1. Исанын илк мөҹүзәси һагда данышын.

 ЕРАМЫЗЫН 29-ҹу илинин сонларыдыр. Иса хидмәтинә јениҹә башлајыб. О, анасы Мәрјәм вә шаҝирдләриндән бәзиләри Насирәнин шималында јерләшән Ганәјә тоја дәвәт олунуб. Бу аилә илә Мәрјәмин јахын мүнасибәти вар, она ҝөрә дә Мәрјәм тоја ҝәлән гонаглара гуллуг едир. Бирдән тојда проблем јараныр: шәраб гуртарыр. Бу аилә вә бәјлә ҝәлин һамынын јанында биабыр ола биләр b. Ола билсин, гонагларын сајы ҝөзләниләндән чох олуб. Мәрјәм тез оғлунун јанына ҝедиб дејир: «Шәраблары јохдур» (Јәһ. 2:1—3). Иса нә едир? Гејри-ади бир шеј: сују әла шәраба чевирир (Јәһ. 2:9, 10).

2, 3. а) Иса мөҹүзә ҝөстәрмәк баҹарығындан неҹә истифадә едирди? б) Исанын ҝөстәрдији мөҹүзәләри арашдырмағын һансы хејри вар?

² Иса хидмәт етдији илләр әрзиндә чохлу мөҹүзәләр ҝөстәрмишди c. Онун мөҹүзәләри он минләрлә инсана хејир ҝәтирмишди. Мәсәлән, ҝөтүрәк Исанын садәҹә ики мөҹүзәсини. Биринҹисиндә о, 5000 кишини, икинҹисиндә исә 4000 кишини дојуздурмушду. Гадынларла ушаглары да сајсаг, үмумиликдә  бу ики мөҹүзә заманы 27 000-дән чох инсан јејиб дојмушду (Мәт. 14:15—21; 15:32—38). Һәлә үстәлик һәмин вахт Иса чохлу хәстәни дә сағалтмышды (Мәт. 14:14; 15:30, 31). Сөзсүз, һәмин инсанлар бу мөҹүзәләри ҝөрүб валеһ олмушдулар.

³ Исанын мөҹүзәләриндән чох шеј өјрәнә биләрик. Бу мәгаләдә онун ҝөстәрдији бәзи мөҹүзәләри арашдыраҹағыг вә өјрәндикләримиз иманымызы артыраҹаг. Һәмчинин өјрәнәҹәјик ки, мөҹүзәләр едәркән Исанын ҝөстәрдији тәвазөкарлыгдан вә шәфгәтдән неҹә өрнәк ҝөтүрә биләрик.

4. Исанын мөҹүзәләриндән өјрәндијимиз дәрсләр кимә иманымызы артырыр?

⁴ Исанын мөҹүзәләриндән тәк онун барәдә јох, һәм дә Јеһова барәдә чох шеј өјрәнирик. Ахы онун бүтүн мөҹүзәләринин мәнбәји Јеһова иди! Һәвариләрин ишләри 10:38 ајәсиндә дејилир ки, Аллаһ «Исаны мүгәддәс руһла вә гүввә илә мәсһ етди», о, «өлкәни ҝәзиб-долашараг инсанлара јахшылыг етди», «Иблисин әзијјәт вердији адамлары сағалтды… Аллаһ бу адамла иди». Һәмчинин унутмајын ки, Исанын дедији вә етдији һәр шеј, о ҹүмләдән ҝөстәрдији мөҹүзәләр Атасынын дүшүнҹәсини вә һиссләрини әкс етдирирди (Јәһ. 14:9). Ҝәлин ҝөрәк Исанын мөҹүзәләри һансы үч саһәдә иманымызы мөһкәмләндирир.

5. Иса нәјә ҝөрә мөҹүзәләр ҝөстәрирди? (Мәтта 20:30—34).

⁵ Биринҹиси, Иса вә Атасы бизи чох севир. Иса Мәсиһин инсанлары севдији нәдән ҝөрүнүр? Мәсәлән, о, јер үзүндә оларкән инсанларын әзабына сон гојмаг үчүн мөҹүзәләр ҝөстәрирди. Бир дәфә ики кор киши Исадан хаһиш етмишди ки, онлары сағалтсын. (Мәтта 20:30—34 ајәләрини охујун.) Исанын «бу адамлара јазығы ҝәлди» вә онлары сағалтды. «Јазығы ҝәлмәк» кими тәрҹүмә олунан јунан феили дахилдән ҝәлән дәрин шәфгәт һиссини билдирир. Бу ҹүр шәфгәт һисси мәһәббәтдән гајнагланыр. Бу һисс Исаны һәмчинин тәшвиг етмишди ки, аҹлары дојурсун вә ҹүзамлы адамы сағалтсын (Мәт. 15:32; Марк 1:41). Әмин ола биләрик ки, рәһмли Аллаһымыз Јеһова вә Оғлу бизи севир вә әзабларымызы ҝөрмәк онлара гәлб ағрысы верир (Лука 1:78; 1 Бут. 5:7). Онлар бәшәријјәтә зүлм верән бүтүн бәлалара сон гојмағы һәсрәтлә ҝөзләјирләр!

