1. Јығынҹагларда нәјә ҝөрә шәрһләр веририк?

 БИЗ јығынҹаға нијә ҝәлирик? Әввәла, Јеһованы уҹалтмаг үчүн (Зәб. 26:12; 111:1). Һәмчинин бу чәтин дөврдә бир-биримизи мөһкәмләндирмәк үчүн (1 Салон. 5:11). Әл галдырыб шәрһ вермәклә һәр ики мәгсәдә чатмыш олуруг.

2. Јығынҹагда нә вахт шәрһ верә биләрик?

² Бизим һәр һәфтә јығынҹагларда шәрһ вермәк имканымыз олур. Мәсәлән, һәфтәсону «Ҝөзәтчи гүлләси»нин мүзакирәсиндә. Һәфтәичи ҝөрүшләрдә исә «Һикмәт хәзинәсиндән инҹиләр», «Мүгәддәс Китаб дәрси» вә мүзакирә үчүн олан диҝәр бәндләрдә шәрһ верә биләрик.

3. Шәрһ вермәклә бағлы һансы чәтинлијимиз ола биләр? Ибраниләрә 10:24, 25 ајәләри бу саһәдә бизә неҹә көмәк едә биләр?

³ Һәр биримиз Јеһованы уҹалтмаг вә диндашларымызы мөһкәмләндирмәк истәјирик. Амма бәзән шәрһ вермәк чәтин олур. Һәјәҹанландығымыз үчүн шәрһ верә билмирик, јахуд шәрһ вермәји чох истәјирик, амма әлимизи галдыранда бәзән гардашлар бизә сөз вермир. Бәс бу чәтинликләрин өһдәсиндән неҹә ҝәлә биләрик? Һәвари Булусун ибраниләрә јаздығы мәктубда бу суала ҹаваб верилир. Һәмин мәктубда о, бирҝә јығышмағын ваҹиблијини вурғулајыр вә дејир ки, әсас мәгсәдимиз бир-биримизи руһландырмаг олмалыдыр. (Ибраниләрә 10:24, 25 ајәләрини охујун.) Әҝәр јадда сахласаг ки, садә шәрһләримизлә дә бир-биримизи руһландыра биләрик, онда шәрһ вермәкдән чәкинмәјәҹәјик. Диҝәр  тәрәфдән дә, истәдијимиз гәдәр шәрһ верә билмәсәк дә, севинәҹәјик ки, башгалары даһа чох шәрһ верә билди (1 Бут. 3:8).

4. Бу мәгаләдә һансы үч мәгамдан данышылаҹаг?

⁴ Адәтән балаҹа јығынҹагларда шәрһ верәнләрин сајы аз олур. Бөјүк јығынҹагларда исә әксинә, чох адам әл галдырыр. Бу мәгаләдә өјрәнәҹәјик ки, һәр ики һалда бир-биримизи неҹә руһландыра биләрик. Сонда исә өјрәнәҹәјик ки, шәрһләримизин руһландырыҹы олмасы үчүн нә едә биләрик.

5. Әҝәр ҝөрүшдә иштирак едәнләрин сајы аздырса, бир-биримизи неҹә руһландыра биләрик?

⁵ Балаҹа јығынҹагда вә ја групда шәрһ верәнләрин сајы елә дә чох олмур. Һәтта бәзән ҝөрүшү апаран гардаш ҝөзләјир ки, кимсә әл галдырсын. Бу заман адама елә ҝәлә биләр ки, ҝөрүш гуртармаг билмир. Белә һалда чәтин ки кимсә ҝөрүшдән руһлансын. Бәс сиз өз тәрәфиниздән нә едә биләрсиниз? Чалышын тез-тез әл галдырасыныз. Онда башгалары да сизә бахыб шәрһ вермәјә һәвәсләнәҹәк.

6, 7. Шәрһ верәркән һәјәҹанымызы неҹә азалда биләрик?

⁶ Шәрһ вермәјин ады ҝәләндә һәјәҹан сизи бүрүјүр? Бу һисс чохларында олур. Амма баҹы-гардашлары руһландырмаг наминә, бәлкә, һәјәҹанынызы азалтмаг үчүн һансыса јоллар тапасыныз? Буну неҹә етмәк олар?

