирдир?

¹⁰ Иманымызы мөһкәмләндирмәјин икинҹи јолу Јеһованын гүдрәти барәдә дүшүнмәкдир. Јеһова вәд етдији һәр шеји јеринә јетирмәјә гадирдир. Дүздүр, инсанлар дүшүнүр ки, јени дүнјада әбәди һәјатын олмасы мүмкүнсүздүр. Амма Јеһова инсанлар үчүн мүмкүнсүз ҝөрүнән о гәдәр вәдләр вериб ки! Бу, белә дә олмалыдыр. Ахы О, Гадир Аллаһдыр (Әјј. 42:2; Марк 10:27). Мәҝәр О, ади вәдләр верәр? (Ефеслиләрә 3:20 ајәсини охујун.)

11. Јеһова һансы ағласығмаз вәдләр вериб? (« Јеринә јетмиш бәзи мөһтәшәм вәдләр» адлы чәрчивәјә бахын.)

¹¹ Ҝәлин кечмишдә баш вермиш бир-ики һадисәјә нәзәр салаг. Јеһова халгына мүмкүнсүз кими ҝөрүнән вәдләр вермишди. Мәсәлән, Ибраһим пејғәмбәрлә Сараја демишди ки, гоҹа јашларында оғул саһиби олаҹаглар (Јар. 17:15—17). Һәмчинин вәд етмишди ки, онун нәсли Кәнан дијарыны мирас алаҹаг. Ибраһимин нәсли, јәни исраиллиләр узун илләр Мисирдә гул олдуглары үчүн Јеһованын бу вәдинин јеринә јетәҹәји ағласығмаз ҝөрүнә биләрди. Амма бу вәд јеринә јетди. Даһа сонра Јеһова гоҹа јашларында олан Илсәбаја демишди ки, ушағы олаҹаг. Һәмчинин Јеһова бакирә олан Мәрјәмә билдирмишди ки, Онун Оғлуну дүнјаја ҝәтирәҹәк. Бунунла да Јеһованын мин илләр өнҹә Әдән бағында вердији сөз һәјата кечәҹәк. Јеһованын дедији кими дә олду (Јар. 3:15).

12. Јушә 23:14 вә Әшија 55:10, 11 ајәләри бизи Јеһованын гүдрәти илә бағлы нәјә әмин едир?

¹² Јеһованын вердији вә јеринә јетирдији вәдләр барәдә дүшүнәндә иманымыз артыр. Әмин олуруг ки, О, јени дүнја јаратмаға гадирдир. (Јушә 23:14; Әшија 55:10, 11 ајәләрини охујун.) Бунун сајәсиндә биз һәмчинин башгаларына да изаһ едә билирик ки, јени дүнјанын олаҹағы хүлја дејил. «Јени ҝөј вә јени јер» һагда вердији вәдлә бағлы Јеһова шәхсән белә дејиб: «Бу сөзләр доғру вә етибарлыдыр» (Вәһј 21:1, 5).

ДАИМА ИБАДӘТИНИЗЛӘ БАҒЛЫ ИШЛӘРЛӘ МӘШҒУЛ ОЛУН

13. Јығынҹаг ҝөрүшләри иманымызы неҹә мөһкәмләндирир? Изаһ един.

¹³ Иманымызы мөһкәмләндирмәјин үчүнҹү јолу ибадәтимизлә бағлы ишләрә вахт ајырмагдыр. Мәсәлән, јығынҹаг ҝөрүшләринин бизә фајдасы барәдә дүшүнәк. Узун илләр тамвахтлы хидмәтин мүхтәлиф нөвләриндә иштирак етмиш Анна баҹы b дејир: «Ҝөрүшләр мәнә иманымы мөһкәм сахламаға көмәк едир. Һәтта натигин тәлим вермәк габилијјәти јахшы олмаса да, јахуд о, јени бир фикир демәсә дә, Мүгәддәс Китабы даһа јахшы баша дүшмәјимә көмәк едән вә иманымы ҝүҹләндирән һансыса фикирләр олур». Һәмчинин баҹы-гардашларын шәрһләринин дә иманымызы мөһкәмләндирдији данылмаздыр (Ром. 1:11, 12; 10:17).

14. Тәблиғ иши иманымызы неҹә мөһкәмләндирир?

¹⁴ Тәблиғ иши дә иманымызы мөһкәмләндирир (Ибр. 10:23). Барбара адлы баҹы  70 илдән чохдур ки, Јеһоваја хидмәт едир. О дејир: «Һәр дәфә фикир верирәм ки, тәблиғ иши инсанын иманыны артырыр. Башгаларына Јеһованын ҝөзәл вәдләри барәдә нә гәдәр чох данышырамса, иманым бир о гәдәр ҹанлы вә мөһкәм олур».

15. Фәрди мүталиә иманынызы неҹә мөһкәмләндирир? (Һәмчинин шәкилләрә бахын.)