6. Јеһова Исаја һансы сәлаһијјәти вериб?

⁶ Икинҹиси, Јеһова Исаја бәшәријјәтин бүтүн проблемләрини һәлл етмәк ихтијары вериб. Мөҹүзәләри васитәсилә Иса ҝөстәрмишди ки, гаршысында аҹиз олдуғумуз проблемләри арадан галдырмаға гадирдир. Мәсәлән, о бизи бәшәријјәтин проблемләринин көкүндә дуран ҝүнаһдан вә онун нәтиҹәси олан хәстәлик вә өлүмдән гуртармаг игтидарындадыр (Мәт. 9:1—6; Ром. 5:12, 18, 19). Ҝөстәрдији мөҹүзәләр сүбут едир ки, о, «һәр ҹүр» хәстәни сағалда билир, һәтта өлүләри дирилдә билир (Мәт. 4:23; Јәһ. 11:43, 44). Һәмчинин Исанын шиддәтли фыртынаны рам етмәк вә инсанлары шәр руһи гүввәләрдән азад етмәк сәлаһијјәти вар (Марк 4:37—39; Лука 8:2). Јахшы ки, Јеһова Исаја бу гәдәр ихтијар вериб!

7, 8. а) Исанын мөҹүзәләри сизи нәјә әмин едир? б) Сиз ҝәләҹәкдә һансы вәдин ҝерчәкләшмәсини ҝөзләјирсиниз?

⁷ Үчүнҹүсү, әмин ола биләрик ки, Аллаһын Падшаһлығынын һакимијјәти алтында ҝөзәл  немәтләр алаҹағыг. Исанын јер үзүндә ҝөстәрдији мөҹүзәләрдән өјрәнирик ки, о, Аллаһын Падшаһлығынын Падшаһы кими тезликлә бундан да бөјүк ишләр ҝөрәҹәк. О нәләр едәҹәк? Биз там сағлам олаҹағыг, чүнки Иса бүтүн хәстәликләрә, әлиллијә сон гојаҹаг (Әшј. 33:24; 35:5, 6; Вәһј 21:3, 4). Һеч вахт аҹлыг нәдир билмәјәҹәјик, тәбии фәлакәтләрин гурбаны олмајаҹағыг (Әшј. 25:6; Марк 4:41). Үстәлик, гәбирләрдә олан әзизләримизә јенидән говушаҹағыг (Јәһ. 5:28, 29). Бәс сиз ҝәләҹәкдә һансы вәдин ҝерчәкләшмәсини ҝөзләјирсиниз?

⁸ Исанын ҝөстәрдији мөҹүзәләрдән онун ики хүсусијјәти — тәвазөкарлығы вә шәфгәти ајдын ҝөрүнүр. Биз дә өзүмүздә бу хүсусијјәтләри јетишдирмәлијик. Ҝәлин Исанын ики мөҹүзәсини нәзәрдән кечирәк. Елә башлајаг Ганәдәки тојдан.

9. Иса тојда нә етмишди? (Јәһја 2:6—10).

⁹ Јәһја 2:6—10 ајәләрини охујун. Тојда шәраб гуртаранда Иса нәсә етмәјә борҹлу иди? Хејр. Чүнки һеч бир јердә пејғәмбәрлик олунмамышды ки, Мәсиһ сују шәраба чевирәҹәк. Бәс сизин тојунузда охшар вәзијјәт јашансајды, мәсәлән, нәсә гуртарсајды, өзүнүзү неҹә һисс едәрдиниз? Јәгин ки, хәҹаләт чәкәрдиниз. Елә Исанын да бу аиләјә јазығы ҝәлди, онларын, әсас да бәјлә ҝәлинин хәҹаләт чәкмәсини истәмәди. Буна ҝөрә дә о, әввәлдә  гејд етдијимиз мөҹүзәни ҝөстәрди. Һарадаса 390 литрлик сују әла шәраба чевирди. Бәс нәјә ҝөрә бу гәдәр чох? Онун бу сәхавәти сајәсиндә аилә тојдан сонра галан шәрабы ја өзләри истифадә едә биләрди, ја да сатыб бәјлә ҝәлинә көмәк едә биләрди. Бир дүшүнүн, бәјлә ҝәлин һәмин вахт һансы һиссләри кечирирдиләр!

10. Јәһја 2-ҹи фәсилдә һансы мараглы мәгамлар гејд олунуб? (Һәмчинин шәклә бахын.)