⁷ «Ҝөзәтчи гүлләси»нин көһнә сајларындан ҝөзәл мәсләһәтләр тапа биләрсиниз b. Мәсәлән, јахшы һазырлашын (Мәс. 21:5). Мөвзуја јахшы һазырлашанда шәрһ вермәк инсана даһа асан олур. Һәмчинин гыса шәрһләр верин (Мәс. 15:23; 17:27). Гыса шәрһ верәндә инсан о гәдәр дә һәјәҹанланмыр. Баҹы-гардашлар үчүн гыса, мәсәлән, бир-ики ҹүмләдән ибарәт олан шәрһләри баша дүшмәк даһа асан олур, нәинки узун-узады, өзүнә чохлу фикир дахил едән шәрһләри. Өз сөзләринизлә гыса шәрһләр версәниз, ҝөстәрәҹәксиниз ки, јахшы һазырлашмысыныз вә мөвзу барәдә анлајышыныз вар.

8. Әлиниздән ҝәләни етдијинизи ҝөрәндә Јеһова һансы һиссләри кечирир?

⁸ Јухарыда верилән мәсләһәтләрә әмәл етсәниз дә, ола билсин, јенә дә стрес кечирирсиниз, бир-ики дәфәдән артыг шәрһ верә билмирсиниз. Бу заман әмин ола биләрсиниз ки, Јеһова әлиниздән ҝәләни етдијинизи ҝөрүр вә гијмәтләндирир (Лука 21:1—4). Әлиниздән ҝәләни етмәк ҝүҹүнүз чатмајан шеји етмәк демәк дејил (Филип. 4:5). Нә едә биләҹәјинизи мүәјјән един, ону етмәк үчүн мәгсәд гојун вә Јеһоваја дуа един ки, сизә һәјәҹанынызы боғмаға көмәк етсин. Кимиси үчүн илк мәгсәд бир гыса шәрһ вермәк ола биләр.

9. Бөјүк јығынҹагларда һансы чәтинлик олур?

⁹ Әҝәр јығынҹағынызда тәблиғчиләрин сајы чохдурса, сизин дә башга чәтинлијиниз ола биләр. Ола билсин, о гәдәр баҹы-гардаш әл галдырыр ки, сизә тәк-түк сөз верилир. Мәсәлән, Даниелла c адлы бир баҹы јығынҹагда шәрһ вермәји чох хошлајыр. О баша дүшүр ки, шәрһ вермәк ибадәтин бир һиссәсидир, бу јолла Мүгәддәс Китаб һәгигәтләри үрәјиндә даһа дәрин көк салыр вә  баҹы-гардашлары руһландырыр. Амма Даниелла бөјүк јығынҹаға кечәндә әввәлки гәдәр шәрһ верә билмирди. Бәзән исә бүтүн јығынҹаг боју бир дәфә дә олсун она сөз верилмирди. О дејир: «Чох дилхор олурдум. Елә һисс едирдим ки, санки мәни бөјүк бир шәрәфдән мәһрум едибләр. Бу һал дәфәләрлә тәкрарлананда адама елә ҝәлир ки, гардаш буну гәсдән едир».

10. Нә етсәк, шәрһ вермәк имканымыз даһа чох олар?