¹⁵ Һәмчинин фәрди мүталиә дә иманымызы мөһкәмләндирир. Мүталиә ҹәдвәли тәртиб етмәјин Сјузан адлы баҹыја бөјүк көмәји дәјиб. О дејир: «Мән базар ҝүнү нөвбәти һәфтәнин “Ҝөзәтчи гүлләси” мәгаләсинә һазырлашырам. Базар ертәси вә чәршәнбә ахшамы исә һәфтәичи ҝөрүшә һазырлашырам. О бири ҝүнләр дә башга шејләри мүталиә едирәм». Бу ҹәдвәлинә һәмишә риајәт етдији үчүн Сјузанын иманы ҝетдикҹә артыр. Узун илләрдир баш идарәдә хидмәт едән Ајрин баҹыја исә иманыны мөһкәмләндирмәјә Мүгәддәс Китаб пејғәмбәрликләрини арашдырмаг көмәк едир. О дејир: «Адам ҝөрәндә ки, пејғәмбәрликләр неҹә хырдалығына кими јеринә јетиб, мәәттәл галыр» c.

«МҮТЛӘГ ҜЕРЧӘКЛӘШӘҸӘК»

16. Јеһованын Һәбгуг пејғәмбәрә дедији сөзләрин бизә дә аид олдуғуну һарадан билирик? (Ибраниләрә 10:36, 37).

¹⁶ Јеһованын хидмәтчиләринин бәзиләри Шејтан дүнјасынын сонунун ҝәлмәсини узун илләрдир ҝөзләјир. Адама елә ҝәлә биләр ки, Јеһованын вәди ҝеҹикир. Јеһова хидмәтчиләринин бу ҹүр һиссләр кечирдијини билир. Одур ки, Һәбгуг пејғәмбәрә демишди: «Вахты чатанда бу вәһј ҝерчәкләшәҹәк, о, иҹрасына тәләсир, јалан чыхмајаҹаг. Ҝеҹикән кими ҝөрүнсә белә, ону ҝөзлә, чүнки мүтләг ҝерчәкләшәҹәк. Ҝеҹикмәјәҹәк!» (Һәб. 2:3). Бәс бу сөзләр тәкҹә Һәбгуг пејғәмбәрә  аид иди? Јохса бизим үчүн дә һансыса мәнаны кәсб едир? Һәвари Булус Јеһованын бујруғу илә бу сөзләри јени дүнјанын интизарында олан мәсиһиләрә аид етмишди. (Ибраниләрә 10:36, 37 ајәләрини охујун.) Бәли, тамамилә әмин ола биләрик ки, гуртулушумуз ҝеҹикирмиш кими ҝөрүнсә дә, «мүтләг ҝерчәкләшәҹәк. Ҝеҹикмәјәҹәк!»

17. Бир баҹы Јеһованын Һәбгуг пејғәмбәрә вердији мәсләһәтә неҹә әмәл едиб?

¹⁷ Бәли, Јеһова хидмәтчиләринә мәсләһәт ҝөрүр ки, Онун ҝүнүнү ҝөзләсинләр. Онун чох хидмәтчиси бу мәсләһәтә әмәл едир. Һәтта бәзиләри онилликләрдир ҝөзләјир. Мәсәлән, Луиза адлы бир баҹы Јеһоваја 1939-ҹу илдән хидмәт едир. О дејир: «О вахтлар елә билирдим ки, мән мәктәби гуртармамыш Армаҝеддон ҝәләҹәк. Амма ҝәлмәди. Бу илләр әрзиндә мәнә мөмин инсанларын һәјаты барәдә охумағын бөјүк көмәји дәјиб. Мәсәлән, Нуһ, Ибраһим, Јусиф вә башгалары Јеһованын вәд етдији мүкафаты алана гәдәр хејли вахт ҝөзләмишдиләр. Һәмин ҝүнү интизарла ҝөзләмәк һәм мәнә, һәм дә диҝәр баҹы-гардашлара көмәк едиб ки, јени дүнјанын јахын олдуғуна әминлијимизи итирмәјәк». Јеһованын чох хидмәтчиси бу сөзләрә шәрикдир.

18. Хилгәти мүшаһидә етмәк јени дүнјанын ҝәләҹәјинә иманымызы неҹә мөһкәмләндирир?

¹⁸ Дүздүр, јени дүнја һәлә мөвҹуд дејил, амма мөвҹуд олан башга шејләр вар. Бу, улдузлар, ағаҹлар, һејванлар вә инсанлардыр. Һеч биримиз бу шејләрин ҝерчәк олдуғуна шүбһә етмирик, һалбуки бир заманлар онлар јох иди. Јеһова јарадыб дејә бу ҝүн онлар вар (Јар. 1:1, 26, 27). Аллаһымыз һәмчинин јени дүнја гурмаг нијјәтиндәдир вә бу нијјәтини дә һәјата кечирәҹәк. Јени дүнјада инсанларын мүкәммәл сағламлығы олаҹаг вә әбәдијјән јашајаҹаглар. Јеһова бунун үчүн вахт тәјин едиб. Һәмин вахт јени дүнја әтрафымыздакы хилгәт гәдәр ҝерчәк олаҹаг (Әшј. 65:17; Вәһј 21:3, 4).

19. Иманынызы неҹә мөһкәмләндирә биләрсиниз?

¹⁹ О вахта гәдәр исә иманынызы мөһкәмләндирмәк үчүн һәр фүрсәтдән истифадә един. Фидјәјә миннәтдарлығынызы артырын. Јеһованын гүдрәти барәдә дүшүнүн. Даима ибадәтлә бағлы ишләрлә мәшғул олун. Белә етсәниз, «вәдләри иман вә сәбирлә мирас аланлар»ын арасында олаҹагсыныз! (Ибр. 6:11, 12; Ром. 5:5).