¹⁰ Бу һадисәдә бәзи мараглы мәгамлар вар. Иса күпләри су илә өзү долдурмушду? Хејр. О, буну хидмәтчиләрә тапшырмышды. Чүнки диггәти өзүнә чәкмәк истәмирди (Јәһ. 2:6, 7). Бәс сују шәраба чевирәндән сонра, Иса шәрабы сәрпајыја өзү апарды? Хејр. Буну да хидмәтчиләрә тапшырды (Јәһ. 2:8). О, шәрабла долу гәдәһи әлинә алыб гонагларын гаршысында «бахын, неҹә әла шәраб дүзәлтмишәм» демәди.

11. Исанын мөҹүзәсиндән нә өјрәнирик?

¹¹ Исанын бу мөҹүзәсиндән нә өјрәнирик? Онун тәвазөкар олдуғуну. Иса ҝөстәрдији мөҹүзә илә өјүнмәди. Үмумијјәтлә, о һеч вахт етдији шејләрлә өјүнмүрдү. Әксинә, Иса тәвазөкар иди, һәмишә вурғулајырды ки, етдији һәр шејә ҝөрә Атасына борҹлудур (Јәһ. 5:19, 30; 8:28). Биз дә Исадан нүмунә ҝөтүрәрәк тәвазөкар олсаг, етдијимиз шејләрлә өјүнмәјәҹәјик. Ҝәлин Јеһоваја хидмәтдә нә едириксә едәк, өзүмүзлә јох, гуллуг етдијимиз ҝөзәл Аллаһымызла өјүнәк (Әрм. 9:23, 24). Һәмишә Јеһованы уҹалдаг. Ахы Онун көмәји олмадан биз һеч нә едә билмәрик! (1 Кор. 1:26—31).

12. Башга һансы саһәдә Иса кими тәвазөкар ола биләрик? Нүмунә чәкин.

¹² Башга һансы саһәдә Иса кими тәвазөкар ола биләрик? Ҝәлин белә бир сәһнәни тәсәввүр едәк. Бир ағсаггал ҝәнҹ јығынҹаг хидмәтчисинә илк ачыг нитгини һазырламаға көмәк едир, өзү дә бунун үчүн хејли вахт ајырыр. Онун сајәсиндә ҝәнҹ гардаш руһландырыҹы нитг сөјләјир вә буну һамы бәјәнир. Јығынҹагдан сонра бир нәфәр һәмин ағсаггала јахынлашыб дејир: «Гардаш әла чыхыш етди». Бу вәзијјәтдә ағсаггал неҹә давранаҹаг? О: «Һә, јахшы иди. Она көмәк етмәк үчүн чох вахт ајырмышам»,— дејәҹәк? Јохса, әксинә, тәвазөкарлыгла белә дејәҹәк: «Әла нитг иди. Она афәрин!» Әҝәр биз тәвазөкар олсаг, башгалары үчүн нәсә јахшы бир шеј едәндә буну инсанлара бәјан етмәјә лүзум ҝөрмәјәҹәјик. Јеһованын етдикләримизи ҝөрмәси вә гијмәтләндирмәси бизим үчүн кифајәт олаҹаг. (Мәтта 6:2—4 ајәләри илә әлагәләндирин; Ибр. 13:16.) Јеһова ҝөрәндә ки, Иса кими тәвазөкарыг, бизимлә гүрур дујур (1 Бут. 5:6).

13. Иса Наин шәһәринин јахынлығында нә ҝөрүр вә нә едир? (Лука 7:11—15).

¹³ Лука 7:11—15 ајәләрини охујун. Ҝәлин Исанын хидмәтинә башлајандан тәхминән ики ил сонра ҝөстәрдији бир мөҹүзәдән данышаг. О, Ҹәлиләнин Наин шәһәринә ҝәлир. Бу шәһәр Шунамдан елә дә узаг дејил. Тәхминән 900 ил өнҹә Әлјәсә пејғәмбәр Шунамда бир гадынын оғлуну дирилтмишди (2 Пад. 4:32—37). Иса шәһәр дарвазасына јахынлашанда ҝөрүр ки, орадан бир ҹәназә чыхарырлар. Бир дул гадынын оғлу өлмүшдү. Үстәлик, бу онун јеҝанә оғлу иди. Амма гадын тәк дејилди, онун јанында шәһәр ҹамаатындан чохлу адам вар иди. Иса онлары дајандырыб ағласығмаз бир шеј едир — бу јаслы ананын оғлуну дирилдир. Мүждәләрдә Исанын  өлүләри дирилтдији үч һадисә јазылыб. Бу онлардан биринҹиси иди.

14. Лука 7-ҹи фәсилдә һансы мараглы мәгамлар гејд олунуб? (Һәмчинин шәклә бахын.)