¹⁰ Даниелла баҹынын һиссләри сизә танышдыр? Еләдирсә, бәлкә дә, ағлыныздан кечир ки, даһа шәрһ вермәјәсиниз, отуруб садәҹә ҝөрүшә гулаг асасыныз. Амма белә етмәјин. Әксинә, шәрһ вермәјә ҹәһд един. Һәр ҝөрүшә бир нечә шәрһ һазырлајын. Белә етсәниз, әввәлдә сизә сөз верилмәсә дә, ҝөрүш боју һәлә дә шәрһ вермәк имканыныз олаҹаг. «Ҝөзәтчи гүлләси»нин тәлим нәшринә һазырлашанда һәр абзасын мәгаләнин әсас мөвзусу илә неҹә әлагәли олдуғу барәдә дүшүнүн. Онда мүзакирә боју шәрһ вермәк үчүн һәмишә фикриниз олаҹаг. Бундан әлавә, бәзи абзасларда дәрин тәлимләр мүзакирә олунур вә онлары изаһ етмәк даһа гәлиздир (1 Кор. 2:10). Һәмин абзаслара шәрһ һазырлаја биләрсиниз. Чүнки адәтән белә абзаслара әл галдыранларын сајы аз олур. Бәлкә дә, бүтүн бу мәсләһәтләрә әмәл етсәниз дә, артыг нечә ҝөрүшдүр ки, шәрһ верә билмәмисиниз. Бу заман нә етмәк олар? Ҝөрүшдән әввәл бәнди апараҹаг гардаша јахынлашыб һансы суала ҹаваб вермәк истәдијинизи дејә биләрсиниз.

11. Филиппилиләрә 2:4 ајәси бизи нәјә тәшвиг едир?

¹¹ Филиппилиләрә 2:4 ајәсини охујун. Һәвари Булус Аллаһдан илһам алараг мәсиһиләри тәшвиг етмишди ки, башгаларыны да фикирләшсинләр. Јығынҹаг ҝөрүшләри заманы бу мәсләһәтә неҹә әмәл едә биләрик? Бизим кими башгаларынын да шәрһ вермәк истәдијини унутмамалыјыг.

12. Јығынҹагда башгаларыны руһландырмағын бир јолу һансыдыр? (Һәмчинин шәклә бахын.)

¹² Ҝәлин белә бир нүмунә барәдә дүшүнәк. Достларынызла сөһбәт едәндә анҹаг сиз данышырсыныз, јохса имкан верирсиниз ки, онлар да данышсын? Тәбии ки, истәјәрдиниз  ки, онлар да сөһбәтә гошулсунлар. Ејнилә јығынҹагларда да истәјәрдик ки, даһа чох адам шәрһ версин. Әслиндә, баҹы-гардашлары руһландырмағын ән јахшы јолларындан бири онлара иманларыны ифадә етмәјә имкан вермәкдир (1 Кор. 10:24). Ҝәлин ҝөрәк буну неҹә едә биләрик.

13. Ҝөрүш заманы даһа чох адамын шәрһ вермәсинә неҹә имкан јарада биләрик?

¹³ Әввәла, һәмишә чалышын гыса шәрһ верәсиниз, онда башгаларына да шәрһ вермәјә вахт галаҹаг. Ағсаггаллар вә тәҹрүбәли тәблиғчиләр бу саһәдә нүмунә олмалыдырлар. Гыса шәрһ верәндә белә, чалышын чох фикрә тохунмајасыныз. Әҝәр абзасдакы бүтүн фикирләри вурғуласаныз, онда башгаларына демәјә сөз галмајаҹаг. Бу абзасда ики төвсијә верилди: чалышын шәрһләриниз гыса олсун вә чох фикрә тохунмајын. Әҝәр бу абзаса илк шәрһи сиз версәниз, бәлкә, бу ики мәгамдан јалныз бирини вурғулајасыныз?

14. Әлимизи нечә дәфә галдыраҹағымыза гәрар верәркән нәји нәзәрә алмалыјыг? (Һәмчинин шәклә бахын.)

¹⁴ Һәмчинин һикмәтли олун, нә гәдәр әл галдырдығыныза фикир верин. Әлинизи тез-тез галдырсаныз, ҝөрүшү апаран гардаш өзүнү мәҹбур биләҹәк ки, һәр дәфә сизә сөз версин. Онда сиз бир нечә дәфә шәрһ вердијиниз һалда, башгалары һеч шәрһ вермәјәҹәк. Нәтиҹәдә онлар руһдан дүшүб, әлләрини һеч галдырмајаҹаглар (Ваиз 3:7).

15. а) Ҝөрүшү апаран гардаш бизә сөз вермәсә, буна неҹә јанашмалыјыг? б) Ҝөрүшү апаран гардаша һәр кәси нәзәрә алмаға нә көмәк едә биләр? (« Ҝөрүшү апаранлара» адлы чәрчивәјә бахын.)