¹⁴ Ҝәлин бу һадисәдәки бәзи мараглы мәгамлара фикир верәк. Диггәт јетирин, Иса јаслы ананы ҝөрдү вә сонра «она јазығы ҝәлди» (Лука 7:13). Демәли, о ҝөрдү ки, јаслы гадын ағлаја-ағлаја мафәнин өнүндә ҝедир вә буну ҝөрәндә онун һалына аҹыды. Амма Иса садәҹә ананын јанындан өтүб кечмәди. Һәм дә шәфгәт ҝөстәрди. Һәмин ана илә данышды вә үрәк-дирәк вериб деди: «Ағлама». Сонра исә бир шеј етди: оғланы дирилдиб «анасына верди» (Лука 7:14, 15).

15. Исанын ҝөстәрдији мөҹүзәдән нә өјрәнирик?

¹⁵ Исанын ҝөстәрдији бу мөҹүзәдән нә өјрәнирик? Өјрәнирик ки, јаслы инсанлара шәфгәт ҝөстәрмәлијик. Тәбии ки, биз Иса кими өлүләри дирилдә билмәрик, амма мүшаһидәчи олуб, үрәјимиздә јаслы инсана гаршы шәфгәт ојада биләрик. Даһа сонра шәфгәти әмәлдә ҝөстәриб, һансыса сөзүмүзлә она тәсәлли верә биләрик вә ја башга ҹүр көмәк едә биләрик d (Мәс. 17:17; 2 Кор. 1:3, 4; 1 Бут. 3:8). Һәтта садә бир сөзүмүзүн вә ја һәрәкәтимизин инсана бөјүк көмәји дәјә биләр.

16. Сәһнәләшдирилмиш шәкилдә тәзәликҹә өвладыны итирмиш ананын һадисәсиндән нә өјрәнирсиниз?

¹⁶ Бир һадисәјә нәзәр салаг. Бир нечә ил бундан өнҹә ибадәт евиндә нәғмә охунан заман бир баҹы фикир верир ки, бир ана ағлајыр. Нәғмә дирилмә үмиди барәдә иди. Һәмин ананын тәзәликҹә гызы өлмүшдү. Она ҝөрә дә баҹы тез онун јанына ҝедир, ону гуҹаглајыр вә нәғмәнин галаныны онунла бирҝә охујур. Ана даһа сонра белә демишди: «Үрәјимдә баҹы-гардашлара севҝим ашыб-дашды. Биз көмәји мәһз бурада — ибадәт евиндә ала биләрик». О һәмин ҝүн јығынҹаға ҝәлдијинә ҝөрә чох севинирди. Јеһова пәришан инсанлара шәфгәт ҝөстәрмәјимизи, һәтта онлар  үчүн етдијимиз ән хырда шејләри белә ҝөрүр вә гијмәтләндирир (Зәб. 34:18).

17. Бу мәгаләдән нә өјрәндик?

¹⁷ Мүждәләрдән Исанын мөҹүзәләри барәдә арашдырсаг, иманымызы мөһкәмләндирән чох шеј өјрәнә биләрик. Бу мөҹүзәләрдән ҝөрүрүк ки, Јеһова вә Иса бизи чох севир, Иса бүтүн бәшәријјәтин проблемләрини һәлл етмәјә гадирдир вә тезликлә Падшаһлығын һакимијјәти алтында Аллаһын вәд етдији немәтләри алаҹағыг. Бу мөҹүзәләри арашдыраркән јахшы олар ки, Исанын хүсусијјәтләрини неҹә әкс етдирә биләҹәјимиз һагда дүшүнәк. Бәлкә, фәрди мүталиәниздә вә ја аиләви ибадәт заманы Исанын диҝәр мөҹүзәләрини дә нәзәрдән кечирәсиниз? Ҝөрүн бу мөҹүзәләрдән нә өјрәнирсиниз, сонра исә өјрәндикләринизи башгалары илә бөлүшүн. Белә етсәниз, инсанларла мараглы сөһбәтләриниз алынаҹаг (Ром. 1:11, 12).

18. Нөвбәти мәгаләдә нә һагда данышаҹағыг?

¹⁸ Хидмәтинин сонуна јахын Иса даһа бир нәфәри дирилтди. Бу, Мүждәләрдә јазылмыш үч дирилмә һадисәсиндән сонунҹусу иди. Амма һәмин мөҹүзә диҝәрләриндән фәргләнирди. Бу дәфә Иса дөрд ҝүнүн өлүсү олан бир јахын достуну дирилтмишди. Онун бу мөҹүзәсиндән нә өјрәнирик? Дирилмә үмидинә иманымызы неҹә мөһкәмләндирә биләрик? Нөвбәти мәгаләдә бу суаллара ҹаваб тапаҹағыг.