¹⁵ Ола билсин, мүзакирә заманы чох адам әл галдырдығы үчүн истәдијиниз гәдәр шәрһ верә билмәјәсиниз. Һәтта бәзән ола биләр ки, сизә һеч сөз верилмәсин. Бу, хош дејил. Амма чалышмалыјыг ки, һәмин гардашын бизимлә гәсд-гәрәзлији олдуғуну дүшүнмәјәк (Ваиз 7:9).

16. Шәрһ верәнләри неҹә руһландыра биләрик?

¹⁶ Әҝәр истәдијиниз гәдәр шәрһ верә  билмирсинизсә, бәлкә, башгаларынын шәрһләрини диггәтлә динләјәсиниз вә ҝөрүшдән сонра онлары шәрһләринә ҝөрә тәрифләјәсиниз? Сизин тәриф сөзләриниз баҹы-гардашлары вермәк истәдијиниз шәрһ гәдәр руһландыра биләр (Мәс. 10:21). Тәрифләмәк дә бир-биримизи руһландырмағын јолудур.

17. а) Валидејнләр ушагларына јашларына ујғун шәрһләр һазырламаға неҹә көмәк едә биләрләр? б) Видеоја әсасән, шәрһ һазырлајанда һансы дөрд аддымы атмаг лазымдыр? (Һашијәјә бахын.)

¹⁷ Јығынҹагларда бир-биримизи руһландырмағын башга һансы јолу вар? Әҝәр валидејнсинизсә, ушагларыныза јашларына ујғун шәрһләр һазырламаға көмәк един (Мәт. 21:16). Бәзән әр-арвад проблемләри вә ја әхлаг мәсәләләри кими ҹидди мөвзулар мүзакирә олунур. Амма бу заман да ушагларын шәрһ верә биләҹәји бир-ики абзас тапмаг олар. Һәмчинин ушагларыныза изаһ един ки, һәр әл галдыранда онлара сөз вериләҹәјини дүшүнмәсинләр. Онда онларын јеринә башгасына сөз вериләндә мәјус олмајаҹаглар (1 Тим. 6:18) d.

18. Шәрһ верәркән диггәти өзүмүзә чәкмәмәк үчүн нә едә биләрик? (Мәсәлләр 27:2).

¹⁸ Һәр биримиз өз шәрһләримизлә Јеһованы уҹалда вә диндашларымызы руһландыра  биләрик (Мәс. 25:11). Һәрдәнбир өз башымыза ҝәлмиш һадисәдән данышмаг олар. Амма еһтијатлы олмалыјыг ки, өзүмүз барәдә чох данышмајаг. (Мәсәлләр 27:2 ајәсини охујун; 2 Кор. 10:18.) Әксинә, чалышаг ки, шәрһләримиз әсас етибарилә Јеһова, Онун Кәламы вә халгы илә бағлы олсун (Вәһј 4:11). Дүздүр, әҝәр суалда өз фикримизи демәк тәләб олунурса, буну едә биләрик. Мәсәлән, мәгаләнин нөвбәти абзасына суал бу гәбилдәндир.

19. а) Јығынҹагда башгаларыны фикирләшмәјимиз һансы нәтиҹәләри ҝәтирәҹәк? (Ромалылара 1:11, 12). б) Шәрһ вермәклә бағлы сизин нә хошунуза ҝәлир?

¹⁹ Шәрһ вермәклә бағлы сәрт гајдалар јохдур, бунунла белә, һамымыз чалышмалыјыг ки, бир-биримизи руһландыраг. Ола билсин, бунун үчүн даһа чох шәрһ вермәјимиз лазым ҝәлсин. Јахуд әксинә, бу о демәкдир ки, нә гәдәр шәрһ вермәјимиздән асылы олмајараг, буна гане олаҹағыг вә башгаларынын да шәрһ вердијинә ҝөрә севинәҹәјик. Әҝәр јығынҹаг ҝөрүшләриндә башгаларыны фикирләшсәк, онда һамымыз бир-биримизи руһландыраҹағыг. (Ромалылара 1:11, 12 ајәләрини охујун.)